Gombhir Patok Kelam Tanchea Sangata Sobhen Koxem Vaglolem Jehovak Zai?

1. Jehovak kitem zai?

AMI svota pasot nirnnoi gheunk Jehovan amkam svotontrtai dilea. Ami dor disak zaite nirnnoi ghetat. Punn eka munxan gheunk zata to sogleam-von mhotvacho nirnnoi mhunnttlear, aplem jivit Jehovak somorponn korun tachea familicho bhag zavop. Sogleamnim oxem kelʼlem Jehovak zai. Karonn Jehova soglea lokancho mog korta ani soglim khuxal aslolim taka zai. Toxench, ami sogleamnim tachea sangata ek lagxilʼli ixttagot zoddloli ani sasnak jielʼlim taka zai.—D.S. 30:19, 20; Gal. 6:7, 8.

2. Gombhir patok adarlam tannim kitem kelʼlem Jehovak zai? (1 Ju. 2:1)

² Punn Jehova konnankuch apli bhokti korunk fors korina. Tannem ho nirnnoi dor eka munxacher soddla. Tor bautizm ghetlea uprant ek munis gombhir patok adarta zalear kitem? To poschatap korina zalear taka sobhentlean bhair kaddttat. (1 Kor. 5:13) Tori astana, tannem poschatap korun porot aplea sangata ek lagxilʼli ixttagot zoddloli Jehovak zai. Khorem mhunnttlear, Jehovan soddvonnechem dennem diunk ek mhotvachem karonn mhunnttlear, poschatap kortat tankam bhogsonnem mellʼllolem Jehovak zai aslem. (1 Juanv 2:1 vachat.) Amcho mogall Bap Jehova, gombhir patok adarta tankam poschatap korun porot aplea lagim ieunk urba dita.—Zek. 1:3; Rom. 2:4; Jak. 4:8.

3. Ami hea lekhant kitem polloitolim?

³ Patka vixim ani gombhir patok kelam tea munxa vixim Jehovak koxem bhogta tem to amkam kolloita. Ani ami pasun tachem chintop apnnailʼlem Jehovak zai. Ami hem koxem korunk zata tem ami hea lekhant polloitolim. Tor ho lekh vachtana, (1) poilea xekddeantlea Korint sobhent eklean gombhir patok kelem tednam apostl Paulun sobhek kitem sanglem, (2) tea patki munxan poschatap kelo tednam apostl Paulun tankam kitem sanglem, ani (3) hea ghoddnnentlean gombhir patok korta tea munxa vixim Jehovak koxem bhogta mhunn amkam kolltta, tacher dhean diat.

EKA BHAVAN GOMBHIR PATOK KELEM TEDNAM PAULUN SOBHEK KITEM SANGLEM?

4. Poilea xekddeantlea Korint sobhent kitem choltalem? (1 Korintkarank 5:1, 2)

⁴ 1 Korintkarank 5:1, 2 vachat. Paulun tachea tisrea mixinori bhonvdde vellar, vitt haddtta tosli ek khobor aikoli. Ti mhunnttlear, novich stapon zalʼlea Korint sobhentlo ek bhav aplea bapaichea baile sangata onoitik kuddicho sombond dovortalo. Tea munxachi vagnnuk ekdom hollxikechi asli ani ‘sonvsarantlo lok pasun toxem korinaslo.’ Ani ojapachem mhunnttlear, sobhentlea bhav-bhoinnamnim to munis jem korta, tantunt kainch vaitt na oxem chintlem. Ani tannim taka sobhentlean bhair pasun kaddunk na. Kiteak? Jehova opurnn munxak doia ani somjikai dakhoita tea toren, tim pasun dakhoitat oxem thoddim chintʼtalim zait. Punn aplea lokam modem, vitt haddtta toslim kamam korop Jehovak matui manvona. Hea munxachea gombhir patkak lagon, Jehovachi bhokti korinasle te lok hi khobor aikon sarke thottakle ani te Jehovachea lokam vixim vaitt ulounk lagle. Toxench to munis sobhentuch aslo dekhun, tacho vaitt probhav her bhav-bhoinnancher pasun poddonk xoktalo. Tor Paulun sobhek kitem korunk nirdexon dilem?

