OBHEASACHO LEKH 46
Sobit Bag Zatolich Mhunn Jehova Gerentti Dita!
“Prithumer jim konn apnnancher axirvad ghaltat, tim sotevont Devachea nanvan apnnancher axirvad magtolim.”—IZ. 65:16.
GIT 3 Tunch Adar, Tunch Visvas, Tujer Bhorvonso
KITEM XIKTOLIMa
1. Izaias Izraelitkarank kitem sangonk sodhtalo?
JEHOVA ek ‘sotevont Dev’ mhunn provadi Izaiasan sanglem. “Sotevont” mhunn bhaxantor kelʼlea utracho orth, “amen” zaun asa. (Iz. 65:16) Ani “amen” hea utracho orth, “toxench zaum.” Bible-ant “amen” hem utor, Jehova vo Jezuchea babtint uzar kelam tednam, tannim jem kitem sanglam tem khoreponnim zatolench mhunn gerentti dita. Tor Izaias Izraelitkarank oxem sangonk sodhtalo: Jehova fuddara vixim jem kitem sangta, tem sodanch ghoddon ieta. Khorem mhunnttlear, Jehovan jem kitem bhasailʼlem tem tannem sodanch purnn kelam.
2. Amchea fuddara vixim Jehovan dilʼleo bhas purnn zatoleoch mhunn ami kiteak visvas dovrunk zata, ani hea lekhant ami khoinchea prosnancher dhean ditolim?
2 Fuddara vixim Jehovan jem bhasailam tem purnn zatolench mhunn ami pasun visvas dovrunk zata kai? Hoi. Izaiasachea tempa thaun sumar 800 vorsam uprant, Jehovan dilʼleo bhas purnn zatoleoch mhunn ami kiteak visvas dovrunk zata tem apostl Paulun somzailem. Tannem mhunnttlem: “To kednanch fott ulounk xokona.” (Heb. 6:18) Zoxem eke zhorintlean kharem udok kednanch ieunk xokona, teach bhaxen sotachi Zhor zaun aslolo Jehova Dev kednanch fott marunk xokona. Tor Jehova sangta tem soglem ghoddttolench mhunn ami purnn visvas dovrunk zata. Ani hantunt tannem dilʼleo bhas pasun mellon asat. Tor hea lekhant ami don prosnancher dhean dium-ia: Jehovan fuddara vixim kitem bhasailam? Ani hi bhas to purnn kortolo mhunn tannem kitem gerentti dilea?
JEHOVAN KITEM BHAS DILEA?
3. (a) Jehovan dilʼli khoinchi bhas tachea lokank sogleam-von chodd avoddtta? (Prokasovnni 21:3, 4) (b) Hi bhas aikon thodde lok kitem mhunnttat?
3 Sonvsarbhor aslolea Jehovachea sevokank avoddtta tosli ek bhas polloum-ia. (Prokasovnni 21:3, 4 vachat.) Jehovan eka oslea vellachi bhas dilea jednam “moronn anink aschem na, dukh anink korchim nant, rudon somptolem, koxtt-ui anink asche nant.” Amchea modlim zaitim zannam porgottnnent lokank bhuzvonn diunk, ani Sobit Bagent jivit koxem astolem tem dakhounk him versam uzar kortat. Punn hea vixim sangtana, thodde lok oxem mhunnot: “Hem aikonk khub borem dista, punn hem kednanch zaunchem na.”
4. (a) Jehova kitem zannam aslo? (b) Bhas diunchea bhair, Jehovan anik kitem kelam?
4 Jehovan hea bhasaunne vixim apostl Juanvak borounk prerit kelʼlo tednam, ami aiz dusreank Rajeachi bori khobor porgottʼttana hea bhasaunne vixim sangtolim mhunn Jehova zannam aslo. Toxench lok heo “noveo ghoddnnio” aikotolim tednam, zaitea zannank tem manun gheunk kotthin zatolem mhunn pasun to zannam aslo. (Iz. 42:9; 60:2; 2 Kor. 4:3, 4) Tor Prokasovnni 21:3, 4-ant sanglolim besanvam ghoddon ietolim mhunn khatri dovrunk ami dusreank koxi modot korunk zata? Ani ami Jehova, ani tachea bhasaunneancher amcho bhorvonso koso ghott korunk zata? Jehovan amkam fokot bhas diunk na, punn amchi khatri vaddtta toslim karonnam pasun dileant. Tim kitem zaun asat?
