Otumbr—Jivit ani Porgottnni Mittingechea Pustike Pasot Modot
OTUMBR 7-13
DEVACHEA UTRANTLE THEVE | JAKOB 3-5
“Deva Thaun Ieta Ti Zannvai Dakhoiat”
(Jakob 3:17, NW) Punn voir thaun ieta ti zannvai poile svater nirmoll; uprant xantichi, somjikaiechi, adnea pallunk toiar asloli, konnvallaien ani borea follamnim bhorloli; ti bhed-bhav korina, ddhongeponnan cholona.
cl 221-222 ¶9-10
“Deva Thaun Ieta Ti Zannvai” Tumchea Jivitant Kam Korta Kai?
9 “Poile svater nirmoll.” Nirmoll asop mhunnttlear fokot bhailean nhoi, punn bhitorlean xudʼd ani khot-nastana asop. Zannvai kallza bhitor sorta mhunn Bible sangta. Punn sorga voili zannvai vaitt chintnam, anvdde ani hetu aslolea eka kallza bhitor soronk xokona. (Mhonnʼnneo 2:10; Matev 15:19, 20) Punn, amchem kalliz nirmoll asa zalear, mhunnche ami opurnn munxam zaun pasun amchem kalliz zata titlem nirmoll dovortat zalear, ami ‘vaittak patt korun boreo korneo kortolim.’ (Stotr 37:27; Mhonnʼnneo 3:7) Tor Bible-ant hanga, nirmoll ho zannvaiecho poilo gunn mhunn sanglam tem sarkem nhoi kai? Khorem mhunnttlear, noitik ritin ami nitoll na ani Devachem khorem ginean amkam na zalear, voir thaun ietat te gunn ami sarke toren koxim apnnaunk pavtolim?
10 “Uprant xantichi.” Devachea povitr xoktechem foll xanti zaun asa. Ani sorginchi zannvai amkam ti melloun gheunk urba dita. (Galasiekarank 5:22) Jehovachea lokank “ektthaim dovorta ti xanti” ami ibaddunk diunchim nant. (Efezkarank 4:3) Xanti ibadd zata tednam ti portun zoddunk ami zata titlo proitn kortat. Hem kiteak gorjechem? Bible sangta: “Xantin jieiat, ani mogacho ani xanticho Dev tumche sovem astolo.” (2 Korintkarank 13:11) Tor ami xantin jietat title meren, xanticho Dev amchea sangata astolo. Ami amchea bhav-bhoinnam sangata jea toren vagtat, tacho porinnam Jehova sangata aslolea amchea ixttagoticher poddtta. Ami xanti korpi zaun asat mhunn koxim dakhoitolim?
(Jakob 3:17, NW) Punn voir thaun ieta ti zannvai poile svater nirmoll; uprant xantichi, somjikaiechi, adnea pallunk toiar asloli, konnvallaien ani borea follamnim bhorloli; ti bhed-bhav korina, ddhongeponnan cholona.
cl 223-224 ¶12
“Deva Thaun Ieta Ti Zannvai” Tumchea Jivitant Kam Korta Kai?
12 “Somjikaiechi.” Somjikai asop mhunnttlear kitem? Jakob 3:17-ant ‘somjikai,’ hea utrak uzar kelolem Grek utor bhaxantor korunk kotthin mhunn thodde ponddit sangtat. Bhaxantor korpeamnim, “movall,” “pasiens vo sosnikai,” ani “porva korop,” oslim utram uzar korun bhaxantor kelam. New World Translation-achea futtnottant hea utracho orth “dusrea pasot soddun divop” mhunn dila. Voir thaun ieta tea zannvaiecho ho gunn amkam asa mhunn ami koxim dakhounk xoktat?
cl 224-225 ¶14-15
“Deva Thaun Ieta Ti Zannvai” Tumchea Jivitant Kam Korta Kai?
