Odheai 7
Magnneant Deva Lagim Sorchem
Dispottem magnnem corpachem kiteak mhotvachem? (1)
Connank ami magnnem corchem, ani coxem? (2, 3)
Magnneank lagon konntʼte favote vixay? (4)
Tuvem kednam pratunchem? (5, 6)
Soglim magnnim Dev aicota cai? (7)
1. Magnnem zaun asa khalticaen Devaxim uloup. Tuvem Devaxim Dispottem magunk zaem. Hea porim tuka tachexim êk mogall ixtt coso lagincho bhasonk xekta. Jehovah itlo hod ani bolladik asa, torui to amchim magnnim aicota! Tum Devak dispotto magnnem cortai cai?—Stotram 65:2; 1 Tesalonikkarank 5:17.
2. Magnnem amchea bhoktecho vantto zaun asa. Heaporim, ami focot Dev Jehovak magnnem corunk zai. Zednam Jezu prithumicher aslolo tannem sodanch tachea Bapaxi maglem, dusrea connank nhoi. Ami toxench corunk zai. (Matev 4:10; 6:9) Torui astana, amchim soglim magnnim Jezuchea nanvan munnonk zai. Heaporim dacoita qui ami Jezuchea bhesak moriad ditão ani amcam tachea sodvonn bolidanacher patienne asa.—Juanv 14:6; 1 Juanv 2:1, 2.
3. Zednam ami magtão tednam ami Devaxim amchea callzam thaun ulovunk zai. Amchim magnnim tond patt mutlolim vo magnnea pustokatulean vachlolim oxim asunchim nhoi. (Matev 6:7, 8) Ami khuincheai moriadechea stithint, khuincheai vellar, ani khuincheai zaguar magnnem corunk soktat. Amchea callzant gopchip mutlolim magnnim passun Dev aikunk sokta. (1 Samuel 1:12, 13) Amchim khaxa magnnim munnonk êk susamadhan zago dusrea loka thaun pois oso sodhun cadlear boro.—Mark 1:35.
4. Cosle vixay tum magonk soktai? Kiteim zem tujea tachethaim aslolea ixttagothic ghodie porinnam corta tem. (Filipkarank 4:6, 7) Nomono magnnem dacoita qui ami Jehovachea nanvank lagon ani udhexavixen magonk zai. Ami amcheo bhovtik gorzo purvoto corunk lagon, amchim patkam bhogxiunk lagon, ani tallnneo portikar corunk mozot corunk lagon passun magom soktão. (Matev 6:9-13) Amchim magnnim apsuvadthi aschim noim. Devachea khoxek manvotat teoch vostu focot ami magonk zaeo.—1 Juanv 5:14.
5. Zednam tumchem calliz Devak upcar mandunk vo orgam diunk chant marta tednam tumi magnnem corum eta. (1 Itihas 29:10-13) Zednam tumcam somoxa etat ani tumchea bhavadthachi porikxa zata tednam tumi magnnem corunkuch zai. (Stotram 55:22; 120:1) Tumchim jevonnam tumi jeunchea adim magnnem corop zoktem zavun asa. (Matev 14:19) “Dor êk porsongar” magnnem corunk Jehovah amcam amontronn dita.—Efezkarank 6:18, NW.
6. Zor tor ami êk khor patok adartão tor ami kherit corun magnnem corpachi goroz asa. Oslea vellar ami Jehovachea kakutichi ani bogsonneanchi bhik magonk zai. Zor tor ami amchim patkam taka cobul cortão ani dusor ti nam adarunk amchean zata tem cortão, tor Dev “bogsunk toyar” asa.—Stotram 86:5, NW; Mhonnʼnneo 28:13.
7. Jehovah focot nitivont munxanchim magnnim aicota. Tumchim magnnim Devan aikunk zai, tor tumi tachea caidheam pormonnem jieunk tumchean zata titlo proyotn corunk zavo. (Mhonnʼnneo 15:29; 28:9) Magnnem cortanam tuvem khalto uronk zavo. (Lukas 18:9-14) Tum magnnem cortai taka lagon tuvem kam corchi goroz asa. Heaporim tum xabit cortai qui tuca patienni asa ani tum kitem munttai tacho orth khoroch zanaim. Fokot tea vellar Jehovah tujim magnnim porthipall cortolo.—Hebrevank 11:6.