BHAS PURNN KORTOLO MHUNN JEHOVAN KITEM GERENTTI DILEA?
5. Sobit Bage vixim Jehovan ji bhas dilea tacher patieunk koslim karonnam asat, ani tim amkam khoim mellttat?
5 Sobit Bage vixim Jehovan ji bhas dilea tacher kiteak patieunk zata tem zannam zaunk, mukhar dilʼlea versancher dhean diat. Thoim mhunnttlam: “Uprant xinvasonar boslolo asa Tannem mhollem: ‘Polleiat, soglleo vostu Hanv noveo kortam!’ Tannem mhaka anink-ui sanglem: ‘Hem boroun dovor, kiteak him utram khatrechim ani sotachim’. Ani Tannem mhaka mhollem: ‘Zalem! Hanv Alfa ani Omega, mhonnge Oromb ani Xevott.’”—Prok. 21:5, 6a.
6. Jehova apli bhas purnn kortoloch mhunn Prokasovnni 21:5, 6-antlean amkam koxi khatri melltta?
6 Jehovan dilʼli bhas to purnn kortoloch mhunn hea versam thaun amkam koxi khatri melltta? Hea versam vixim, Revelation Climax pustokant oxem boroilam: “Hanga Jehovan jem sanglam tem eka orthan, tannem eka dokumentacher sign kelʼlea sarkem zaun asa. Ani hem amkam khatri dita ki to tachi bhas purnn kortoloch.”b Tor Prokasovnni 21:3, 4-ant Jehova amkam bhas dita, ani uprant vers 5 ani 6-ant gerentti dita, mhunnche eka orthan to thoim sign korta. Tor Jehovan kitem gerentti dilea tacher ami atam bariksannen dhean dium-ia.
7. Prokasovnni 21:5-ant boroilʼlim utram konn mhunntta, ani hem kiteak khas zaun asa?
7 Jehovan dilʼli gerentti hea utramnim suru zata: “Xinvasonar boslolo asa Tannem mhollem.” (Prok. 21:5a) Prokasovnni pustokant oslea tin ghoddnneam vixim sanglam, zoim dorxonant Jehova svota zaun uloita. Ani tantuntli ek ghoddnni hi zaun asa dekhun him utram khas asat. Tor hi gerentti ek xoktivont devdut vo jivont zalʼlo Jezu nhoi, punn svota Jehova dita. Dekhun hea gerenttint, mukhar dilʼlea versamnim jem boroilam tacher ami purnn khatri dovrunk zata. Karonn Jehova “kednanch fott ulounk xokona.” (Tit. 1:2) Khorench Prokasovnni 21:5, 6-ant boroilʼlim utram purnn zatolim mhunn kainch dubhav na!
“POLLEIAT, SOGLLEO VOSTU HANV NOVEO KORTAM!”
8. Apnnem dilʼli bhas purnn zatolich mhunn dakhoun diunk Jehova kitem sangta? (Izaias 46:10)
8 Atam ami “polleiat” hea utracher dhean dium-ia. (Prok. 21:5) “Polleiat” mhunn bhaxantor kelʼlem Grik utor, Prokasovnni pustokant zaite pavtti melltta. Eka pustokant sanglam ki hem utor, “vachpeanchem dhean fuddem kitem sanglam tacher voddun haddunk” uzar kelam. Tor Jehova fuddem kitem sangta? To mhunntta: “Soglleo vostu Hanv noveo kortam!” Khorem mhunnttlear, hi bhas fuddarak purnn zatoli. Punn apunn hem kortoloch mhunn Jehovak itli khatri asa ki to tem atanch korta tea toren uloita.—Izaias 46:10 vachat.
9. (a) “Soglleo vostu Hanv noveo kortam!” him utram, Jehova korta tea khoinchea don vostunk lagu zatat? (b) “Poilem mollob” ani “poili prithum” hanchem kitem zatolem?