5. Paulun sobhek kitem korunk sanglem, ani tacho orth kitem aslo? (1 Korintkarank 5:13) (Chitr pasun polloiat.)

⁵ 1 Korintkarank 5:13 vachat. Jehovachea preronnan, Paulun tea sobhek chitt boroili ani poschatap korina tea patkeak sobhentlean bhair kaddcho mhunn sanglem. Tor visvaxi Kristanvamnim tachea sangata koxem vagonk zai aslem? “Oslea munxa sangata vell sarop bond korat” mhunn Paulun tankam sanglem. Hacho orth kitem? “Oslea munxa sangata jevunk poriant bosonakat” mhunn Paulun fuddem somzailem. (1 Kor. 5:11) Karonn eka munxa sangata ami jevunk bostat tednam, ami tachea sangata uloitat ani vell sartat. Punn tannim oxem kelʼlem Pauluk naka aslem. Tannim oslea eka munxa sangata vell sarchoch nhoi mhunn Paulu tankam sangonk sodhtalo. Oxem kelʼlean, tacho vaitt probhav sobhecher poddcho naslo. (1 Kor. 5:5-7) Toxench tea patki munxak pasun, apnnem Jehovak kitlo dukhoila tem kollon ietolem aslem, taka aplich loz distoli asli ani to poschatap korunk fuddem sortolo aslo.

6. Paulun chitt dhaddlea uprant sobhen kitem kelem, ani tea patkeacher koslo porinnam zalo?

⁶ Korint sobhek chitt dhaddlea uprant, bhav-bhoinnam aplo solʼlo koxe toren ghetolim mhunn Pauluk usko zalʼlo. Punn uprant Tit taka ek bori khobor gheun ailo tednam, Paulu ekdom khuxal zalo. Karonn sobhen Paulucho solʼlo apnnaun, tea patkeak sobhentlean bhair kaddlolo. (2 Kor. 7:6, 7) Titlench nhoi, Paulun sobhek chitt dhaddun thoddea mhoineam uprant, tea patkean poschatap kelo. Tannem aplo sobhav ani vagnnuk bodolʼli ani to Jehovachea noitik dorjeam pormonnem jieunk laglo. (2 Kor. 7:8-11) Tor atam tannem poschatap kelea uprant Paulun sobhek koslem nirdexon dilem?

TANNEM POSCHATAP KELEA UPRANT PAULUN SOBHEK KITEM SANGLEM?

7. Sobhentlean bhair kaddlea uprant tea patki munxan kitem kelem? (2 Korintkarank 2:5-8)

⁷ 2 Korintkarank 2:5-8 vachat. “Tea munxak choddxea lokamnim ji xist dilea ti puro” mhunn Paulun sanglem. Karonn sobhentlean bhair kaddlea uprant, tea patki munxan poschatap kelo. Tor sobhen taka anik xist diunchi goroz nasli.—Heb. 12:11.

8. Paulun sobhek fuddem kitem sanglem?

⁸ Paulun sobhek fuddem oxem sanglem: “Tumi doia dakhoun taka bhogsunk zai ani taka bhuzvonn diunk zai.” Toxench, “tumi tacho mog kortat mhunn taka khatri diunk” zai. Dhean diat ki Paulun sobhek tannim fokot tea patkeak porot sobhent haddcho itlench sangonk na. Punn tanchim utram, sobhav ani vagnnuke vorvim tannim khoreaninch taka bhogxila ani tim tacho mog kortat mhunn taka khatri diunk sanglem. Karonn tannim oxem kelearuch, to porot aila mhunn tim khoreaninch khuxal asat mhunn tea poschatap kelʼlea patkeak kollttolem aslem.

