Jun—Jivit ani Porgottnni Mittingechea Pustike Pasot Modot
JUN 3-9
DEVACHEA UTRANTLE THEVE | GALASIEKARANK 4-6
“Ek ‘Vopar vo Suchit Korta Toslem Nattok’ Jem Amkam Mhotvachem”
(Galasiekarank 4:24, 25) Hea ghoddnniantli ek vopar kaddum-ieta. Heo dogi bailo mhonnge don korar: ek mhollear Sinai dongra velo; tacho rupkar Hagar ani ti aplea bhurgeank gulamam zaunk zolma haddta. 25 Hagar mhollear Arabient aslolea Sinai dongracho rupkar, teach borabor atanchea Jeruzaleacho-i rupkar, kiteak hem Jeruzalem aplea bhurgeam soit gulamponnant asa.
it-1 1018 ¶2
Hagar
Apostl Paulu pormonnem, suchit korta toslea eka nattkant, Hagar, Somurti khala aslolea Israelitkaranchea raxttrak suchit korta. Hea raxttran apunn Somurtichea korara pormonnem jietolem mhunn Sinai dongra fuddem Jehovak utor dilolem. Ho korar, “bhurgeank gulamam zaunk zolma haddta.” Te lok patki aslolean, tea korara pormonnem jieunk pavonk nant. Tea koraran Israelitkarank svotontr korchea bodlek, te moronn favo aslole patki mhunn tankam guneanvakari tharaile. Tor, te gulam zale. (Ju. 8:34; Rom. 8:1-3) Pauluchea disamnim aslolem Jerusalem Hagarak suchit korta. Israelachi rajdhani Jerusalem, Israel raxttrak suchit kortalem, jem aplea bhurgeam sangata gulamponnant aslem. Punn, povitr xokte udexim obhixikt zalole Kristanv, ‘voir asa tea Jerusalemache,’ mhunnche Devache suchit korta tea bailechim, bhurgim zaun asat. Svotontr bail Sara sarkem hem Jerusalem kednanch gulamponnant naslem. Punn Ishmael-an Izakak piddapidd dili, teach toren Jezu vorvim svotontr zalolea ‘voir asa tea sorginchea Jerusalemachea’ bhurgeank, gulamponnant aslolea Jerusalemachea bhurgeam thaun piddapidd soschi poddli. Hagar ani tichea putak bhair ghatlo, jem Jehovan Israel raxttrak bhair ghatlem tem suchit korta.—Gal. 4:21-31, Povitr Pustok – Novo Korar; Ju. 8:31-40 hem-ui polloi.
(Galasiekarank 4:26, 27, Povitr Pustok – Novo Korar) Punn voir asa tem Jeruzalem aple sotʼtechem; amchi avoi tem. 27 Tor boroilelem asa tem oxem: “Sontosbhorit za, vanza kai bhurgem-ball naslelea; khuxalkaien uddio mar ani tuzo tallo ubar prosut venni bhogunk naslelea; tor sanddlele bailek ogllim bhurgim ghov aslelek tiche poros unnim”
w14 10/15 10 ¶11
Rajeacher Halona Toslo Bhavarth Dovrat
11 Abrahamachi sonsot bhakit kelolea desachi daiji zali tednam Abrahamacho korar purnn zalo. Punn Bible-antlim versam ho korar anik kitem suchit korta tea ritin pasun purnn zalo mhunn dakhoita. (Gal. 4:22-25) Hem koxem zalem, tem Devachea preronnan Apostl Paulu somzaita. To sangta ki Abramachea sonsticho poilo bhag Kristak suchit korta, ani dusro bhag, 1,44,000 povitr xokten obhixikt zalʼlea Kristanvank suchit korta. (Gal. 3:16, 29; Prok. 5:9, 10; 14:1, 4) Sonstik zolmak haddtta ti bail mhunnttlear, “voir asa tem Jeruzalem.” Mhunnche Devachea songottnnecho sorgincho bhag, zantunt Devache sorginche visvaxi sevok mellon asat. (Gal. 4:26, 31) Abrahamachea korarant bhakit kelam toxem, bailechi sonsot munxakullak besanvam haddttoli.