14 “Adnea pallunk toiar asloli.” Hea utrank uzar kelolem Grek utor Grek Bhaxen Boroilʼlea Pustokamnim ani khoinch uzar korunk na. Eka ponddita pormonnem hem utor “soinikank dita tea xisti vixim sangonk uzar kelam.” Hacho orth, “rokddench manun ghevop” ani “khalti zavop.” Voir thaun ieta tea zannvaie pormonnem cholpi munis, khuxemonan Bible-antlea utrank khalti zata. To oslo munis nhoi, zo ek vixoi sarko mhunn apunnuch tharaita, ani to chukicho asa mhunn dusreamnim purave diun somzailear pasun manun ghena. Punn to munis oslo, zo Devachea Utra thaun sarke purave diun somzailea uprant apunn chuklo vo apli somzonni chuklea mhunn somzon rokddoch bodlonk toiar asta. Tumi oslim munxam mhunn dusrim tumchea vixim chintat kai?
“Konnvallaien ani Borea Follamnim Bhorloli”
15 “Konnvallaien ani borea follamnim bhorloli.” Konnvallai voir thaun ieta tea zannvaiecho mhotvacho bhag zaun asa. Teach pasot zannvai, ‘konnvallaien bhorloli’ asa mhunnttlam. Dhean diat, ‘konnvallai’ ani ‘borim follam’ sangata uzar keleant. Hem sarkem zaun asa, karonn Bible-ant konnvallaie vixim sangtana tacho orth dusream pasot kallji dakhovop oso dita. Ti osli doia-maia, ji doiechea kamanchem pik dita. Eka borounneant, doia hea utracho orth, “ekleachi vaitt poristhiti polloun bhogta tem dukh ani tachea pasot kitem tori korcho gunn” mhunn sangta. Tor, Devachi zannvai urba nasloli, porva korinasloli, vo fokot gineanan bhorloli nhoi. Punn, ti mogall, bhavnam asloli ani dusreanchim bhavnam somzon gheta tosli zaun asa. Ami konnvallaien bhorlolim mhunn ami koxim dakhounk xoktat?
(Jakob 3:17, NW) Punn voir thaun ieta ti zannvai poile svater nirmoll; uprant xantichi, somjikaiechi, adnea pallunk toiar asloli, konnvallaien ani borea follamnim bhorloli; ti bhed-bhav korina, ddhongeponnan cholona.
cl 226-227 ¶18-19
“Deva Thaun Ieta Ti Zannvai” Tumchea Jivitant Kam Korta Kai?
18 “Bhed-bhav korina.” Devachi zannvai kullak lagon aslolo bhed-bhav ani raxttrak lagon aslolo gorv pois korta. Ami oslea zannvaie pormonnem choltat zalear, munxanchim tonddam polloun tankam lekhchim vo bhed-bhav korchim koslim-i chintnam asat zalear pois kortolim. (Jakob 2:9) Ami bhav-bhoinnanchem xikxonn, poiso, vo tankam sobhent aslolea zobabdare pormonnem tankam lekhinant; vo amchim bhav-bhoinnam kitlim-i gorib vo durboll disot, ami tankam amchea poros unnea molachi mhunn lekhinant. Tim Jehovacho mog zoddunk purtim asat zalear, tim amcho pasun mog zoddunk purtim asat.
19 “Ddhongeponnan cholona.” “Ddhongi” hea utrak uzar kelolea Grek utracho orth, ‘eka nattkant ek bhag korpi ek kolakar.’ Adlea kallar, Grek ani Romi kolakar vhoddlim rupnnim ghalun nattkant aplo bhag kortale. Taka lagon, “ddhongi” hea utrak uzar kelolem Grek utor, khorem na tem dakhoita toslea vo fottingponn korta toslea munxak uzar korunk lagle. Devachea zannvaiecho ho gunn amkam asa zalear, ami fokot amchea bhav-bhoinnam sangata jea toren vagtat tacheruch nhoi, punn tanchea vixim amkam koxem bhogta tacher pasun porinnam poddonk zai.
