Ami Kitem Nhestat Ani Koxim Distat Tem Kiteak Gorjechem?

Amkam sogleank veg-veglle toren nhesonk ani toiar zaunk avoddtta. Punn, amchem nhesop Jehovakui avoddtta vo na tem zannam zavop gorjechem. Tor, hem korunk ami Bible-antlim thoddim totvam polloum-ia.

1. Ami kitem nhestolim ani koxim distolim tem tharaitana kitem ugddas dovrunk zai?

Ami “moriadin ani sarkem chintop dovrun man haddtta tosle” kopdde vinchun kaddunk zai. Toxench, amche kopdde nitoll asonk zai jea vorvim ami “Devachi bhokti” kortat mhunn dusreank kollon ietolem. (1 Timotak 2:9, 10) Hea vixim ami char mudʼde polloum-ia: (1)  Jehovachea lokamnim “man haddtta” toxem nhesonk zai. Jehovache Sakxi mittingek veg-veglle toren nheson ietat tem tumi polloilam astolem. Tor, ami mittingek ietat tednam ami kitem nhestat ani koxim distat tem Jehovak man haddtta tea bhaxen asonk zai. (2)  Ami “moriadin” nhesonk zai. Hacho orth, ami dusreank amchi kudd dakhoita toxem vo dusreanchem dhean amcher haddtta toxem nhesonk favona. (3)  Aiz novim-novim fashion-am ietat ani tim soglim ami dolle dhampun apnnainant tednam amkam “sarkem chintop” asa mhunn ami dakhoitat. (4)  Ami kitem nhestat ani koxim distat tea vorvim ami khorea “Devachi bhokti” kortat mhunn lokank kollon ieunk zai.—1 Korintkarank 10:31.

2. Ami koxim distolim tem tharaitana dusream vixim kiteak chintunk zai?

Ami kosle kopdde ghaltolim tem ami tharaunk zata tem khorem. Punn, ami koxim distat tem polloun dusreank addkholl zaunk favona. Tachea bodlek, ami “aplea xezareak khuxal korunk chintchem jea udexim tachem borem zatolem ani to ghott zatolo.” Tor, dusreanchim bhavnam motint dovrun ami koxim distolim tem tharaunk zai.—Romkarank 15:1, 2 vachat.

3. Amkam polloun lok sot koso xikonk pavtolo?

Ami sodanch bore kopdde ghalunk zai tem khorem. Punn, mittingek ani porgottnnek voitat tednam ami kosle kopdde ghaltat ani ami koxim distat tacher chodd dhean divop gorjechem. Karonn, ami porgottnni kortana lokanchem dhean amchea sondexacher aschea bodlek, eamchea kopddeancher gelʼlem amkam naka. Punn, tannim sot xikon amchea “Taronn diupi Devachea xikounnechi sobitkai” vaddoilʼli amkam zai.—Titak 2:10.

KHOLAIEN XIKAT

4. Amchem nhesop borem asta tednam Jehovak man melltta

Amchem nhesop borem asonk sogleam-von mukhel karonn kitem zaun asa? Stotr 47:2 vachun sokol dilʼlea prosnanche zobab zannam zaum-ia:

• Dusrim amkam Jehovachea nanvan vollkhotat dekhun amchem nhesop koxem asonk zai?

• Ami mittingek ani porgottnnent koxim nhestat tacher dhean divop gorjechem oxem tumkam dista. Kiteak?

5. Ami kitem nhestolim ani koxim distolim tem ami koxem tharaunk zata?

VIDEO polloiat.

VIDEO: “Tumi Kortat Tem Soglem Devak Mhoima Diunche Khatir Korat” (10:18)

Amche kopdde marog asum vo nasum, te nitoll asonk zai ani dor eke ghoddiek sobta toxe asonk zai. 1 Korintkarank 10:24 ani 1 Timotak 2:9, 10 vachat. Uprant sokol dilʼlea prosnanche zobab zannam zaum-ia:

• Ami mhelle ani eke ghoddiek sobona tosle kopdde kiteak ghalche nhoi?

• Ami kudd dakhoitat tosle vo tight vo dusreanchea monant vaitt chitnam haddttat tosle kopdde kiteak ghalche nhoi?

Aiz Kristanvam, Moizesachea Somurti khala nant, punn tea kaideam vorvim Jehovachem chintop kitem asa tem kollon ieta. Dusri somurt 22:5 vachun sokol dilʼlea prosnacho zobab zannam zaum-ia:

• Bailamnim dadleam sarkem ani dadleamnim bailam sarkem kiteak nheschem nhoi?

1 Korintkarank 10:32, 33 ani 1 Juanv 2:15, 16 vachun sokol dilʼlea prosnanche zobab zannam zaum-ia:

• Ami kitem nhestat ani koxim distat tem amchea vattarantlea lokank ani sobhentlea bhav-bhoinnank vaitt dista toxem kiteak aschem nhoi?

• Tumchea vattarantlea choddxea lokanchem nhesop koxem asa?

• Ani tantuntlem khoinchem tori Kristanvank sobona toslem asa oxem tumkam dista? Ani kiteak?

KITEM XIKLIM

Ami kitem nhestat ani koxim distat tea vorvim ami Jehovak ani toxench dusreank man ditat mhunn dakhoitat.

Porot Ugddas Korum-ia

• Ami kitem nhestat ani koxim distat tem Jehovak kiteak gorjechem?

• Amchem nhesop koxem asonk zai mhunn Bible sangta?

• Ami koxim nhestat tea vorvim amchea porgottnnechea kamacher koslo porinnam zaunk xokta?

ANIK SODHAT

Tumi koxim nhestat tea vorvim lok tumchea vixim kitem chintunk xokta tem zannam zaiat.

“Mhojem Nhesop Koxem Asa?” (Web article)

Ami tattoo kaddunk zata kai?

“Tattoo Vixim Bible Kitem Sangta?” (Web article)

Ami koxem nhesonk zata tea vixim Bible-antlim anik khoinchim totvam amkam modot korunk xoktat tem zannam zaiat.

“Amchem Nhesop Jehovak Man Haddtta Kai?” (The Watchtower, September 2016)

Nhespa vixim eke bailechem chintop kitem aslem? Ani sot xiklea uprant tinnem aplem chintop koxem bodolʼlem tem zannam zaiat.

“Dusreanchem Nhesop Polloun Mhaka Addkholl Zatali” (Awake!, December 22, 2003)