Dusro Juanv
1 Vinchun kaddlole bailek ani tichea bhurgeank, vhoddila koddlean hi chitt. Hanv tumcho khoreponnim mog kortam. Ani fokot hanvuch nhoi, punn sot zannam zaleant tim soglim tumcho khub mog kortat. 2 Karonn amchea modem sot asa ani sodankal astolem. 3 Dev zo amcho Bap, ani tea Bapacho Put Jezu Krist, hanchea koddlean amkam sot ani mog, teach borabor favo nasloli doia, kakut ani xanti mellot ravtoli.
4 Tujim thoddim bhurgim, Bapa koddlean amkam mellʼllea tea adnea pormonnem sotachea vatten choltat hem zannam zalʼlean hanv khub khuxal zatam. 5 Tor baile, atam, hanv tujea lagim vinoti kortam ki ami eka-mekacho mog korcho. (Hanv tuka ek novi adnea boroina, punn survate thaun amkam mellʼlloli tich adnea boroitam.) 6 Bapachea adnea pormonnem cholop mhunnttlearuch mog. Tumi survate thaun aikolea ti adnea hich ki tumi mogachea vatten cholot ravchem. 7 Karonn zaite fottoupi sonvsarant bhair sorleat, je Jezu Krist hadda-masacho munis zaun ailolo mhunn manun ghenant. Zo hem manun ghena to fottoupi ani Kristacho virodhi zaun asa.
8 Ami khub mhenot korun tumchea modem utpon keleat teo vostu tumi hogddaina zaunk svotacher nodor dovrun ravat. Oxem kelear, tumkam purnn inam mellttolo. 9 Zo konn Kristachea xikounne bhair voita ani teo pallop soddun dita, tacher Devachi maniotai urona. Zo konn tachi xikounn pallit ravta taka Bapachi ani Putachi maniotai melltta. 10 Zor konnui tumchea lagim ieta ani hi xikounn dina zalear, oslea munxak tumchea ghorant gheum nakat vo taka nomoskar pasun korinakat. 11 Zo taka nomoskar korta to tachea noxttea kamamnim bhagidar zata.
12 Khorem mhunnttlear, mhaka tumchea pasot zaiteo vostu boroupacheo asat, punn hanv teo inkan kagddacher borounk sodhina. Tachea bodlek, hanv tumchea lagim ieun tumchea koddem ulounk sodhtam, jea vorvim tumchi khuxalkai anik vaddttoli.
13 Tujea vinchun kaddlolea bhoinnichim bhurgim tuka aplo mog dhaddttat.