Julay—Jivit ani Porgottnni Mittingechea Pustike Pasot Modot
JULAY 1-7
DEVACHEA UTRANTLE THEVE | KOLOSKARANK 1-4
“Tumchem Pornem Patki Soimb ani Tacheo Chali Soddun, Tumi Novea Munxacho Akar Gheiat”
(Koloskarank 3:5-9) Dekhun tumchea soimbant asat te sonvsari anvdde marun uddoiat: pozoddponn, mhelleponn, kamchar, khotteo vondovnnio, ani ti mannsuge-bhaili girestkaiechi axa hi axa khorench mhollear kuddea devanchi puza. 6 Oslea vostunk lagun, Devachem aikonant tancher Tacho krodh denvun ieta. 7 Ani tanche modem tumi jietaleat tednam, tumchem-i jivit toslench aslem. 8 Punn atam hem sogllem tumi soddun diunkuch zai: rag, krodh ani vikottai; jastio ani pozddeo khobro tumchea tonddantleo kodinch bhair sorcheo nhoi; 9 ekamekak kodinch fotti marum nakat, kiteak tumchem pornnem patki soimb ani tacheo chali soddun, tumi novea monxacho akar ghetla.
w11 3/15 10 ¶12-13
Devacho Otmo Gheiat, Sonvsaracho Nhoi
12 Mhozo sobhav kitem dakhoun dita? (Koloskarank 3:8-10, 13 vachat.) Hea sonvsaracho otmo, patki soimbachea kamank urba dita. (Gal. 5:19-21) Amchea bhitor koslo otmo asa to amkam, soglem borem cholta tednam nhoi, punn borem cholona tednam dison ieta. Zoxem, jednam amcho ek bhav vo bhoinn amkam polloun polloinaslolea bhaxen korta, amkam dukhoita vo amchea add vaitt pasun korta. Hachea bhair, ami amchea ghora bhitor ekttim astat tednam, amchea bhitor koslo otmo asa tem sarkem dison ieta. Tor ami amkanch thodde prosn vicharun chovkoxi korunk zai, ‘Gelʼlea sov mhoineamnim, mhozo sobhav chodd Krista bhaxen zala kai, vo hanvem soddun diloleo adleo vaitt sonvoim-o portun mhojea utramnim ani kornneamnim dison ietat kai?’
13 Devacho otmo, amchem “pornnem patki soimb ani tacheo chali soddun” diunk ani “novea monxacho akar” gheunk amkam modot korta. Ho otmo amkam chodd mogall ani doiall zaunk modot kortolo. Toxench, chuk kelea mhunn eka-mekak guneanvkari tharaunk karonn asa zalear pasun, ami tankam bhogsunk toiar astolim. Amcher onʼneai zala oxem amkam dista zalear pasun, ami ‘kallzant koddsann dovorchimnant; rag ani krodh monant dovorchimnant ani bob marchimnant.’ Tachea bodlek, ami “doiall-movall kallzachim” zaun vavurcho proitn kortolim.—Ef. 4:31, 32.
(Koloskarank 3:10-14) Apli purnn vollokh mello porian toch Rochnnar hea novea monxak odik-odik Aplea sarkeacho novo korit asa. 11 Hantum anink Grik ani Judev mhonn na, sunot kelʼlo ani sunot na-kelʼlo mhonn na, porko ani zonglli monis mhonn na, gulam ani svotontr monis mhonn na. Asa to ekloch Krist soglleam sovem Toch! 12 Tumi Devan vinchun kaddlolim, povitr kelʼlim ani Tache opurbaiechim: dekhun tumi doiall-movall kallzachim, bholim, khaltim, dulob ani vhodd sosnnikaiechim monxam zaiat. 13 Dusreacher garannem korunk nimit aslear, tumi ekamekak sosunk zai ani bhogsunk zai. Somian tumkam bhogxileant, toxench tumi-i ekamekak bhogsat. 14 Hea sogllea sugunnancho mukutt koso, pritimog tumche modem vosum-di, kiteak tache vorvim sogllea sugunnancho sopurnn ekvott zata.
w13 9/15 21 ¶18-19
Tumi Bodlav Kela Kai?
18 Devachea Utrak amchea jivitant bodol korunk diunk zai zalear, ami poilem sodanch Bible vachop ani xikop gorjechem. Zaite lok, vella-vellar Bible vachtat, ani dekhun Bible kitem sangta tea vixim tankam bori vollokh asta. Tumi porgottnnechem kam kortana ghoddie toslea lokank mellʼlleant astolim. Thoddo lok, Bible-antlim versam polloinastana pasun sangtat. Punn, Devachea Utracho ghoddie tanchea chintnamcher ani jea toren tim jivit jietat tacher kainch probhav poddonk na astolo. Tor tanchem kitem chuklam? Devachea Utracho eka munxachea jivitant probhav poddon tachea jivitant bodlav zaunk zai zalear, tannem tim utram aplea kallzant rigonk diunk zai. (Gal. 6:6) Taka lagon, ami xiktat tacher ami chintunk vell kaddunk zai. Ami amkanch he prosn vicharunk zatat: ‘Hanv xiktam tem fokot eka dhormachi xikounn nhoi, punn tem sot mhunn mhaka khatri asa kai? Tea bhair, hanv xiktam tem mhojea jivitant koxem apnnaunk zata tea vixim chintʼtam kai vo hanv fokot dusreank xikounkuch xiktam kai? Jehova mhojea lagim uloita, oxem mhaka dista kai?’ Hea prosnancher ami chintun niallttat tednam Jehova pasot amchea kallzant aslolim bhavnam anik vaddttolim. Tache pasot aslolo amcho mog anik vaddttolo. Devachem Utor amchea kallzak lagta tednam ami Devak manta tosle bodlav korunk pavtolim.—Mho. 4:23; Luk. 6:45.
