Jehova ‘Jivo Dev’ Mhunn Sodanch Ugddas Dovrat

1. Tras sosunk poddlear pasun Jehovachi seva korit ravonk amkam koxi modot zata?

AMI ekdom ‘trasan bhorlolea vellar’ jietat mhunn Bible-ant sanglam. (2 Tim. 3:1) Soitanachea hea noxttea sonvsarant, her lokank sosunk poddttat te tras amkam-i sosunk poddttat tem khorem. Punn hachea bhair, ami Jehovachi seva kortat dekhun, amkam virodh ani dhumalleacho pasun fuddo korunk poddtta. Punn he sogle tras asonui, Jehovachi seva korit ravonk amkam koxi modot zata? Jehova ek “jivont Dev” hem ugddas dovorlolean.​—Jer. 10:10; 2 Tim. 1:12.

2. Jehova vixim kitem zannam zalʼlean amkam modot zata?

² Jehova ek jivo Dev zaun asa. Amkam koslea oddchonneancho fuddo korunk poddtta tem to ekdom boro bhaxen zannam. Ani amkam modot korunk to sodanch toiar asta. (2 It. 16:9; St. 23:4) Amcho mogall Dev Jehova amchi kallji gheta ani amkam modot korunk fuddem sorta mhunn ami ugddas dovortat tednam, amkam koslea-i oddchonneancho fuddo korunk modot zata. Hench Raza Davidan onnbhovlem. Tea vixim ami fuddem polloum-ia.

3. Davidan “Sorvespor jivo asa” oxem mhunnttlem. Hea utrancho orth kitem aslo?

³ David Jehovak bore bhaxen vollkhotalo ani to tacher sodanch patieun ravlo. Raza Saulu ani her dusman Davidacho jiv kaddunk sodhtale tednam tannem modotik lagon Jehova lagim magnnem kelem. (St. 18:6) Ani Jehovan tachea magnneak zobab dilo ani taka salvar kelo tednam Davidan mhunnttlem: “Sorvespor jivo asa.” (2 Sam. 22:47) Davidachea hea utrancho orth kitem aslo? “Jehova ek khoro Dev zaun asa, zo aplea sevokank soglea vellar modot korunk toiar asta” oxem David sangonk sodhtalo mhunn eka pustokant sanglam. Davidan aplea jivitant jem kitem onnbhovlem tantuntlean Jehova ek jivo Dev mhunn tachi khatri ghott zali. Hea vorvim Jehovachi seva ani vakhannʼnni korit ravonk tacho nichov ghott zalo.​—St. 18:28, 29, 49.

4. Jehova jivo Dev mhunn khatri aslolean amkam kosle faide asat?

⁴ Jehova jivo Dev mhunn khatri aslolean, urben tachi seva korunk amkam modot zatoli. Toxench tras ailear pasun, te sosunk amkam boll mellttolem, ani Jehovache sevent vavr korit ravonk ami fuddem sortolim. Tea bhair, Jehovak chittkon ravonk ami amcho nichov ghott korunk pavtolim.

JIVO DEV TUMKAM GHOTTAI DITOLO

5. Amchea oddchonneancho fuddo korunk amkam kosli khatri asonk zai? (Filipkarank 4:13)

⁵ Jehova ek jivo Dev ani to amkam modot korunk xokta mhunn ami ugddas dovortat tednam, amkam kitli-i vhoddli oddchonn sosunk poddlear pasun ami ti sosunk pavtolim. Karonn kosli-i oddchonn Jehova mukhar vhodd nhoi! To Sorvpodvedar Dev zaun asa, ani amcher ietat te tras sosunk to amkam xokti diunk xokta. (Filipkarank 4:13 vachat.) Hea vorvim ami dhiran tancho fuddo korunk xoktat. Lhan-lhan oddchonneam vellar Jehova amkam modot korta mhunn ami onnbhovtat tednam, vhoddlea oddchonneam vellar pasun to amkam modot kortolo mhunn amchi khatri vaddttoli.

6. David lhan aslo tednam tachea jivitantlea khoinchea ghoddnneank lagon Jehovacher tacho visvas anikui ghott zalo?

⁶ Ami Davidachea jivitant ghoddlolea don ghoddnneancher dhean dium-ia. Lhan astana aplea bapaichea menddranchi dekhrekh kortana, ek pavtti eka vanxelan, ani anik ek pavtti eka xinvan tachea bapaichea menddrank dhorun voile. Punn tea donui vellar Davidan tea zonvaram thaun aplea bapaichea menddrank vanchoile. Hem to apleach xokten korunk xoklona, punn toxem korunk Jehovanuch taka xokti dilʼli mhunn taka khatri asli. (1 Sam. 17:34-37) Heo ghoddnneo David kednanch visronk na. Ani tancher niall kelʼlean, fuddarak pasun Jehova taka modot kortolo mhunn taka purnn khatri mellʼlli.

