Agost—Jivit ani Porgottnni Mittingechea Pustike Pasot Modot
AGOST 5-11
DEVACHEA UTRANTLE THEVE | 2 TIMOTAK 1-4
“Devan Amkam Dila To Atmo Amkam Bhezudd Korina”
(2 Timotak 1:7, NW) Kiteak Devan amkam dila to otmo amkam bhezudd korina, punn xokti dita, mog vaddoita, ani sarkem chintop dovrunk modot korta.
w09 5/15 15 ¶9
Tornnatteamno—Tumchi Udorgot Dixtti Poddum Di
9 Paulun Timotak modot korunk tachea ugddasak haddlem: “Devan amkam dila to otmo amkam bhezudd korina, punn xokti dita, mog vaddoita, ani sarkem chintop dovrunk modot korta.” (2 Tim. 1:7, NW) “Sarkem chintop” mhunnttlear, chintpachi-somzunchi ani xanneponnan kam korchi tank. Hacho orth, tumkam ek poristhiti oxi asonk zai oxem dista tem chintun tacho fuddo korchea bodlek, ti poristhiti asa toxich ticho fuddo korchi tank. Onnbhov naslole thodde tornnatte bhezuddponnacho otmo dakhoitat. Tanchea monacher aslolea dobhava thaun bhair soronk lagon, te hispa bhair nhidtat vo TV polloitat, gungim vokhdam ghetat vo bebdikai kortat, soglo vogot party kortat, vo pozoddponn kortat. Kristanvank, ‘odhormi jivitachi vatt ani sonvsari axa sanddunk, . . . hea iugant aplem jivit mannsugechem ani Devak manta toslem dovrunk, ani tachi bhokti korunk,’ xittkailam.—Titak 2:12.
(2 Timotak 1:8) Mhonnttoch amchea Somiacho govai koso ubo ravunk lojenaka, vo hanv Tache khatir bondkhonnint poddlam mhonn mhoje-i pasot lojenaka. Portench zalear, Xubhvortomana khatir mhojea vangdda koxtt ani dhumalle sosun ghe, ani te sosunk Dev tuka boll ditolo mhonn patieun rav.
w03 3/1 9 ¶7
‘Dhir Gheiat Ani Ghott Ravat!’
7 Paulun Timotak oxem boroilem: “Devan amkam dila to atmo amkam bhezudd korina, punn Devacho atmo amkam ghottaien bhorta . . . Mhonnttoch amchea Somiacho govai koso ubo ravunk lojenaka.” (2 Timotak 1:7, 8; Marku 8:38) Him utram vachlea uprant, ami amkanch vicharunk zata: ‘Mhojea patienni vixim sangonk hanv lojetam kai vo hanv dhiran uloitam? Jea zagear hanv kam korta (vo iskolak voitam) thoim, hanv ek Jehovacho Sakxi mhunn sangta vo lipoitam? Hanv dusream poros vegllo ravonk lojetam, vo Jehova sangata aslolea mhojea ixttagotik lagon vegllo ravop mhaka manachem dista? Xubhvortoman porgott korunk konn-ui fatti sorta vo lojeta zalear, Jehovan Joshua-k dilolo solʼlo tannem ugddas dovrunk zai: “Dhir gheiat ani ghott ravat.” Kednanch visronakat, amche kamache vangddi vo iskolantlim bhurgim kitem chintat tem mhotvachem nhoi, bodlek Jehova ani Jezu Krist kitem chintat tem mhotvachem.—Galasiekarank 1:10.
Bible-ant Motiam Sodhum-ia
(2 Timotak 2:3, 4) Jezu Kristacho bollvont soinik za ani tuka ietat tea koxttank dhiran fuddo kor. 4 Soinikachi seva korunk zannem aplem nanv dilam, to hea jivitachea heram rattimnim kednanch ghusollna, kiteak apnnak soinikache sevek ghetla tea senapotichea hukumank sarkoch aito asun to taka manonk zai.
