Job Konn Aslo?

Uz nanvachea desant, Jehovachi bhokti korpi ek munis aslo. Tachem nanv Job. To khub girest aslo ani tachi ek vhoddli famil asli. To goribank, vidvank ani onath bhurgeank modot kortalo. To sodanch borem tench kortalo. Dekhun tachea jivitant kednanch dukh-tras ieunk nant oxem kai?

Soitan Jobak polloitalo, punn Jobak hi khobor nasli. Jehovan Soitanank sanglem: ‘Tunvem mhozo sevok, Jobak polloila? Tachea sarko prithumer anik konnuch na. To mhojem utor aikota ani sarkem tench korta.’ Soitanan sanglem: ‘To tujem kiteak aikochona. Itlim besanvam tunvem taka dileant. Tum taka rakhta, ani tunvem taka itli vhoddli zomin ani zaitim zonvaram dileant. Tum hem soglem tachea thaun kaddun gheit zalear to tuji bhokti korop bond kortolo.’ Tednam Jehovan mhunnttlem: ‘Tum Jobachi porikxa gheun polloi. Punn fokot tacho jiv tum kaddum naka.’ Jehovan, Soitanak Jobachi porikxa gheunk kiteak dili? Karonn, Jehovak khatri asli ki Job apli bhokti korop kednanch bond korchona.

Jobachi porikxa gheunk Soitan taka zaite tras dita. Sogleant poilim to Sabeiankar-ank dhaddtta. He lok Jobacheo gaio, boil ani gaddvam chorun vhortat. Tea uprant Soitan, uzo dhaddun Jobachea menddreank lasun uddoita. Magir to Kaldeikarank dhaddtta ani he lok Jobachea unttank chorun vhortat. Jobachea zonvaranchi rakhonn kortolea chakrank pasun Soitan marun uddoita. Tea uprant, to Jobacher anikui kotthin tras haddtta. Te mhunnttlear, jea ghorant tachim soglim bhurgim jevtalim, tem ghor moddon tancher poddtta. Ani tim soglim mortat. Haka lagon Job khub dukhi zata. Punn to Jehovachi bhokti korop soddun dina.

Soitan, Jobak anikui tras diunk sodhtalo, dekhun tannem Jobachea akʼkhe kuddicher, vhoddle-vhoddle fodd ieum-xe kele. Tea foddank lagon taka khub tras zatale. Hem soglem kiteak zata, tem taka khobor nasli. Punn torui to Jehovachi bhokti korit ravlo, ani taka lagon to Jehovak khub manvolo.

Tachea uprant, Soitan Jobachi anikui porikxa korunk tin munxank dhaddtta. Te Jobak sangtat: ‘Tunvem lipon kitem tori vaitt vo koslem tori patok kelam astolem. Dekhun Dev tuka xikxa dita.’ Job sangta: ‘Hanvem kainch vaitt korunk na.’ Punn uprant Jobak disonk lagta ki ghoddie hem soglem Jehovach tacher dhaddta. Ani Dev aplea sovem onʼneai korta oxem Job-ak dista.

Hem soglem Elihu nanvacho ek munis vogi boson aikotalo. Punn uprant to ulounk suru korta ani mhunntta: ‘Tumi sogleamnim sanglam tem chukichem asa. Jehova itlo vhodd asa ki ami taka purnn toren kennach somzonk pavchimnant. To kednanch vaitt korunk xokona. To soglem polloita ani trasant asloleank modot korta.’

Uprant, Jehova Joba lagim uloita. To vicharta: ‘Hanvem prithum ani sorg rochlo tednam tum khoim aslo? Hanv onʼneai korta mhunn tum kiteak mhunntta? Jem kitem ghoddtta tem kiteak ghoddtta ti tuka khobor na, torui tum uloita.’ Tednam apunn chuklo mhunn Jobak kolltta. Ani to mhunntta: ‘Mhoji chuk zali. Hanvem tuje vixim fokot aikolʼlem. Punn atam hanv tuka bore toren vollkhotam. Tujean korunk zaina toslem kainch na. Hanvem jem kitem sanglem taka lagon please mhaka bhogos.’

Porikxa kabar zalea uprant, Jehova Jobachem duens borem korta. Ani poilim tachea lagim jem kitem aslolem tachea poros chodd taka dita. Ani tea uprant Job zaitim vorsam khuxalkaien jieta. Kotthin aslear pasun, Joban Jehovachem aikolem mhunn taka zaitim besanvam mellʼllim. Tor tuka kotthin aslear pasun, Joba bhaxen tum Jehovachi bhokti korit ravtolo?