Balam-achem Gaddum Uloita

Izraelitkaram oronnʼnneant ravlear sumar 40 vorsam zalʼlim. Tannim zaitim vhodd-vhodd xaram jikhon ghetlolim. Atam tim Jordan nodichea udente vatten, Moab-achea moidanar aple tombu ghalun aslim. Ani thoddeach vellan tim tea desant bhitor sorpachim aslim, zo tankam diunk Devan bhas dilʼli. Izraelitkaram aplo des ghetolim mhunn, Moabacho raza, Balak bhielʼlo. Dekhun Izraelitkarank xirap ghalunk tannem Balam nanvachea eka munxak Moabant apoilo.

Punn Jehovan Balamak sanglem: ‘Tunvem Izraelitkarank xirap diuncho nhoi.’ Tor Balam thoim vochona. Balamak Raza porot apoita ani taka zai tem to ditolo mhunn promise korta. Torui, Balam thoim vochona. Tednam Dev taka sangta: ‘Tujean vochom ieta, punn hanv tuka kitem sangtolom tench tum sang.’

Balam aplea gaddvacher boson dokxinne vatten, Moabak vochonk bhair sorta. Jehovan taka sanglolem ki tannem Izraelitkarancher xirap ghalchem nhoi. Toriastana, to tancher xirap ghalunk sodhta. Vatter Jehovacho devdut taka tin pavtti addaita. Punn Balamak to devdut disona. Fokot Balamachem gaddum taka pollounk xokta. Poile pavtt tea devdutak polloun tem gaddum rostea voilean denvon xetant voita. Dusre pavtt, tem gaddum durgak tenkon voita ani Balamcho paim chiddʼddota. Xevottak, tem gaddum rosteachea modem boson ravta. Dor ek pavtt, Balam boddi gheun tea gaddvak marta.

Tisre pavtt to gaddvak marta tednam, Jehova tea gaddvak uloum-xem korta. Gaddum Balamak vicharta: ‘Tum mhaka kiteak marta?’ Balam sangta: ‘Tunvem mhoji loz kelea. Mhoje lagim tolvar asli zalear, hanv tuka jivexim martolom aslom.’ Gaddum sangta: ‘Kitlim vorsam thaun hanv tuka mhojea fatticher boson vhorot asam. Punn hachea poilim hanvem kednam-i oxem kelam?’

Uprant Jehovan, Balamak to devdut dixtti poddoso kelo. Devdutan taka sanglem: ‘Izraelitkarank xirap dium naka mhunn Jehovan tuka sanglolem.’ Balam mhunntta: ‘Mhoji chuk zali. Hanv porot mhojea ghora voitam.’ Tednam devdut taka sangta: ‘Tujean Moabak vochom ieta, punn Jehova tuka jem sangonk laitolo tench tum sang.’

Balam lisanv xiklo kai? Na. Itlem soglem zaun-ui, Balam Izraelitkarancher tin pavtti xirap ghalunk proitn korta. Punn tin-ui pavtti, Balam tea lokancher besanv ghalum-xem Jehova korta. Xevottak, Izraelitkaram Moabacher zhuz kortat, ani Balam tednam morta. Balam-an Jehovachem poilench aiklolem zalear, kitlem borem zaupachem nhoi?