Bible-ant Motiam Sodhum-ia
(Jakob 4:7) Oxem tor, Devak khaltim zaiat; devcharacher zhuz korat ani to tumche thaun pollun vetolo.
w06 1/15 30 ¶20
Ami Bible-antlea dorjeank ani sotak chittkun ravtat tednam “devcharacher zhuz” kortat. Soitan hea sonvsaracho dev zalolean, ho sonvsar tachea chintnam pormonnem cholta. (2 Korintkarank 4:4) Toxem zalolean, ami sonvsarache gunn, zoxe, gorv, svarth, onoitiktai, hinvsa, ani girestkaiechi axa nakartat. Oronnʼnneat Soitanan Jezucher tallnni haddli tednam, Jezun Devachem Utor uzar korun zobab dilo dekhun to pollon gelo mhunn ami zannant. (Matev 4:4, 7, 10, 11) Teach toren, ami Jehovak sompurnntaien khaltim zatat ani magnnea vorvim tacher bhorvonso dovortat tednam, Soitan haron amchea thaun “pollun vetolo.” (Efezkarank 6:18) Jehova Devacho ani tachea opurbaiechea Putacho adar aslear, amkam sasnak urta toslem vaitt konnacheanuch korunk zaina—na, nhoi mhunn Denvcharachean!—Stotr 91:9-11.
(Jakob 4:11, 12) Mhojea bhavam- bhoinnimno, ekamekachem vaitt uloum nakat. Jim konn aplea bhavachem vo bhoinnichem vaitt uloitat vo tanchi nit kortat, tim Somurticher add uloitat ani tichi nit kortat; ani Somurtichi tum nit kortai zalear, tum ti pallinaim punn ticho monsubidar zatai. 12 Dev ekloch Somurt-Datar ani To ekloch Monsubidar. Taka ekleakuch taronn diunk ani nas korunk tank asa. Punn tujea peleachi nit korunk tum konn?
w97 11/15 20-21 ¶8
Bhavarth Pasiens Vaddoita ani Magnnem Korit Ravonk Modot Korta
8 Eka bhava vo bhoinnim add ulovop ek patok zaun asa. (Jakob 4:11, 12) Tori astana, thodde Kristanv aplea bhava-bhoinnim vixim vaitt uloitat. Hem tim apunn nitivont mhunn dakhounchea sobhavak lagon, vo apleak voir ubarun dusreank khala ghalunk lagon oxem korunk puro. (Stotr 50:20; Mhonnʼnneo 3:29) ‘Vaitt ulovop,’ hea utrank uzar kelolea Grek utrancho orth add vochop ani vaddoun-choddoun sangop vo khottem boglantt ghalop. Hacho orth eka bhavachi vaitt toren nit korop. Hem ‘Somurticher add ulovop ani tichi nit korop’ koxem zata? Xastri ani Farizev, Devache kaide kuxik dovrun, aplea naddbudin aplea svotachea dorjeam pormonnem nit kortale. (Marku 7:1-13) Teach toren, Jehova jea bhavak guneanvkari mhunn somzona, to bhav guneanvkari mhunn ami nit kortat zalear ami Devachea ‘Somurtichi nit korun’ ti purti nhoi mhunn dakhoun diunchimnant kai? Ani ami onʼneai korun amchea bhavacheo chuki sodhun kaddttat zalear, ami mogachi somurt sompurnntaien pallinant oxem zata.—Romkarank 13:8-10.
OTUMBR 14-20
DEVACHEA UTRANTLE THEVE | 1 PEDRU 1-2
“Tumi-i Povitr Zaiat”
(1 Pedru 1:14, 15) Devachim khaltim-pallok bhurgim zaiat, ani tumi sot vollkhonasleat tednam tumi tumchea vondovnniam pormannem choltaleat toxem atam korum nakat. 15 Portench, soglle tumche chalint povitr zaiat, kiteak Zannem tumkam apoileant To povitr;
w17.02 9 ¶5
Soddvonn—Bapai Thaun Ek “Sompurnn Vordan”
5 Ami Jehovachea nanvacho mog kortat mhunn koxim dakhounk xoktat? Amchea kornneamnim. Ami povitr asonk zai mhunn Jehova opekxa korta. (1 Pedru 1:15, 16 vachat.) Hacho orth ami fokot Jehovachich bhokti korunk zai, ani amchea purnn kallzan tachem utor pallunk zai. Amcher dhumallo ailo zalear pasun, tachea noitik totvam ani kaide pormonnem jieunk ami zata titlo proitn kortat. Ami nitichea kornneam vorvim, amcho uzvadd fankoitat ani hea toren Jehovachea nanvak mhoima haddttat. (Mt. 5:14-16) Ami povitr lok zalolean, Jehovache kaide amchea boreak lagon asat, ani Soitanan ghatlole arop fott mhunn ami amchem jivit jea toren jietat, tachea udexim dakhoitat. Ami chuki kortat tednam ami kallzant thaun poschatap kortat ani Jehovachea nanvacher opman haddtta toslea korneam thaun pois sortat.—St. 79:9.
