Vilap
א [Aleph]
3 Hanv toch munis, zannem tachea krodhachea danddeak lagon koxtt-dukh soslam.
2 Tannem mhaka dhanvddaila, ani to mhaka uzvaddant nhoi punn kallkhant cholonk laita.
3 Khorem mhunnttlear, to dis-bhor porot-porot mhojer hat ubarta.
ב [Beth]
4 Tannem mhojem mas ani kat zhoroun uddoilea,
Tannem mhojim haddam moddun uddoileant.
5 Tannem mhaka gherav ghatla, koddu vikan ani trasamnim tannem mhaka charui vatten veddo ghatla.
6 Khub poilim moron gelʼlea munxam bhaxen, tannem mhojer kallokh aslolea zageamnim bosonk dobhav ghatla.
ג [Gimel]
7 Hanv pollon vochona zaunk, tannem mhojea charui vatten vontteo ubeo keleat,
Tannem mhaka tambeachea zodd sanklleamnim bandun dovorla.
8 Hanv roddon modoti pasot ulo martam tednam, to mhojem magnnem nakarta.*
9 Tannem taslole fator ghalun mhojeo vatto addaileat,
Tannem mhoje roste vankdde-tinkdde keleat.
ד [Daleth]
10 Eka vanxela sarko, lipon boslolea eka xinva sarko, to mhojer okosmat akromonn korunk ravla.
11 Tannem mhaka rostea voilean kuxik voddun vhela ani mhoje kuddkean-kuddke keleat.*
Tannem mhaka padd korun soddla.
12 Tannem aplo dhonu toiar kela,* ani mhojer aplo bann tannun dovorla.
ה [He]
13 Aplea begantle bann* kaddun tannem mhojer marle ani te mhojea kiddnent rigleat.
14 Soglea desantle lok mhojim fokannam kortat, mhojea vixim git toiar korun dis-bhor gaitat.
15 Tannem mhaka koddu vostumnim bhorla ani koddu zhaddacho* bhorpur ros pivoila.
ו [Waw]
16 To xenkreamnim* mhoje dant moddtta,
Mhaka gobrant lollonk laita.
17 Tunvem mhoji xanti kaddun ghetlea, sukh* kitem tem hanv visorlam.
18 Taka lagon hanv mhunnttam: “Mhoji mhoima kabar zalea, Jehovacher aslolo mhozo bhorvonso nanch zala.”
ז [Zayin]
19 Mhojea koxtt-dukhacho ani hanv ghor-dar na zaun poddlam tacho ugddas kor, hanv koddu zhadd* ani vik khatam tacho ugddas kor.
20 Tum khorench ugddas kortolo ani sokol bagon mhojea lagim ietolo.
21 Hem hanv mhojea kallzant ugddasak haddttam, taka lagon hanv pasiensan tuji vatt polloitolom.
ח [Heth]
22 Jehovachea visvaxi mogak lagonuch amcho nas zaunk na,
Karonn tachi kakut kednanch kabar zaina.
23 Ti dor sokallim novi zata, tum sodanch visvaxi.
24 Hanvem mhunnttlem, “Jehova mhozo vantto, taka lagon hanv pasiensan tachi vatt polloit ravtolom.”
ט [Teth]
25 Zo munis Jehovacher bhorvonso dovorta, taka sodhit ravta, tea munxak to boreponn dakhoita.
26 Xant* ravon taronn mellonk Jehovachi vatt polloilear borem.
27 Eka munxan tornattponnar zum ubarlear borem.
י [Yod]
28 Dev tacher zum dovorta tednam tannem ekloch vogi boson ravchem.
29 Tannem aplem tondd dhulʼlint ghalchem, ghoddie taka azun pasun bhorvonso asot.
30 Tannem thapott martoleak aplo polo dakhouncho, jitle opman sosunk zatat te sosche.
כ [Kaph]
31 Karonn Jehova amkam sasnak soddun diunchona.
32 Tannem amkam dukh dilam tem khorem, punn tachea bhorpur visvaxi mogak lagon to amchi kakut pasun kortolo.
33 Karonn munxachea putank koxtt-dukh diunk vo tancher tras haddunk taka avoddna.
ל [Lamed]
34 Prithume voilea soglea koideank paim-am ponda maddovop,
35 Bhov Vortea Deva mukhar eka munxak neai diunk nakarop,
36 Eka munxak tachea kesint neai mellona toxem korop
—Osleo vostu Jehovak manvonant.