(Galasiekarank 4:28-31) Mhonnttoch, mhojea bhavam-bhoinnimno, tumi Izaka porim bhasavnnechim bhurgim. 29 Tednam soimbachea nemam pormannem zolmolʼlo bhurgo Devache bhasavnne udexim zolmolʼlea bhurgeak piddapidd ditalo, toxench atam-i ghoddta. 30 Punn Povitr Pustok kitem sangta? Gulam-cheddvak ani tachea putak bhair ghal; kiteak svotontr bailechea puta borabor gulam-cheddvachea putak daizant vantto ascho na. 31 Mhonnttoch, bhavam-bhoinnimno, ami gulam-cheddvachim bhurgim nhoi, punn svotontr bailechim.
Bible-ant Motiam Sodhum-ia
(Galasiekarank 4:6) Ani atam “Abba, Bapa!“, oso ulo martolo aplea putacho atmo Devan apnna thaun dhaddun amchea kallzamnim ghala: hem tumi tachim bhurgim mhonn dakhoun dita.”
w09 4/1 13
Tumi Zannant?
Jezun Jehovak “Abba, Bapa” kiteak mhunnttlem?
ʼAb·baʼʹ, hem Aramaik bhaxechem utor, “mhojea bapa” vo “Bapa” ho orth diunk xokta. Hem utor Bible-antlea versamnim tin pavtti melltta ani tin-ui pavtti tem magnneant, sorgincho Bapui Jehova lagim magtana uzar kelam. Tea utracho orth kiteak mhotvacho?
The International Standard Bible Encyclopedia sangta: “Jezuchea tempar, ʼabbāʼ hem utor chalte bhaxent uloitana uzar kortale. Hem utor chodd korun bhurgim aplea bapaik ulo martana uzar korun aplo lagxilʼlo sombond ani resped dakhoitalim.” Hem utor mogan ulo marunk uzar kortale ani bhurgim ulounk xiktalim tea poilea utram modlem ek aslem. Jezun him utram aplea Bapa lagim kallzant thaun magtana uzar kelim. Apunn morchea thoddeach voram poilim, Jezun Getsemani molleant vochon Jehovak magnnem kortana him utram uzar kelim, “Abba, Bapa mhojea.”—Marku 14:36.
Voir sangloli Encyclopedia fuddem oxem sangta, “Devak ulo marunk Greco-Roman kallachea Judevanchea sahitʼteant ʼAbbāʼ hem utor sarkench unnem uzar kortale. Karonn, oslea chaltea bhaxen uzar kortale tem utor Devak uzar korop taka man haddina oxem tankam ghoddie distalem.” Punn “Jezun . . . hem utor magnneant uzar korun, Deva sangata aplo lagincho sombond aslo to khoro mhunn dakhoilem.” Hachea bhair, Devachea Utrant “Abba” hem utor anik don pavtt apostl Paulun aplea borovpant uzar kelem. Hachea voilean, poilea xekddeantlea Kristanvamnim pasun magnnem kortana hem utor uzar kelʼlem mhunn kolltta.—Romkarank 8:15; Galasiekarank 4:6.
(Galasiekarank 6:17) Itlem sanglea uprant konnench mhaka anink tras dium noie; kiteak mhoje kuddir asat te dag Jezu pasot hanvem bhoglolea koxttanche.
w10 11/1 15
Tumi Zannant?
“Mhoje kuddir asat te dag Jezu pasot hanvem bhoglolea koxttanche” mhunn sangtana, Paulu kitea vixim uloitalo?—Galasiekarank 6:17.
▪ Paulun boroilolea hea utrancho veg-vegllo orth poilea xekddeantlea Kristanvanchea monank ghoddie ailo astolo. Udharonnak, adlea kallar zhuzachea koideank, mondir chortoleank, ani pollon voitolea chakrank vollkhonk ek gorom lokhondd uzar korun tanchea kuddicher ek chhap vo dag kortale. Eka munxacher ho dag aslear tem lojechem aslem.
Punn, ho dag sodanch lojecho naslo. Zaite adle lok apunn umke kullache vo dhormache sodoxia mhunn dakhoun diunk oxem dag apnnancher ghalun ghetale. Udharonnak, Theological Dictionary of the New Testament-a pormonnem, “Sirieche lok Hadad ani Atargatis hea tanche devank apnnank somorpit kortale tednam tanchea hatincher vo golleacher kuru kortale . . . Dionysus-anchea bhoktancher eka ivy zhaddachea panachea akaracho dag vo chhap martale.”