19 Devachem Utor sodanch vachun, tacher niall kelear, jem ami chodd korun thoddem tori kelam, tem chaluch dovrunk amkam urba mellttoli. Mhunnche, ami amchem ‘pornnem patki soimb ani tacheo chali soddun, khorea gineana udexim novea munxacho akar ghe-it ravtolim.’ (Kol. 3:9, 10) Hoi, Devachea Utracho khoro orth somzota tednam, ani amchea jivitacher tacho probhav poddtta tednam, amkam sodanch ies mellttolo ani ami novea munxacho sobhav vo Kristi sobhav vaddoitolim. Ho sobhav amkam Soitanachea naddbudʼdichea kamam thaun rakhonn mellonk modot kortolo.
Bible-ant Motiam Sodhum-ia
(Koloskarank 1:13, 14) Kallokhache razvottkentli Tannench amkam suttka dili, Aplea mogachea Putachea rajeant amkam bhitor kaddlim. 14 Tache sovem amkam mellʼlli amchi suttka, patkam-mafi:
it-2 169 ¶3-5
Devachem Raj
“Tachea mogachea Putachem Raj.” Jezu sorgar vochon dha disam uprant, 33 K.X. Ponʼnasavea Disachea Utsovak, Jezun tancher povitr xokti votoili tednam, Jezuk Devachea “uzvea vatten unch podvi” dili mhunn Jezuchea xisank kollon ailem. (D.I. 1:8, 9; 2:1-4, 29-32; 2:33, NW) Tednam ‘novo koraracho’ probhav tancher poddlo dekhun to korar lagu zalo. Hea toren, te “sonvskarlolem vo povitr raxttr,” mhunnche Devachea Israelache poile bhag zale.—Heb. 12:22-24; 1Ped. 2:9, 10; Gal. 6:16.
Krist atam tachea Bapaichea uzveak boslo ani hea sobhecho Mostok zalo. (Ef. 5:23; Heb. 1:3; Filp. 2:9-11) 33 K.X. Ponʼnasavea Disachea Utsova thaun, tachea xisancher ek otmik raj stapon zalem mhunn Bible-achim versam dakhoitat. Kolosant aslolea poilea xekddeantlea Kristanvank boroitana apostl Paulu Jezu Kristachem raj tednanch aslolea bhaxen uloita: “Kallokhache razvottkentli Tannench [Devan] amkam suttka dili, Aplea mogachea Putachea rajeant amkam bhitor kaddlim.”—Kol. 1:13; sor kor D.I. 17:6, 7.
33 K.X. Ponʼnasavea Disachea Utsova thaun Kristachem raj, ek otmik raj koxem Devachea Israelacher, mhunnche, Devan aplim otmik bhurgim zaunk povitr xokte udexim vinchun kaddlolea Kristanvancher razvottki choloitolem. (Ju. 3:3, 5, 6) Devachim bhurgim zalolea hea Kristanvank povitr xokte udexim sorgar inam mellttolo tednam te Kristachea otmik rajeache prithume voili porza mhunn urchenant, punn Krista sangata sorgar raza zatole.—Prok. 5:9, 10.
(Koloskarank 2:8) Monxanchea polkea xanneponnan tumkam fosoun, konnench tumkam aplea tabeant korina zaunk chotur ravat. Oslem xanneponn monxam thaun tumkam pavlolea xikovnnanchi vatt dakhoita zait, vo tem tumkam srixtti choloitat tea odhikarianchea nemanchea margar ghaltat zait, punn tem Kristachi zannvai nhoi.
w08 8/15 28 ¶9
Galasiekarank, Efezkarank, Filipkarank, ani Koloskarank Potrantle Mukhel Mudʼde
2:8—Paulun ‘munxanchea polkea xannemponna’ vixim xittkailolem tem kitem? Tem mhunnttlear, Soitanachea sonvsaracheo vostu vo totvam, jim tachea sonvsarachim bhag zaun asat, taka vatt dakhoitat vo urba ditat. (1 Juanv 2:16) Munxachea polkea xanneponnant, sonvsarachem totvginean, girestkai ani khotte dhorm mellon asa.
JULAY 8-14
DEVACHEA UTRANTLE THEVE | 1 TESALONIKEKARANK 1-5
“Ekamekak Dhir Diat ani Ekamekacho Bhavarth Ghott Korunk Vavrat”
(1 Tesalonikekarank 5:11-13) Mhonnttoch, zoxem tumi korun aileant, toxench ekamekak dhir diat ani ekamekacho bhavarth ghott korunk vavrat. 12 Bhavam-bhoinnimno, tumche modem koxtti vavr kortat ani Somiachea nanvan tumche voir odhikar choloitat ani tumkam bori budh ditat tanchi bhidda dhorat; 3 Tanchea vavrak lagun tankam vhodd man ani opurbai dakhoiat. Tumche modem xantin cholat.
