OBHEASACHO LEKH 47
GIT 38 Dev Tuka Thir Ghott Dovortolo
“Tum Devak Khub Moladik Asa”!
“Tum Devak khub moladik asa.”—DAN. 9:23, NW.
MUKHEL MUD’DO
Zaitea zannank tim kainch valorachim nant oxem dista. Punn tim Jehovache nodren khub moladik asat mhunn zannam zaunk ho lekh tankam modot kortolo.
1-2. Ami Jehovache nodren moladik asat mhunn koxi khatri korunk zata?
JEHOVACHIM sevokam taka khub moladik asat. Punn hem sot mhunn manun gheunk thoddeank kotthin zata. Ghoddie dusrim tanchea sangata vaitt toren vagleant dekhun tankam oxem dista. Tumkam-i kednam oxem ghoddlam kai? Hoi zalear, tumi Jehovache nodren moladik asat mhunn tumi koxi khatri korunk zata?
2 Bible-antleo ghoddnneo vachlolean ami dusreank koxim lekhlolim Jehovak zai tem amkam kolltta. Tacho Put Jezun dusreank man dilo ani tanchea sangata doiallaien vaglo. Hea vorvim apunn kainch valorachim nant mhunn chintʼtat, tim tachea ani tachea Bapachea nodren moladik asat mhunn Jezun dakhoilem. (Ju. 5:19; Heb. 1:3) Tor hea lekhant (1) Jezun lokank, tim Jehovache nodren moladik asat mhunn somzonk koxi modot keli, ani (2) ami khoreponnim Jehovak moladik asat mhunn ami koxi khatri korunk zata tem polloum-ia.—Hag. 2:7.
JEZUN LOKANK TIM MOLADIK ASAT MHUNN VOLLKHONK MODOT KELI
3. Galilientle lok modoti pasot Jezu lagim ailʼle tednam tannem tankam koxe lekhle?
3 Jezu Galilient porgottnni kortalo tednam, tachem aikonk ani aplim duensam borim korunk zaite lok tachea sorxim aile. “Te gonvlli naslolea menddram bhaxen ghavo zalʼle ani adar naslole asle” mhunn Jezun polloilem. (Mt. 9:36; study note polloiat.) Dhormik fuddari tea lokank mhotvache nhoi mhunn lekhtale ani te “xirap poddlole lok” oxem pasun mhunnttale. (Ju. 7:47-49; study note) Punn tankam xikoun ani tanchim duensam borim korun Jezun tankam man dilo. (Mt. 9:35) Itlench nhoi, anikui lokank modot korunk Jezun aplea apostlank porgottnni korunk proxikxonn dilem ani duensam borim korunk odhikar dilo.—Mt. 10:5-8.
4. Jezu aplea aiknnaream lagim jea toren vaglo tantuntlean ami kitem xiktat?
4 Jezu aplea aiknnaream lagim doiallaien ani respedan vaglo. Hea vorvim zankam dusrim kainch valorachim nant mhunn lekhtalim tancho apunn ani aplo Bap khub valor korta mhunn Jezun dakhoilem. Tumi Jehovachi seva kortat, punn tachea nodren valorachim nant oxem tumkam dista zalear, aplea lagim xikonk sodhtoleam sangata Jezu koso vaglo tem chintat. Oxem kelʼlean, tumi Jehovache nodren moladik asat mhunn tumkam kollttolem.
5. Jezuk mellʼllolea Galilientle bailechi poristhiti koxi asli tem somzaiat.
5 Jezun fokot lokanchea zomeakuch nhoi, punn dor eka munxak pasun xikoilem ani modot keli. To Galilient porgottnni kortalo tednam taka ek bail mellʼlli, jika 12 vorsam thaun rogtpatachem duens aslem. (Mk. 5:25) Kaidea pormonnem ti oxudʼdh asli ani konnem-i tika hat lailear, to pasun oxudʼdh zatalo. Ti sobha ghorant vo porbe vellar dusream sangata mellon Jehovachi bhokti korunk xokonasli. (Lev. 15:19, 25) Tor ti ghoddie choddso vell ekttich sartali. Ti khub duent asli ani apunn kainch valorachi na oxem pasun tika distalem zait.—Mk. 5:26.
6. Ti duent bail koxi bori zali?
6 Tea pasot, Jezun apleak bori kelʼli tika zai aslem. Punn tinnem Jezu fuddeant ieun apnnak bori kor mhunn sangonk na. Karonn aplea poristhitik lagon tika loz distali zait vo apunn oxudʼdh asa ani apnnem lokam modem ieunk zaina dekhun Jezu apnnak tapoit vo dhanvddait mhunn tika bhirant asli zait. Punn tinnem fokot Jezuchea kopddeank pasun hat lailear ti bori zatoli mhunn tika bhavarth aslo. (Mk. 5:27, 28) Tinnem toxench kelem, ani ti bori zali. Oxem zalem tednam, apnnak konnem hat lailʼlo mhunn Jezun vicharlem. Ani tinnem taka soglem sanglem. Tednam Jezu tichea sangata koso vaglo?