Hea versachi somzonni diupi zaite zann, Paulu him utram sangon, aplea Kristanv mixinori kamant veg-vegllea vellar taka mar poddlo tednam tachea kuddicher zalolea daga vixim uloitalo astolo mhunn chintat. (2 Korintkarank 11:23-27) Hem sangon Paulu ghoddie, aplea kuddicher aslole marache dag nhoi, punn aplea jivitachi chal apunn Kristanv mhunn vollokh dita mhunn sangonk sodhtalo astolo.
JUN 10-16
DEVACHEA UTRANTLE THEVE | EFEZKARANK 1-3
“Jehovachi Ievzonn ani Tachem Kam”
(Efezkarank 1:8, 9) amkam tannem bhogunk dilʼli tachi doia, tachi priti! tache budʼdhik par na, xim na! Tthav-naslolem tachem ginean! 9 Aple khuxecho gutt tannem amkam ukto korun dilo: adim-fuddench bholeponnan apnnem Krista sovem tharailoli ievzonn amkam dokhol korun porgott keli.
it-2 837 ¶4
Povitr Gutt
Mesiasachem Raj. Krista vixim povitr gutt ukto korchea vixim Paulu aplea borounnent akʼkhi mahiti dita. Efezkarank 1:9-11-ant, Dev aplo khuxecho ‘povitr gutt’ ukto korchea vixim oxem sangta: “Aple khuxecho gutt tannem amkam ukto korun dilo: adim-fuddench bholeponnan apnnem Krista sovem tharailoli ievzonn amkam dokhol korun porgott keli. Kallam-iuganche sompadnnek Kristak mostok korun, sorgar prithver asa titlem tachech adhin ektthaim korchem: hich ti tachi moga-ievzonn. Apnnachech khuxe pormannem zo ekloch sogllem ievjita, zo ekloch sogllem tharaita, tannench amkam Jezu sovem aplim mhonnun aplea sasnnant nirmun haddlim.” Ho ‘gutt vo povitr gutt’ eka sorkara vixim asa, mhunnche Devachem Mesiasachem Raj. Paulu ‘sorgar asa tem’ mhunn sangtana, Krista sangata sorginchea Rajeache daiji zaunchim asat tanchea vixim uloita. ‘Prithumer asa tem,’ mhunnche prithumer astoli ti porza. Povitr gutt Rajeak sombondit aslo mhunn Jezun aplea xisam lagim uloitana tankam dakhoun dilem. Tannem mhunnttlem: “Devachea Rajeacho gutt vollkunk Devan tumkam dennem dilam.”—Mk. 4:11.
(Efezkarank 1:10) Kallam-iuganche sompadnnek Kristak mostok korun, sorgar prithver asa titlem tachech adhin ektthaim korchem: Hich ti tachi moga-ievzonn.
w12 7/15 27-28 ¶3-4
‘Ekloch Jehova’ Aplea Kuttumbak Ekttaita
3 Moizesan Israelitkarank sanglem: “Sorvespor amcho Dev ekloch Sorvespor.” (D.I. 6:4) Jehova jem korta, ani jem ievjita tem eka-mekak mellon asta. Tor, “kallam-iuganche sompadnnek,” Devan ek “ievzonn” suru keli, mhunnche sorga voilea ani prithume voilea aplea rochnnek ekvottan haddchi ek manddavoll suru keli. (Efezkarank 1:8-10 vachat.) Hi ievzonn don bhagamnim aplo udʼdhex purnn kortoli. Poilo bhag, sorgar Jezu Kristachea odhikara khala kam korunk obhixikt lokank toiar korta. Ho bhag 33 K.X. hea vorsachea Ponʼnasavea Disachea Utsovak suru zalo, jednam Jehovan, Krista sangata sorgar raj choloitoleank vinchunk suru kele. (D.I. 2:1-4) Kristachea soddvonnechea bolidana adarit obhixit lok sasnachem jivit zoddunk nitivont asat mhunn tharailam dekhun, te apunn “Devachim apnnailolim bhurgim” mhunn khuxemonan manun ghetat.”—Rom. 3:23, 24; 5:1; 8:15-17.