w11 6/15 26 ¶12
“Ekamekak Dhir Diat ani Ekamekacho Bhavarth Ghott Korunk Vavrat”
12 Sobhecher ‘odhikar cholovop,’ mhunnche fokot xikounn divopuch nhoi. 1 Timotak 3:4-ant uzar kelolim “bore bhaxen cholovop,” him utram pasun, toch orth ditat. Thoim, ek sobhecho dekhrekh korpi, ‘aplo kuttumb bore bhaxen choloita toslo ani aplea bhurgeank khaltim ravonk bore dekhin lhan-vhodd korta toslo’ asonk zai mhunn Paulu sangta. Hanga uzar kelolim utram ‘bore bhaxen cholovop,’ mhunnche to aplea bhurgeank fokot xikoina, punn to aplea kuttumbant fuddakar gheta ani ‘aplea bhurgeank khaltim’ ravonk modot korta. Teach toren, vhoddil pasun sobhent fuddakar ghetat, ani sogleank Jehovak khaltim ravonk modot kortat.—1 Tim. 3:5.
w11 6/15 28 ¶19
“Ekamekak Dhir Diat ani Ekamekacho Bhavarth Ghott Korunk Vavrat”
19 Tuka konnem tori ek khas dennem dilem zalear tum kitem kortolo? Tem dennem uzar korun tum tea denneacho valor korta mhunn dakhoitolo? Jehovan tuka Jezu udexim, “monxank dennim vo munxam modem dennim” dileant. Vhoddil bhaxonn ditat tednam, te somzoitat te vixoi tumi dhean diun aikon apnnaitat tednam tumi tea denneancho valor kortat mhunn eke toren dakhounk xoktat. Toxench, tumi mittingent orth-bhorit zobab diun tea denneancho valor kortat mhunn dakounk xoktat. Vhoddil fuddakar ghetat tea kamant tankam tenko diat, zoxem porgottnnechea kamant. Eka vhoddilan dilolo solʼlo tuka faideak poddlo zalear, tea vixim taka vochon sanglear kitlem borem nhoi? Hachea bhair, vhoddilanchea familink tumi tancho valor kortat mhunn dakhounk zata kai? Ugddas dovrat, tanchi famil tanchea sangata sarcho asa to vell teag korta dekhun ek vhoddil sobhe pasot khub vavrunk pavta.
(1 Tesalonikekarank 5:14) Bhavam-bhoinnimno, xist nasloleank xiddkaiat, bhezuddank dhir diat, osoktank boll diat, soglleam sorim sosnnikaien cholat.
w17.10 10 ¶13
“Kornneamnim ani Sotan Mog Dakhoiat”
13 Oskotank boll diat. “Osoktank boll diat, soglleam sorim sosnnikaien cholat.” Ho Bible-antlo kaido ami pallttat tednam amcho mog kitlo khoro asa to dison ieta. (1 Tes. 5:14) Oskot asat tim zaitim zannam, uprant bhavarthant ghott zatat tori astana, thoddeank pasiensan amchi modot di-it ravchi goroz poddtta. Hem korunk ami tankam urba ditat toslim Bible-antlim versam dakhounk zatat, amchea sangata porgottnni korunk apounk zata, vo thoddo vell kaddun tim kitem sangtat tem aikonk zata. Tea bhair, ek bhav vo ek bhoinn “ghott” vo “osokt” mhunn bexttench chintchea bodlek, ami soglim thoddea ritimnim ghott asat ani thoddea ritimnim osokt asat mhunn ugddas dovrop gorjechem. Apostl Paulun pasun apnnank oskotaio asat mhunn manun ghetlem. (2 Kor. 12:9, 10) Tor, bhav-bhoinnam thaun melltta tea modoti thaun ami sogleamnim faido melloun gheunk zata.
w15 2/15 9 ¶16
Jezuchi Khaltikaiechi ani Movallaiechi Dekh Gheiat
16 Amchim movall utram. Dusream pasot amkam moipas asa zalear, ami ‘bhezuddank dhir ditolim.’ (1 Tes. 5:14) Osleank urba diunk ami kitem mhunnonk zata? Amkam tanchea vixim khoreamnim kitli kallji ani chinta asa, tea vixim tankam ami sangon urba diunk zata. Ami kallzant thaun tankam xabaski ditat tednam, apleak bore gunn ani tank asa mhunn tim pollounk pavtolim. Jehovan tankam aplea Puta lagim voddun haddleant, mhunnche, to tankam moladik mhunn lekhta mhunn ugddas korunk zata. (Juanv 6:44) Jea sevokanchem “kalliz dukhovlam khontovlam” vo zanchem “mon kollvollta vollvollta” tanchi Jehovak khub kallji asa mhunn ami tankam khatri diunk zata. (St. 34:18) Amchim movall utram, buzvonn zai asloleank ani dukhovloleank pekovnni haddunk xokta.—Mho. 16:24.
Bible-ant Motiam Sodhum-ia
(1 Tesalonikekarank 4:3-6) Devak zai tem hench: tumi povitr zalʼlim. Kamchar tumi pois korcho; 4-5 Devachi vollokh naslolea raxttram porim tumi kuddicheo vondovnnio bhagouncheo nhoi, punn zonn-eklean povitrtaien ani mannsugen aple potinnichea sangata jieunk zanno zaunchem. 6 He babtint konnench aplea bhavak onit korum noie ani taka fottoun tacho adav kaddum noie. Ami tumkam adim hem kollit kelam ani Deva mukhar oxi xiddkavnni dilea: oslea sogllea patkank Somi khast laitolo.