9 Jehova sangta: “Soglleo vostu Hanv noveo kortam!” Hacho orth kitem? Hea odheai-ant him utram, Jehova korta tea don vostunk lagu zatat. Ek, to pornem asa tem nanch korta. Ani dusrem, to novem kitem tori haddtta. Prokasovnni 21:1-ant amkam oxem vachunk melltta: “Poilem mollob ani poili prithum nanch zalim.” “Poilem mollob” mhunnttlear, Soitan ani noxttea dutanchea probhava khala aslole sorkar. (Mt. 4:8, 9; 1 Ju. 5:19) Toxench Bible-ant uzar kelʼlea pormonnem, “prithum” mhunnttlear hea prithume voile lok. (Ut. 11:1; St. 96:1) Tor “poili prithum” mhunnttlear, aiz hea prithumer asat te noxtte lok. Tor Jehova sodʼdheak asa tea ‘mollbant’ ani ‘prithument’ bodlav korchona, punn tem purnn toren nas korun uddoitolo. Ani uprant to ek “novem mollob” ani “novi prithum” haddttolo. Hacho orth, nitivont munxancher ek novo sorkar raz kortolo.
10. Jehova kitem novem kortolo?
10 Prokasovnni 21:5-ant, apunn kitem kortolo tea vixim Jehovan kitem sanglem tacher dhean dium-ia. Thoim tannem oxem sangonk na: “Hanv sogleo noveo vostu kortam.” Tachea bodlek, tannem oxem mhunnttlem: “Soglleo vostu Hanv noveo kortam!” Tor hacho orth, Jehova noveo vostu korcho na, punn asat teoch vostu noveo kortolo. Mhunnche, hi prithum ani munxank novim kortolo. Izaiasan bhasaunni kelʼlea pormonnem, hi prithum Eden bage sarki sobit zatoli ani dor ek munis poripurnn zatolo. Jim cholonk xokonant, pollounk xokonant ani aikonk xokonant, tim purnn toren borim zatolim. Titlench nhoi, moron geleant tim pasun jivont zatolim.—Iz. 25:8; 35:1-7.
“HIM UTRAM KHATRECHIM ANI SOTACHIM . . . ZALEM!”
11. Jehovan Juanvak kitem sanglem, ani toxem korunk kitem karonn dilem?
11 Jehovan ji gerentti dilea tantunt anik kitem mellon asa? Jehovan Juanvak sanglem: “Hem boroun dovor, kiteak him utram khatrechim ani sotachim.” (Prok. 21:5) Hanga Jehovan fokot “boroun dovor” mhunn sangonk na, punn tachem karonnui dilem. Tannem mhunnttlem: “Kiteak him utram khatrechim ani sotachim.” Hacho orth, Devachim utram patieupa sarkim asat. Tor Juanvan tim ‘boroun dovorlim’ mhunn ami kitlim upkari asat nhoi! Karonn hea vorvim, Jehovan sobit bage vixim dilʼli bhas ami aiz vachunk xoktat ani fuddarachea sobit besanvam vixim niallunk xoktat.
12. Jehovan “Zalem!” oxem kiteak mhunnttlem?
12 Uprant, Jehovan “Zalem!” oxem mhunnttlem. (Prok. 21:6) Hanga Sobit Bage vixim tannem jem kitem bhasailam tem purnn zalʼlea sarkem to uloita. Ani to oxem mhunnonk xokta. Karonn tacho udʼdhex purnn korunk taka konnuch addaunk xokona! Jehovan tachea gerenttint, uprant kitem sanglem tacher atam dhean dium-ia. Karonn tea vorvim to apli bhas purnn kortoloch mhunn amkam anikui khatri melltta.
“HANV ALFA ANI OMEGA”
13. “Hanv Alfa ani Omega” oxem Jehovan kiteak mhunnttlem?
13 Ami poilim polloilem toxem, Juanvak dilʼlea dorxonamnim Jehova tin pavtti svota zaun uloilo. (Prok. 1:8, ftn; 21:5, 6; 22:13) Ani tinui pavtti tannem oxem mhunnttlem: “Hanv Alfa ani Omega.” Grik bhaxentlea okxorantlem poilem okxor alfa zaun asa, ani nimannem okxor omega zaun asa. Tor Jehova apunn “Alfa ani Omega” mhunn sangta tednam, apunn jem suru korta tem sompoitoloch mhunn to sangonk sodhtalo.