4 Dusro bhag, Kristachea Mesiasachea Rajea khala, Sobit Bag zatolea hea prithumer jietoleank toiar korta. ‘Vhodd lokanchea urponjent vo zomeant’ asat te, hea zomeache poile bhag zaun asat. (Prok. 7:9, 13-17; 21:1-5) Ek Hozar Vorsanche Razvottkechea vellar lakʼkhamnim punorjivont zalole lok tanchea sangata mellon ietole. (Prok. 20:12, 13) Punorjivontponn amcho ekvott anik koxe toren dakhoun ditolo tem ami chintunk zata! Ek hozar vorsanchea xevottak, ‘prithumer asat tanchi’ nimanni porikxa zatoli. Tednam jim konn visvaxi ravtat, tankam prithume voilim ‘aplim bhurgim’ mhunn Dev apnnaitolo.—Rom. 8:21; Prok. 20:7, 8.
Bible-ant Motiam Sodhum-ia
(Efezkarank 3:13) Mhonnttoch, tumche khatir hanv koxtt-dogd bhogtam mhonn polleun, tumi niraxi zaum nakat mhonn hanv tumche kodde magtam: he mhoje koxtt-dogd tumchi vhoddvik.
w13 2/15 28 ¶15
Vhoddvik vo Mhoima Zoddunk Lagon Tuka Kitench Addaunk Dium Naka
15 Ami soddun dinastana Jehovachi khuxi kortat tednam ami dusreank vhoddvik vo mhoima zoddun gheunk modot kortat. Efezkaranche sobhek, Paulun oxem boroilem: “Tumche khatir hanv koxtt-dogd bhogtam mhonn polleun, tumi niraxi zaum nakat mhonn hanv tumche kodde magtam: he mhoje koxtt-dogd tumchi vhoddvik.” (Ef. 3:13) Khoinchea orthant Pauluche koxtt-dogd Efezkarank “vhoddvik” zaun asle? Tras aslear pasun Paulu tanchi seva korit ravlo tem polloun, Kristanv zalolean tankam mellttat te sueog, chodd mhotvache ani ekdom valorache mhunn Efezkar lekhunk pavle. Paulun tras aile tednam soddun dilʼlem zalear, Jehova sangata tanchi ixttagot, seva, ani bhorvonso valoracho nhoi oxem Efezkarank disonk xoktalem nhoi? Tor, Paulun sosnikai dakhoilolean Kristanv dhorm unch molacho ani Jezuche xis zaunk lagon kosle-i teag korop valorachem mhunn tannem dakhoun dilem.
(Efezkarank 3:19, Povitr Pustok - Novo Korar) Ani soglle zannvaie voir asa to Kristacho mog tumi ollkhoteleat, ani tumche bhorte vorvim tumi Devache sorvbhortent bhitor sorteleat.
cl 299 ¶21
“Kristacho Mog Vollkhon Ghevop”
21 “Ollkhoteleat” hea utrak uzar kelolea Grek utracho orth, “kornneamnim, onnbhovantlean” vollkhon ghevop. Ami Jezu bhaxen mog dakhoitat tednam, mhunnche svarth nastana dusream pasot ami amkanch ditat, doia-maia dakhoun dusreanchea gorzank pavtat ani kallzant thaun bhogxitat tednam ami khoreanich Jezuchim bhavnam vollkhotat mhunn dakhoitat. Hea toren, ami amchea onnbhovantlean ‘sogle zannvaie voir asa to Kristacho mog vollkhotolim.’ Jitlim ami Krista bhaxen zaunk vavurtat, titlim ami amcho mogall Dev Jehova, lagim sortolim, zachi Jezun poripurnn toren dekh ghetli.
JUN 17-23
DEVACHEA UTRANTLE THEVE | EFEZKARANK 4-6
“Devan Dilʼlem Zhuzachem Angtrann Ghalun Ravat”
(Efezkarank 6:11-13) Devcharachea sogllea manddnniancher zoit vhorunk Devan dilʼlem zhuzachem angtrann ghalun ravat; 12 Kiteak mhollear, rogta-masachea dusmanam lagim amkam zhuz na; punn pordhanam lagim, odhikariam kodde, hea kallokachea sonvsaracho razkarbhar choloitolea lagim, ontrallar vosti kortolea khottea atmeam kodde amchem zhuz. 13 Dekhun Devan dilʼlem angtrann ghalchi tumkam goroz asa; na tor, vaitt disa hea dusmanam virudh zhuzunk tumchean zaunchem na, ani soglle upai gheun-ui tumchean thir ubim ravunk ghoddchench na.
