Obheas 6

Bible-antlem Vers Kiteak Uzar Kelam Tem Spoxtt Ritin Somzavop

Juanv 10:33-36

KITEM KORCHEM: Bible-antlem vers vachlea uprant rokddoch dusrea mudʼdeacher vochom naka. Tunvem vachlam tem vers ani tum sangta to mudʼdo koso zuddlolo asa tem tujea aiknnareank spoxtt ritin dakhoun di.

HEM KOXEM KORCHEM:

Mukhel utrancher dhean di. Bible-antlem vers vachlea uprant mudʼdeak lagu zatat tim utram dakhoi. Hem korunk tunvem tim utram porot vachunk zata vo aiknnareamnim tim utram sodhun kaddunk tunvem tankam ek prosn vicharunk zata.

Tea versant kitem sanglam tem tum dusrea utramnim sangta zalear-ui, tujea aiknnareank Bible-antlim utram tujea mukhel mudʼdeak koxim lagu zatat tem spoxtt kollon ieunk zai.
Mukhel mudʼdeancher uzvadd ghal. Bible-antlem vers vachunk tunvem karonn sanglam zalear, tea versantlim mukhel utram tea karonnak koxim adar ditat tem dakhoi.

Versacher bhasabhas kortana tuzo Bible ukto dovor. Oxem kelʼlean, tum kitem sangta tem Bible-achea versant koxem dakhoilam tem aiknnareank sarkem somzotolem.
Bible-antlem vers koxem lagu zata tem sompea ritin dakhoi. Mukhel mudʼdeak lagu zaina ti mahiti sangom naka. Bhasabhas korta tea vixoi-acher aiknnaro kitem zannam tem motint dovor ani mudʼdo koso lagu zata tem dakhounk kitli mahiti sangonk zai tem tharai.