Tumi Zannam Aslim?

Babilonachea Belshazara vixim Bible jem sangta tem sarkem asa mhunn pornnea vostuncho sodh koso dakhoun dita?

DANIELACHEA pustokant sanglolo Belshazar Raza kednam jieunkuch na mhunn, Bible-ache khodd kaddpi zaitim vorsam thaun sangtale. (Dan. 5:1) To jielʼlo mhunn pornnea vostunchea sodh korpeank kainch puravo mellonk naslo dekhun, te toxem chintale. Punn tanchem chintop, 1854-ant bodolʼlem. Kiteak?

Tea vorsa, J. G. Taylor nanvachea eka British odhikarean, Ur hea adlea xarachem ibadd zaun poddlolea thoddea zageancher sodh kelo. Hem xar dokxinn Iraq-ant aslem. Taka thoim eka vhodd gopura bhitor, cylinder-achea akaracheo, matiecheo zaiteo vostu mellʼlleo. He cylinder 10 cm lamb asat. Ani tacher khillean kantoilolem vo, cuneiform borounni asa. Tantuntlea eka cylinderacher, Babilonacho Nabonidus Razak ani tacho malgoddo put, Belshazarak lamb auk mellonk ek magnnem asa. Hea sodha udexim Belshazar khorench jielʼlo mhunn ek puravo mellʼllo.

Ani khodd kaddpeank tem manun gheunchench poddlem. Punn Bible Belshazar fokot jielo mhunn sangona, punn to ek raza zaun aslo mhunn sangta. Khodd kaddpi porot dubhavunk lagle. Udharonnak, thoddim kitem mhunnttat tem, 19-vea xekddeant British vigeanik William Talbotan boroilem: “Aplo bapui Nabonidus, razvottki choloitana Bel-sar-ussur [Belshazar] pasun razvottki choloitalo. Punn hacho thoddo pasun puravo na.”

Punn matieche her cylinder-a thaun, sarkem kitem tem kollon ailem. Karonn he matieche cylinder, Belshazaracho bapui Nabonidus Raza zaitim vorsam Babilon xara bhair astalo mhunn dakhoitat. Tor, to xarant naslo tednam, konn razvottki choloitalo? Nabonidus dusrea eka xarant astalo tednam to Belshazarak aplem xinvason ani aplea soinacho choddso bhag sompoitalo mhunn Encyclopaedia Britannica sangta. Tor tea vellar Belshazar aplea bapaichea zagear raj choloitalo. Taka lagon, pornnea vostuncho sodh korpi ani bhaxecho zannar, Alan Millard-an oxem mhunnttlem: “Daniel pustokant Belshazarak ‘raza’ mhunnttla tem sarkem zaun asa.”

Khorem mhunnttlear, Daniel pustok visvas dovorpa sarkem ani Devan prerit kelam mhunn manunk Devachea sevokank Bible-antuch aslole purave puro.—2 Tim. 3:16.