7. Eke duent baile sangata Jezu koso vaglo? (Marku 5:34)
7 Ti bail ‘ekdom bhielʼli ani koddkoddttali’ tem Jezun polloilem. (Mk. 5:33) Tor to tichea sangata khub doiallaien vaglo ani tika bhuzvonn dili. Tannem tika “dhuve” pasun mhunnttlem. Hea vorvim Jezun tika man dilo ani mog dakhoilo. (Marku 5:34 vachat.) ‘Dhuv’ hea utra vixim study note sangta: “Jezun eke bailek ‘dhuv’ mhunnttli mhunn Bible-antle fokot heach ghoddnnent sanglam. Ti bhieun ‘koddkoddttali’ dekhun ghoddie tannem oxem mhunnttlem.” Jezu aplea sangata hea toren vaglo dekhun ti kitli khuxal zali astoli tea vixim chintat. Jezu toso vagonk naslo zalear pasun ti bori zatoli asli. Punn apunn lokam modem ailʼli ani Jezuchea kopddeank hat lailʼlo dekhun tichem ontoskornn sodanch tika khatolem aslem. Tor Jezun tika bori keli itlench nhoi, punn aplea mogall sorginchea Bapachi ti moladik dhuv zaun asa mhunn tannem dakhoun dilem.
8. Brazil-antle eke bhoinnik koslea trasancho fuddo korunk poddlo?
8 Aiz pasun Jehovachea thoddea sevokank tanchea duensak lagon tim kainch valorachim nant oxem dista ani tim niraxi zatat. Brazil-antli, niemit pioneer mhunn seva korpi bhoinn Maria-ka zolma thaunuch donui paim nant ani davo hat na. Ti sangta: “Mhoje he poristhitik lagon iskolantlim bhurgim mhaka porot-porot sotaitalim. Tim mhaka dukhoitat toslim nanvam dovortalim. Thodde pavtti mhoji famil pasun mhaka, hanv kainch faideachem na oxem lekhtali.”
9. Maria Jehovak moladik asa mhunn zannam zaunk tika koxi modot zali?
9 Maria-k koxi modot mellʼlli? Ti Jehovachi Sakxi zali tednam, sobhentlea bhav-bhoinnamnim tika bhuzvonn dili ani svotak Jehovache nodren pollounk tika modot keli. Ti sangta: “Mhaka itlea bhav-bhoinnamnim modot kelea ki tanchim nanvam borounk gelear, mhojea notebook-acheo page-o pavcheonant! Mhaka him mogall bhav-bhoinnam dilʼlea pasot hanv Jehovak khub upkari.” Khorench, Jehovache nodren Maria moladik asa mhunn vollkhonk bhav-bhoinnamnim tika modot keli.
10. Magdalache Mariek kosle tras asle, ani haka lagon tika koxem bhogtalem? (Chitram pasun polloiat.)
10 Toxench, Jezun Magdalache Mariek koxi modot keli tacher dhean diat. Ticher sat noxtte dut boslole! (Luk. 8:2) Te ghoddie tika vegllech toren vago-xem kortale. Taka lagon lok tichea thaun pois ravtalo zait. Tea ekdom kotthin vellar tika kitle tras sosunk poddle astole tea vixim chintat. Ti khub bhielʼli astoli ani konnuch apleak modot korunk xokchona vo aplo mog korina oxem tika dislem zait. Punn tika tras kortolea soglea noxttea dutank Jezun bhair kaddle ani ti Jezuchi pattlavdar zali. Hea toren ti Jehovachea nodren kitli moladik asa tem Jezun dakhoilem. Hem Jezun anik koxe toren kelem?
Magdalachi Marie Jehovak moladik asa mhunn Jezun tika koxi khatri dili? (Peregraf 10-11 polloiat)
11. Magdalachi Marie Jehovak moladik asa mhunn Jezun tika koxem dakhoilem? (Chitram pasun polloiat.)
11 Jezu ani tache apostl ganv-ganvamnim porgottʼttale tednam, tanchea sangata ieunk Jezun tika apounnem dilem.b Tor Jezu dusream lagim uloitalo tednam ti soglem aikotali, jea vorvim tika faido zatalo. Toxench, Jezu jivont zalo teach disak to tika dixtti poddlo, ani sogleam-von poilim tichea lagim uloilo. Tea bhair, apunn jivont zala mhunn aplea apostlank kollounk Jezun tika sueog dilo. Hea soglea vattamnim, ti Jehovak khorench moladik asa mhunn zannam zaunk Jezun tika modot keli.—Ju. 20:11-18.
