Izaias
48 Jakobachea ghorannea, aik!
Tum jem tukach Izrael mhunntta,
Tum jem Judachea zhorintlean* ailam,
Ani tum, jem Jehovachea nanvan soput gheta,
Ani Izraelachea Deva lagim magnnem korta,
Hem soglem tum sotan ani nitivontponnan korina.
2 Karonn tum apunn povitr xarant ravpi oxem mhunntta,
Ani Izraelachea Devacho asro gheta,
Zachem nanv fouzancho Dev Jehova.
3 “Adim* ghoddlolea vostum vixim hanvem khub poilim sanglolem.
Teo mhojeach tonddantlean bhair sorloleo,
Ani hanvench teo kolloilʼleo.
Hanvem okosmat panvl ghetlem ani teo purnn zaleo.
4 Karonn tum kitlem hottʼtti* asa tem mhaka khobor aslem,
Tuji man lokhnna bhaxen ani tujem kopol tambea bhaxen ghott asa.
5 Taka lagon, hanvem khub poilinch heo vostu sangloleo,
Teo ghoddon ieunchea poilinch tuka sangloleo.
‘Hem mhojea murtechem kam, mhojea kantoilʼlea ani dhatuchea murtechea* adnea pormonnem tem zalem,’
Oxem tunvem mhunnchem nhoi mhunn hanvem tuka teo sangloleo.
6 Tunvem heo sogleo vostu aikoleat ani polloileat,
Heo tum sogleank kollounchem na kai?
Atam thaun hanv tuka noveo vostu kolloitam,
Tuka khobor naslole gutt hanv ugddape kortam.
7 Jeo vostu hanvem rochleat teo noveo asat, porneo nhoi.
Zanchea vixim tunvem poilim kednanch aikonk na.
Na zalear tum mhunnttolem, ‘Hem tor hanv poilim thaunuch zannam.’
8 Na, tunvem heo vostu aikonk na, tea vixim tuka kainch khobor na.
Adim tuje kan bond asle.
Karonn tum visvasghatki aslem mhunn hanv zannam,
Ani tuka zolma thaunuch opradi mhunnttlolem asa.
9 Punn hanv mhojea nanva pasot mhozo rag addaun dovortolom,
Mhojea vakhannʼnnek lagon hanv mhakach addaitolom,
Hanv tuzo nas korchom na.
10 Polloi! Hanvem tuka xudʼdh kelam, punn chandi bhaxen nhoi.
Hanvem tuka koxtt-dukhachea bhottʼttent ghalun topasun kaddlam.*
11 Mhojea pasot, hoi mhojea nanva pasot hanv panvl ghetolom.
Karonn hanv mhojem nanv boxttaunk koso dium?
Hanv mhoji mhoima dusrea konnankuch dina.*
12 Jakoba, mhojem aik, ani Izraela, hanvem tuka vinchun kaddla.
Hanv toch, hanv bodlonk na. Hanvuch poilom ani nimannom.
13 Hanvem mhojea hatamnim prithumechi buniad ghatlea,
Ani mhojea uzvea hatan mollob posrailam.
Hanv tankam* apoitam tednam tim sangata ubim ravtat.
14 Tumi sogle ektthaim ieiat ani aikat.
Tumchea devam modem* oso konn asa zannem hea vostum vixim kolloilam?
Jehovan zacho* mog kela,
To Babilonachea add tachi khuxi purnn kortolo,
Ani Kaldeikarancher tacho hat ubarlolo astolo.
15 Hanvem svota hem mhunnttlam, hanvench taka apoila.
Hanvench taka haddla, to korta tem dor ek kam purnn zatolem.
16 Mhojea lagim ieiat ani aikat.
Survatek thaun hanv ukteponnim uloilom, hanv gupit toren ulounk na.
Ti ghoddonk lagli tednam thaun hanv thoinch aslom.”
Akʼkhea Vixvacho Dhoni Jehovan mhaka ani aple povitr xoktek dhaddlea.*
17 Jehova, zo tuzo Soddoupi ani Izraelacho Povitr Dev zaun asa, to oxem mhunntta:
“Hanv Jehova, tuzo Dev,
Jem tujea boreak* tench hanv tuka xikoitam,
Ani jea vatten tunvem cholonk zai, teach vatten tuka vhortam.
18 Mhojea adneancher tunvem dhean diun, teo pallʼlleo zalear, kai borem zatolem!
Tednam tuji xanti nhoim-e bhaxen zatoli,
Ani tujem nitivontponn doriachea lharam bhaxen zatolem.
19 Tuji sonsot* renve sarki,
Ani tuji pillgi renvenchea konnam sarki, mezunk zaina titli zatoli.
Tujem nanv mhojea mukhavoilem puson voichem na vo nanch zaunchem na.”
20 Babilonantlean bhair sorat!
Kaldeikaram thaun pois pollon vochat!
Khuxalkaien kollounni korat! Vhoddlean bob marat!
Prithumechea konnxea-konnxea meren hi khobor pavoiat:
“Jehovan aplo sevok Jakobak soddoilo.
21 Padd zalʼlea zageantlean tankam haddttana tannem tankam tan lagonk diunk na.
Tannem tanchea pasot khoddpantlean udok vhanvom-xem kelem,
Tannem khoddop foddlem ani udok vhanvonk laglem.”
22 Jehova mhunntta: “Noxtteank kednanch xanti mellona.”