Pioneer Seva Korat

Beginuch hea vaitt sonvsaracho xevott zauncho asa. Tor amchea vellacho boro upeog korunk ami dhei dovrunk zatat. (Ef. 5:15, 16) Ani Jehovache sevent anik vavr korunk dhei dovorlolean, ami amchi takot bore toren uzar korunk pavtolim. (1Kor. 9:26) Tor tumchea kuttumbik bhokte vellar, novea seva vorsa pasot tumi kosle dhei dovortolim tea vixim tumi ulounk zata. Tumi khoinche dhei dovrunk zatat tea vixim magnnem korun chintunk, hea mittingechea pustikent aslole lekh tumkam modot korunk xoktat.—Jak. 1:5.

Udharonnak, tumchea familintlea konnem-i eklean tori niemit pioneer seva korunk, familichea her sodoxiamnim modot korunk zata. Punn tumi itlim voram korunk pavchimnant oxem tumkam dista zalear tumcheach sarki poristhiti aslolea pioneer seva korpi bhav-bhoinnam lagim tumi ulounk zata. (Mho. 15:22) Tumi ghoddie tumchea kuttumbik bhokte vellar, pioneer seva korpi eka bhavacho vo bhoinnicho onubhov vicharunk zata. Ani uprant, tumi kednam porgottnni korunk xoktolim tea vixim boroun dovrunk zata. Tumi adim pioneer seva kelea zalear atam tumi asat te poristhitint, tumi pioneer seva korunk xoktolim kai na tea vixim tumi chintunk zata.

Tumchea familint konnui eklean, ek mhoino vo eka poros chodd mhoineam pasot, sahaiok pioneer seva korunk zata kai? Tumi rokddinch thoktat zalear, ekuch borabor zaito vell porian porgottnni korchea bodlek, tumi dor disak thoddea-thoddea vella pasot porgottnni korunk zata. Tumi sumanache panchui dis kam kortat vo iskolak voitat zalear porgottnni korunk sutti aslolo ek mhoino vo panch sonvar-aitar aslolo ek mhoino tumi vinchun kaddunk zata kai? Tumi eka calendar-acher, tumi khoinchea mhoineant sahaiok pioneer seva kortolim, ani tea mhoineant kednam-kednam porgottnni kortolim tem boroun dovrunk zata.—Mho. 21:5.

DHIRVONT . . . PIONEER SEVOK ZAIAT, HO VIDEO POLLOIAT ANI UPRANT HEA PROSNACHO ZOBAB DIAT:

• Pioneer seva korunk teag kortat tancho Jehova koso mog korta ani koxi kallji gheta, hea vixim bhoinn Aamand-achea onubhovantlean ami kitem xiklim?