w17.07 10 ¶13
Khori Girestkai Sodit Ravat
13 Timot ek bhavarthi munis aslo. Paulun taka “Jezu Kristacho bollvont soinik,” mhunnttlea uprant tannem taka sanglem: “Soinikachi seva korunk zannem aplem nanv dilam, to hea jivitachea heram rattimnim kednanch ghusollna, kiteak apnnak soinikache sevek ghetla tea senapotichea hukumank sarkoch aito asun to taka manonk zai.” (2 Tim. 2:3, 4) Aiz Jezuchea pattlavdaram modem, dha lakha poros chodd zann Paulun dilolo solʼlo apnnaun aple poristhiti pormonnem apnnachean zata titlem korun purnn vellachi seva kortat. Jahirat ani sonvsara thaun ietat tea dobhav pois korun te hem totv ugddas dovortat: “Rinnkari rinn diupeacho gulam zata.” (Mho. 22:7) Soitanak ami gulam koxe zaun amcho vell ani amchi takot tachea veapareachea sonvsarant sarloli zai. Ami kelolea thoddea nirnnoiank lagon ami zaitim vorsam rinnachea gulamponnant uronk xoktat. Ghor dovrun kaddlolem vhodd rinn, xikxonnak lagon kaddlolem rinn, mharog gaddi vikti gheunk kaddlolem rinn, chodd khorch korun kelʼlea kazarak lagon bhorunk zai tem rinn, hem soglem poixeank lagon zaito temp porian ekleacher vhodd dobhav ghalunk xokta. Tor, amchem jivit sadem dovrun, rinn ani khorch unno kortat tednam ami xanneponn dakhoitat. Hea toren ami aichea veapar sonvsarache gulam zaunchea bodlek Devachim gulam zaunk svotontr astat.—1 Tim. 6:10.
(2 Timotak 2:23) Orth-naslole ani xisti-bhaile vivad vattai; tankam lagun tonddak tondd zata mhonn tum zannoi.
w14 7/15 14 ¶10
Jehovache Lok “Khotteponn Pois” Kortat
10 Aiz Jehovachea lokank chodd korun sobhe bhitor fottkirea xikoupeank tondd diunk poddona. Toripunn, Devachea utrant nasloli xikounn ami aikotat tednam, ti khoim thaun-ui ieum, ami ti nakarunk zai. Fottkirea xikoupeam sangata ami vad-vivad korop xannemponnachem nhoi, zaum te mellttat tednam vo internet-ar vo anik khoinchea-i ritin. Amcho irado tankam modot korcho aslear pasun, oxem korop Dev dita tea solʼleam add zatolem. Tachea bodlek, ami Jehovache lok dekhun, fottkire xikounne thaun ami soglea toren pois ravtat ani ti nakartat.
AGOST 12-18
DEVACHEA UTRANTLE THEVE | TITAK 1–FILEMONAK
“Zannte vo Vhoddil Nemche”
(Titak 1:5-9) Tuka Kretant pattim dovrunk karonn hem: thoim jem kitem opurtem urlam, tem tunvem purtem korchem ani dor-eka nogrant tunvem zannte nemche. Hanvem tuka sanglam tem monant dhor: 6 dor-ek zannto guneanv-naslolo zauncho ani taka ekuch potinn aschi; tachim bhurgim zaunk zai bhavarthi, ani tim pamprel vo avoi-bapaichem aikonant mhonn konnench tancher dad diunk zaina toslim. 7 Zo konn dhormadheokx, to, Devacho karbhari mhonnttoch, guneanva mekllo zaunk zai; to gorvi vo ragixtt zauncho nhoi, nhoi mhonn bebdo, markor vo girestkaieche axecho. 8 Portench, to porkeancho poramos korta toslo zauncho ani bholeponnan bhorlolo; to moriadik zaunk zai, Devak manta toslea jivitacho ani Tache bhokticho, ani apnnakuch domaunk zanno aslolo. 9 Xastra pormannem bhavarthacho nirop ghott samballta toslo to zaunk zai; oxem to oputt sarki xikovnn diun herank updesunk xoktolo ani ticher add uloitoleam kodde vivadunk zanno zatolo.
