Jeremias
20 Jeremias hea vixim bhasaunni kortalo tednam, Imeracho put Pashur aikotalo. To ek iadnik aslo ani Jehovachea ghoracho ek mukhel odhikari pasun aslo. 2 Pashuran hem soglem aikolem tednam tannem Jeremias provadeak marlo, ani taka Jehovachea ghorant Benjaminachea Unchlea Darvonttea lagim aslolea lakddachea khoddeant* ghatlo. 3 Punn dusrea disa Pashuran Jeremiasak khoddeantlo kaddlo tednam Jeremiasan taka mhunnttlem:
“Jehovan tujem nanv Pashur nhoi, punn Soglea Vattamnim Akant mhunn dovorlam. 4 Karonn Jehova oxem mhunntta, ‘Hanv tuka, tujea pasot ani tujea soglea ixttam pasot akantachem karonn kortolom. Te sogle tujea dolleam mukhar aplea dusmananchea tolvarin mortole. Hanv akʼkhea Judak Babilonachea razachea hatant ditolom, ani to tankam Babilonant koidi korun vhortolo ani tolvarin jivexim martolo. 5 Hanv hea xarache sogle bhanddar, tachi sogli girestkai, tacheo sogleo moladik vostu ani Judachea razanche sogle theve tanchea dusmananchea hatant ditolom. Te tankam luttʼttole, tankam aplea tabeant ghetole ani tankam Babilonant vhortole. 6 Ani Pashura, tum ani tujea ghorant ravpi sogle lok koident voitole. Tum Babilonant voitolo ani thoim mortolo. Tuka thoinch tujea soglea ixttam sangata purtole, karonn tunvem tankam khotteo bhasaunneo keleat.’”
7 Jehova Deva, tunvem mhaka fosoilo ani hanv foslom,
Tunvem tujem boll mhojea add uzar kelem ani tuka zoit mellʼllem.
Dis-bhor lok mhaka hanstat,
Soglim mhojeo moskoreo kortat.
8 Karonn hanv uloitam title-i pavtti, mhaka roddon ani bob marun hench kollounk poddtta,
“Hinvsa* ani nisontton!”
Hanv Jehovacho sondex sangtam dekhun dis-bhor mhozo opman kortat ani mhaka hanstat.
9 Tor hanvem mhunnttlem: “Atam thaun hanv tachea vixim anik ulounchom na,
Tachea nanvan hanv anik kainch sangchom na.”
Punn Devacho sondex mhojea kallzant ujea bhaxen zollonk laglo, mhojea haddamnim bond korun dovorlolea zollttea ujea sarko zalo.
To addaun-addaun hanv thoklom,
Ani mhojean anik ravonk zaina zalem.
10 Hanvem zaiteo vaitt khobro posorloleo teo aikoleo,
Akantan mhaka gherav ghatla.
“Tachem nanv piddʼddear korum-ia, ami tachem nanv piddʼddear korum-ia!”
Mhojea pasot borem magpi dor eklo, hanv kednam sokol poddttolom kai mhunn vatt polloun oxem mhunntta:
“To ghoddie pixeponnan kitem tori chuk kortolo,
Tednam ami taka dhorunk pavtole ani amcho bodlo gheunk pavtole.”
11 Punn Jehova mhojea sangata eka oslea xoktivont zhuzarea sarko aslo, zaka sogle bhietat.
Taka lagon, mhaka dhumallo ditat te addkhollon poddttole ani tankam zoit mellchem na.
Tankam ies mellchem na dekhun, te samke lojek poddttole.
Tankam zalʼlo opman sodankal urtolo ani to konnuch visorchona.
12 Punn, fouzanchea Deva Jehova, tum nitivont munxak topasta,
Tum tachim kholaiechim chintnam* ani kalliz polloita.
Deva, tum tanche koddlean koso sudd ghetolo tem mhaka pollounk di,
Karonn hanvem mhoji kes tujea hatant ghatlea.
13 Jehova pasot git gaiat! Jehovachi vakhann’nni korat!
Karonn tannem goribak noxtteanchea hatantlo vanchoila.
14 Hanv zolmolʼlom tea disacher xirap poddom!
Mhojea avoin mhaka zolm dilʼlo tea disacher besanv poddona zaum!
15 “Tuka ek bhurgo zolmola, ek put zolmola!”
Hi bori khobor mhojea bapaik diun, taka sontosbhorit kelʼlo,
Tea munxacher xirap poddom.
16 Tea munxachi poristhiti tea xaram bhaxen zaum, zancho Jehovan koslench dukh dhorinastana nas kelʼlo,
Sokallim taka bob marun roddtta to avaz, ani donparchea vellar taka zhuzacho bovall aikonk ieum-di.
17 Tannem mhaka kusveantuch kiteak marun uddounk na,
Jea vorvim mhoji avoi mhozo fondd zatoli asli,
Ani hanv sodanch tichea kusveant urtolom aslom?
18 Hanv kusveantlean bhair kiteak sorlom?
Fokot tras ani dukh pollounk,
Ani lojen mhoje dis sompounk?