(1 Pedru 1:16) oxench Povitr Pustok sangta: Hanv povitr dekhun tumi-i povitr zaiat.
lvs 77 ¶6
Ami Manoronjon Koxem Vinchun Kaddchem
6 “Hanv povitr dekhun tumi-i povitr zaiat,” mhunn Jehova amkam sangta. (1 Pedru 1:14-16; 2 Pedru 3:11) Amchi bhokit povitr, vo nitoll aslearuch Jehova ti manun ghetolo. (Dusri Somurt 15:21) Jehova dves korta tem, zoxem onoitiktai, hinvsa, vo denvcharank sombond aslole kosle-i vixoi ami kortat zalear, amchi bhokti nitoll aschina. (Romkarank 6:12-14; 8:13) Punn, heo vostu polloun ami khuxal zatat zalear pasun Jehovak avoddchem na. Heo vostu amchi bhokti mhelli ani Jehovak manvona tosli korunk xokta, ani hachea udexim Jehova sangata amkam aslolea ixttagoticher vaitt probhav poddonk xokta.
Bible-ant Motiam Sodhum-ia
(1 Pedru 1:10-12) Heach taronnak provadi ravtale ani tem koxem zoddchem tem te sodit asle; ani Dev tumkam diuncho aslo tea dennea vorvim tannim adim-fuddench bhakitam kelim. 11 Kristacho Atmo provadiam sovem aslo ani Kristan koxtt sosche asle ani uprant Taka mhoima mellchi asli mhonn teach Atmean tankam adinch sanglolem. Hem sogllem kednam ani koxem ghoddtolem aslem tem provadi sodun kaddunk vavurle. 12 Te porgottʼtale to sondex apleach faideak nhoi, punn tumchea faideak mhonn Devan provadiank kollit kelem. Ani jem kitem tannim sangun dovorlem, tench atam Xubhvortoman porgottlam tea monxamnim tumkam uktem kelem. Hem Xubhvortoman porgottʼtana Devan sorgar thaun dhaddlolo Povitr Atmo tanchim monam uzvaddaitalo. Devdut legun hea vostunchi vollokh axen gheunk sodtat.
w08 11/15 21 ¶10
Jakob ani Pedru Potrantle Mukhel Mudʼde
1:10-12. Obhixikt aslole Kristi Sobhe vixim Devachea adlea tempachea provadeamnim boroilolea Devachea kholaiechea sota vixim zannam zaun somzonk Devdutank itsa asli. Punn Jehovan hea sobhe sangata vagonk suru kelem tednanch him sotam spoxtt toren te somzole. (Ef. 3:10) Devdutanchi dekh gheun, ami pasun ‘Devacheo kholaiecho vostu’ zannam zaunk proitn korcho nhoi kai?—1 Kor. 2:10.