w14 11/15 28-29
Vachpeam Thaun Prosn
Adim dor ekleak koxe nemtale tea vixim Bible-ant bariksannen sanglolem na, punn nemnnuk koxi zatali tea vixim somzunk Bible modot korta. Paulu ani Barnabas tanche poile mixinori bonvdde thaun porot ghora voitale tedna, “Dor-eke Povitr-Sobhek tannim zannte nemle ani, magnnim ani upas korun, jea Somiak [“Jehovak,” NW] tannim bhavarthan manun ghetlolo, tea Somiache [“Jehovache,” NW] adhin tankam kele.” (Itihas 14:23) Khubxea vorsam uprant, Paulun aplea bhonvddi korpi sangati Titak, oxem boroilem: “Tuka Kretant pattim dovrunk karonn hem: thoim jem kitem opurtem urlam, tem tunvem purtem korchem ani dor-eka nogrant tunvem zannte nemche. Hanvem tuka sanglam tem monant dhor.” (Titak 1:5) Teach toren apostl Paulu borabor, zaiteo bhonvddi kelolea Timotak pasun osloch odhikar dilolo mhunn dison ieta. (1 Tim. 5:22) Tor, hi nemnnuk Jerusalem-ant aslole apostl ani zanntte korinasle, punn bhonvddi korpi vhoddil kortale mhunn sarke kolltta.
Bible-ant sanglolea hea manddavolli pormonnem, Jehovachea Sakxeanchem Sonchalon Monddollan, vhoddil ani sobheche sevokanchi nemnnuk konn korta tantunt bodlav kela. Setembr 1, 2014 thaun nemnnuk hea toren zata: Dor ek sorkittachi dekhrekh korpi aplea sorkittant zobabdari gheunk purte asat tanche vixim bariksannen topasta. Sobhent bhett dita tednam to tanche vixim anik zannam zauncho proitn korta ani ghoddtta zalear tanchea sangata sevent pasun kam korta. Tea sobhechea vhoddilam sangata tea bhavam vixim uloun zalea uprant tea bhavank vhoddil vo sobhecho sohokari mhunn nemchi zobabdari sorkittachea dekhrekh korpeachi zaun asa. Hea toren, poilea xekddeant asli toxi manddavoll zata titli atam-i pallʼllea.
Hea manddavollint aslole veg-veglli zobabdari konn kortat? Sodanche bhaxen, gorabeak jevonn diunchi mukhel zobabdari ‘visvaxi ani xannea chakrachi’ zaun asa. (Mt. 24:45-47) Te, povitr xoktechea adaran Bible versancho sodh kortat ani tantuntlim totvam jivitant koxim apnnaunk zatat, tea vixim margdorxon ditat. Hea toren sonvsarbhor asloleo sobha manddavollin cholounk modot zata. Visvaxi chakor soglea sorkittachi dekhrekh korpeank ani xaka somitichea bhavank pasun nemta. Toxench, dor ek xaka ofis chakra thaun mellʼllolem margdorxon pallunk sobhank modot korta. Sobhentlea vhoddilank, Devachea sobhent zobabdari gheunk purte asat mhunn tannim sanglam tea bhavam vixim Bible-ant sanglolea pormonnem bariksannen topasnni korchi ekdom gombir zobabdari asa. Zobabdari gheunk purte asat tea bhavam vixim bariksannen topasnni korchi, tea vixim magnnem korchi, ani uprant tea bhavank nemchi gombir zobabdari dor eka sorkittachi dekhrekh korpeak asta.
Bible-ant Motiam Sodhum-ia
(Titak 1:12) Tanche bhitorlea eklean, tanchech modlea eka vortea zannaran oxem mhonnlolem asa: “Kretkaram sodanch fottkirim, noxtteo monzati, samkinch allxi pottiim.”