it-1 863-864
Pozoddponn
Pozoddponn osli ek chuk zaun asa, ji chuk keli zalear eka munxak Kristi sobhentlean bhair kaddunk zata. (1Kor. 5:9-13; Heb. 12:15, 16) Pozoddponn korta to Kristanv aple linga sombondit sandhe chukiche toren uzar korta dekhun to apleach kuddichea add patok korta mhunn apostl Paulu sangta. Oxem kelolean Deva sangata aslolea tachea ixttagoticher vaitt porinnam poddtta. Devachea sobhent to mhelleponn haddtta, ani loingik sombond dovorlolean mornnak pavoita toslea duensank to apleacher ieunk ieukar dita. (1Kor. 6:18, 19) To vo tem hem korun, aplea Kristi bhavanchea hokʼkacher paim dovorta: (1Tes. 4:3-7) (1) Sobhent mhelleponn, lojek pavoita toslem pixeponn ani sobhecher vaitt nanv haddtta (Heb. 12:15, 16), (2) jea konna sangata to vo tem pozoddponn korta, taka noitik ritin mhello korta, ani ankvar asa zalear to vo tem kazar zaunk nitoll urona, (3) tachea svotachea familichem nanv piddʼddear korta ani toxench (4) jea konnam lagim to pozoddponn korta, tachea avoi-bapaichea, ghovachea, vo tachem konnam lagim kazar zaunchem aslem tachea add patok korta. To munxachi nhoi punn Devachi beporva korta. Munxanche kaide, pozoddponn chukichem vo chukichem nhoi mhunn sangonk puro, punn Dev tachea patkachem sarkem farikponn ghetolo.—1Tes. 4:8.
(1 Tesalonikekarank 4:15-17) Ami tumkam atam xikoitanv ti Somiachich xikovnn: ami, jivim asanv tim, Somiachea ienneak Dev ozun jivim dovortolo tim, morun geleant tanche adim Somiachea sangata aschim nanv; 16 Kiteak hukum porgott zatolo, Mha-devdutacho tallo gaztolo ani Devachi tuturi vaztoli; tednam Somi Apunn khaxa sorgar thaun denvtolo, ani Kristacher bhavarth dovrun meleant tim poilim punorjivont zatolim: 17 uprant ami jivim astoleanv tim, Dev ozun jivim dovortolo tim: Kristak ontrallar mellche khatir, amkam tanche borabor kupancher uklun vhortole. Oxem ami Somiachea sangata astoleanv sodam-sodankal.
w15 7/15 18-19 ¶14-15
“Tumchi Soddvonn Lagim Pavlea”!
14 Magogachea Gogan Devachea lokancher akromonn korunk suru kelea uprant kitem zatolem? Matev ani Marku ekech ghoddnne vixim oxem sangta: “To [Munxacho Put] aplea dutank dhaddun char-ui dixam veleam, prithumechea ximam thaun ontrallachea ximam porian astolea, apnnem vinchloleank zomoitolo.” (Marku 13:27; Mt. 24:31) Hem zomovop vo ektthaim korop, obhixiktank poilim ektthaim korchea vella vixim sangona, vo urlolea obhixiktank nimanno xikʼko melltta tea vella vixim sangona. (Mt. 13:37, 38) To nimanno xikʼko, vhodd sontap suru zaunchea poilim marun zatolo. (Prok. 7:1-4) Tor Jezu uloitalo tem zomovop vo ektthaim korchem kam koslem? To 1,44,000 zannantlea urlolea obhixiktank sorgincho inam mellttolo tea vella vixim uloitalo. (1 Tes. 4:15-17; Prok. 14:1) Hi ghoddnni Magogachea Gogan akromonn korunk suru kelea uprant kednam tori ghoddttoli. (Ez. 38:11) Magir Jezuchim him utram purnn zatolim: “Tednam Devak manovlolim monxam aplea Bapachea Rajeant suria vori porzolltolim.”—Mt. 13:43.
15 Hacho orth obhixikt zann “kuddi soit” sorgar voitole kai? Prithume thaun Kristanvank kuddi soit vhortole ani uprant prithumer Jezu razvottki choloitolo tednam taka soglim pollounk xoktoli mhunn Kristanv mhunnttat tosle dhormache lok patietat. Punn, “monxachea Putachi khunna” sorgar dixtti poddttoli ani Jezu “mollbachea kupancher” dixtti poddttolo mhunn Bible spoxtt toren sangta. (Mt. 24:30) Hea donui utramnim te dixtti poddona mhunn kollon ieta. Hachea bhair, “masa-rogotak Devachea Rajeachem daiz zoddunk tank na.” Tor zankam sorgar vhortole, te “eke ghoddie bhitor, dollo bittbittʼta mhonnosor, nimanne tuturechea sadar . . . rupantor” zatole. (1 Korintkarank 15:50-53, vachat) Toxem zalolean, ami hanga “kuddi soit” him utram uzar korinant karonn to chukicho orth dita. Punn, urlole visvaxi obhixikt sogle sangata eka dhopkeant ektthaim zatole.