w18.05 27 ¶1
Tornnatteamno—Devchara Add Zhuzonk Thir Ubim Ravat
Apostl Paulu Kristanvanchem jivit, dusmana mukhar ube ravon zhuztolea soinikank sor korta. Hem khorem, ki amchem zhuz hat paim-an zhuztat toslem nhoi, punn Deva thaim aslolea amchea ixttagoticher dhoko ieta tednam tachea add zhuztat tem zhuz zaun asa. Soitan ani tache denvchar amche khore dusman, je zaitea vorsancho onnbhov ani kola aslole zhuzari zaun asat. Tor survatek, amkam ghoddie ami hem zhuz jikchimnant oxem disot. Chodd korun tornnattim hea zhuzant oskot disonk puro. Tor, munxam poros chodduch bollixt aslolea hea noxttea otmea add tim koxim jikonk xoktolim? Khorem mhunnttlear, tornnattim jikonk xoktat, ani tim jikot asat! Kiteak? ‘Somiache podvechea bollan, tim ghott zatat.’ Punn tim fokot Devachea xoktechem boll gheun nhoi, punn zhuza pasot nheson toiar asat. Borem proxikxonn ghetlolea soinikam sarkim, tim “Devan dilʼlem zhuzachem angtrann ghalun” ravtat. —Efezkarank 6:10-12 vachat.
(Efezkarank 6:14, 15) Mhonnttoch sogllim hatiaram gheun toiar ravat: tumi vollkhunk pavleant tem Devachem sot zaum-di tumchea penkttacho pottʼtto; Devak manta toslem jivit zaum-di tumche chhatichem kottʼttem; 15 xantichem xubhvortoman porgottchi hurba zaum-di tumchea paianche butt.
w18.05 28-29 ¶4, 7, 10
Tornnatteamno—Devchara Add Zhuzonk Thir Ubim Ravat
4 Devachea Utra thaun ami xiktat tem sot, Deva sangata amchea ixttagoticher ietat tea khottea xikvonne thaun amkam rakhonn dita. (Juanv 8:31, 32; 1 Juanv 4:1) Ani ami Devachea sotacho jitlo mog kortat, titlem amkam amchem “chhatichem kottʼttem” ubarunk, mhunnche Devachea nitichea totvam pormonnem jieunk sompem zata. (St. 111:7, 8; 1 Juanv 5:3) Hachea bhair, Devachea Utrantlea sotachi amkam sarki somzonni asa zalear ami ghott ravon amchea virodheank hem sot mhunn dakhounk fatti sorchimnant.—1 Ped. 3:15.
7 Jehovache noitik dorje amchem kalliz koxem rakhta tem dakhounk kitli bori vopar! (Mho. 4:23) Ek soinik aplem lokhonddachem chhatichem kottʼttem bodlun ek ghott na toslem dhatun kelolem chhatichem kottʼttem kednanch ghalchona. Teach toren, Jehovache dorje pallchea bodlek, ami amkam sarkem dista tem kednanch korchimnant. Karonn, amchi somzonni chodduch chukichi aslolean ti amkam zai asloli rakhonn diunk xokona. (Mho. 3:5, 6) Bodlek, amchea kallzachi rakhonn korunk amchea chhatir ‘lokhonddachem kottʼttem’ ghott boslam kai na mhunn ami sodanch khatri korun gheunk zai.
10 Zoxem Romi soinikanche butt tankam zhuzant vochonk modot kortale, Kristanv ghaltat tea paianche butt tankam xanticho sondex porgottunk modot kortat. (Iz. 52:7; Rom. 10:15) Hem khorem, ki sondhi melltta tednam ulounk amkam dhirachi goroz asa. 20-vorsancho Bo oxem sangta: “Mhojea klasintlea bhurgeam lagim ulounk mhaka bhirant distali. Mhaka dista hanv lojetalom. Punn atam hanv tea tempa vixim chinta tednam, hanv kiteak lojetalom kai mhunn hanv chintʼtam. Atam mhojea ixttank sakx diunk hanv khuxal zata.”