w89 5/15 31 ¶5
Vachpeam Thaun Prosn
Kretkaranchi zat vo kulla add soglem lok uloitale tim opmanachim utram apunn manun gheta mhunn Paulu sangonaslo. Hachi amkam khatri asa, karonn Devachi maniotai mellon ghetlole, povitr xokte udexim obhixikt zalole bore Kristanv Kret-ant aslole mhunn Paulu zannam aslo. (Itihas 2:5, 11, 33) “Dor-eka nogrant” aslolea sobhamnim bhavarthi Kristanv tor aslech. Te Kristanv poripurnn munis nasle, toripunn te fottkire ani allxi pottiim nasle; karonn te toxe asle zalear tankam Devachi maniotai mellchi nasli. (Filipkarank 3:18, 19; Prokasovnni 21:8) Ani aiz ami dor eka raxttarant polloitat toxem, Kretant pasun ghoddie promannik lok asle. Te tanchea bhovtonnim noitik dorje pallinant tea lokank polloun dukhi asle ani Devacho sondex aikon manun gheunk toiar asle.—Ezekiel 9:4; Itihas 13:48 sor kor.
(Filemonak 15, 16) Onesimusak ghoddie tuje sorxilo thoddo vell heach pasot kaddlolo zait ki to dusrim tujea sangata sodankal ascho, 16 punn atam gulam koso nhoi, tor gulama poros odik vorto, ek opurbaiecho bhav koso; mhakach tachi itli opurbai zalear, tuzoch gulam koso ani Somia sovem ek bhav koso to tuka kitlo odik opurbaiecho zauncho na?
w08 10/15 31 ¶4
Titak, Filemonak, ani Hebrevank Potrantle Mukhel Mudʼde
15, 16—Onesimusak suttka di mhunn Paulun Filemonak kiteak sangonk na? Paulu ‘Devachem Raj porgottunk, ani Somia Jezu Krista vixim xikounn diunchea’ kamacheruch aplem sompurnn dhean diunk sodhtalo. Tea pasot, somaza sombondit asloleo somosia, zoxem gulamponnam sombondit somosient to aplem tondd ghalunk sodhi naslo.—Itihas 28:31.
AGOST 19-25
DEVACHEA UTRANTLE THEVE | HEBREVANK 1-3
“Promannikponnacho Mog Korat ani Khotteponnacho Dves Korat”
(Hebrevank 1:8) Punn Aplea Putak zalear, Dev oxem mhonntta: “Tujem xinvason, Deva, iugam-iugamnim togtolem, Promanikponnan Tum razvott choloitoloi.
w14 2/15 5 ¶8
Kristak, Mhoimevont Razak Zoi!
8 1914 hea vorsak, Jehovan sorgar aplea Putak Mesias Raza mhunn nemlo. ‘Tachi razvottki promanikponnan choltoli.’ Tor, tachi razvottki nitichi ani bhed-bhav nasloli mhunn ami khatri dovrunk zata. Taka odhikar cholounk hokʼk asa, karonn ‘Dev tachem xinvason.’ Mhunnche, Jehova tache razvottkechi buniad zaun asa. Tea bhair, Jezuchem xinvason “iugam-iugamnim togtolem.” Devan nemlolea hea bollixt Raza khala Jehovachi seva korunk tumkam vhodd man bhogona kai?
(Hebrevank 1:9) Promannikponnacho Tum mog kortai ani khotteponnak vittetai. Dekhun sogllea Tujea vangddiam modlo voir kaddun, Devan, Tujea Devan, anondan bhortolea telan Tuka makhlo.”
w14 2/15 4-5 ¶7
Kristak, Mhoimevont Razak Zoi!
7 Stotr 45:6, 7 vachat. Jezu nitivontponnacho chodd mog kortalo ani aplo Bapui Jehovak opman haddtta toslea vostuncho dves kortalo dekhun, Jehovan taka Mesias Rajeacho Raza mhunn nemlo. Jezuk tachea “vangddiam,” von chodd, mhunnchem Davidachea vonxavollintlea Judachea raza von chodd “anondan bhortolea telan . . . makhlo.” Koxem? Poilem mhunnttlear, Jehovan khud Jezuk makhlo. Toxench, Jehovan taka Raza ani Porom Iadnik mhunn makhlo. (St. 2:2; Heb. 5:5, 6) Tea bhair, Jezuk telan nhoi punn povitr xokte udexim makhlo, ani tachi razvottki sonvsarchi nhoi punn sorginchi.