(1 Pedru 2:25) Tumi sanddlolea xelliam porim bhonvtaleat, punn atam tumchea khorea Gonvllia ani Rakhnnea-xim Devan tumkam portun haddleant.
it-2 565 ¶3
Rakhnno
Sogleam-von Vhodd Rakhnno. Poilo Pedru 2:25-ant ‘sanddlolea xelliam porim bhonvtoleam,’ vixim sangtana, Pedru Izaias 53:6-a thaun ulʼlekh korta. Uprant to oso sangta: “Punn atam tumchea khorea Gonvllia ani Rakhnnea-xim Devan tumkam portun haddleant.” Hanga to Jehova Deva vixim sangta astolo, karonn Pedrun zankam ti chitt boroiloli, tim Jezu Krista thaun koddsorun vochonk naslolim, punn tachea vorvim tim Jehova Deva lagim porot ailʼlim, zo aplea lokancho Vhodd Gonvlli zaun asa. (St. 23:1; 80:1; Jer. 23:3; Ez. 34:12) Jehova ek rakhnno pasun zaun asa, zo topasnni korta. (St. 17:3) Jehova korta ti topasnni (Gr., e·pi·sko·peʹ), to nas korcho asa toslea torechi zhoddtti zaunk xokta. Hea torechi topasnni tannem Kristi Xok, poilea xekddeant Jerusalemachi keloli jednam Jerusaleman ‘Dev bhett diunk ailolo dis, vo Dev topasnni [Gr., e·pi·sko·pesʹ] korunk ailolo to dis vollkhonk na.’ (Luk. 19:44) Vo topasnni, boro porinnam ani faide pasun haddunk xokta, zoxem Devachea ‘zhoddttechea disa [Gr., e·pi·sko·pesʹ] Devak vakhannʼnni haddttat’ tankam mellttoli.—1Ped. 2:12.
OTUMBR 21-27
DEVACHEA UTRANTLE THEVE | 1 PEDRU 3-5
“Sogllea Vostuncho Xevott Lagim Pavla”
(1 Pedru 4:7) Sogllea vostuncho xevott lagim pavla. Dekhun, favo te porim prarthon korche khatir, xant ravat ani zagrutaien cholat.
w13 11/15 3 ¶1
“Prarthon Korche Khatir, Zagrutaien Cholat”
Adim, ratik kam kortalo eklo oso mhunntta, “Ratchea vellar zago ravonk ekdom kotthin vell mhunnttlear dis udenvchea poilim.” Chodd korun jea lokank ratik zage ravonk poddtta te lok oxench sangonk puro. Aichea kalla voilea Kristanvank pasun osleach torechea eka oddchonneak tondd diunchem poddtta. Karonn te eka lamb rati sarkea aslolea Soitanachea vaitt kalla-iugant jietat. Ani ho tea iugacho oslo vell asa jem, munxachea itihasant sogleam poros chodd kallkhachea vaitt kamanim buddla. (Rom. 13:12) Hea xevottachea vellar ami nhidlear kitlem dhokeachem zatolem! Toxem zalolean, “favo te porim prarthon korche khatir, xant ravat, zagrutaien cholat” hea Bible-ant dilolea xittkaunnek ami kan divop chodd gorjechem.—1 Ped. 4:7.
(1 Pedru 4:8) Bhov-korun, ekamekak vhodda priti-mogan vagoiat, kiteak pritimog khub-khub patkam kaddun uddoita.
w99 4/15 22 ¶3
Deva Sangata Amchi Ixttagot Unni Zalea Mhunn Koxem Vollkhonk Zata ani Sudharnni Korunk Zata
Xevottak, apostl Pedrun mogan dilolea hea xittkaunnek monant ghott dovrat: “Sogllea vostuncho xevott lagim pavla. Dekhun, favo te porim prarthon korche khatir, xant ravat ani zagrutaien cholat. Bhov-korun, ekamekak vhodda priti-mogan vagoiat, kiteak pritimog khub-khub patkam kaddun uddoita.” (1 Pedru 4:7, 8) Munxanchi opurnntai, mhunnche amchea ani her lokanchea opurnntaiecheruch dhean divop ekdom sompem. Ani heo opurnntaio amchea kallzant ani monant addkoll, vo adllun poddpa fatra sarkeo zaunk xoktat. Soitan munxachea hea oskotkaie vixim boro zannam. Munxank eka-meka thaun pois korun tancher hukum cholunchi hi tachi chal to chotraien choloita. Toxem zalolean, ami eka-meka pasot aslolea kholaiechea moga udexim osleo chuki bhogsun, ‘amchea kallzant Denvcharak rig diunchinant.’—Efezkarank 4:25-27.
