Bhag 9
Tumchea Kuttumba Sangata Jehovachi Bhokti Korat
“Zannem rochleat sorg ani sonvsar, . . . Taka saxttangim poddun nomoskar korat.”—Prokasovnni 14:7
Tumkam ani tumchea kuttumbak modot kortat toslim zaitim Bible-antlim totvam tumi hea pustikent xikleant. Tumi khuxal aslolim Jehovak zai. Tumi tachi bhokti poilea zagear dovorli zalear, her “soglleo vostu To tumkam ditolo” mhunn bhasaita. (Matev 6:33) Tumi tachim ixttam zalʼlim taka zai. Tor tachea sangata ixttagot korunk dor ek poristhiticho boro upeog korat, karonn ho ek vhoddantlo-vhodd sueog zaun asa.—Matev 22:37, 38.
1 JEHOVA SANGATA TUMCHO SOMBOND GHOTT KORAT
BIBLE KITEM SANGTA: Jehova mhunntta, “Hanv tumcho Bapui zatolom, ani tumi zatoleat Mhoje put ani Mhojeo dhuvo.” (2 Korintkarank 6:18) Tumi tachim ghott ixttam zalʼlim Devak zai. Ani hem korunk ek vatt mhunnttlear magnnem korun. Jehova sangta, “Thambonastana magnnem korat.” (1 Tesalonikekarank 5:17) Tumchim chintnam ani uske aikonk to axeun ravta. (Filipkarank 4:6) Tumchea kuttumba sangata magnnem kortat tednam tumi Devacher kitlim patietat tem tim pollounk xoktolim.
Deva lagim ulounchea borabor tumi tachem aikonk zai. Devachem aikotolim zalear tumi Bible ani Bible adarit prokaxonancho obheas korunk zai. (Stotr 1:1, 2) Tumi xiktat tacher niall korat. (Stotr 77:11, 12) Devachem aikonk anik ek vatt mhunnttlear sodanch Kristi mittingek hajir zavop.—Stotr 122:1-4.
Jehova sangata tumcho sombond ghott korunk anik ek mhotvachi vatt mhunnttlear tache vixim dusreank sangop. Jitlim tumi tache vixim uloitolim titlim tumi tachea lagim soronk pavtolim.—Matev 28:19, 20.
TUMI KITEM KORUNK ZATA:
Sodanch Bible vachunk ani magnnem korunk vell kaddat
Tumchea kuttumba sangata Jehovachi ixttagot ghott zata toslea kamank monoronjon ani visova poros chodd mhotv diat
2 KUTTUMBIK BHOKTECHO SONTOS GHEIAT
BIBLE KITEM SANGTA: “Jitlim tumi Devak lagim sortat, titlo Dev tumkam lagim sortolo.” (Jakob 4:8) Dor sumanak kuttumbik bhokti korunk manddavoll korop ani tea pormonnem vavr korop gorjechem. (Utpoti 18:19) Punn titlench kelear puro nhoi. Dev tumchea jivitant sodanch asonk zai. “Ghorant visov ghetana, bhair-bhitor sortana, nhidtana ani utthtana” Deva vixim uloun tachea sangata tumchea kuttumbachi ixttagot ghott korat. (Dusri Somurt 6:6, 7) Joshua bhaxen zaiat. Tannem mhunnttlem, ‘hanv ani mhojem kuttumb Jehovachi seva kortoleanv.’—Joshua 24:15.
TUMI KITEM KORUNK ZATA:
Tumchea kuttumbantlea dor ekleacheo gorzo monant dovrun dor sumanank tankam tea vixoi-acher proxikxonn diunk ek bori manddavoll korat