(Efezkarank 6:16, 17) Devcharache soglle zollte bann tumchean palounk zaunche khatir, tumchea hatant sodam bhavarthacho ddhal dhorat. 17 Xevttim soddvonnechem xirostrann ghalat ani povitr atmean dilʼli torsad, mhonnge Devachem Utor, dhorun ravat.
w18.05 29-31 ¶13, 16, 20
Tornnatteamno—Devchara Add Zhuzonk Thir Ubim Ravat
13 Soitan tujer dhaddtta te thodde “zolltte bann” mhunnttlear, Jehova vixim Soitan sangta ti fott, zoxem, Jehovak tuji kallji na ani to tuzo mog korunk xokona. Ekunnis vorsanchem Ida-k, apunn kainch valorachem nhoi, oslea bhavnam add zhuzchem poddlem. Tem sangta, “Zaite pavtt mhaka, Jehova mhojea thaun pois asa ani hanv tachem ixtt zalolem taka naka, oxem dista.” Tachea monant oslim chintnam ietat tednam taka koxi modot zata? “Mhozo bhavarth ghott dovrunk ek vhodd modot mhunnttlear mittingo” mhunn Ida sangta. “Hanv dita te zobab konnakuch aikonk naka mhunn chintun hanv mittingent vogi bostalem ani kednanch zobab dinaslem. Punn atam, hanv mittingechi toiar korta ani don vo tin pavtti zobab diuncho proitn kortam. Hem korop mhaka kotthin zata tori astana hanv oxem korta tednam mhaka borem dista. Ani bhav-bhoinnam mhaka khub urba ditat. Hanv sodanch mittinge uprant Jehova mhozo mog korta hea khatren ghora ietam.”
16 Zoxem ek xirostrann eka soinikacho mendu rakhta, tosoch “soddvonn zoddpacho amcho bhorvanso” amchem mon, ani amchim chintnam rakhta. (1 Tes. 5:8; Mho. 3:21) Devachea bhasaunneancher amchem dhean dovrunk amcho bhorvonso amkam modot korta ani amchea trasam vixim sarke ritin chintunk modot korta. (St. 27:1, 14; D.I. 24:15) Punn amchem “xirostrann” faideak poddtta toslem asonk zai zalear, ami tem amchea hatant dhorun ravchem nhoi, punn amchea tokler ghalunk zai.
20 Paulu Devachea Utrak eka torsadek sor korta. Punn amche patienne vixim zobab ditana, vo tem utor amchem svotachem chintop bodlunk uzar kortat tednam tem ami kola uzar korun vaprunk xikonk zai. (2 Kor. 10:4, 5; 2 Tim. 2:15) Tumi tumchi kola koxi vaddounk zata? 21 vorsancho Sebastian mhunntta: “Hanv mhojea Bible vachpantlea dor eka odheai-a thaun ek vers vinchun kaddun boroita, ani mhojea avddichea versanchem ek list korit asa. Oxem korun, hanv Jehovachem chintop anik bore toren somzonk pavtam oxem mhaka dista.” Daniel oso mhunntta: “Bible vachtam tednam, hanv porgottnnechea kamant lokank faideak poddtta toslim versam vinchun kaddtta. Tuka Bible-acho kitlo mog asa, ani tankam somzaunk tum tujean zata titlem-i korta tem polloun lok tum sangta tem manun ghetat hem mhaka dison ailam.”
Bible-ant Motiam Sodhum-ia
(Efezkarank 4:30) Devachea Povitr Atmeak khont dium nakat, kiteak ho atmo Devanuch tumcher marlolo xikʼko, purnn suttkechea disa tumi Devachinch mhonn khunnaunk dilʼlo xikʼko.
