14. Joel 3:1, 2-ant sanglolem tem kednam purnn zalem?

¹⁴ Joel atam borem kitem sangta. Porot stapnnecho sondex to atam dita. To des porot folladik zatolo. (Joel 2:23-26) Fuddarak oslo ek vell ieuncho asa, jednam Deva vixim zannvai bhorpur mellttoli. Jehova mhunntta, “Hanv Mhozo Atmo ghaltolom. Tumche put ani tumcheo dhuvo sodenx ditolim, . . . Gulam dadleam ani bailancher porian tea disamnim Hanv Mhozo Atmo ghaltolom.” (Joel 3:1, 2) Israelitkar Babilona thaun aplea desant porot ailea uprant tancher Devachi povitr xokti rokddich votounk na. Punn, 33 K.X. hea vorsachea Ponʼnasavea disa, mhunnche, zaitea xekddea uprant tannem votoili. Hem ami koxim zannant?

15. Itihas 2:16, 17-ant sanglea pormonnem, Pedrun Joel 3:1-a thaun ulʼlekh kortana utrant koslo bodlav kelo, ani hantuntlean amkam kitem kolltta?

¹⁵ Apostl Pedrun prerit zaun Joel 3:1, 2-ant sanglolem tem, tea Ponʼnasavea disa ghoddlolea eka ojapachea ghoddnnek lagu kelem. Tea disa sokallim sumar nnov vorar Devan apli povitr xokti votoili ani jea konnak ti povitr xokti mellʼlli, te “Devachim xrextt kortutvam” vixim sangonk lagle. (Itihas 2:11) Devachea preronnan Pedru Joel-achea bhasaunne thaun ulʼlekh kortana, to matxim vegllim utram uzar korta. Tannem tachea utrant kitem bodol kele tacher tumi dhean dilam? (Itihas 2:16, 17 vachat.) To thoim survatek “hea uprant” him utram mhunnchea bodlek, “nimannea disamnim” mhunntta. Mhunnche, Judevanchea kallachea nimannea disamnim, “sogllea monxamkullacher” Dev apli povitr xokti ghaltolo vo votoitolo mhunn tannem sanglem. Hantuntlean, zaito temp soron gelea uprant Joel-an sangloli bhasaunni purnn zali mhunn kollon ieta.

16. Poilea xekddeant Devan apli xokti votoilolean progottnnechea kamacher koslo porinnam zalo, ani amchea kalla vixim kitem?

¹⁶ Poilea xekddeantlea Kristanvancher Devan apli xokti votoilea uprant oslem ek porgottnnechem kam suru zalem jem ek dis sonvsarbhor zaunchem aslem. Sumar 61 K.X.-ant, apostl Paulun Koloskarank apli chitt boroili tednam “xubhvortoman mollba khala aslolea sogllea monxam modem porgott zalam” mhunn sangonk pavlo. (Kol. 1:23) Hanga Paulun “sogllea monxam modem” oxem mhunnttlem tednam, to ani her zann provas korunk xoktale tea prithumechea soglea zagea vixim to uloitalo. Ani aiz Jehovachea povitr xoktechea adaran, porgottnnechem kam anik chodd vaddot gelam, mhunnche “prithumechea ximam porian”!—Itihas 13:47; “Hanv Mhozo Atmo Ghaltolom vo Votoitolom,” hem boks polloiat.