Jeremias

35 Josiacho put, Judacho raza Jehoiakimachea disamnim, Jehovacho ho sondex Jeremiasak mellʼllo: 2 “Rekabitanchea ghorannea lagim voch ani tanchea lagim uloi. Tankam Jehovachea ghorachea* eka jevpachea rumant gheun ieo. Uprant tankam pieunk drakxancho soro di.”

3 Taka lagon, hanv Jeremiasacho put ani Habaziniacho natu Jazaniak, tachea bhavank, tachea soglea putank ani Rekabitanchea akʼkhea ghoranneak, 4 Jehovachea ghorant gheun gelom. Thoim hanv tankam Igdaliacho put, khorea Devacho sevok Hananachea putanchea jevpachea rumant gheun gelom. Ho rum kunvor jevtat tea ruma lagim aslo, ani kunvrancho rum, darar asta tea rakhonndarachea, mhunnche, Shalumacho put Maseiachea jevpachea ruma voir aslo. 5 Magir hanvem drakxanchea sorean bhorlolim kopam ani pele,* Rekabitanchea ghoranneantlea munxam mukhar dovorle ani tankam mhunnttlem: “Drakxancho soro pieiat.”

6 Punn tannim mhunnttlem: “Na, ami drakxancho soro pieunchenant. Karonn amcho purvoz Jehonadaban* zo Rekabacho put aslo, tannem amkam oxi adnea dilʼli, ‘Tumi, toxench tumchea putamnim drakxancho soro kednanch pieuncho nhoi. 7 Ani tumi hanga ghor bandchem nhoi, bim vompchem nhoi, drakxanche molle launche nhoi, vo te tumchea tabeant gheunche nhoi. Tachea bodlek tumi sodanch tombuninch ravchem, jea vorvim tumi pordexi mhunn ravtat tea desant zaito kall jieunk pavtole.’ 8 Taka lagon, ami amcho purvoz Rekabacho put Jehonadabachi adnea sodanch pallʼllea—ami, amcheo bailo, amche put ani amcheo dhuvo drakxancho soro kednanch pienant. 9 Ami ravonk ghoram bandinant, toxench amchea lagim drakxanche molle vo xetam vo bim na. 10 Ami tombuninch ravtat ani amcho purvoz Jehonadaban* dilʼleo sogleo adnea ami pallttat. 11 Punn Babilonacho Raza Nebukadnezaran* hea desacher akromonn kelem tednam ami mhunnttlem, ‘Ieiat, ami Jeruzalemant vochom-ia. Oxem kelʼlean, Kaldeikaranchea ani Siriechea fouje thaun ami salvar zatole.’ Ani heach karonnak lagon ami atam Jeruzalemant ravtat.”

12 Jehovacho ho sondex Jeremiasak mellʼllo: 13 “Izraelacho Dev, fouzancho Dev Jehova oxem mhunntta, ‘Voch, ani Judachea lokank ani Jeruzalemant ravtoleank sang: Jehova mhunntta, “Mhojeo adnea pallunk hanv tumkam urba di-it naslom kai? 14 Rekabacho put Jehonadaban aplea sonstik, tannim drakxancho soro pieuncho nhoi mhunn ji adnea diloli, ti te aiz poriant pallttat ani drakxancho soro pienant. Hea toren, tannim tanchea purvozachi adnea pallʼlli. Punn hanv tor porot-porot tumchea lagim uloilom, tori astana tumi mhojem aikonk na. 15 Hanv mhojea soglea sevokank, mhojea provadeank tumchea lagim porot-porot dhaddit ravlom ani te tumkam sangot ravle, ‘Upkar korun, tumi tumcheo vaitt vatto soddun porot ieiat ani sarkem tem korat! Dusrea devam fattlean vochonakat, tanchi seva korinakat. Tednam hanvem tumkam ani tumchea purvozank dilʼlea desant tumi ravonk pavtole.’ Punn tumi mhojem aikonk na vo mhaka kan diunk na. 16 Rekabacho put, Jehonadabachea sonstin, tanchea purvozan tankam dilʼli adnea pallʼlli. Punn hea lokamnim mhojem aikonk na.”’”

17 “Taka lagon, Izraelacho Dev, fouzancho Dev Jehova oxem mhunntta: ‘Hanv Judacher ani Jeruzalemant ravtolea soglea lokancher tem odruxtt haddunk voitam, zachea vixim hanvem tankam xittkaunni dilʼli. Karonn hanv tanchea lagim uloilom, punn tannim aikonk na. Hanv tankam ulo marit ravlom, punn tannim zobab diunk na.’”

18 Jeremiasan Rekabachea ghoranneak mhunnttlem: “Izraelacho Dev, fouzancho Dev Jehova oxem mhunntta, ‘Tumi tumcho purvoz Jehonadabachi adnea pallʼllea ani tumi tannem dilʼleo sogleo adnea pallit aileat, ani tannem tumkam sanglam toxench tumi kortat. 19 Taka lagon, Izraelacho Dev, fouzancho Dev Jehova oxem mhunntta: “Rekabacho put, Jehonadabachea* sonstintlo ekui munis mhojea mukhar seva korunk urchona oxem kednanch zaunchem na.”’”