Bible-ant Motiam Sodhum-ia
(Hebrevank 1:3) To Devache mhoimecho porzoll ani Devacho sopurnn rupkar. Aplea bollixtt hukuman akʼkho sonvsar To samballta; ani, monxank patkantli xudʼdhi zoddlea uprant, sorgar choddun thor Devachea uzvea hatak bosla.
it-1 1185 ¶1
Rup
Jezun Devachem rup vo tache gunn ani sobhav sodanch ek sarkech toren porzollʼlle kai?
Devacho malgoddo Put zo uprant ek munis zalo, Jezu, taka Devachea rupan rochlolo. (2Kor. 4:4) Devan “amchea rupacho ani amchea sarkeacho monʼxak rochum-ia” mhunn sanglem tednam to hea puta lagim uloilo mhunn kollon ieta. Tor, Put ani tacho Bapui, mhunnche tacho Rochnnar, hanchea modem aslolem hem ek sarkemponn putak rochlolo tednam thaun aslem. (Ut. 1:26; Ju. 1:1-3; Kol. 1:15, 16) Ek poripurnn munis zaun prithumer aslo tednam, tannem aplea Bapaiche gunn ani sobhav eka munxachean zata titlea toren porzollʼlle. Taka lagon to oxem mhunnonk xoklo: “Jim konn mhaka polletat, tim mhojea Bapak polletat.” (Ju. 14:9; 5:17, 19, 30, 36; 8:28, 38, 42) Jezu otmik kuddin punorjivont zalea uprant tacho Bapui, Jehova Devan taka “sorgar ani sonvsarar . . . sogllo odhikar” dilo tednam, Jezu anik chodd Jehovachea sarkeacho zalo. (1Ped. 3:18; Mt. 28:18) Karonn, tednam Devan Jezuk “unch sorgar” mhunnche anik unch stanar ubharlo. Tor atam Devacho Put, aplea Bapaichi mhoima sorg soddun prithumer ieunchea poilim porzollttalo tachea poros chodd porzollunk pavlo. (Filp. 2:9; Heb. 2:9) To atam “Devacho sopurnn rupkar” zaun asa.—Heb. 1:2-4.
(Hebrevank 1:10-12) Tea bhair Povitr Pustokar oxem boroilʼlem asa: “Tunvem, Dhonia, prithum rochlear kallanche kall zaun gele, sorg-ui Tujea hatanchem kam; 11 tim sorun vetolim, Tum ekloch urtoloi; pornnea vostram vori tim kotteun vetolim, 12 ani zhoron gelʼlea angavleam vori Tum tim kaddun uddoitoloi, ani novim vostram ghaltoloi. Punn Tum asai tosoch astoloi, Tujea vorsank ont-par na!”
it-1 1063 ¶7
Sorg
Stotr 102:25, 26-ant sanglolim utram Jehova Devak lagu zatat. Punn Paulu tim utram Jezu Kristak lagu korta. Karonn, vixv rochunk Devan aplea ekleach Putak aplea sangata kam korunk uzar kelo. Rochlam tache modem ani Puta modem ontor dakhoun, Put sodankal urtolo mhunn Paulu sangta. Devak zai zalear apnnem rochlolo sorg ani prithum to, eka ‘angavleam vori’ kaddun uddounk xokta.—Heb. 1:1, 2, 8, 10-12.
AGOST 26–SETEMBR 1
DEVACHEA UTRANTLE THEVE | HEBREVANK 4-6
“Devachea Visovant Bhitor Soronk Nettan Fuddem Vochat”
(Hebrevank 4:1, Povitr Pustok - Novo Korar) Tachea visovant ami bhitor sortelenv mhonn Devan amkam bhasavnni kelʼli asa, dekhun hea visovant bhitor sorunk apnnak huxir zait mhonn konnench chintinam zaunk chotrai dorum-ia.
(Hebrevank 4:4) Kiteak eke svater Povitr Pustokar satvea disachi khobor korun oxem mhonnlolem asa: “Aplo vavr sompoun, satvea disa Devan visov ghetlo,”
w11 7/15 24-25 ¶3-5
Devacho Visov Mhunnche Kitem?