7. Kitem kelʼlean David Goliata add zhuzonk pavlo?

⁷ Uprant, David chodd korun tornnatto aslo tednam Izraelachi fouz asli thoim to gelo. Punn thoim pavlea uprant sogle Izraelitkar soinik bhielʼle tem tannem polloilem. Karonn Goliat nanvachea eka lamb Filistevkaran ‘Izraelache foujek avhan vo dhomki dilʼli.ʼ (1 Sam. 17:10, 11) Tea soinikamnim Goliat kitlo vhoddlo asa, ani to tankam kitem sangta tacher dhean dilʼlem dekhun te khub bhielʼle. (1 Sam. 17:24, 25) Punn Davidan hea vostuncher dhean diunk na. Goliatan fokot Izraelache foujek nhoi, punn “jivea Devache foujek” dhomki dilʼli mhunn tannem polloilem. (1 Sam. 17:26) Tor David Jehova vixim chintʼtalo. Ani apunn ek gonvlli aslo tednam Jehovan apleak jea ritin modot kelʼli, teach toren hea poristhiticho fuddo korunk pasun to apleak modot kortolo mhunn Davidak visvas aslo. Tor Jehovache modotin to Goliata add zhuzlo ani taka zoit mellʼllem.​—1 Sam. 17:45-51.

8. Jehova amkam modot korunk toiar asa mhunn amcho visvas ami koso vaddounk zata? (Chitr pasun polloiat.)

⁸ Amcho jivo Dev Jehova amkam modot korunk sodanch toiar asa mhunn ugddas dovorlolean, ami pasun oddchonneancho fuddo korunk pavtolim. (St. 118:6) Tor Jehova amkam modot korunk toiar asa mhunn amcho visvas ami koso vaddounk zata? Ami Bible-ant oslea ghoddnneam vixim vachunk zata jednam Jehovan aplea adlea visvaxi sevokank modot keli. (Iz. 37:17, 33-37) Toxench, aichea kallar Jehovan amchea bhav-bhoinnank koxi modot kelea, tea vixim jw.org website-icher aslole ripott ami vachunk vo pollounk zatat. Tea bhair, Jehovan amkam koxi modot kelea tem ami ugddas korunk zata. Punn hea vixim ugddas kortana, Jehovan Davidak ojapache ritin vanxela ani xinva add zhuzonk modot keli tea toren amkam korunk na, oxem amkam disot. Punn khorem mhunnttlear, Jehovan amchea pasot zaitem kelam. Aplim ixttam zaunk tannem amkam aplea sorxim voddun haddleant. (Ju. 6:44) Toxench atam pasun, to amkam modot korta dekhunuch ami tachi seva korit asat. Tor Jehovan amchea magnneancho koso zobab dila, vo amkam ekdom goroz asli tednam koxi modot kelea, vo ekdom kotthin poristhitint koxe toren amchi kallji ghetlea, tem amchea ugddasak hadd mhunn ami tachea lagim magonk zata. Hea toren niall kelʼlean, Jehova amkam atam modot korta toso fuddem pasun korit ravtolo mhunn amchi khatri vaddttoli.

9. Amcher oddchonneo ietat tednam ami kitem ugddas dovrunk zai? (Mhonnʼnneo 27:11)

⁹ Jehova ek jivo Dev mhunn ugddas dovorlolean, amchea oddchonneam vixim sarkem chintop dovrunk amkam modot zatoli. Koxi? Oddchonneo ietat tednam kitem chodd mhotvachem tem ami ugddas dovrunk zai. Tem mhunnttlear, trasanchea vellar ami Jehovachi seva korop bond kortolim mhunn Soitanan amcher arop ghatla. (Job 1:10, 11; Mhonnʼnneo 27:11 vachat.) Punn ami Jehovak visvaxi ravtat tednam, ami tacho mog kortat ani Soitan fottkiro mhunn ami dakhoitat. Amkam ghoddie sorkari odhikaream thaun dhumallo sosunk poddot, vo poixeanchem unnemponn asot, vo ami porgottnni kortat tea vattarant lok amchem aikonant zait, vo amkam her oddchonneo asot. Punn tea vellar ami ugddas dovrunk zai ki Jehovachem kalliz khuxal korunk hi amkam ek bori sondhi asa. Toxench, amchean sosunk zaina tachea poros chodd Jehova amkam sosunk diunchona. (1 Kor. 10:13) To soglea vellar amkam ghottai ditolo.