Jehova kitem-i korunk suru korta tednam to tem sompoitach (Peregraf 14, 17 polloiat)
14. (a) Jehovan eka orthan “Alfa” kednam mhunnttlem, ani eka orthan “Omega“ kednam mhunnttolo? (b) Utpoti 2:1-3-ant kitem gerentti dilea?
14 Adanv ani Evek rochlea uprant, munxakulla pasot ani prithume pasot aplo udʼdhex kitem asa tem Jehovan sanglem. Hea vixim Bible-ant oxem boroilam: “Axirvad ghalun Devan tankam mhollem: ‘Choddat ani vaddat, prithum bhorat ani tika tumchea hata khal dovrat.’” (Ut. 1:28) Tor Jehovan aplo udʼdhex sanglo tednam, tannem eka orthan “Alfa” oxem mhunnttlem. Ani fuddarak jednam akʼkhi prithum Adanv ani Evechea poripurnn sonstin bhortoli, soglim Jehovachi adnea pallttolim, ani prithum sobit bag zatoli tednam Jehovacho udʼdhex purnn zatolo. Ani eka orthan, to “Omega” oxem mhunnttolo. “Ontrall ani prithvi ani tancher manddloleo soglleo vostu” rochlea uprant Jehovan kitem gerentti dilʼli, tem amkam Utpoti 2:1-3-ant vachunk melltta. (Vachat.) Jehovan satvo dis povitr mhunn tharailo. Hantuntlean kitem kolltta? Jehovan gerentti dili ki munxakulla ani prithume pasot aslolo aplo udʼdhex to purnn kortolo. Ani ho udʼdhex satvea disachea xevottak sompurnn ritin purnn zatolo.
15. Jehovacho udʼdhex kednanch purnn zaunchona, oxem Soitanak kiteak dislem astolem?
15 Adanv ani Eve Jehovachea add gelim tednam, tim patki zalim ani tanchea akʼkhea sonsticher patok ani moronn posorlem. (Rom. 5:12) Hea karonnak lagon, Soitanan chintlem astolem ki Jehovacho udʼdhex atam kednanch purnn zaunchona. Mhunnche, hi akʼkhi prithum Jehovachi adnea pallttat toslea poripurnn munxamnim kednanch bhorchi na, ani to kednanch “Omega” mhunnonk pavchona. Punn Jehova ghoddie oxem korunk xokta mhunn Soitanan chintlem astolem: Adanv ani Evek jivexim marun, prithume pasot aplo udʼdhex purnn korunk to ek novem poripurnn zoddpem rochtolo. Punn Jehovan oxem kelʼlem zalear, Soitan taka fottkiro mhunnttolo aslo. Karonn Utpoti 1:28-ant, Jehovan Adanv ani Evek hi akʼkhi prithum, tanche sonstin bhortoli mhunn sanglolem.
16. Jehova aplo udʼdhex purnn korunk harlo mhunn apunn tacher arop ghalunk pavtolo, oxem Soitanan kiteak chintlem zait?
16 Vo ghoddie Soitanan oxem chintlem astolem: Jehova, Adanv ani Evek sonsot utpon korunk ditolo, ji kednanch poripurnn zaunchina. (Up. 7:20; Rom. 3:23) Tor tanchi sonsot kednanch poripurnn zaunchina zalear, Jehova aplo udʼdhex purnn korunk harlo, oxem Soitan mhunnonk pavtolo aslo. Karonn hi prithum poripurnn munxamnim bhorchi nasli.
17. Soitan toxench Adanv ani Eve, Jehovachea add gelear pasun aplo udʼdhex purnn korunk Jehovan kitem kelem, ani hea vorvim kitem purnn zaunk pavtolem? (Chitr pasun polloiat.)
