Adanv ani Eve-k, Eden bagentlim bhair kaddlea uprant tankam zaitim bhurgim zalim. Tancho poilo put Kain ek xetkar zalo ani tancho dusro put Abel menddram rakhpi zalo.

Ek dis Kain ani Abel Jehovak ek bolidan ditat. Tumi zannant bolidan mhunnttlear kitem? Bolidan mhunnttlear, ek khas torecho gift. Abelan dilʼlem bolidan Jehovak avoddlem. Punn Kainan dilʼlem bolidan Jehovak avddonk na. Taka lagon, Kainak khub rag ailo. Jehovan taka mhunnttlem: ‘Zor tum rag soddun dina zalear tum kitem tori vaitt korunk pavtolo.’ Punn tannem Devachem matui aikonk na.

Kainan, Abelak mhunnttlem: ‘Chol ami xetant iea.’ Te xetant eklech astana, Kainan aplea bhavak, mhunnche Abelak jivexim marlo. Tednam Jehovan kitem kelem? Tannem Kainak xikxa dili. Tannem taka aple famili thaun itlo pois dhaddlo ki to thoim thaun kednanch porot ieunk pavlo na.

Amkam kitem xikonk melltta? Amkam zai toxem zaina tednam ami ragar zaunk xoktat. Amchea bhitor rag vaddtta zalear vo konnui amkam ami ragan bhorleant mhunn sangta zalear ami to rag rokddoch soddun diunk zai. Na zalear ami kitem tori vaitt korunk pavtolim.

Abel Jehovacho mog kortalo ani borem tench kortalo. Tea pasot, Jehova taka kednanch visorchona. Ani hi prithum sobit bag kortolo tednam Jehova, Abelak porot jivo kortolo.

Vell voita toso, prithumer lok vaddot gelo. Tantuntlo choddso lok vaitt aslo ani sorgavoile thodde devdut pasun vaitt zale. Te sorg soddun prithumer aile. Tannim oxem kiteak kelem tem tumi zannant? Karonn te munis zaun bailam lagim kazar zaunk sodhtale.

Te kazar zalea uprant tanchea bailank put zolmole. Te put vhodd zaun itle xoktivont zale ki te dusreank marunk lagle ani tras diunk lagle. Te oslim vaitt kamam korit ravlole Jehovak naka aslem. Tea pasot, ek vhoddli buddtti dhaddun soglea vaitt lokancho nas korunk Jehovan tharailem.

Punn ek munis tanchea thaun vegllo aslo. To Jehovacho mog kortalo. Tachem nanv Noah. Taka ek bail ani tin put asle. Tachea putanchim nanvam aslim Shem, Ham ani Jafet. Ani dor eka putak bail asli. Jehovan Noah-k boksa bhaxen dista tosli ek vhoddli bott bandunk laili. Oxem kelʼlean, Noah ani tachi famil tea buddtte thaun salvar zaunk xoktalim. Toxench, Jehovan Noah-k tea bottint zaitea zonvarank vhoronk lailim, jea udexim tancho-i jiv salvar zaunk xoktalo.

Noah-n rokddich bott bandunk suru keli. Taka ani tache familik ti bott bandunk sumar 50 vorsam laglim. Jehovan sanglolem toxich tannim ti bott bandli. Noah-n buddtte vixim lokank sanglem punn konnench tachem aikonk na.

Magir tea bottint bhitor vochpacho vell pavlo. Uprant kitem zalem tem zannam zaum-ia.