Jeremias
29 Nebukadnezaran jea lokank Jeruzalemantlean Babilonant koidi korun vhelʼle tea soglea lokank, tanchea modem urlolea vhoddilank, iadnikank ani provadeank, Jeremias provadean Jeruzalemantlean ek chitt dhaddli. 2 Jekonia Raza, razachi avoi, dorbarantlo odhikari, Juda ani Jeruzalemache kunvor, kola aslole kamdar ani dhatuchem kam korpachi kola aslole kamdar,* Jeruzalemantlean koident gelea uprant tannem hi chitt dhaddloli. 3 Tannem hi chitt Shafanacho put Elasa, ani Hilkiacho put Gemariachea hatan diun dhaddloli, zankam Judacho Raza Zedekian, Babilonacho Raza Nebukadnezara koddem dhaddlole. Tea chittint oxem boroilʼlem:
4 “Izraelacho Dev, fouzancho Dev Jehova, apnnem Jeruzalemantlean Babilonant koidi mhunn dhaddlolea lokank oxem mhunntta, 5 ‘Tumi ghoram bandat ani tantunt ravat. Molle laiat ani tanchim follam khaiat. 6 Kazar zaiat, ani putank ani dhuvank zolmak haddat. Tumchea bhurgeankui kazar korat, oxem tim pasun putank ani dhuvank zolmak haddttolim. Thoim tumcho ankddo vaddot vochom, to denvcho nhoi. 7 Ani hanvem jea xarant tumkam koidi mhunn dhaddleat, tea xarachea xanti pasot vavr korat. Tea xara pasot Jehova lagim magnnem korat, karonn thoim xanti aslear tumkam-i xanti astoli. 8 Karonn Izraelacho Dev, fouzancho Dev Jehova oxem mhunntta: “Tumchea modem aslolea provadeank ani fuddar parkhupeank tumkam fosounk dinakat. Te jim sopnam polloun tumkam sangtat, tim aikonakat. 9 Karonn Jehova mhunntta, ‘Te mhojea nanvan khotteo bhasaunneo kortat. Hanvem tankam dhaddunk nant.’”’”
10 “Karonn Jehova oxem mhunntta, ‘Tumi Babilonant 70 vorsam ravlea uprant hanv tumcher dhean ditolom, ani tumkam hea zagear porot haddttolom mhunn hanvem dilʼli bhas hanv purnn kortolom.’
11 “Jehova mhunntta, ‘Tumchea vixim hanv kitem chintʼtam tem hanv bore bhaxen zannam. Hanv tumcher odruxtt haddunk nhoi, punn tumkam xanti diunk chintʼtam, tumkam ek boro fuddar ani bhorvonso diunk chintʼtam. 12 Tumi mhaka ulo martole ani mhojea lagim ieun magnnem kortole, ani hanv tumchem aikotolom.’
13 “‘Tumi mhaka sodhtole ani hanv tumkam mellttolom, karonn tumi mhaka tumchea purnn kallzan sodhtole. 14 Ani hanv tumkam mellttolom,’ oxem Jehova mhunntta. ‘Hanvem tumkam jea zageamnim ani raxttramnim ximpddaileant ani tumi zoim koidi asat, thoim thaun hanv tumkam sogleank ektthaim kortolom ani tea zagear porot haddttolom, jea zagear thaun hanvem tumkam koidi korun dhaddlolim,’ oxem Jehova mhunntta.
15 “Punn tumi mhunnttat, ‘Jehovan amchea pasot Babilonant provadi upzoileat.’
16 “Davidachea xinvasonar boslolea razak ani hea xarant ravtolea soglea lokank, mhunnche tumchea sangata koident vochonk naslolea tumchea bhavank, Jehova oxem mhunntta, 17 ‘Fouzancho Dev Jehova oxem mhunntta: “Hanv tanchea modem tolvar, bhuk ani pidda* dhaddttam. Hanv tankam kuslolea* anjiram sarkim kortolom, jim khaunk zainant titlim kusleant.”’
