Tor ami koxim dhirvont zaunk xoktat? Amchim avoi-bapui amkam ghoddie dhirvont zaiat mhunn sangonk xoktat. Punn ho gunn amkam tanchea koddlean apxinch mellona. Dhirvont zavop, ek novi kola xikchea bhaxen zaun asa. Ek novi kola xikonk ek bori vatt mhunnttlear, xikoupeak bariksannen pollovop ani tachi dekh ghevop. Teach bhaxen, dhirvont zaunk dusrim koxim dhir dakhoitat tem ami bariksannen pollounk zai, ani tanchi dekh gheunk zai. Ami Daniela bhaxen Devachea Utracho bariksannen obheas korunk zai. Jehova lagim kallzantlean ani zaite pavtti magnnem korun, tachea sangata ghott ixttagot korunk zai. Ani to sodanch amkam modot kortolo mhunn tacher visvas dovrunk zai. Oxem kelear, amchea bhavarthachi porikxa zata tednam ami dhir dakhounk pavtolim. Ami dhir dakhoitat tednam, choddso lok amkam resped ditat, toxench khaltea kallzache lok Jehova vixim xikonk umed dakhounk xoktat. Khorench, dhir dakhoilʼlean zaito faido zata! w23.08 2 ¶2; 4-5 ¶8-9

‘Topasun kaddop’ hea utrak uzar kelʼlem Grik utor, lok jea ritin veg-veglle dhatu, zoxem bhangar ani chandi khorem asa kai na tachi topasnni kortat, taka sor kelam. Ami pasun, ami jem kitem aikotat ani vachtat tem sarkem asa kai na tem topasun kaddunk zai. Ani vhodd sonkoxtt lagim pavta toso, ami oxem korop anikui gorjechem astolem. Tor dusrim sangtat tem soglem dolle dhampun sot mhunn manun gheunchea bodlek, ami jem kitem aikotat vo vachtat, tem Bible-a pormonnem ani Jehovache songottnne pormonnem sarkem asa kai na tem zannam zaunk, ami amchi chintpachi tank uzar korunk zai. Oxem kelear, noxttea dutanchea khotte xikounnent ami foschimnant. (Mho. 14:15; 1 Tim. 4:1) Jehovachea lokancho zomo vhodd sonkoxttantlean salvar zatolo. Punn amchea dor ekleachem faleam kitem zatolem tem ami nokllo. (Jak. 4:14) Ami vhodd sonkoxtta thaun salvar zaunk xoktat, vo tachea poilim amcher moronn ieunk xokta. Punn Jehovak visvaxi ravlear amkam sasnachem jivit mellttolem mhunn ami khatri dovrunk zata. Tor amkam sorgar vo hea prithumer jieuncho bhorvonso asum, hea bhorvonxeacher dhean diunk ani Jehovachea disa pasot toiar ravonk, ami soglim ghott nichov korum-ia. w23.06 13 ¶15-16

Bible-antleo thoddeo bhasaunneo koxeo purnn zatoleo tem ami noko. (Dan. 12:8, 9) Punn ek bhasaunni koxe toren purnn zatoli tem amkam purnn toren somzona dekhun, ti ghoddchi na oxem nhoi. Tor Jehovan adim kelem toxem, atam pasun to sarkea vellar, ami zannam zaunk zai tem somzonk amkam modot kortolo mhunn ami khatri dovrunk zata. Sonvsarantlim raxttram beginuch, “Soglim xantin ani surokxotaien asat!” oxem mhunnttolim. (1 Tes. 5:3) Uprant sonvsarantle sorkar, khottea dhormancher akromonn kortole ani tacho nas korun uddoitole. (Prok. 17:16,17) Magir te Devachea lokancher akromonn kortole. (Ez. 38:18,19) Oxem zata tednam, Armageddonachem zhuz suru zatolem. (Prok. 16:14,16) Heo sogleo ghoddnneo beginuch ghoddttoleo mhunn ami khatri dovrunk zata. Punn tednam meren, bhasaunneam vixim obheas korun ani dusreankui toxem korunk modot korun, ami amchea sorginchea Bapak kitlim upkari asat tem dakhoit ravom-ia. w23.08 13 ¶19-20