3 Satvo dis, Kristi Xokachea poilea xekddeant pasun chalu aslo mhunn zannam zaunk don purave amkam modot kortat. Poilo, Sonvara Disa Jezu ekleak boro korta tem ek kam mhunn sangon Jezuchea virodheamnim tacher arop ghatlo tednam tannem tankam kitem sanglem tacher dhean diat. Somian tankam sanglem: “Mhozo Bap ozun porian vavr korit asa, toso hanv vavr korit asam.” (Juanv 5:16, 17) Jezu kitem mhunnonk sodhtalo? To Sonvara Disa kam korta mhunn tacher arop ghatlole. Tea aropak tannem oso zobab dilo: “Mhozo Bap azun porian kam korta.” Dusrea utramnim Jezun apleacher arop ghaltoleank oxem sanglem: ‘Mhozo Bap ani hanv ekech bhaxechea kamant vavurtat. Mhozo Bap, zaite xekddeamnim xekdde lamb aslolea Sonvara Disa kam korit ravla zalear, mhaka pasun Sonvara Disa kam korchi porvangi asa.’ Tor prithume vixim sangtana, Devacho visovacho vhodd Sonvar Dis, mhunnche Satvo Dis, aplea disamnim pasun chalu aslo mhunn Jezu dakhounk sodhtalo.
4 Dusro puravo amkam apostl Pauluchea utrantlean melltta. Utpoti 2:2-ant sanglolim utram Paulu ulʼlekh korun Devachea visova vixim oxem boroita: “Amkam bhavarth asa dekhun, ami Devachea visovant bhitor sortolenv.” (Heb. 4:3, 4, 6, 9, Povitr Pustok - Novo Korar) Tor, satvo dis Pauluchea disamnim pasun chalo aslo. To visovacho dis kednam porian chalu astolo?
5 Hea prosnacho zobab mellonk, satvea disacho udʼdhex kitem aslo to ami ugddas dovrunk zai. To udʼdhex Utpoti 2:3-ant somzaila: “Devan, satvea disacher axirvad ghalun, to dis povitr kelo.” To dis “povitr kelo” mhunnche, aplo udʼdhex xarti pavounk, Jehovan to dis kuxin dovorlo. To udʼdhex mhunnttlear, hi prithum Devachea Utra pormonnem choltolea munxamnim bhorchi, jim hea prithumechi ani tacher aslolea jivea vostunchi dekhrekh kortolim. (Ut. 1:28) Ho udʼdhex purnn korunk lagon Jehova Dev ani Jezu Krist zaka “sonvaracher odhikar asa,” te ‘ozun porian vavr korit asat.’ (Mt. 12:8) Devacho visovacho dis, tacho udʼdhex xarti pavtolo tednam meren, mhunnche Kristachea Ek Hozar Vorsanchea Razvottkechea xevottak porian chaluch urtolo.
(Hebrevank 4:6) Zankam Devachi bori khobor poili pavli, tannim bhavarth dovrunk na, dekhun tankam somadhanant bhitor sorunk mellunk na. Mhonnttoch dusrea kai zannank somadhan bhogunk Dev bhitor sorunk dita.
w11 7/15 25 ¶6
Devacho Visov Mhunnche Kitem?
6 Adanv ani Evek Devacho udʼdhex kitem to sarke toren somzailolem. Toriastana, tannim tea udʼdhexa pormonnem kam korunk na. Adanv ani Eve Deva add gelolim poilim munxam aslim. Tanchea uprant lakʼkhamnim lok Deva add gelo. Devan vinchun kaddlolea lokan, mhunnche Israel raxttran pasun Devachem aikonk na. Ani mhotvachem mhunnttlear, adlea Israelitkaram bhaxen poilea xekddeantle Kristanv pasun tosleach fasant poddonk xoktat mhunn apostl Paulun tankam xittkailem. Tannem boroilem: “Tea somadhanant bhitor sorunk nettan fuddem vochum-ia; na zalear, tanche bhaxen ovisvaxi zaun, tem somadhan amkam-i chukot.” (Heb. 4:11) Dhean diat, Paulu hanga Deva add vochop ani Devachea somadhanant vo visovant bhitor soronk chukop, hanchem modem sombond dakhoita. Hantuntlean amkam kitem xikonk melltta? Ami khoinchea-i eke ritin Devachea udʼdhexa add gelear, Devachea visovant bhitor soronk ami chukonk xoktat kai? Hea prosnacho zobab zannam zavop chodd mhotvachem asa, ani to zobab ami fuddem polloitolim. Punn atam, Israelitkaranchea vaitt udharonnantlean, ami Devachea visovant bhitor sorchea vixim anik kitem zannam zaunk zata tem polloum-ia.