12. Konnuch aplo mog korchona oxem Lidia-k kiteak distalem?
12 Magdalache Marie bhaxen, aiz zaitea lokank konn tancho mog korina oxem dista. Spain-antli bhoinn Lidia sangta ki ti zolmak ieunchea poilim, tichi avoi abortion korunk chintʼtali. Ani ti zolmak ailea uprant pasun, tichi avoi tichi kallji ghenasli ani tichea lagim khub krur toren uloitali. Ti sangta: “Mhoje avoin mhaka mog dakhounk na dekhun, dusreamnim mhozo mog kelʼlo ani tim mhojim ixttam zalʼlim mhaka zai aslem. Hanv khub vaitt mhunn mhojea avoin mhojea monant ghatlolem dekhun, mhaka to mog kednanch mellchona oxem mhaka distalem.”
13. Jehovache nodren apunn moladik asa mhunn vollkhonk Lidia-k koxi modot zali?
13 Lidia Bible xikonk lagli tednam, Jehova lagim magnnem korun, Bible vachun, toxench bhav-bhoinnanchea doiall utram ani korneam vorvim ti Jehovache nodren khub moladik asa mhunn tika kollʼllem. Ti sangta: “Mhozo ghov mhozo khub mog korta mhunn mhaka zaite pavtti sangta. Toxench to mhoje bore gunn porot-porot mhojea ugddasak haddtta ani mhojim ixttam-i toxench kortat.” Lidia bhaxen tumchea sobhent pasun konnui asa zait zaka Jehovache nodren to khub moladik asa mhunn vollkhonk modot zai astoli. Tor tumi tumchea utramnim ani korneamnim taka ti khatri diunk zata.
AMI SVOTAK JEHOVACHE NODREN KOXEM POLLOUNK ZATA?
14. Tumi tumkam Jehovache nodren pollounk 1 Samuel 16:7-antlean koxi modot zata? (“Jehovache Lok Taka Khub Moladik Kiteak Asat?” hem boks pasun polloiat.)
14 Sonvsarantlo lok tumkam polloita toso Jehova polloina mhunn ugddas dovrat. (1 Samuel 16:7 vachat.) Tumi pollounk koxim distat, tumche lagim kitle poixe asat vo tumi kitlim xikleant tea pormonnem sonvsarantlo lok tumcho valor korta. Punn Jehova toxem korina. (Iz. 55:8, 9) Tor tumkam Jehovache nodren pollounk proitn korat, hea sonvsarantlo lok polloita toso nhoi. Toxench Bible-ant amkam oslea zaitea lokam vixim vachunk melltta zankam ek-ek pavtti tim kainch valorachim nhoi oxem distalem. Zoxem Elija, Naomi ani Hana. Tanchea vixim vachtana, tim Jehovache nodren kitlim moladik aslim tacher tumi dhean diunk zata. Toxench tumi Jehovak khub valorachim asat ani to tumcho mog korta mhunn tumi zaite pavtti onnbhovlam astolem. He onnbhov tumi boroun dovrunk zatat. Tea bhair, tumi valorachim nant ho dubhav pois korunk, amchea prokaxonamnim “valorachim” hea utracher tumi sodh korunk zata.c
15. Daniel Jehovak “khub moladik” kiteak zalo? (Daniel 9:23, NW)
15 Ami Jehovak visvaxi asat dekhun taka moladik asat mhunn sodanch ugddasak haddunk zai. Eka vellar Daniel “ekdom thoklolo” ani khub niraxi aslo. (Dan. 9:20, 21, NW) Tednam ghoddie to 100 vorsancho zait ailʼlo. Tea vellar Jehovan taka koxi urba dili? Daniel apleak “khub moladik asa” ani apnnem tachim magnnim aikoleant mhunn Jehovan taka devdut Gabriela vorvim sanglem. (Daniel 9:23, NW vachat.d) Ani hi ghoddnni Jehovan amkam bhuzvonn diunk Bible-ant boroun dovorlea. (Rom. 15:4) Tor Daniel promannik ani Jehovak visvaxi aslo dekhun to Jehovak moladik zalo. (Ez. 14:14) Hantuntlean ami xiktat ki Jehova amchim-i magnnim aikota ani ami promannik toxench visvaxi asat dekhun ami Daniela bhaxen taka moladik asat.—Mik. 6:8, ftn.; Heb. 6:10.
