ODHEAI 28
Ami Jehovak Ani Jezuk Koxem Upkariponn Dakhounk Zata?
Chintat, tumcho ek mogall ixtt tumkam ek sobit dennem dita. Tednam tumkam koxem bhogtolem? Tumi khub khuxal zatolim ani tache upkar attoitolim nhoi! Jehova Devan ani Jezu Kristan amkam ek vortem dennem dilam. Hem dennem kitem ani tea dennea pasot ami tanche upkari asat mhunn koxem dakhounk zata?
1. Jehovak ani Jezuk upkariponn dakhounk ek vatt khoinchi?
‘[Jezucher] bhavarth dovortat tea soglea’ munxank sasnachem jivit mellttolem mhunn Devan Bible-ant bhasailam. (Juanv 3:16) Tor, amcho bhavarth dakhounk ami fokot Jezu amche pasot mela itlench patielear puro nhoi. Ami amchea utramnim ani korneamnim ho bhavarth dakhounk zai. (Jakob 2:17) Oxem kortat tednam ami Jehovak ani Jezuk amchem upkariponn dakhoitat ani tanchea sangata amchi ixttagot ghott zata.—Juanv 14:21 vachat.
2. Ami Jehovak ani Jezuk anik khoinchea ritin upkariponn dakhounk zata?
Jezun morchea adlea rati aplea apostlam sangata ek khas jevonn dovorlem. Taka Bible-ant ‘Somiachem Sanjechem Jevonn’ mhunnttlam vo taka ami Jezuchea Mornnacho Ugddas Dis pasun mhunnttat. (1 Korintkarank 11:20) Aplea xisamnim ani khorea Kristanvamnim ho dis ugddas kelʼlo Jezuk zai aslem. Jezun sanglem: “Mhozo ugddas korun oxench korit ravat.” (Lukas 22:19) Ami Jezuchea Mornnachea Ugddas Disak hajir zatat tednam, Jehova Devan ani Jezu Kristan jem amkam moladik dennem dilam tea pasot ami upkari asat mhunn dakhoitat.
KHOLAIEN XIKAT
Jehovan ani Jezun amkam zo mog dakhoila tache pasot ami anik koxe toren upkariponn dakhounk zata ani Jezuchea Mornnacho Ugddas Dis itlo mhotvacho kiteak tem polloum-ia.
3. Upkari asat mhunn korneamnim dakhoiat
Chintat, tumi udkant buddttalim ani ek munis tumkam salvar korta. Tannem tumcho jiv salvar kelo hem tumi visortolim kai? Kednanch na. Tumi jivitbhor tachim upkari astolim ani hem tumi tumchea korneamnim dakhoitolim nhoi!
Jehova Devan amcho jiv salvar korunk aplea Putak dhaddlo. 1 Juanv 4:8-10 vachun sokol dilʼlea prosnanche zobab zannam zaum-ia:
Jezuchem bolidan ek moladik dennem oxem ami kiteak mhunnonk zata?
Jehovan ani Jezun tumchea pasot zo mog dakhoila tea vixim tumkam koxem dista?
Jehovan ani Jezun tumkam zo mog dakhoila tache pasot tumi upkari asat mhunn koxem dakhounk zata? 2 Korintkarank 5:15; 1 Juanv 4:11; 5:3 vachat. Dor ek vers vachlea uprant sokol dilʼlea prosnacho zobab zannam zaum-ia:
Hea versa pormonnem ami upkari asat mhunn koxem dakhounk zata?
4. Jezuchi dekh gheiat
Jezu pasot upkariponn dakhounk anik ek mhotvachi vatt mhunnttlear tachi dekh ghevop. 1 Pedru 2:21 vachun sokol dilʼlea prosnacho zobab zannam zaum-ia:
Jezuchi dekh gheunk tumi kitem korunk zata?
Jezu Devachea Utracho mog kortalo, bori khobor porgottʼttalo ani dusreank modot kortalo
5. Jezuchea Mornnachea Ugddas Disa hajir zaiat
Poilech pavtt Somiachem Sanjechem Jevonn koxem kelʼlem tem zannam zaunk, Lukas 22:14, 19, 20 vachun hea prosnanche zobab zannam zaum-ia:
Somiachea Sanjechea Jevnna vellar Jezun kitem kelem?
Unddo ani drakxancho soro kitem dakhoun dita?—Vers 19 ani 20 polloiat.
Jezuk zai aslem ki tachea xisamnim dor vorsa tachea mornnacho dis ugddas kelʼlo. Taka lagon, Jehovachim Sakxi dor vorsa ektthaim zaun Jezuchea adnea pormonnem tea disacho ugddas kortat. Hea khas disa vixim zannam zaunk VIDEO polloun sokol dilʼlea prosnacho zobab zannam zaum-ia.
Jezuchea Mornnachea Ugddas Disak kitem kortat?
Unddo Jezuchea poripurnn kuddik suchit korta ji tannem amchea pasot bolidan keli. Ani drakxancho soro tachea rogtak suchit korta
THODDO LOK MHUNNTTA: “Salvar zaunk fokot Jezuchem nanv ghetlear puro.”
Juanv 3:16 ani Jakob 2:17 uzar korun anik kitem korop gorjechem mhunn tumi dakhoitolim?
KITEM XIKLIM
Jezun amcho khub mog kela. Taka upkari asat mhunn dakhounk ami tacher bhavarth dovortolim, ho bhavarth korneamnim dakhoitolim ani dor vorsa tachea Mornnachea Ugddas Disak hajir zatolim.
Porot Ugddas Korum-ia
Jezucher bhavarth dovrop mhunnttlear kitem?
Jehovan ani Jezun dakhoilʼlea moga pasot tumi upkariponn koxem dakhounk zata?
Jezuchea Mornnachea Ugddas Disak kiteak hajir zaunk zai?
ANIK SODHAT
Jezu amchea pasot melo hem zannam zaun amkam kitem korunk urba melltta?
Bhavarth mhunnttlear kitem ani ami to koso dakhounk zata tem zannam zaiat.
“Jehovachea Bhasaunneancher Bhavarth Dovrat” (The Watchtower, October 2016)
Jezuchea bolidana vixim zannam zatoch eke bailechem jivit koxem bodolʼlem tem polloiat.
Jezuchea Mornnachea Ugddas Disak choddxim zannam unddo kiteak khainant ani drakxancho soro kiteak pienant tem zannam zaiat.