JULAY 15-21
DEVACHEA UTRANTLE THEVE | 2 TESALONIKEKARANK 1-3
“Khotto To Uktim Dixtti Poddtta”
(2 Tesalonikekarank 2:6-8) Nemlolea kalla adim to dixtti poddona zaunk kitem taka addaun dovorta, tem-i tumi zannont. 7 Gupit bollan khotteponn aplem kam korit asa, ani zo konn tem atam addaun dovorta to na zai-sor tem gupit urtolem. 8 Tednam mat Khotto to uktim dixtti poddtolo. Somi Jezu Aplea tonddachea bafan tacho jiv kaddtolo ani Aplea ienneachea dobajean tacho nas kortolo.
it-1 972-973
Devachi Bhokti
Hanga anik ek gutt liplolo asa, zo Jehovacho “gutt vo povitr guttachea” sarko add asa. To gutt mhunnttlear “gupit bollan khotteponn vo hea khotteponnacho gutt.” Ho Kristanvank gupit aslo, vo ek gutt aslo, karonn apostl Pauluchea disamnim “khotto to” ek umko vorg mhunn tachi vollokh spoxtt disonk nasli. To “khotto” ailea uprant pasun, tache khotteponn Devachi bhokti korchea nanvan cholta dekhun zaiteank to gupit astolo. Khorem mhunnttlear, tachem khotteponn khorea Devache bhokte thaun koddsorlolo broxtt dhorm zaun asa. Aplea disamnim “hea khotteponnachea guttachem” kam chalu aslolem mhunn Paulun sanglem. Karonn Kristanv sobhent khotteponnacho probhav aslo, zo uprant ek dhorm broxtt vorg zaun uprascho aslo. Xevottak, Jezu Kristachea ienneachea vellar, to hea khotteak nas kortolo. Soitanachea probhava khala aslolo, ho dhorm broxtt “khotto,” apnnank “‘dev’ mhunntta vo bhozta (Gr., seʹba·sma) titleacherui to uprasta.” Tor ho khotto, Deva add aslolea Soitanachem hotʼtiar zaun asa. To ek vhodd fottoupi, ani tachea chali ritim pormonnem choltat tancher to nas haddtta. To “khotto” iexosvi zata, karonn tachem khotteponn Devachea ddhongi bhoktechea poddʼddean dhanklolem asa.—2Tes. 2:3-12; Mt. 7:15, 21-23 sor kor.
(2 Tesalonikekarank 2:9-12) To Khotto Soitanache podven ietolo, ani soglle torecheo bollvont kornnio, fottkirim ojapam ani vismitam korun dakhoitolo; 10 ani ibadd zaunchim asat tankam sogllea jinsachea khotteponnan fosoitolo. Sotacho mog korun apli soddvonn zoddunk tankam naka zalem dekhun, tim ibadd zatolim. 11 Dekhun Devachea nirmonnan fottichem boll tancher denvta ani oxem tim fott manun gheunk pavtat. 12 He porim, zannim sot manun ghetlem na punn khotteponnachi seva korunk vinchun kaddlem, tim sogllim khastichea formonnak sampoddtolim.
it-2 245 ¶7
Fott
Fottingponn vinchun kaddttolea lokancher “fottichem boll” denvunk Jehova Dev soddun dita. Hea toren te Jezu Krista vixim aslolea borea khobrecher bhavarth dovorchea bodlek “fott manun gheunk pavtat.” (2Tes. 2:9-12) Hem totv somzonk zaitea xekddeam adim, Israelacho Raza Ahabachea disamnim kitem ghoddlem tachea voilean kollon ieta. Ahab Ramoth-gileada virudh zhuzlear jiktolo mhunn fottkire provadi taka sangtat. Punn Jehovacho provadi Mikaian taka ies mellcho na mhunn sanglem. Mikaian polloilolea dorxona pormonnem, Jehovan eka devdutak, Ahabachea provadeank “fott uloum-xe” korunk soddun dilo. Hacho orth, hea devdutan apli xokti uzar korun tea provadeank sot uloum-xe nhoi, punn te apunn zaun kitem sangonk sodhtale, ani Ahab kitem aikonk sodhtalo tem uloum-xem kelem. Taka poilinch xittkailolem, toripunn, Ahaban tancheo fotti aikon apnnakuch fottoilo, ani taka aplo jiv hogddauncho poddlo.—1Raz. 22:1-38; 2It. 18.
Bible-ant Motiam Sodhum-ia
(2 Tesalonikekarank 1:7, 8) ani Somi Jezu aplea bollixtt devdutam borabor sorgar thaun ieta to dixtti poddtolo tednam, tumkam, atam koxtt-dogd bhogtoleank, toxench amkam-i Dev ilaz ditolo. 8 Kiteak Somi Jezu ujeachea agttea modem denvun ietolo ani Devak vollkhun ghenant ani amchea Somia Jezuchem Xubhvortoman manun gheunk kobul nant tankam to xikxa laitolo.
it-1 834 ¶5
Uzo
“Atanchem mollob ani atanchi prithum ujean lasun uddounk dovorleant” mhunn Pedrun boroilolem. Hea versanchea poilinchim ani uprantlim versam ani toxench Bible-antlea her versam udexim hanga khorea ujea vixim nhoi, punn sasnachea nisonttona vixim sangta mhunn kollon ieta. Noah-chea disamnim ailolea buddtten khorem mollob ani prithum nas korunk na, punn fokot Devachi bhokti korinant toslea munxancho nas kelo. Teach toren, Jezu Krist ani tachea xoktivont ainzanchi prokasovnni zata tednam, fokot Devachi bhokti korinant toslea lokanchem, ani jea khottea sonvsarache te bhag asat, tachem sasnak nisontton zatolem.—2Ped. 3:5-7, 10-13; 2Tes. 1:6-10; sor korat Iz. 66:15, 16, 22, 24.