18 “‘Hanv tolvar, bhuk ani pidda gheun tanchea fattik lagtolom. Ani hanv tanchi oxi poristhiti kortolom, ki prithume voilim soglim rajeam samkinch thottaktolim, xirap ditana tanchem udharonn ditolim, tankam polloun ojap zatolim, fivnneo* ghalun tanchim fokannam kortolim ani jea raxttramnim hanv tankam ximpddaitolom, thoim tancho opman zatolo, 19 karonn tannim mhozo sondex aikonk na, zo hanvem tanchea koddem mhojea sevokam koddlean, mhunnche, mhojea provadea koddlean porot-porot diun dhaddlolo,’ oxem Jehova mhunntta.
“‘Punn tumi mhojem aikonk na,’ oxem Jehova mhunntta.
20 “Taka lagon, hanvem Jeruzalema thaun Babilonant koidi korun dhaddleat tea soglea lokamno, hanv Jehova kitem mhunnttam tem aikat. 21 Mhojea nanvan khotteo bhasaunneo kortolea Kolaiacho put Ahab ani Maseiacho put Zedekia vixim, Izraelacho Dev, fouzancho Dev Jehova oxem mhunntta, ‘Hanv tankam Babilonacho Raza Nebukadnezarachea* hatant ditam. To tankam tumchea dolleam mukhar marun uddoitolo. 22 Ani tanchea sangata jem ghoddttolem tachem udharonn diun Babilonant aslole Judache sogle koidi xirap ditana oxem mhunnttole: “Jehovan tuka Zedekia ani Ahaba bhaxen korum, zankam Babilonachea razan ujeant bhazle!” 23 Karonn tannim Izraelant khub lojechim kamam keleant, tanchea xezareanchea bailam sangata pordvar kela, ani mhojea nanvan fotti sangleat, jeo sangonk hanvem tankam adnea diunk nasli.
“‘Jehova oxem mhunntta, “Hanv hem soglem zannam, ani hanv hea vostuncho govai zaun asam.”’”
24 “Ani Nehelamantlea Shemaiak tum sang, 25 ‘Izraelacho Dev, fouzancho Dev Jehova oxem mhunntta: “Tunvem tujea nanvan Jeruzalemantlea soglea lokank, Maseiacho put iadnik Zefaniak ani soglea iadnikank chitti dhaddleo ani tankam mhunnttlem, 26 ‘Jehovan Jehoiada iadnika bodlek, tuka, Zefaniak iadnik kela. Tunvem Jehovachea ghorachi* dekhrekh korunk, ani zo konn provadi zaunchem dhong korta, toslea pixeache hat-paim ani tokli khoddeant* ghalunk, hanvem tuka odhikar dila. 27 Toxem zalear, tumchea mukhar provadi zaunchem dhong korta tea Anathotantlea Jeremiasak tunvem khast kiteak lavunk na? 28 Tannem Babilonant, amkam pasun oxi chitt boroun dhaddli: “Tumi zaito vell koidi mhunn urtole! Taka lagon, tumi ghoram bandat ani tantunt ravat. Molle laiat ani tanchim follam khaiat,—”’”’”
29 Zefania iadnikan, Jeremias provadea mukhar hi chitt vachun dakhoili tednam, 30 Jehovacho ho sondex Jeremiasak mellʼllo: 31 “Koident aslolea soglea lokank ho sondex dhadd, ‘Nehelamantlea Shemaia vixim Jehova oso mhunntta: “Hanvem Shemaiak dhaddunk naslo, tori astana tannem tumkam bhasaunni sangli ani tumkam fottincher visvas dovrunk lailo. 32 Taka lagon Jehova oxem mhunntta, ‘Hanv Nehelamantlea Shemaiak ani tachea sonstik khast diunchom asam. Tachea sonstintlo ekui munis hea lokam modem jivo urchona. Hanv mhojea lokam pasot jeo boreo vostu kortolom, teo to pollounk pavchona. Karonn tannem lokank Jehova add vochonk uksaileat,’ oxem Jehova mhunntta.”’”