JIVO DEV TUMKAM INAM DITOLO

10. Apleachi bhokti kortoleam pasot jivo Dev Jehova kitem korta?

¹⁰ Apleachi bhokti kortoleank Jehova sodanch inam dita. (Heb. 11:6) To atam amkam dhadosponn ani xanti dita, ani fuddarak sasnachem jivit ditolo. Jehova amkam inam diunk sodhta, ani taka toxem korunk xokti asa mhunn ami tacher purnn visvas dovrunk zata. Heach karonnak lagon, tachea adlea visvaxi sevokam bhaxen ami tachea sevent amchem boreantlem-borem diunk sodhtat. Ani oxench poilea xekddeant Timotan kelem.​—Heb. 6:10-12.

11. Jehova ani bhav-bhoinnam pasot Timotan khub vavr kiteak kelo? (1 Timotak 4:10)

¹¹ 1 Timotak 4:10 vachat. Apunn korta tea vavra pasot, jivo Dev Jehova apleak inam ditoloch mhunn Timotak ghott bhavarth aslo. Taka lagon, Jehova ani bhav-bhoinnam pasot tannem khub vavr kelo. Koslo? Apostl Paulun taka porgottnnent ek boro xikoupi ani sobhent ek boro uloupi zaunk vaddavoll korunk sanglem. Toxench, tannem Timotak zannttea ani nennttea bhav-bhoinnam pasot ek bori dekh dovrunk sangli. Tea bhair, Timotak thoddeo kotthin zobabdareo asleo. Zoxem goroz asli tednam, taka bhav-bhoinnank mogan punn koddok utramnim xist diunk poddttali. (1 Tim. 4:11-16; 2 Tim. 4:1-5) Timot kortalo tem soglem kam bhav-bhoinnam thodde pavtti pollounk xokonaslim, vo tim tacho valor korinaslim. Punn apunn Jehovache sevent jem kitem korta tem soglem Jehova polloita ani to apleak inam ditoloch mhunn Timotak purnn khatri asli.​—Rom. 2:6, 7.

12. Vhoddil apleo zobabdareo purnn korunk khub vavr kiteak kortat? (Chitr pasun polloiat.)

¹² Aiz vhoddilamnim pasun khatri dovrunk zata ki Jehova tancho vavr polloita ani to tacho khub valor korta. Vhoddilank zaiteo zobabdareo astat. Zoxem gonvlli bhett korop, xikovop ani porgottnni korop. Punn hachea bhair zaite vhoddil songottnnechea bandkamant bhag ghetat ani odruxttank sampoddloleank modot kortat. Ani thodde vhoddil, Patient Visitation Groups vo Hospital Liaison Somitint seva kortat. Vhoddilank khobor asa ki sobha khoinchea-i munxachi nhoi, punn Jehova Devachi zaun asa. Tea pasot apleak asloleo zobabdareo purnn korunk te khub vavr kortat. Ani Jehova tankam tanchea vavracho inam ditoloch mhunn tankam purnn khatri asa.​—Kol. 3:23, 24.

13. Jehovache sevent ami jem kitem kortat tem polloun taka koxem bhogta?

¹³ Ami soglim vhoddil mhunn seva korunk xokonant tem khorem. Punn ami sogleamnim, Jehova pasot kitem-na-kitem korunk zata. Ami tachea sevent amchean zata tem soglem kortat tednam, Jehovak tem khub moladik asa. Zoxem, sonvsarbhorchea kamant ami denngim ditat tednam, Jehova tacho valor korta. Ami chodd diunk xokonant zalear pasun, tem tachea nodre bhair vochona. Toxench bhirant vo lojek lagon ami mittingek zobab diunk fattim-fuddem zatat astolim. Torui, ami zobab diunk hat voir kaddttat tednam, Jehovak khub borem dista. Tea bhair amkam konnem-i dukhoilear pasun, ami tankam bhogxitat tednam Jehova khub khuxal zata. Punn ami Jehovache sevent korunk sodhtat titlem amchean korunk zaina oxem dislear pasun, ami jem kitem kortat tacho Jehova khub valor korta mhunn ami khatri dovrunk zata. To amcho mog korta ani amkam inam ditoloch!​—Luk. 21:1-4.