(2 Tesalonikekarank 2:1, 2) Somiacho dis pavlo mhonn sangun konnem-i bhakit kelem zalear, vo aminch oxem mhollam vo boroun dhaddlam mhonn konn-konn sangtit zalear, 2 tumchem mon sompeponnim ghusponk dium nakat mhonn vo tumi akantum nakat mhonn ami tumche lagim magtanv.
it-1 1206 ¶4
Bhakit
“Prerit Kelolim Utram”—Sot ani Fott. Apostlamnim boroilolea thoddea borounneant pneuʹma (otmo) hem Grek utor, khas toren uzar kelam. Udharonnak, 2 Tesalonikekarank 2:2-ant apostl Paulun Tesalonikentlea bhavank, “Somiacho [“Jehovacho,” NW] dis pavlo mhonn sangun konnem-i bhakit [mullavo orth, “otmo”] kelem zalear, vo aminch oxem mhullam vo boroun dhaddlam mhonn konn-konn sangtit zalear” tanchem mon sompeponni ghusponk diunchem nhoi vo akantunk diunchem nhoi mhunn sanglem. Paulu hanga pneuʹma (otmo) hem utor, “mhollam” vo “boroun dhaddlam” hea utram sangata uzar korun, hanga tacho orth eka-meka lagim ulounchi ek vatt mhunn dakhoun dita. Heach karonnak lagon, Lange-chem Commentary on the Holy Scriptures (p. 126) hea vixim oxem sangta: “Hanga Apostl, Devak sombondit ek vixoi-a vixim, fuddarachi ghoddnni sangta mhunn dhong korchea vixim, eka provadeachea utram vixim sangonk sodhtalo.” (P. Schaff-an kelolem bhaxantor ani sudharnni, 1976) Vincent-acho Word Studies in the New Testament oxem mhunntta: “Otmea udexim. Kristanv zomatimnim aslole sodox, apnnank Devan kolloilolim utram herank sangcho odhikar mellʼlla mhunn dhavo korun, kelolea bhakitam udexim.” (1957, Vol. IV, p. 63) Tor, thoddim bhaxantoram, hanga ani oslea her kodden pneuʹma hea utrak bexttinch “otmo” hem utor uzar kortat. Punn her bhaxantoramnim tea utram bodlek “Otmeacho sondex” (The Bible—An American Translation), “fuddar sangop” (The Jerusalem Bible), “preronna” (DʼOstervald; Segond [French]), “prerit kelolim utram” (NW) him utram uzar keleant.
JULAY 22-28
DEVACHEA UTRANTLE THEVE | 1 TIMOTAK 1-3
“Eka Borea Kamak Lagon Fuddem Sorat”
(1 Timotak 3:1) Hi sangnni khatrechi: zo konn sobhecho fuddari zaunchi axa ballgita, to borea kamachi axa ballgita.
w16.08 21 ¶3
Devachea Sevent Vaddavoll Korchi Goroz Asa Mhunn Tumkam Dista Kai?
3 1 Timotak 3:1 vachat. “Axa ballgita” hea utrank uzar kelolea Grek kriapodacho orth, kitem tori dhorop, ghoddie jem sompemponni hath lavpak mellona, tem aplo hat lamb korun dhorop. Him utram uzar korun apostl Paulu, Devachea sevent vaddavoll korunk vavr korop gorjechem mhunn sangonk sodhtalo. Chintat, fuddarak apunn sobhent kitem kortolo mhunn ek bhav niall korta. To hea vellar sobhecho sevok nasot, punn apnnem Devak manta te gunn vaddounchi goroz asa mhunn to somzota. Poilo, to ek sobhecho sevok mhunn purto zaunk proitn korta. Magir, to Devak manta tosle gunn vaddoun sobhecho dekhrekh korpi mhunn vavrunk axeta. Punn dor eka vellar, sobhent anik zobabdari samballunk to goroz te gunn vaddouncho proitn korit ravta.
(1 Timotak 3:13) Prodhan-sevokanchem muniarponn bore bhaxen kortit te sobhe modem apnnank vhodd man zoddtole, ani Jezu Kristacher dovorcho asa to bhavarth vhodda kalljidarponnan porgottunk pavtole.
km 9/78 4 ¶7
‘Apnnank Vhodd Man Zoddttat’ Tosle
7 “Apnnank vhodd man zoddtole” mhunn Paulun kiteak mhunnttlem astolem tem somzonk sompem asa. Thodde mhunnttat toxem, igorjent podvi melloun gheunk vavurchea vixim to uloinaslo. Bodlek, ‘bore bhaxen muniarponn choloitat’ tea sobhechea sevokank, Jehovachem ani Jezuchem besanv mellttolem ani akʼkhi sobha tankam resped ani tenko ditoli mhunn tannim khatri dovrunk zata mhunn to sangtalo. Toxem zalolean, te “Jezu Kristacher dovorcho asa to bhavarth vhodda kalljidarponnan porgottunk” pavtat. Tanchi zobabdari te visvaxiponni kortat dekhun, tanche bore sevek lagon sobha tancho valor korta; tancho bhavarth halona toslo ani te bhienastana vo lojechi bhirant nastana aplea bhavartha vixim porgottʼttat.
