Tumi Zannam Aslim?

Eka fatracher kantoilolim utram Bible sangta tem khorem mhunn koxim dakhoun ditat?

SUMAR 700-600 K.X.A.-ant kantoilolo ek fator, Jerusalem-antlea Bible Lands Museum-ant haddun dovorla. Ho fator Israel-antlea Hebron-ant aslolea somadhi mhunn uzar kortolea dholint mellʼllo. Tacher oxem kantoilolem: “Hagav-achea putak Hagaf-acher Yahweh Sabaot-acho xirap poddom.” Bible-ant sanglam tem sarkem asa mhunn him utram koxim dakhoitat? Adlea Hebrev bhaxent, Jehova hem Devachem nanv borounk uzar kelolim okxoram, Bible kallar lokank khobor aslim ani te tim sodanchea jivitant uzar kortale mhunn hem dakhoun dita. Him okxoram Inglez bhaxen, YHWH zaun asat. Oslea dholimnim lok lipon ektthaim ietale ani dholincher kantoun boroitale. Tannim kantoilam tem ami vachtat tednam tantunt Devachem nanv zaite pavtti vachunk melltta. Tea bhair, te aplem nanv pasun kantoitale zantunt Devachem nanv zoddun astalem.

Hea borounnem vixim University of Georgia-achi Dr. Rachel Nabulsi sangta: “YHWH hem nanv hea boroupant zaite pavtti vachunk melltta. . . . Hantuntlean, Israel ani Judachea lokanchea jivitant YHWH hem nanv kitlem mhotvachem aslem mhunn kantoilolea utrantlean kollon ieta.” Hachea voilean, Bible-ant asa tem sarkem mhunn kolltta. Karonn Hebrev okxoram bhaxantor korun Inglez bhaxent boroilolim YHWH, hozaramnim pavtti Bible-ant uzar keleant. Tea bhair, Bible-antlea zaitea lokanchea nanvamnim Devachem nanv zuddlolem asa.

Fatracher kantoilolem “Yahweh Sabaot,” hea utrancho orth, “soineancho Dev Jehova” (NW) mhunn ieta. Tor Bible kallar, fokot Devachem nanvuch nhoi punn “soineancho Dev Jehova” him utram pasun uzar kortalim mhunn kollon ieta. Hantuntlean pasun Bible-ant sanglam tem sarkem mhunn kollon ieta. Karonn Bible-ant “soineancho Dev Jehova” him utram, Hebrev bhaxent boroilolea pustokamnim 283 pavtti vachunk mellttat, jim choddxe pavtti Izaias, Jeremias ani Zekaria hea pustokamnim asat.