JIVEA DEVAK CHITTKON RAVAT

14. Jehova jivo Dev mhunn ugddas dovorlolean taka visvaxi ravonk amkam koxi modot zatoli? (Chitr pasun polloiat.)

¹⁴ Jehova jivo Dev mhunn ami ugddas dovortat zalear, taka visvaxi ravonk amkam sompem zatolem. Hea vixim amkam Juzechem udharonn asa. Jehova jivo Dev mhunn tannem ugddas dovorlem dekhun taka manvona toslem kainch to korunk sodhinaslo. Tor tannem onoitik kam korunk saf nakarlem. (Ut. 39:9) Jehova jivo Dev mhunn sodanch ugddas dovrunk, ami tache lagim magnnem korunk ani tachea Utracho obheas korunk vell kaddunk zai. Oxem kelear, tachea sangata amchi ixttagot ghott zatoli. Ani Juze bhaxen Jehovak manvona toslem kainch ami korunk sodhchimnant.​—Jak. 4:8.

15. Oronnʼnneant Izraelitkaram sangata jem ghoddlem tantuntlean ami kitem xiktat? (Hebrevank 3:12)

¹⁵ Jehova jivo Dev mhunn ugddas dovornant tim sompeponnim tachea thaun pois vochonk xoktat. Oronnʼnneant Izraelitkaram sangata kitem ghoddlem tacher dhean diat. Jehova asa mhunn tim zannam aslim. Punn to tanchea gorzanchi kallji ghetolo vo na mhunn tim dubhavunk laglim. Tannim oxem pasun vicharlem: “Sorvespor amche vatten asa ki na?” (Sutt. 17:2, 7) Ani hea pasot, tim uprant Deva add gelim. Tanchem udharonn aiz amkam ek xittkaunni zaun asa. Ani ami tanche bhaxen kednanch zaunk sodhinant.​—Hebrevank 3:12 vachat.

16. Jehova Devak chittkon ravonk amkam kiteak kotthin zaunk xokta?

¹⁶ Punn ami jietat tea noxttea sonvsarant Jehova Devak chittkon ravop titlem sompem na. Karonn zaitim zannam Dev na oxem mhunnttat. Toxench, choddxim zannam Devachea dorjeam pormonnem jienant. Tori astana, him munxam khuxal asat oxem amkam dista. Ani hea karonnak lagon, amcho bhavarth halonk xokta. Dev asa mhunn ami kednanch dubhavchimnant tem khorem. Punn to amkam modot kortolo kai na mhunn ami dubhavunk xoktat. Oxench, Stotr 73-achea boroupeak ghoddlem. Tachea bhonvtonnim aslole lok Devache kaide pallinasle. Tori astana te khuxal asat mhunn tannem polloilem. Hea karonnak lagon, Devachi seva korun faido asa kai na mhunn to dubhavunk laglo.​—St. 73:11-13.

17. Jehovak chittkon ravonk amkam koxi modot zatoli?

¹⁷ Stotrkarak aplem chintop sarkem korunk koxi modot zali? Jehova jivo Dev mhunn visortat tancho porinnam kitem zatolo, tea vixim tannem niall kelo. (St. 73:18, 19, 27) Toxench, Jehovachi seva kelʼlean apnnak koslim besanvam mellʼlleant tem tannem ugddasak haddlem. (St. 73:24) Ami pasun, Jehovan amkam koslim besanvam dileant tacher niall korunk zai. Ani ami Jehovachi seva korinaslim zalear, amchem jivit koxem astolem aslem tea vixim ami chintunk zata. Oxem kelear, visvaxiponnan Jehovachi seva korit ravonk amkam modot zatoli, ani stotrkara bhaxen ami pasun mhunnttolim: “Hanv zalear Deva sorxim dhadoxi asam.”​—St. 73:28.

18. Fuddara vixim amkam kiteak bhieupachi goroz na?

¹⁸ Hea nimannea disamnim amcher kosleo-i oddchonneo ieum, ami tancho fuddo korunk xoktolim. Karonn ami “jivea ani khorea Devachi bhokti” kortat. (1 Tes. 1:9) Jehova Devak amchi khub kallji asa ani to sodanch amkam modot kortolo. Adlea kallar pasun, tannem aplea visvaxi sevokank soddunk na. Ani aizui to amkam soddun diunchona. Toxench, beginuch vhodd sonkoxtt ietolo tednam pasun, ami ekttinch aschimnant. Jehova amchea sangata astolo. (Iz. 41:10) “Tor ami dhiran oxem mhunnom-ia: ‘Jehova mhozo modot korpi zaun asa, hanv bhieunchona.’”​—Heb. 13:5, 6.