Kristi Dhorm Zaitea Desamnim Posorta

Jezuchi adnea pallun tache apostl prithumechea soglea zageancher bori khobor porgott kortat. 47 K.X.-ant, Antiok-antle bhav Pauluk ani Barnabasak porgottnnechea eke bhonvddek dhaddttat. Te dogui urben soglea Asia Minor-achea xaramnim porgottnni kortat. Zoxem Derbe, Listra ani Ikoniumant.

Paulu ani Barnabasan soglea lokank mhunnche girestank, goribank, zantteank ani tornnatteank porgottnni keli. Ani zaiteamnim, Krista vixim sot apnnailem. Paulu ani Barnabas, Siprus zunveacho razpal, Sergius Paulusak porgottnni kortana, ek jadugar tankam addaita. Tednam Paulu tea jadugarak sangta: ‘Jehova tuka xikxa dium.’ Teach vellar, to jadugar kuddʼddo zata. Hem polloun Razpal Paulus Kristanv zata.

Paulu ani Barnabas sogleak porgottnni kortat. Mhunnche, te ghora-ghoramnim, bazaramnim, rosteancher ani sobha-ghoramnim pasun porgottnni kortat. Ek pavtt, te Listrant eka longddea munxak bore kortat. Ani hem vizmit polloun, thoincho lok tankam dev mhunn somzotat ani tanchi bhokti korunk sodhtat. Punn Paulu ani Barnabas tankam addaitat ani oxem mhunnttat: ‘Fokot Devachich bhokti korat! Ami tor tumchea bhaxenuch munis.’ Punn thodde Judev thoim ietat ani lokank Pauluchea add vochonk uksaitat. Tednam lok Pauluk fatraitat ani to melo mhunn somzon taka voddit vhoron, xarachea bhair uddoitat. Punn Paulu moronk naslo. Rokddech thoinche bhav taka modot korunk ietat ani taka xarant porot haddttat. Uprant, Paulu porot Antiokant voita.

49 K.X.-ant, Paulu porgottnnechea dusre bhonvddek voita. Asia Minor-antlea bhavank mellon zalea uprant to anikui pois, mhunnche Europe-ak voita. Thoim to Athens, Efez, Filipi, Tesalonika ani dusrea xaramnim vochon bori khobor porgott korta. Hea bhonvddechea vellar, Silas, Lukas ani Timot nanvacho tornatto Paulu sangata voitat. Thoim noveo sobha toiar korunk ani tankam ghottai diunk te sangata mellon khub vavr kortat. Paulu dedd voros Korintant ravta ani thoinchea bhavank ghottai dita. To thoim porgottnni korta, xikoita ani sobhank chitti boroita. Toxench, to tombu korpachem kam korta, ani uprant Antiokant porot ieta.

Magir, 52 K.X.-ant, Paulu porgottnnechea tisrea bhonvddek voita. To Asia Minor-a thaun apli bhonvddi suru korta. To khub pois provas korta. To utʼtore vatten Filipi poriant voita ani thoim thaun sokol Korint poriant provas korta. Paulu Efezant zaitim vorsam ravta. To thoinchea lokank xikoita, duentank borim korta ani thoinchea sobhank modot korta. To eka Iskolachea holant pasun dor disak bhaxonn dita. Tachem bhaxonn aikon zaito lok aplea jivitant bodlav kortat. Hea toren, zaitea desamnim bori khobor porgott kelea uprant Paulu xevottak Jeruzalemant voita.