Izaias
5 Hanv zacho khub mog kortam tachea pasot ek git gaitolom,
Hem git tachea vixim ani tachea drakxanchea mollea vixim asa.
Hanv khub mog korta tacho drakxancho mollo porvotachea denvter aslo.
2 Tannem to khonnlo ani tantuntle fator kaddun uddoile.
Thoim tannem ekdom bori drakxanchi val roili,
Ani mollea modem ek gopur bandlo,
Toxench, drakxam maddoupacho zago khonnlo.
Uprant borim drakxam zatolim mhunn to vatt polloit ravlo,
Punn tika fokot ranvotti drakxam zalim.
3 Taka lagon tannem mhunnttlem, “Jeruzalemant ravtoleamno ani Judachea lokamno,
Mhoje ani mhojea drakxanchea mollea modem nit korat.
4 Hanvem mhojea drakxanchea mollea pasot kitem mhunn korunk na?
Mhojea lagim zata tem soglem hanvem kelem.
Tor hanv borea drakxam pasot axeun aslom tednam,
Mhaka ranvotti drakxam kiteak mhunn mellʼllim?
5 Mhojea drakxanchea molleak hanv kitem kortolom,
Tem hanv tumkam sangtam:
Hanv tachi voim* kaddun uddoitolom
Ani mollo zollon voitolo,
Tachi fatrachi vonnot hanv moddun uddoitolom
Ani mollo paim-am ponda maddon voitolo.
6 Hanv taka padd zaunk soddttolom,
Taka kednanch benddche nant ani khonnche-i nant.
To mollo kantteanchea jhilkuttamnim ani tonnan bhortolo,
Ani tacher paus poddona zaunk hanv kupank hukum ditolom.
7 Karonn Izraelachem ghorannem, fouzancho Dev Jehovacho drakxancho mollo zaun asa.
Ani Judache munis, taka khub avoddttali ti drakxanchi val zaun asa.
Neai mellttolo mhunn to ravlo,
Punn polloi! tannim onʼneai kelo.
To nitivontponnak ravlo,
Punn polloi! taka sonkoxttachem roddnnem aikonk ailem.”
8 Anik zago urona tea meren,
Jim konn ghorak-ghor zoddun
Ani xetak-xet zoddun,
Akʼkhi zomin aplich zalʼlea porim thoim ravtat, tancher hai!
9 Fouzancho Dev Jehova oso soput ghetana hanvem aikolem,
Zaitim ghoram padd zatolim, tim kitlim-i vhoddlim ani sobit aslear pasun
Tim padd zatolim ani thoim ekui munis ravchona,
Tanchi poristhiti polloun lok samkech thottoktole.
10 Karonn dha ekor drakxanchea molleantlean fokot ek bath* drakxancho soro mellttolo,
Ani ek homer* bim-am thaun fokot ek efa* itlench pik mellttolem.
11 Je soro pieunk sokallim fuddem uttʼtthat,
Ani sanjer kallokh zaisor ttaitt zaum poriant piet ravtat, tancher hai!
12 Tim jevnnam dovortat tednam kinori,* tar aslolem sadhon,
Punn te Jehovachea kamacher dhean dinant,
Ani tachea hatachim kamam polloinant.
13 Taka lagon, mhoje lok koident voitole,
Karonn tankam mhoji vollokh na.
Tanche manadik munis upaxim poddttole,
Ani tanche sogle munis tanen vollvollttole.
14 Fonddan* aplo zago vaddoila,
Tannem aplem tondd ugddun khub vhoddlem kelam.
Tache* vhoddle-vhoddle munis,* tache bovall korpi zome ani mouza korpi munis,
Sogle Fonddant voitolech.
15 Tednam munxak man bagounchi poddttoli,
Taka loz bhogchi poddttoli,
Ani gorvixttanche dolle lojen bhortole.
16 Fouzancho Dev Jehova zhoddtti* kortolo ani tea udexim taka mhoima mellttoli.
Khoro ani Povitr Dev, nitivontponna udexim apunn povitr mhunn dakhoun ditolo.
17 Aplea chorvachea mollar chortat toxim menddram chortolim.
Jea padd zalʼlea zageancher mottim-mottim zonvaram ravtalim, thoim pordexi lok aplem pott bhortole.
18 Je fosoupachea doriemnim aple guneanv voddttat
Ani zonvaram voddttat tea doriemnim aplem patok voddttat, tancher hai!
19 Ani je mhunnttat: “Devan aplem kam begin korchem,
Ami tem pollounchem mhunn tannem tem begin korchem.
Izraelachea Povitr Devacho udʼdhex* begin purnn zauncho.
Hea udexim amkam to kollttolo!”
20 Je boreak vaitt ani vaittak borem mhunnttat,
Je kallkhak uzvadd ani uzvaddak kallokh mhunnttat,
Je koddu asa taka godd ani godd asa taka koddu mhunnttat, tancher hai!
21 Je aplech nodren apunn zannvaieche mhunn somzotat,
Ani je apunnuch xanne mhunn somzotat, tancher hai!
22 Je bhorpur drakxancho soro pietat,
Ani soro miks* korunk huxar asat, tancher hai!
23 Je lonch* gheun noxtteak soddttat,
Ani nitivontak neai dinant, tancher hai!
24 Jea toren ujean tonn zollon voita,
Ani agttean suklolem tonn kabar zata, tea toren tancho-i nas zatolo.
Tanchim mullam kustolim,
Tanchim fulam dhulʼli bhaxen ubon voitolim,
Karonn fouzancho Dev Jehovacho tannim kaido nakarlo*
Ani Izraelachea Povitr Devachea utracho opman kelo.
25 Taka lagon, Jehovacho rag aplea lokancher pettla,
Ani tankam marunk to aplo hat ubartolo.
Tednam dongor thorthortole,
Ani tanchim moddim kochrea sarkim rostear poddlolim astolim.
Hem soglem* polloun, tacho rag thondd zaunk na,
Punn tankam marunk tannem aplo hat azunui ubarlolo asa.
26 Poisulʼlea raxttra pasot ek khunna koxi tannem khambo ubo kela.
Fivnni* marun prithumechea konnxeam thaun lokank apoileat.
Ani polloi! te vegan* ietat.
27 Tanchea modlo konnuch thokona vo addkhollona.
Konnuch jhemena vo nhidona.
Konnanchoch bhenddacho pottʼtto luz* na,
Ani tanchea paim-anchea zoteancheo lesi tunttloleo nant.
28 Tanche sogle bann dhariche asat,
Ani tanche sogle dhonu tann kelʼle asat.*
Tanchea ghoddeanchim fuddam* ghott fatra* sarkim asat,
Ani tanchea rothanchim rodam* vadollachea varea sarkim ghunvtat.
29 Te xinva sarke goroz ghaltat,
Te tornattea xinvam sarke goroztat,
Te gurguron aplea xikaracher uddi martole ani taka gheun voitole,
Konnuch taka tanchea hatantlean vanchounk xokchona.
30 Tea disa te aplea xikaracher
Doria gurgurta tea toren gurgurtole.
Konnui tea desak polloita taka kallokh ani sonkoxtt distolem.
Ani kupank lagon uzvadd pasun kallkhant bodoltolo.