9. Poschatap kelʼlea patki munxak bhogsunk thoddeank kiteak kotthin zalem astolem?

⁹ Punn hea munxak doia dakhoun taka porot sobhent gheunk thoddeank kotthin zalem zait. Oxem ami kiteak mhunnonk zata? Karonn tea patki munxak lagon sobhek zaite tras zalʼle dekhun tim tacher ragar aslim astolim. Toxench, tachea hea vagnnukek lagon thoddea zannank loz bhogunk poddli zait. Tea bhair, tea sobhentlim bhav-bhoinnam Jehovache kaide pallunk khub vavr kortalim. Tor oslim gombhir patkam kelʼlea munxak porot sobhent ieukar ditale mhunn tannim aikolem tednam, tanchea modlea thoddeank aplea sangata onʼneai zala mhunn dislem zait. (Lukas 15:28-30 sor korat.) Tori astana, poschatap kelʼlea hea bhavacho tannim kallzantlean mog korop mhotvachem aslem. Kiteak?

10-11. Poschatap kelʼlea munxak vhoddilamnim bhogsunk na zalear kitem zatolem aslem?

¹⁰ Hea vixim chintat. Tea munxan poschatap kelea uprant, vhoddilamnim taka porot sobhent apnnaunk na zalear taka koxem bhogtolem aslem? Vo to porot sobhent ailea uprant bhav-bhoinnamnim taka mog dakhounk na zalear, taka koxem distolem aslem? “To dukhant buddon voitolo” aslo, ani to porot kednanch Jehovachi seva korunk xokchona oxem taka distolem aslem. Itlench nhoi, Jehova sangata apli ixttagot porot ghott korcho vavr korop to soddun ditolo aslo.

¹¹ Hachea poros vaitt mhunnttlear, bhav-bhoinnamnim taka bhogsunk na zalear, tim Jehova sangata tanchi svotachi ixttagot hogddaitolim aslim. Karonn Jehovachi dekh gheun, poschatap kortat taka bhogsunchea bodlek, tim Soitanachi dekh ghetolim aslim zo ekdom krur asa ani konnakuch doia dakhoina. Tor eka orthan, Soitan tankam uzar korun poschatap kelʼlea tea patkeak Jehovachi bhokti korina zaunk niraxi kortolo aslo.—2 Kor. 2:10, 11; Ef. 4:27.

12. Korint sobhen Jehovachi dekh koxi gheunk zatali?

¹² Tor Korint sobhentlea bhav-bhoinnamnim Jehovachi dekh koxi gheunk zatali? Poschatap kelʼlea munxam sangata Jehova jea toren vagta toxim vagon. Jehovachea bhogsonnea vixim Bible boroupeamnim kitem boroilem tacher dhean diat. Davidan mhunnttlem: “Jehova boro ani bhogsunk toiar asa.” (St. 86:5, NW) Toxench Mikan mhunnttlem: “Tuje-oslo Dev anink khoim asot? Tum guneanv kaddun uddoitai, khotteponn rokddench bhogxitai.” (Mik. 7:18) Tea bhair Izaiasan mhunnttlem: “Khottea monxamnim apli vatt sanddchi ani noxttea monxamnim aplim vaitt chintna soddun diunchim. Tannim Sorvespora-xim portun ieunchem ani To tanchi doia kortolo. Tannim amchea Deva-xim ieunchem ani udar kallzan To tankam bhogxitolo.”—Iz. 55:7.

13. Poschatap kelʼlea munxak porot sobhent apnnavop sarkem kiteak zaun aslem? (“Korint Sobhentlea Tea Munxak Sobhent Porot Kednam Ghetlo?” hem boks polloiat.)