it-1 1128 ¶3
Povitrtai
Povitr Xokti. Jehovachi xokti, vo tacho otmo, tachea tabeant asta ani sodanch tachich khuxi purnn korta. Ti xokti nitoll, nirmoll, povitr, ani fokot Devachea borea kamank lagon uzar korunk dovorloli asa. Takach lagon tika “povitr atmo” ani ‘povitr korta to atmo’ mhunnttla. (St. 51:11; Luk. 11:13; Rom. 1:4; Ef. 1:13) Ekleacher povitr xokti kam korta tednam, ti taka povitrtaien vo nitollsannen cholonk urba dita. Tor koslech mhelle vo chukichem kam korta tednam ek munis tea xokte add voita vo tika ‘dukhi korta vo khont dita.’ (Ef. 4:30) Povitr xokti ek zonn vo veokti nhoi hem khorem, punn ti Devacho povitr sobhav dakhoun dita zaka lagon tika ‘khont zaunk’ xokta. Konnui koslem-i vaittponn korit ravta zalear, to ‘povitr atmeache vorgunn addaunk vo ibaddunk xokta.’ (1Tes. 5:19) Osleo kornneo korit ravlear, ek munis Devachea povitr xoktek, ‘tiddounk’ xokta, ani haka lagon Dev aplea add vochpi munxacho dusman zaunk xokta. (Iz. 63:10) Zo munis povitr xoktek khont dita vo dukhoita, to tachi ninda korunk pasun pavonk xokta. Hea patkak Jezu Kristan sanglolem toxem anik bhogsonnem na, zaum atanchea zaum fuddlea iugant.—Mt. 12:31, 32; Mk. 3:28-30; SPIRIT polloi.
(Efezkarank 5:5) Hem mat monant dhorat: kamchari monxank, pozddea lokak, sonvsari vostunchi odik-odik axa dhorunuch jietat tankam, Kristachea ani Devachea rajeant daiz na. (Osli sonvsari vostunchi axa khorench mhollear kuddea devanchi puza.)
it-1 1006 ¶2
As
Korneamnim dixtti poddtta. Eklo axecho mhunn to sogleank dixtti poddtta toslem ek kam korta tednam dison ieta. Tednam tache chukiche ani chodduch aslolea anvdde ukte zatat. Chukiche anvdde vo as, vaittacho gorb dhorun, patkak zolm ditat mhunn Bible-acho boroupi Jakob sangta. (Jak. 1:14, 15) Tor ek axechea munxak tachea kornneamnim vollkhom ieta. Axecho munis zavop mhunnche murti puza korpi zavop mhunn apostl Paulu sangta. (Ef. 5:5) Apli as vo vonddovnni bhagounk to eka vostuk aplea Rochnnarache seve ani bhokte mukhar dovorta tednam tea vostuk to aplo dev korta.—Rom. 1:24, 25.
JUN 24-30
DEVACHEA UTRANTLE THEVE | FILIPKARANK 1-4
“Koslech Uske Kaddum Nakat”
(Filipkarank 4:6) Koslech huske kaddum nakat; sogllea tumchea magnneamnim tumkam goroz titlem-i Devak kollit korat, punn tumchim magnnim dhinvaxi kallzan kelʼlim zaum-di.
w17.08 10 ¶10
“Amchea Gineana Poros Vorti Devachi Xanti”
10 Koslea-i karonna vixim usko korinastana “Devachi xanti” ami koxi onnbhovunk zata? Filipkarank Paulun sanglolea utram udexim uske ietat tednam magnnem amkam modot korta mhunn kolltta. Tor amkam uske astat tednam, ami tea vixim khont korchea bodlek magnnem korunk zai. (1 Pedru 5:6, 7 vachat.) Jehova tumchi kallji ghetolo hea bhavarthan magnnem korat. Tumchim besanvam ugddas korun, “dhinvaxi kallzan” magnnem korat. Dev “amchean magunk-prarthunk zata, vo ami kolpunk xoktanv, tache poros ogllem korunk” xokta mhunn ami monant dovortat tednam tacher amcho bhorvonso anik ghott zatolo.—Ef. 3:20.
(Filipkarank 4:7) Ani amchea gineana poros vorti Devachi xanti tumchim monam ani kallzam Jezu Krista sovem rakhtoli.
w17.08 10 ¶7
“Amchea Gineana Poros Vorti Devachi Xanti”
7 Filipint aslolea bhavamnim Pauluchi chitt vachli tednam, Pauluk kitem ghoddlolem tem tanchea monant ailem astolem. Tanchea modlea konnem-i opekxa korunk naslem tem Jehovan korun dakhoilem. Paulu tankam koslem lisanv xikounk sodhtalo? Sompea utramnim sangchem mhunnttlear, huske kaddinakat, magnnem korat, ani tumkam Devachi xanti mellttoli. Punn, dhean diat, ‘Devachi xanti amchea soglea gineanam poros vorti vo chodd’ asa. Hacho orth kitem? Thoddea bhaxantor kortoleamnim hea utrancho orth, “amchea soglea sopnam poros chodd” vo “soglea munxanchea ievzonneam poros chodd” mhunn sangla. Paulu hanga, “Devachi xanti” chintunk zata tachea poros chodd ojapachi zaun asa mhunn sangtalo. Tor, munxachea nodren amchea trasantlean suttonk koslich vatt na oxem disot. Punn Jehova vatt zannam, ani to ami opekxa korunk xoktat tachea poros vortem korunk xokta.—2 Pedru 2:9 vachat.
