Jezu Mesias Zata

Juanv oxi porgottnni kortalo: ‘Mhojea-von vhodd konn tori ieuncho asa.’ Jezu sumar 30 vorsancho zalo tednam, to Galilie thaun Jordan nodi-xim voita, zoim Juanv lokank bautizm ditalo. Apleakui bautizm di mhunn Jezu Juanvak sangta. Punn Juanv mhunntta: ‘Mhojean tuka bautizm koso diunk zata? Tunvem mhaka bautizm diunk zai.’ Jezu taka sangta: ‘Tunvem mhaka bautizm dilʼlo Jehovak zai.’ Tor te Jordan nodint voitat, ani Juanv Jezuk purnn ritin udkant buddoun bautizm dita.

Jezu udkantlo bhair ieun magnnem korta. Teach vellar, sorg ukto zata ani Devachi povitr xokti, parvea bhaxen tacher denvon ieta. Tea uprant sorgar thaun Jehova oso uloita: “Tum mhozo opurbaiecho Put, tum mhaka manvola.”

Jehovachi povitr xokti Jezucher ieta tednam, to Mesias vo Krist zata. Ani tea uprant, Jehovan taka jea pasot hea prithumer dhaddlolo, tem kam to suru korta.

Bautizma uprant, Jezu rokddoch oronnʼnneant voita ani 40 dis thoinch ravta. Thoim thaun ailea uprant, to Juanvak mellonk voita. Jezu ieta tem polloun, Juanv oxem mhunntta: ‘Hoch Devacho Menddro, zo sonvsarachim patkam kaddun uddoitolo.’ Tor oxem sangon Jezuch Mesias mhunn to lokank sangonk sodhtalo. Punn Jezu oronnʼnneant astana, tachea sovem kitem ghoddlem tem tum zannam? Hea vixim fuddlea lisanvant polloum-ia.