17 Jehova kitem kortolo aslo tem Soitanan sopnant pasun chintunk na zait. Soitan, toxench Adanv ani Eve, tachea add gelim. Torui, aplo udʼdhex purnn korunk, Jehova lagim ekdom bori vatt asli. (St. 92:5) Tannem Adanv ani Evek bhurgim zaunk dilim. Hea vorvim tannem mhunnttlolim utram khorim zalim. Tor apunn fottkiro nhoi, punn sotevont mhunn tannem dakhoun dilem. Toxench aplo udʼdhex purnn korunk, Jehovan ek ‘sonsot’ utpon korunk manddavoll keli. Hea sonsti vorvim, Adanv ani Evechea bhurgeam modlim, jim Jehovachi adnea pallttolim tim salvar zatolim aslim. Tor harchea bodlek, Jehova zoitivont zatolo aslo. (Ut. 3:15; 22:18) Jehovan kelʼli soddvonnechi manddavoll polloun, Soitan tonddant bottam ghalun polloit urlo astolo. Kiteak? Karonn Jehovachi hi manddavoll tachea svarth naslolea mogacher adarit asa. (Mt. 20:28; Ju. 3:16) Ani Soitana bhitor ho gunn nanch! Karonn to samko svarthi. Tor Jehovan kelʼlea soddvonnechea manddavolli udexim kitem purnn zaunk pavtolem? Kristachea Ek Hozar Vorsanchea Razvottkechea xevottak, akʼkhi prithum, Adanv ani Evechea sonsti modlim jim Jehovachi adnea pallttat, tea poripurnn munxamnim bhortoli. Hea vorvim Jehovacho udʼdhex purnn zatolo. Ani tea vellar Jehova eka orthan, “Omega” oxem mhunnttolo.
PRITHUM SOBIT BAG ZATOLICH MHUNN AMCHO VISVAS GHOTT KORUM-IA
18. Amkam khatri diunk Jehovan koslim tin karonnam dileant? (“Jehovan Ji Bhas Dilea Tacher Patieunk Tin Karonnam,” hem boks pasun polloiat.)
18 Prithum Sobit Bag zatoli mhunn ami kiteak khatri dovrunk zata tem ami hea lekhant polloilem. Tor dubhav asa tankam khatri diunk ami kitem sangonk zata? Ami tankam tin karonnam sangonk zatat. Poilem, hi bhas svota Jehovan dilea. Prokasovnni pustokant oxem mhunnttlam: “Xinvasonar boslolo asa Tannem mhollem: ‘Polleiat, soglleo vostu Hanv noveo kortam!’” Tor apnnem dilʼli bhas purnn korunk Jehova lagim zannvai, xokti ani itsa asa. Dusrem, Jehovan jem sanglam tem ghoddon ietolench mhunn to zannam dekhun, tem ghoddon ailʼlea porim to uloita. To mhunntta: “Him utram khatrechim ani sotachim . . . Zalem!” Ani tisrem, Jehova kitem-i korunk suru korta tednam, tem kam sompounk taka konnuch addaunk xokona. Dekhun to oxem mhunntta: “Hanv Alfa ani Omega.” Tor apunn nhoi, punn Soitan fottkiro ani to hartolo mhunn Jehova dakhoun ditolo!
19. Sobit Bage vixim Jehovan ji bhas dilea tacher lok dubhavtat tednam, tumi kitem korunk zata?
19 Ugddas dovrat, tumi porgottnnent dor ek pavtt, Jehovan dilʼle gerentti vixim dusreank sangtat tednam, Jehovan jeo bhas dileat, tacher tumcho visvas tumi ghott korunk pavtat. Tor Prokasovnni 21:4-ant Sobit Bage vixim Jehovan ji bhas dilea, tea vixim tumi dusreank sangtat, ani to munis tumkam, ‘Hem aikonk khub borem dista punn hem kednanch zaunchem na,ʼ oxem mhunntta tednam, tumi kitem korunk zata? Tumi vers 5 ani 6 vachun taka somzaunk zata, ani Jehovan eka orthan sign marun kitem gerentti dilea tem dakhounk zata.—Iz. 65:16.
GIT 145 God’s Promise of Paradise
a Apunn hi prithum Sobit Bag kortolo mhunn Jehovan bhas dilea. Hi bhas to purnn kortolo hachi gerentti amkam hea lekhant mellttoli. Ani dor ek pavtt hea gerentti vixim dusreank sangtana, Jehovan jeo bhas dileat tancher amcho visvas anikui vaddttolo.