Dhormdutancho Itihas
20 Bovall thambtoch, Paulun xisank apoun haddle ani tankam urba dilea uprant, voita mhunn sangon to Masedoniak vochonk bhair sorlo. 2 Tea vattarantlean voitana tannem xisank zaitem sangon urba dili ani to Grisant gelo. 3 Tannem thoim tin mhoine sarle. Punn to tarvar boson Siriant vochpacho aslo tednam Judevamnim tachea add ek ievzonn keli. Tea pasot tannem Masedoniantlean porot vochonk tharailem. 4 Tachea borabor he lok asle: Bereiacho Pirusacho put Sopater, Tesalonikeche Aristarkus ani Sekundus, Derbecho Gaius, Timot ani Asiache Tikikus ani Trofimus. 5 He munis amchea poilim gele ani Troasant amchi vatt pollounk lagle. 6 Punn khomir naslolea unddeachea porbe uprant, ami Filipi thaun tarvar boson bhair sorle ani panch disam bhitor tanche koddem Troasant pavle. Thoim ami sat dis ravle.
7 Sumanachea poilea disa, ami jevonn jevunk ektthaim zale tednam Paulu thoim ailolea lokank bhaxonn diunk laglo. Dusrea disa to vochpacho aslo dekhun to modli rat meren bhaxonn di-it ravlo. 8 Ami zomlole asle tea unchlea rumant zaite dive pettoilʼle asle. 9 Paulu bhaxonn ditana Eutikus nanvacho ek tornnatto zonelar boson aslo. Taka nhid lagli ani to tisrea mallie voilean sokol poddlo. Te taka uklunk gele tednam tankam to melolo mellʼllo. 10 Punn Paulu panvdde denvon sokol gelo ani tannem bagon taka veng marli ani mhunnttlem: “Bovall korinakat, karonn to jivo asa.” 11 Magir to voir gelo ani jevunk laglo.* To tanchea lagim sokall zai meren uloit ravlo ani uprant thoim thaun gelo. 12 Te tea cheddeak gheun gele ani to jivont zala mhunn polloun tankam utramnim sangonk zaina itli bhuzvonn mellʼlli.
13 Magir ami tarvar boson Asosak gele. Paulun amkam poilinch sanglolem toxem to Asosak amchea tarvar choddpacho aslo, punn thoim poriant to cholon ieupacho aslo. 14 Tor Paulu Asosak pavlo tednam ami taka amchea borabor tarvar ghetlo ani ami Mitilenek gele. 15 Tea uprant fuddlea disa ami tarvar boson thoim thaun bhair sorle ani Kiosa lagim pavle. Magir dusrea disa, amchem tarum Samosak ravlem ani tisrea disa ami Miletus pavle. 16 Pauluk Asiant ravpachem naslem dekhun, to Efezant ravonastana fuddem vochot ravlo. Zata zalear Ponʼnasavea disachea porbek Jeruzalemant pavcho mhunn to thoim thaun begin-begin vochonk sodhtalo.
17 Punn tannem Miletusantlean Efezak sondex dhaddlo ani thoinchea sobhentlea vhoddilank apoun haddle. 18 Te tachea lagim aile tednam tannem tankam mhunnttlem: “Hanvem Asiant paim dovorlo tea disa thaun tumchea modem hanvem mhojem jivit koxem sarlam tem tumi ekdom bore bhaxen zannant. 19 Hanv Somiacho gulam zaun ekdom khaltikaien tachi seva korit ravlom ani Judevamnim mhojea add kelʼlea ievzonneank lagon hanvem khub dukam golloilim ani zaitea porikxencho fuddo kelo. 20 Tumkam boreak poddtta toslem kitench sangonk hanv fatti soronk na ani toxench sogleam mukhar ani ghoran-ghor vochon tumkam xikounkui hanv fatti soronk na. 21 Punn poschatap korun Deva koddem porot ieunk ani amchea Somi Jezucher visvas dovrunk hanvem Judev ani Grik lokank pasun ekdom bore bhaxen sakx dili. 22 Ani atam polloiat! hanv povitr xoktechea margdorxona pormonnem Jeruzalemant voitam. Punn thoim mhojem kitem zatolem tem hanv nokllom. 23 Hanv fokot itlench zannam ki bondkhonn ani sonkoxtt mhoji vatt polloitat mhunn povitr xokten mhaka porot-porot dor eka xarant xiddkaila. 24 Toripunn, mhozo jiv mhaka molacho oxem hanv matui chintina. Punn koxe-i bhaxen mhoji dhanvodd ani mhoji seva purnn kelʼli mhaka zai. Hi seva mhaka Somi Jezun dilʼli ki hanvem Devachea favo naslolea doiechea bore khobre vixim bore bhaxen sakx diunchi.
25 “Hanvem tumchea modem zankam Rajeachi porgottnni kelea tanchea modlim konnuch mhaka porot kednanch pollounk xokchim na mhunn mhaka khobor asa. 26 Hanv konnancheach rogtacho zobabdar na mhunn aichea disa tumi govai asat. 27 Karonn hanv Devachea khuxe vixim* sogleo vostu tumkam sangonk fattim soronk na. 28 Tumcher ani akʼkhea hinddacher dhean diat. Karonn povitr xokten tumkam tanchi dekhrekh korpi mhunn nemleat. Devan aplea Putachea rogtan vikti ghetlolea sobhechi tumi gonvllea bhaxen kallji gheunchi mhunn tumkam nemleat. 29 Hanv gelea uprant zulum korpi kole* tumchea modem ietole ani te hindda koddem movall ritin vagche nant mhunn hanv zannam. 30 Tumcheach modle thodde munis ube zatole ani xisank aplea vatten voddun vhoronk chukicheo vostu xikoitole.
31 “Taka lagon zagrut ravat, ani hanv tin vorsam meren dis ani rat, dukam golloun tumchea modlea dor-ekleak suchounneo di-it ravlam mhunn ugddas dovrat. 32 Atam hanv tumkam Devachea ani tachea favo naslolea doiechea utrachea hatant ghaltam. Hem utor tumkam ghottai diunk xokta ani soglea vinchun kaddloleank mellchem asa tem daiz diunk xokta. 33 Hanvem konnancheach chandichi vo bhangrachi vo kopddeanchi as korunk na. 34 Mhojeo ani mhojea sangateancheo pasun gorzo purnn korunk hanvem mhojea hea hatamnim kitlo vavr kela hem tumkam khobor asa. 35 Hanvem tumkam soglea vostumnim dakhoun dilam ki tumi osoch vavr korun oskotank modot korchi ani Somi Jezuchim him utram sodanch ugddas dovorchim: ‘Gheunchea poros diunk chodd khuxalkai melltta.’”
36 Hem soglem sanglea uprant, Paulun sogleam sangata dimi ghalun magnnem kelem. 37 Tednam te sogle dukamnim roddonk lagle, ani Pauluk veng marun tacho umo gheunk lagle. 38 Te taka porot kednanch pollounk xokchenant oxem Paulun tankam mhunnttlem dekhun te khub dukhi zale. Uprant te Pauluk tarum aslem thoim poriant pavounk gele.