¹³ Tor Korintantlea Kristanvamnim Jehovachi dekh gheun, poschatap kelʼlea munxak porot sobhent apnnaunk zai aslo ani tim tacho mog kortat mhunn taka khatri diunk zai asli. Paulun tankam sanglem ki tannim oxem kelear tim ‘soglea vostumnim adnea pallttat’ toslim asat mhunn dakhoun ditolim aslim. (2 Kor. 2:9) Hem khorem ki tea munxak sobhentlean bhair kaddun thoddech mhoine zalʼle. Punn taka xist mellʼllea uprant tannem poschatap kelo. Tor taka porot sobhent apnnaunk vhoddilamnim anik ravchi goroz nasli.

JEHOVA JEA TOREN NEAI KORTA ANI DOIA DAKHOITA TACHI DEKH GHEIAT

14-15. Korint sobhent jem ghoddlem tantuntlean ami kitem xiktat? (2 Pedru 3:9) (Chitr pasun polloiat.)

¹⁴ Korint sobhent ghoddloli hi ghoddnni Jehovan “amkam xikounn diunk” boroun dovorlea. (Rom. 15:4) Hea ghoddnnentlean amkam kollon ieta ki gombhir patok kelʼlo ek munis poschatap korina zalear, Jehova taka sobhent dovorna. Punn thoddim ghoddie chintit ki Jehova doiall mhunnttoch, ek munis poschatap korina zalear pasun to taka sobhent ravonk di-it. Punn khorem mhunnttlear, Jehova hea toren doia dakhoina. Jehova doiall tem khorem, punn to soglech torechi vagnnuk manun ghena. Borea ani vaitta vixim tache dorje kednanch bodolnant. (Jud. 4) Khorem mhunnttlear, poschatap korina toslea patkeank tannem sobhent ravonk dilem zalear, to doia dakhoina oxem zata. Karonn tancho vaitt porinnam sobhentlea herancher poddonk xokta.—Mho. 13:20; 1 Kor. 15:33.

¹⁵ Punn Jehovak konnanchoch nas zalʼlo naka mhunn ami zannant. Khorem mhunnttlear, soglim salvar zalʼlim taka zai. Dekhun ek patki munis aplem chintop ani vagnnuk bodlun porot Jehovachi seva korunk sodhta tednam, to taka doia dakhoita. (Ez. 33:11; 2 Pedru 3:9 vachat.) Ani heach pasot, Korintantlea tea patki munxan poschatap kelo ani apli vaitt vatt soddun dili tednam, taka bhogsun porot sobhent ieukar diunk Jehovan Paulu udexim sanglem.

16. Korint sobhentlea patki munxa sangata Jehova jea toren vaglo tem zannam zalʼlean Jehova vixim tumkam koxem bhogta?

¹⁶ Korint sobhent ghoddlolea ghoddnnentlean Jehova khorench mogall, nitivont ani sarke toren neai korta mhunn amkam kollon ieta. (St. 33:5) Hea vixim zannam zalʼlean ami taka anikui vakhannunk fuddem sortat nhoi? Karonn ami soglim patki zalʼlean amkam tachea bhogsonneachi goroz asa. Itlench nhoi, amkam bhogsunk lagon tannem soddvonnechi manddavoll keli. Hea pasot ami tache khub upkari asat. Jehova aplea soglea lokancho mog korta ani tim sodanch khuxal ravlolim taka zai hem zannam zalʼlean amkam khub bhuzvonn melltta nhoi!

17. Fuddlea lekhamnim ami kitem polloitolim?

¹⁷ Tor aiz konnui gombhir patok korta tednam, vhoddilamnim Jehovachi dekh gheun taka mog koso dakhounk zata ani poschatap korunk koxi modot korunk zata? Toxench, poschatap korinant tankam sobhentlean bhair kaddttat tednam vo konnui poschatap korun porot ek Jehovacho Sakxi zata tednam, sobhentlea bhav-bhoinnamnim kitem korunk zai? Hea prosnanche zobab ami fuddlea lekhamnim polloitolim.