(1 Pedru 4:9) Bore khuxen ekamekak biradd diat.
w18.03 14-15 ¶2-3
Sontos Haddtta Tea Toren Poramos Korop Chodd Gorjecho!
2 Her vixoi-a sangata, Pedrun aplea bhavank hea vixim urba dili: “Bore khuxen ekamekak biradd diat.” (1 Ped. 4:9) ‘Biradd vo poramos’ hea utrak uzar kelolea Grek utracho orth “onvollkheanchi opurbai korop, tankam doia dakhovop.” Kristi bhav-bhoinn “eka-mekak,” mhunnche tim jea konnank poilim thaun vollkhotalim tankam ani tanchea sangata ixttagot asloleancho poramos korunk Pedru urba ditalo. Poramos kelolean tankam koxi modot zatoli?
3 Oxem kelolean, tim eka-mekak lagim ieunk xoktolim. Tumi tumcheach onnbhova vixim chintat. Tumkam konnem tori aplea ghora apoilolim kai? Tanchea ghora vochon ailea uprant thoim sarlolo boro vell tumchea ugddasak urlo na kai? Tumchea sobhentlea konnank tori tumi tumchea ghora apoilolem tednam, tanchea sangata tumchi ixttagot anik ghott zaunk na kai? Ami amchea bhav-bhoinnancho poramos kortat tednam ami jitlim bore toren tankam vollkhonk pavtat, titlim ami ghoddie dusrea toren tankam vollkhonk pavchimnant. Poristhiti chodd ani chodd vaitt zatali toxi, Pedruchea disamnim jietolea Kristanvamnim eka-mekak anik lagim soronk zai aslem. Hea “nimannea disamnim” Kristanvamnim toxench korchi goroz asa.—2 Tim. 3:1.
Bible-ant Motiam Sodhum-ia
(1 Pedru 3:19, 20, Povitr Pustok - Novo Korar) Ani oso to koidi asleleam otmeank bori khobor porgottunk gelo. 20 Magam, Dev azun sosnnikai dhorun aslo, tednam Noa bandtalo tea tarvar ek dhaktto atth zannancho zomo udka vorvim vattavlo; tednanch he otme bhavarth dhorunk raji nam zale.
w13 6/15 23
Vachpeam Thaun Prosn
Jezun “koidi asleleam otmeank” porgottlem mhunn Bible sangta. (1 Ped. 3:19, Povitr Pustok - Novo Korar) Hacho orth kitem?
▪ Apostl Pedru hea otmeanchi vollokh oso dita, ‘Noachea disamnim Dev azun sosnnikai dhorun aslo, tednanch he otme bhavarth dhorunk raji nam zale.’ (1 Ped. 3:20) Tor hanga, Soitanak sangat diun Devachea add gelolea otmeam vixim Pedru uloitalo mhunn sarkem kolltta. Judas oslea Devdutam vixim sangta, zankam “vhodd odhikar dilʼlo aslo, punn to tannim samballunk na, ani aplem tthikann soddun dilem.” “Vhoddlea Disache Zhoddtek Devan tankam kallokhanchea konddant sasnnak sanklliamnim bandun dovorleat” mhunn tannem sanglem.—Judas 6.
Noah-achea disamnim khoinche ritin otme Deva add gele? Vhodd buddtti ieunchea poilim, hea khottea otmeanim apli otmik kudd bodlun munxachi kudd ghetli. Punn tanchea pasot Devacho udʼdhex oso naslo. (Ut. 6:2, 4) Tea bhair, tea aizamnim bailam lagim kuddicho sombond dovorlo, jem sobhavik naslem. Bailam sangata kuddicho sombondh dovrunk lagon Devan otmeank rochunk nasle. (Ut. 5:2) Aplea add vochpi hea duxtt aizancho, Dev aplea sarkea vellar nas kortolo. Tea meren, Judasan sanglolea pormonnem te “kallokhachea konddant” asat. Hacho orth, te Deva thaun koddsorleat ani tanchi poristhiti eke bondkhonnint aslolea sarki asa.