Bible-ant Motiam Sodhum-ia
(1 Timotak 1:4) Toxench, polkea kanniancher ani purvozachea vonxa-vollincher dhean-mon dovrun vell ibaddinakat mhonn tankam sang. Oslea vostumnim polke vivad mat upzotat; Devachi ievzonn fuddem vhorunk te vivad kiteakuch upkaronant, kiteak hi ievzonn fokot bhavartha vorvim fuddem veta.
it-1 914-915
Vonxavoll
Oslea vixoi-acher obheas korop vo bhasabhas korop faideachem naslem, ani Paulun Timotak boroilolem tednam tor, tem kainch faideachem naslem. Apunn khoinchea kulla thaun zolmolo tem vonxavolle udexim dakhoun diunchi gorozuch nasli, karonn Dev Judevank ani Videxiank Kristi sobhent ekech bhaxen polloitalo. (Gal. 3:28) Ani Krist Davidachea vonxavolli thaun ailo mhunn dakhoun diunk adim fuddench vonxavolli vorvim dakhoun dilolem. Tea bhair, Paulun ho solʼlo diun thoddeach tempa uprant Jerusalemacho nas zauncho aslo, ani tednam Judevancheo borounneo kabar zauncheo asleo. Devan tem rakhun dovrunk na. Toxench, Timot ani sobha oslea vixoi-ancher sodh korun vell ibadd korit mhunn Pauluk husko zalolo. Ap-aplea svotachea vonxavolle vixim sodh ani bhasabhas korun tancho Kristi bhavarth ghott zai naslo punn tanchem dhean halounk xoktalem. Kristachi vonxavoll Kristanvank chodd gorjechi asli. Bible-ant diloli hi vonxavoll Mesias Krist mhunn dakhoun diunk puro asli. Bible-ant diloli her vonxavolleo, Bible-ant boroilam tem khorem ani itihasant khorench ghoddlolem mhunn dakhoun ditali.
(1 Timotak 1:17) Dekhun kallam-iuganchea Raiak, ovinaxi ani amkam disonaslolea ekleach Devak, man ani mhoima sodam-sorvoda! Amen!
cl 12 ¶15
“Polloi! Ho Amcho Dev”
15 Fokot Jehovakuch uzar keloli anik ek podvi mhunnche to ‘kallam-iugancho Rai.’ (1 Timotak 1:17; Prokasovnni 15:3) Hacho orth kitem? Jehovak survat na ani ont na. Hem amchea lhan motik somzonk kotthin zata. Stotr 90:2 mhunntta: “Sasnnak thaun sasnnak porian Tum Dev!” Tor Jehovak survat na; to sodanch aslo. Taka lagon taka “Bhov Vondivont Zannto”—hea vixvant kiteachi-i vo konnachi-i survat zaunchea poilim to sodanch aslo! (Daniel 7:9, 13, 22) To Sorvpodvedor Somi mhunn aslolea podvecher taka konn prosn vicharunk xokta?
JULAY 29–AGOST 4
DEVACHEA UTRANTLE THEVE | 1 TIMOTAK 4-6
“Devachi Bhokti ani Girestkaie Modem Aslolo Ontor”
(1 Timotak 6:6-8) Devachi bhokti korun apnnank mellʼllam titlean monxam dhadoxi zatat zalear, Devache bhoktin tankam khoreponnim khub girest keleant mhonnchem. 7 Sonvsarant ietana kitem ami gheun aileanv? Kaich nhoi! Sonvsar soddun vetanam kitem tori ami gheun vetoleanv? Kaich nhoi! 8 Mhonnttoch amkam jevunk-khaunk ani nhesunk-pangrunk aslear, itlean ami dhadoxi zaunchem.
w03 6/1 9 ¶1-2
Asa Titleant Dhadoxi Ascho Gutt Xikop
Paulu khuxal ani dhadoxi asonk ek mukhel karonn mhunnttlear to aplea lagim asa titleant dhadoxi aslo. Aplea lagim asa titlean dhadoxi asop mhunnttlear kitem? Goroz tea vostumnim dhadoxi asop. Hea vixim, Paulun, aplo sevecho vangddi Timotak oxem sanglem: “Devachi bhokti korun apnnank mellʼllam titlean monxam dhadoxi zatat zalear, Devache bhoktin tankam khoreponnim khub girest keleant mhonnchem. Sonvsarant ietana kitem ami gheun aileanv? Kaich nhoi! Sonvsar soddun vetanam kitem tori ami gheun vetoleanv? Kaich nhoi! Mhonnttoch amkam jevunk-khaunk ani nhesunk-pangrunk aslear, itlean ami dhadoxi zaunchem.”—1 Timotak 6:6-8.
Dhean diat, aplea lagim asa titlean dhadoxi asop Devache bhoktek mellon asa mhunn Paulun dakhoun dilem. Khori khuxalkai Devachi bhokti kelolean melltta, mhunnche aspoti vo girestkaie thaun nhoi, bodlek jivitant Devachi seva poilea zagear dovorlolean melltta. Devachi bhokti korit ravonk, ‘jevonn-khann ani nhesop-pangrop’ hi fokot ek modot zaun asli. Tor, Paulu aplea lagim asa titleant dhadoxi ascho gutt mhunnttlear, to kosli-i poristhiti ailear Jehovacher patieun ravlo.
(1 Timotak 6:9) Girest zaunk sodtat tim tallnnek ani devcharachea fasak sampoddtat, kiteak nirbudhi ani noxttadik vondovnnio tankam oddun vhortat; osleo vondovnnio monxank nisonttonak ani ghorttannak pavoitat.
g 6/07 6 ¶2
Girest Zaunk Sodhlear Tumcher Koslo Porinnam Zaunk Xokta
Girestkaie fattlean dhanvlolean lok moronant hem khorem. Punn, tem mellpak lagon tantun buddloleank tanchem jivit kednam soron gelem tench kollona. Tea bhair, tanchea jivitacher vaitt porinnam zaunk xokta. Kamache dobhav vo poixeak lagon tankam chinta asta dekhun, tankam chodd bhirant vo uske zata, nhid poddona, sodam tokli usoltta, vo kuddicher vo kuddi bhitor ghave zaunk xoktat. Hea soglea duensank vo trasank lagon tim begin moronk xoktat. Ani eka munxak aplea jivitant kitem khorench gorjechem tem kollon ailear pasun, tednam meren chodd uxir zaunk xokta. Tachi bail ghoddie tacher visvas dovorchina, tachea bhurgeanchea bhavnancher tea meren vaitt porinnam poddlolo astolo, ani tachi bolaiki tednam meren piddʼddear zalʼli astoli. Thodde vaitt porinnam ghoddie kaddunk zait, punn taka lagon khub vavurchem poddttolem. Toslea lokamnim khoreamnim “koxtt-dogd aplea mathear . . . oddun haddleat.”—1 Timotak 6:10.