16. Jehova amcho mogall Bapui mhunn ugddas dovrunk amkam koxi modot zaunk xokta?
16 Jehova amcho mog korta toslo Bapui zaun asa mhunn ugddas dovrat. To amcheo chuki sodhina, punn amkam modot korunk sodhta. (St. 130:3; Mt. 7:11; Luk. 12:6, 7) Hacher niall kelolean, apunn kainch valorachim nant oxem distolea zaitea zannank bhuzvonn mellʼllea. Udharonnak, Spain-antli bhoinn Michelle-achea ghovan zaitim vorsam poriant tika khub vaitt utram mhunnttlim. Tea pasot apunn kainch valorachi na oxem tika dista. Ti mhunntta: “Oslea vellar Jehova mhaka aplea vengent gheun mhozo mog korta ani mhoji rakhonn korta mhunn hanv mhojea dolleam mukhar haddttam.” (St. 28:9) Toxench Dokxinn Afrikentli bhoinn Lauren, hem aplea ugddasak haddtta: “Jehovan mhaka mogachea doriemnim voddun haddlam, itlim vorsam mhaka aplea lagim dovorlam, ani aplea vixim dusreank sangonk to mhaka uzar korta zalear, tachea nodren hanv khoreaninch moladik asa mhunn mhaka khatri melltta.”—Hos. 11:4.
17. Amkam Jehovachi maniotai asa mhunn ami kiteak khatri dovrunk zata? (Stotr 5:12) (Chitr pasun polloiat.)
17 Tumkam Jehovachi maniotai asa mhunn khatri dovrat. (Stotr 5:12 vachat.) Davidan sanglem ki Jehovachi maniotai ek vhoddli ‘ddhal’ koxi zaun asa, ji nitivont lokanchi rakhonn korta. Hem zannam zalʼlean ami kainch valorachim nant oslem chintop pois korunk amkam modot zaunk xokta. Tor amkam Jehovachi maniotai asa mhunn koxem kollttolem? Ami poilim polloilem toxem, aplea Utra vorvim to amkam ti khatri dita. Toxench, ami taka khub moladik asat hem amchea ugddasak haddunk to vhoddilank, amchea lagxilʼlea ixttank, toxench dusreank uzar korta. Tor dusrim amkam hea toren urba ditat tednam ami kitem korunk zai?
Amkam Jehovachi maniotai asa hem zannam zalolean ami valorachim nant hem chintop pois korunk amkam modot zatoli (Peregraf 17 polloiat)
18. Dusrim amkam xabaski ditat tednam ami ti kiteak manun gheunk zai?
18 Amkam vollkhotat ani amcho mog kortat tim amkam kallzantlean xabaski ditat tednam tim jem sangtat tea vixim ami dubhavchem nhoi. Amkam Jehovachi maniotai asa mhunn khatri diunk Jehova ghoddie tankam uzar korta mhunn ami ugddas dovrunk zai. Ami poilim uloilʼli bhoinn Michelle sangta: “Hanv sovkas-sovkas korun, dusrim mhojea vixim jeo boreo vostu sangtat teo khoreponnim sot mhunn manun gheunk xiktam. Oxem korunk mhaka khub kotthin zata. Torui, hea vixim mhaka khatri asloli Jehovak zai mhunn hanv zannam.” Toxench Michelle Jehovache nodren khub moladik asa mhunn khatri diunk vhoddilamnim pasun mogan taka modot kelea. Tem aiz pioneer ani Bethel-ant remote volunteer mhunn kam korta.
19. Tumi Jehovache nodren moladik asat mhunn kiteak khatri dovrunk zata?
19 Ami amchea sorginchea Bapak khub moladik asat mhunn Jezu amchea ugddasak haddtta. (Luk. 12:24) Hem ami kednanch visorchem nhoi! Tor ami Jehovak khub moladik asat mhunn sodanch amchi khatri ghott dovrum-ia, ani dusrim pasun Jehovache nodren moladik asat mhunn tankam sangom-ia!
GIT 139 Polloi Tuka Novea Sonvsarant!
a Thoddim nanvam bodolʼleant.
b Jezu porgottnni kortalo tednam tachea sangata provas kortolea bailam modem Magdalachi Marie pasun asli. Heo bailo aple poixe moddun Jezu ani tachea apostlanchea gorzanchi kallji ghetaleo.—Mt. 27:55, 56; Luk. 8:1-3.
c Udharonnak, Draw Close to Jehovah pustokacho odheai 24 polloiat. Ani Sodanchea Jivita Pasot Bible-antlean Modot, hea pustokant “Dubhav” hea vixoi-a khala dilʼlim versam, toxench Bible-antleo ghoddnneo vachat.
d Daniel 9:23 (NW): “Tum vinoti korunk laglo tednam mhaka ek sondex mellʼllo ani to sondex hanv tuka sangonk ailam, karonn tum Devak khub moladik asa. Tor, hea sondexacher dhean di ani hem dorxon somzon ghe.”