Jezun “koidi asleleam otmeank” kednam ani koxem porgottlem? Hem Jezuk “atmea pormonnem . . . novo jiv mellʼlo” tednam ghoddlem mhunn Pedru boroita. (1 Ped. 3:18, 19, Povitr Pustok - Novo Korar) Dhean diat, Jezu “porgottunk gelo” mhunn Pedru sangta. Hem bhutkallant boroilam tachea voilean, Pedrun apli poili chitt borounchea poilinch Jezun hi porgottnni keloli mhunn kolltta. Tor, Jezuchea punorjivontponna uprant eka vellar, hea duxtt otmeank zhoddtti mellchi asa mhunn Jezun porgottlem astolem. Hi porgottnni tankam ek bhorvonso dita tosli nasli. Punn, zhoddttechi asli. (Jonas 1:1, 2) Jezun moro-porian bhavarth ani visvaxiponn dakhoilem ani uprant to punorjivont zalo. Denvcharak khoreanich apleacher tabo na mhunn dakhoilolean, Jezu oslem ek zhoddttechem formonn marunk purto aslo.—Juanv 14:30; 16:8-11.
Fuddarak, Jezu Soitan ani tea ainzank bandun patallant uddoitolo. (Lukas 8:30, 31; Prok. 20:1-3) Tea meren, he Deva add gelolea otmeanchi poristhiti ekdom kallokhant aslolea sarki asa, mhunnche te Deva thaun koddsorun geleat ani xevottak tancho nas zatoloch.—Prok. 20:7-10.
(1 Pedru 4:6) Ani heach pasot melʼleank-ui Soddvonnechi khobor porgott keli; he bhaxen, hea sonvsarant sogllea monxam porim tankam mornnachem formonn poddlem zalear-ui, tancheam otmeank tori Devachem jivit mellum-iet aslem.
w08 11/15 21 ¶8
Jakob ani Pedru Potrantle Mukhel Mudʼde
4:6—“Soddvonnechi khobor porgott keli” te ‘melole’ konn?
Te osle lok zaun asat je ‘aplea opradham ani patkam pasot meleat,’ vo osle lok zanchi, bori khobor aikunchea poilim Deva sangata ixttagot nasloli. (Ef. 2:1) Punn borea khobrecher bhavarth dovorlea uprant tannim Jehova sangata ixttagot keli ani hea toren tankam “jivit” mellʼllem.
OTUMBR 28–NOVEMBR 3
DEVACHEA UTRANTLE THEVE | 2 PEDRU 1-3
“Jehovacho Dis Vegim Pavum Mhonn Axeun Ravat”
(2 Pedru 3:9, 10) Kai zonnam To kallav korta mhonn sangtit, punn Sorvespor Apnnem bhasailam tem pallunk kallav korina. Khorem mhollear, To tumkam sosnnikaien vagoita, kiteak konnachench nisontton zalʼlem taka naka, soglleamnim aplem jivit bodolʼlolem taka zai. 10 Sorvesporacho Dis ek chor koso ietolo; tea disa mollob goddgoddan nanch zatolem, srixttiche dhatu koddhon vetole, prithumecho ani tantum aslolea sogttacho bhosm zatolo.
w06 12/15 27 ¶11
Jehova ‘Veginuch Neai Kortolo’
11 Jehova “veginch” neai kortolo mhunn Jezun diloli khatri ami koxi somzonk zai? “To [Jehova] sosnnikaien vagoita,” zalear pasun, tacho vell pavta tednam to rokddoch neai kortolo. (Lukas 18:7, 8; 2 Pedru 3:9, 10) Noah-chea tempar vhodd buddtti aili tednam vaitt lokancho rokddoch nas zalo. Toxench, Lot-achea disamnim sorgar thaun uzo ailo tednam, vaitt lokancho nas zalo. Jezun sanglem: “Munxachea Putachi prokasovnni zatoli tea disa toxench zatolem.” (Lukas 17:27-30) Vaitt lokancho portun ‘okosmat nisontton’ zatolo. (1 Tesalonikekarank 5:2, 3) Khorench, Jehova Soitanachea sonvsarak anik ek dis pasun chodd ravonk diuncho na. Apnnem tharailam teach disa to neai kortolo.