w17.08 12 ¶16
“Amchea Gineana Poros Vorti Devachi Xanti”
16 “Amchea gineana poros vorti Devachi xanti” amkam melltta tednam kitem zata? Bible-antlim versam amkam zobab ditat, “tumchim monam ani kallzam Jezu Krista sovem rakhtoli.” (Filp. 4:7) “Rakhop” hea utrak uzar kelolem Grek utor zhuzachea moidanar uzar kortale. Hem utor, adlea tempar ek ghott vontti aslolea xarachi rakhonn korunk nemlolea soinikanchea zomeank uzar kortale. Filipi oslem ek xar aslem. Filipintle lok ratik bhirant nastana nidonk xoktale, karonn xarache darvontte rakhonk soinik ube asat mhunn te zannam asle. Teach bhaxen, amkam “Devachi xanti” asta tednam amchem kalliz ani mon xanten asta. Jehovak amchi kallji asa ani amkam ies mellʼllolo taka zai mhunn ami zannant. (1 Ped. 5:10) Ho mudʼdo ami monant dovortat tednam ami gorje bhair uske kaddchimnant, vo nirax zaunchimnant.
Bible-ant Motiam Sodhum-ia
(Filipkarank 2:17, NW) Tumchea bhavarthan bhettoilolea tea iodnacher ani povitr sevecher soreachi bhettounni koxi mhaka votoilo zalear pasun, tumchea sogleam borabor hanv-ui khuxal ani sontosbhorit zatolom.
it-2 528 ¶5
Bhettounneo
Soreacheo Bhettounneo. Bhasailʼlolea desant Israelitkar gelea uprant tanchea choddxea her bhettounneam sangata soreachi bhettounni-i astali. (Lok. 15:2, 5, 8-10) Tea soreachea bhettounnent te dhakancho soro (“soro”) uzar kortale ani to vedicher votʼtale. (Lok. 28:7, 14; Ut. 30:9 sor kor; Lok. 15:10.) Filipint aslolea Kristanvank Paulun oxem boroilem: “Tumchea bhavarthan bhettoilolea tea iodnacher ani povitr sevecher soreachi bhettounni koxi mhaka votoilo zalear pasun, tumchea sogleam borabor hanv-ui khuxal.” Hanga tannem apnnank soreache bhettounnek sor korun, to aplea bhav-bhoinnam pasot apleak diunk toiar asa mhunn dakhounk sodhtalo. (Filp. 2:17, NW) Morchea adim tannem Timotak oxem boroilem: “Mhoje vatten, mhojea jivachem bolidan zaunchem zalam, [“soreachi bhettounni koxi mhaka votoila,” NW] sonvsar soddun vecho mhozo vell pavla.”—2Tim. 4:6.
(Filipkarank 3:11) He bhaxen melʼleantlo punorjivont [“poilinchem punorjivontponn,” NW] zaunk pavtolom mhonn mhaka bhorvanso asa.
w07 1/1 26-27 ¶5
“Poilem Punorjivontponn”—Atam Chalu Asa!
5 Uprant, ‘Devache Israel-porjeche’ obhixikt sorginchea mhoiment Somi Jezu Krista sangata ekvottʼttole zoim te ‘Somiachea sangata astole sodam-sodankal.’ (Galasiekarank 6:16; 1 Tesalonikekarank 4:17) Hea ghoddnek “poilinchem punorjivontponn” vo “poilem punorjivontponn” mhunnttat. (Filipkarank 3:10, 11; Prokasovnni 20:6) Tem punorjivontponn somplea uprant, lakʼkhamnim lokank prithumer punorjivont zaun Sobit Bagent sasnank jieuncho vell ietolo. Tor amcho bhorvonso sorgincho vo prithumecho asum, amkam ‘poilinchea punorjivontponna’ vixim itsa asa. Tor tem koslem punorjivontponn? Tem kednam ghoddttolem?