(Hebrevank 4:9-11) Mhonnttoch, zoxem Devan satvea disa visov ghetlo, toxench Devache porjek-ui ek satvea disacho visov dovorlolo asa. Karonn Devan Aplea vavra uprantlo visov ghetlo tech bhaxen, bhasailʼlea somadhanachea desant bhitor sortat tim aplea vavra uprantlo visov ghetat. 11 Toxem tor, tea somadhanant bhitor sorunk nettan fuddem vochum-ia; na zalear, tanche bhaxen ovisvaxi zaun, tem somadhan amkam-i chukot.
w11 7/15 28 ¶16-17
Devacho Visov Mhunnche Kitem?
16 Taronn zoddunk aiz thodde Kristanv Moizesache Somurticho thoddo bhag pallop gorjecho mhunn sangonk xoktat. Efezkarank Paulun preronnan boroilolem tem sarkem spoxtt asa: “Karonn Devachech doiallaien, bhavartha udexim, tumkam soddvonn mellʼllea; ti tuminch kelʼlea proitnancho foll nhoi, punn Devachem funkeachem dennem. He babtint konnench mijas korum noie, kiteak amchi soddvonn amcheach kornniam udexim upzona.” (Ef. 2:8, 9) Tor, Kristanvamnim Devachea visovant bhitor sorop mhunnttlear kitem? Prithume pasot Devacho udʼdhex xarti pavounk Jehovan satvo dis, mhunnche tacho visovacho dis kuxin dovorlo. Jehova aplea songottnne udexim aplea udʼdhexa vixim sangta tea pormonnem kam korun ami Jehovachea visovant bhitor soronk xoktat vo tachea visovant bhagidar zaunk xoktat.
17 Dusrea vatten, visvaxi ani xannea chakra thaun mellttat te Bible adarit solʼle gorjeche nhoi mhunn chintun, ami amkam zai tem kortat zalear, Devachea udʼdhexa add voitolim. Hea toren, Jehova sangata asloli ixttagot ami hogddaitolim. Fuddlea lekhant, Devachea lokam mukhar ietat tea thoddea poristhitim vixim ami bhasabhas kortolim. Toxench, Devachea visovant ami bhitor sorleant vo na tem ami ghetat tea nirnnoi-a voilean, mhunnche ami Devachem aikotat vo amkam zai tem kortat tacher koxem adarit asa tea vixim-i polloitolim.
Bible-ant Motiam Sodhum-ia
(Hebrevank 4:12) Khorench Devachem utor jivem ani bollixtt. Tem don-ui vattamnim pazlole torvari poros rombta. Zoim monxacho prann ani otmo toxench sandhe ani mendu doxim zatat, thoim porian tem rigunk xokta. Tem monxachea kallzache otrek ani chintnam topasun tanche vixim aplo nivaddo dita.
w16.09 13
Vachpeam Thaun Prosn
Hebrevank 4:12-ant “jivem ani bollixtt” aslolem “Devachem utor” kitem zaun asa?
▪ Hea versachim bhonvtonnchim versam polloilear, Paulu thoim Bible-ant Devachea udʼdhexa vixim sanglam tem vo tea udʼdhexachea sondexa vixim sangtalo mhunn kollon ieta.
Hebrevank 4:12, hem vers amchea prokaxonamnim uzar kelam tednam tem choddxe pavtt, Bible-ak munxachem jivit bodlunk aslolea xokte vixim sangtat, ani hem sarkem zaun asa. Punn hea versachi bhonvtonnchim versam polloilear faideachem zatolem. Paulu thoim povitr borounneamnim boroun dovorlolea Devachea udʼdhexa pormonnem kam korunk Hebrev Kristanvank urba ditalo. Paulu hanga Ejiptantlean soddvonn mellon ghetlolea Israelitkaranchem udharonn uzar korta. Tankam “dud ani mhonv vhanvta toslea” eka desant voicho sueog aslo, zoim tim khoro visov melloun gheunk xoktalim.—Sutt. 3:8; D.S. 12:9, 10.