(2 Pedru 3:11, 12) Ani sogllem he bhaxen somptolem mhonnttoch, tumchem jivit patkavinn ani bhoktivont zaunk zai. 12 Jea disa mollob agttem zaun nanch zatolem ani srixttiche dhatu lasun koddtole, to Devacho dis vegim pavum mhonn axeun ravat.
w06 12/15 19 ¶18
“Jehovacho Vhodd Dis Lagim Pavla”
18 “Devacho dis vegim pavum mhonn axeun ravat,” mhunn apostl Pedrun amkam sanglam! Hem ami koxem korunk zata? Ek vatt mhunnttlear amchem “jivit patkavinn ani bhoktivont” dovrun. (2 Pedru 3:11, 12) Amchem dhean-mon oslea vostumnim asta tednam, ‘Devachea disachi’ vatt polloit ravonk amkam modot zata. “Axeun ravat” hea utrank uzar kelolea Grek utracho orth “veg vaddovop.” Jehovacho dis kitlea vegan ietolo, tem amchean kaim bodlunk zaina. Tori, tea disachi vatt polloit astana, ami Devachea sevent amchem dhean-mon dovortat zalear amcho vell begin voita koxem amkam distolem.—1 Korintkarank 15:58.
Bible-ant Motiam Sodhum-ia
(2 Pedru 1:19) Tea bhair amkam odik ghott khatri diunk provadianchem utor asa; taka tumi chit dixat zalear borem kortoleat. Fantem pavo-sor ani sokallchem noketr tumchea kallzamnim ude porian, kallokhant uzvadd ghaltoli divtti koxi tem utor dhorat.
w08 11/15 22 ¶2
Jakob ani Pedru Potrantle Mukhel Mudʼde
1:19—“Sokallchem noketr” konn, to kednam udelo, ani oxem ghoddlem mhunn amkam koxem kolltta? “Sokallchem noketr” aplea Raz-podven aslolo Jezu Krist zaun asa. (Prok. 22:16) 1914-ant Jezu Mesias Raza zaun soglea rochnne mukhar udeun tannem eka novea disachi porgottnni keli. Jezu Raz-podven mhoimebhorit zatolo tednam koso astolo tem rupantorachea dorxonan adinch dakhoun dilolem. Hea rupantora udexim Devachea utrant aslolim bhakitam patieupa sarkim asat mhunn kolltta. Devachea utrak ami kan ditat tednam amchim kallzam uzvaddttat, ani sokallchem noketr udelam mhunn amkam kollon ieta.
(2 Pedru 1:12-15) Dekhun, zori tumi heo vostu zannont ani tumkam mellʼllam tem sot tumchea jivitant tumi ghott dhorun asat, tori hanv tumkam tancho ugddas korit ravtolom. 13 Ho sonvsar soddun vochpacho mhozo vogot lagim pavlo mhonn hanv zannom ani toxench amchea Somia Jezu Kristan mhaka kolloilam. Mhonnun, hanv jivo aso porian heo vostu tumchea monant haddun tumkam zagrut dovorchim mhonn mhaka dista. 14 Ho sonvsar soddun vochpacho mhozo vogot lagim pavlo mhonn hanv zannom ani toxench amchea Somia Jezu Kristan mhaka kolloilam. Mhonnun, hanv jivo aso porian heo vostu tumchea monant haddun tumkam zagrut dovorchim mhonn mhaka dista. 15 Ani hanv morun gelea uprant tumi sodanch hea vostuncho ugddas korcho mhonn hanv humedin vavurtolom.
w08 11/15 22 ¶6
Jakob ani Pedru Potrantle Mukhel Mudʼde
1:12-15. ‘Jivitant sot ghott dhorun,’ ravonk amkam vella-vellar ugddas korun diunchi goroz poddtta. Sobhechea mittingentlean, svotachea obheasantlean ani Bible vachpantlean amkam hea vixim ugddas zaunk modot zata.