מ [Mem]
37 Jehovan adnea dilea bogor konn ulounk xokta ani tem ghoddoun haddunk xokta?
38 Bhov Vortea Devachea tonddantlean
Boreo ani vaitt vostu sangata bhair soronant.
39 Eka munxan aplea patkachea porinnama vixim kiteak gunngunnchem?
נ [Nun]
40 Ami amcheo vatto topasum-ia ani teo bariksannen parkhum-ia, ani Jehova lagim porot ieum-ia.
41 Ami amche hat ubarun, sorginchea Deva lagim kallzantlean oxem magom-ia:
42 “Ami oprad kela ani tujea add geleat, ani tunvem amkam bhogsunk nant.
ס [Samekh]
43 Ami tujea lagim iena zaunk, tunvem ragan bhoron amchi vatt addailea.
Tum amchea fattik laglo ani doia-maia dakhoinastana tunvem amkam marun uddoilim.
44 Amchim magnnim tujea meren pavona zaunk, tunvem tujea lagim ieunchi vatt eka kupan addailea.
45 Veg-vegllea desantlea lokam modem tunvem amkam chikol ani kochrea sarkim korun soddleant.”
פ [Pe]
46 Amche sogle dusman amchea add aplem tondd ugoddttat.
47 Akant ani odruxtt, nas ani nisontton, hench amcher ailam.
48 Mhojea lokanchea dhuvecho nas polloun, mhojea dolleantlean dukancheo zhori vhanvtat.
ע [Ayin]
49 Mhojea dolleantlim dukam thambonant, tim vhanvot ravtat.
50 Jea meren Jehova sorgar thaun sokol polloina, tea meren tim vhanvot ravtat.
51 Mhojea xarantlea soglea dhuvam sangata jem ghoddlem, taka lagon mhojea dolleamnim mhaka khub dukh dilam.
צ [Tsade]
52 Mhojea dusmanamnim kainch karonn nastana, hanv ek suknnem zalʼlea bhaxen mhozo xikar kela.
53 Tannim mhaka fonddant ghalun sasnak vogi kela, te mhojer fator marit ravle.
54 Udok mhojea tokle voir pavlem, ani hanvem mhunnttlem: “Atam hanv kabar!”
ק [Qoph]
55 Jehova Deva, fonddachea kholaie thaun hanvem tujem nanv gheun tuka ulo marlo.
56 Mhozo tallo aik, modoti pasot ani suttke pasot hanv ulo martam tednam tuje kan bond korinaka.
57 Jea disa hanvem tuka ulo marlo, tea disa tum mhojea lagim ailo. Tunvem mhunnttlem: “Bhienaka.”
ר [Resh]
58 Jehova Deva, tum mhojea vatten uloilo, mhozo jiv tunvem soddoilo.
59 Jehova Deva, mhojea sangata zo onʼneai zala to tunvem polloila, upkar korun mhaka neai di.
60 Tannim mhozo koso sudd ghetla ani mhojea add koxeo manddnneo keleat, teo sogleo tunvem polloileat.
ש [Sin] vo [Shin]
61 Jehova Deva, te martat te tomnne tunvem aikoleat, mhojea add tannim kelʼleo sogleo manddnneo tunvem aikoleat.
62 Mhoje virodhi dis-bhor mhojea add uloitat ani kuchkuchtat,* tem tum zannam.
63 Tankam polloi, te boslole asum vo ube asum, mhojea vixim gitam gaun te mhojeo moskoreo kortat!
ת [Taw]
64 Jehova Deva, tum tankam tanchea korneam pormonnem farikponn ditolo.
65 Tum tankam xirap diun tanchim kallzam nibor kortolo.
66 Jehova Deva, tum ragan bhoron tanchea fattik lagtolo ani mollba pondchean tankam pusun kaddttolo.