Ho Devan kolloilolo udʼdhex aslo. Punn, Israelitkaramnim aplem kalliz ghott korun, bhavarth dovrunk na dekhun zaitim zannam tea visovant bhitor soronk pavonk nant. (Lok. 14:30; Josh. 14:6-10) Punn fuddem Paulun, “Devan bhasavnni kelea ti ozun togta vo ozun-ui ek bhasavnni asa” mhunn sanglem. (Heb. 3:16-19; 4:1) Hi “bhasavnni” Devachea udʼdhexacho bhag zaun asa. Hebrev Kristanvamnim kelolea bhaxen, ami hea udʼdhexa vixim vachunk zata, ani tachea pormonnem kam korunk zata. Hi bhasaunni Bible-achea adarit asa mhunn zor diunk, Paulu Utpoti 2:2 ani Stotr 95:11 thaun ulʼlekh korta.
Khorench, “Devan bhasavnni kelea ti ozun togta vo ozun-ui ek bhasavnni asa” mhunn ami khuxal zatat. Devachea visovant ami bhitor soronk xoktat mhunn Bible sangta tacher ami bhorvonso dovorla, ani tantunt bhitor soronk ami pavl ghetlam. Hem ami Moizesachi Somurt pallun vo her kamam korun Jehovachi maniotai zodddlolean zaunk na. Bodlek, ami bhavarthan Devan kolloilolea udʼdhexa pormonnem khuxalkaien kam kelam, ani korit ravtolim. Hachea bhair, voir sanglolem toxem, sonvsarbhor hozaramnim lok Bible obheas kortat ani Devachea udʼdhex kitem to zannam zatat. Zaitea zannamnim hachea udexim aplea jivitant bodlav kela, bhavarth dovorla, ani bautizm ghetlole Kristanv zaleat. Tanchea jivitant zalolo porinnam polloitana, “Devachem utor jivem ani bollixtt” mhunn khatri zata. Devan aplea Utrant dilolea udʼdhexak lagon, amchea jivitant probhav poddla, ani poddot ravtolo.
(Hebrevank 6:17, 18) Tech porim, aple ievzonne vixim apli khuxi kednanch apunn bodolcho na mhonn bhasavnnianchea daijiank Dev ukteponnim dakhounk sodtalo dekhun, Tannem ti bhasavnni soput gheun thir keli. 18 Mhonnttoch atam bodlunk zainant tosleo Devan kelʼleo don vostu asat: tanche vixim Devachean amkam fottounk zaina. Dekhun amche mukhar dovorlolea bhorvanxeacher amchem mon ghott lavun dovrunk, amkam, taka xeronna ailʼleank, vhodd dhir mellta.
it-1 1139 ¶2
Bhorvonso
‘Sorginchem apounnem aslolea bhageleank’ (Heb. 3:1) sasnik jivit ani ovinaxi kuddi mellttoli mhunn aslolo bhorvonso ghott buniadicher adarit asa zo purnn khatri dovorpa sarko asa. Ho bhorvonso tea don vostuncher adarit asa, tannem dilolem utor ani soput ani hea vixim Dev kednanch fott marunk xokona. Ani Krist, sorgar omor zalolean bhorvonso dovrunk anik khatri melltta. Tor “zoxem nangor doriant hoddem surokxit dovorta, toxem ho bhorvanso amchem jivit surokxit samballta. Jezu, Melkizedekachea jinsacho sasnnak sthaplolo amcho Porom-iadnik, Sorginchea Devmondirachea poddʼddeantlean [zoso Porom-Iadnik Farikponnachea Disa Bhov Povitr Sthana bhitor sortalo] vochun Gabhareant amche pasot riglolo asa: thoim ami pavo-sor ho amcho bhorvanso amchea jivitak surokxa dita.”—Heb. 6:17-20.