(1 Timotak 6:10) Sogllea vaittanchem mull mhollear girestkaiechi axa; osli axa dhorun, kai zannam bhavartha thaun koddsorun geleant ani oxem sobar koxtt-dogd aplea mathear tannim oddun haddleat.
g 11/08 6 ¶4-6
Ies Melloun Gheunk Sov Chavio
Ami hea masikent survatek bhasabhas keloli toxi, girestakie thaun ies mellttolo mhunn chintun tachea fattlean urben dhanvtat te lok khore mhunnttlear eka sopna fattlean dhanvtat. Niraxiponna sangata, te aplea jivitant zaitem dukh haddttat. Udharonnak, nettan girestkai melloun gheunk vavurtat te lok choddxe tanchea famili ani ixttam sangata aslolea sombondak valor dinant. Her lok ghoddie kamak lagon nhoi, punn usko vo chinta asa dekhun goroz ti nidh hogddaitat. “Eka vavr korpi munxak bori nhid poddtta, to chodd vo unnem jevum; punn zaiti girestkai asloleak ti girestkai nidhunk diunchi na,” mhunn Upodexok 5:11 sangta.—Hebrew Names Version.
Poiso fokot ek nixttur dhoni nhoi, punn ek fottovpi dhoni pasun zaun asa. Jezu Kristan, “girestkaiechi bhul vo fottounchi xokti aslole girestkaie” vixim sanglem. (Marku 4:19) Dusrea utramnim mhunnot zalear, girestkai khuxalkai haddtta mhunn utor dita, punn diunk xokona. Ti fokot chodd melloun gheunk as vaddoita. Upodexok 5:10 sangta, “Poixeacho mog korta to munis kednanch dhadoxi zaina.”—The New English Bible.
Thoddea utramnim sangchem zalear, poixeancho mog korpi svotak haroita ani ho mog taka xevottak nirax korta, taka ragar korta, vo taka oprad korunk pavoita. (Mhonnʼnneo 28:20) Bodlek udarponn, bhogsuncho gunn, noitik nitollsann, mog ani Deva sangata ixttagot khuxalkai ani ies mellonk modot korta.
Bible-ant Motiam Sodhum-ia
(1 Timotak 4:2) Heo xikovnno fottkirea monxanchea ddhongeponna udexim ietoleo; tanchea ontoskornnancher devcharan dag diun aplo xikʼko marla.
lvs 23-24 ¶17
Deva Lagim Ek Borem Ontoskornn
17 ‘Tumchem ontoskornn guneanva-mekllem dovrat,’ mhunn apostl Paulun boroilem. (1 Pedru 3:16) Dukhachem mhunnttlear, Jehovachim totvam durlokx korit ravtat tea lokanchem ontoskornn, thoddea vella uprant tankam xittkaina. Oslea ontoskornnan “dag diun aplo xikʼko marla,” mhunn Paulun sanglem. (1 Timotak 4:2) Tumi kednam-i ujeant hulpoleant? Toxem zata tednam, tumchea katicher dag vo khot poddon urta, ani thoddea tempa uprant tea zagear tumkam konnem-i hat lailear kainch kollona. Ek munis vaitt korit ravta zalear, tachea ontoskornnacher “dag” poddonk xokta, ani vell sorlea uprant tachem ontoskornn kam korina.
(1 Timotak 4:13) Hanv ie-sor, sobhek Povitr Pustok vachunk, updesunk ani xikovnn diunk lokx di.
it-2 714
Jahir Zagear Vachop
Kristi Sobhent. Poilea xekddeant, Bible-ache thoddech kovlleo asle dekhun sogleam fuddem vachop gorjechem aslem. Apostl Paulun, jea Kristi sobhek potram dhaddlim, tea sobhechea mittingent tim vachunk zai aslim ani uprant tannim tim her sobhank dhaddun tea sobhamnim tim vachunk zai aslim mhunn Paulun adnea dilʼli. Hem korunk, dhaddlolim potram sobhamnim eka-meka sangata vanttunk zai mhunn apostl Paulun hukum dilo. (Kol. 4:16; 1Tes. 5:27) Kristi dekhrekh korpi tornnattea Timotak Paulun, “vachunk, updesunk ani xikovnn diunk lokx di” mhunn solʼlo dilo—1Tim. 4:13.
Jahir zagear vachop kortat tednam ami suddsuddaien vachunk zai. (Hab. 2:2) Jahir zagear vachop dusreank xikounk lagon vachtat dekhun, eka vachpeak to vachta tea bhagachi bariksannechi vollokh asonk zai, ani boroupi tea utramnim kitem mhunnonk sodhta tachi taka sarki somzonni asonk zai. Vachta tednam tannem aiknnareank chukichi somzonni vo chukichim chintna iena zaunk chotur ravchi goroz asa. Prokasovnni 1:3-ant sanglam toxem, tem bhakit vhoddlean vachtat tim, ani utram aikon pallttat tim, subhagi.