Hanvem Gaddi Cholovop Bond Korchi Kai?

EK ZANNTTO munis zaitim vorsam thaun gaddi choloita mhunn chintat. Taka tachi gaddi cholounk borem dista. Karonn ti gheun to khoinsorui vochonk xokta. Punn tachea ixttank ani familik tacho usko zaunk lagla. Ani tannem gaddi cholovop bond korunk zai oxem tankam dista. Punn tankam toxem kiteak dista tem taka somzona.

Tumi osleach poristhiticho fuddo kortat kai? Hoi zalear, tumi gaddi cholounchi vo na tem tharaunk tumkam koxi modot zatoli?

Thoddea desamnim, umkich pirai zalea uprant gaddi cholounk dotorachi porvangi zai poddtta. Ami toslea desant ravtat zalear, sorkarachea hea kaideak ami pallo ditat. (Rom. 13:1) Punn amchea desant oslo kaido na zalear pasun, ami gaddi cholounchi vo na tem tharaunk ho lekh amkam modot kortolo.

TUMCHEM CHOLOVOP KOXEM ASA TACHER DHEAN DIAT

Amerikechea National Institute on Aging (NIA) hea website-ir sanglolea pormonnem, tumi tumkanch he prosn vicharunk zatat:

Road sign vachunk mhaka kotthin zata kai vo ratchea vellar mhaka sarkem disona kai?
Gaddiechea harxeant pollounk mhoji man halounk ani sompeponnim disonant teo vostu ani gaddio pollounk mhaka kotthin zata kai?
Mhaka rokddench kitem-i korunk, zoxem mhozo paim accelerator-a voilo kaddun brake marunk kotthin zata kai?
Hanv itlo slow choloitam kai ki mhaka lagon traffic jam zata?
Mhaka opghat zaunk chukla kai, vo hanvem gaddi lailea dekhun mhojea gaddiek scratch vo chep poddlam kai?
Hanv jea toren gaddi choloitam taka lagon pulisamnim mhaka thamboila kai?
Gaddi choloitam-choloitam mhaka kednam-i dollo laglo kai?
Gaddi cholounk kotthin zaunk xokta toslim vokhdam hanv ghetam kai?
Hanv gaddi choloitam dekhun mhojea familik vo ixttank usko zata mhunn tannim mhaka sanglam kai?

Tumi hantuntlea ek vo don prosnank hoi mhunn zobab dila zalear, tumi thodde bodlav korunk zatat. Zoxem, tumi gaddi cholovop unnem korunk zata, khas korun ratchea vellar. Toxench, tumi gaddi koxi choloitat tacher dhean diunk zata. Tea bhair, eka ghorcheak vo ixttak tumchem cholovop koxem asa tem vicharunk zata. Itlench nhoi, tumi gaddi anik surokxit ritin cholounk xikonk zata. Punn tumi hantuntlea zaitea prosnank hoi mhunn zobab dila zalear, tumi gaddi cholovop bond kelear borem zatolem.a

NIRNNOI GHEUNK BIBLE-ANTLIM TOTVAM UZAR KORAT

Ami atam pasun bore toren gaddi choloitat oxem amkam disot. Ani ami gaddi cholovop bond korunk zai oxem amkam konnui sangta tednam amkam vaitt disot. Punn hea vixim sarke toren chintunk ani bore nirnnoi gheunk amkam koxi modot zatoli? Ami Bible-antlea don totvancher dhean dium-ia.

Tumi kitem korunk xoktat ani xokonant tem vollkhon gheiat. (Mho. 11:2) Ami zannttim zatat toxim, amchi dixtt unni zata, sarkem aikonk iena, muscle oskot zatat ani soddsoddit kamam korunk pavonant. Udharonnak, zaitea lokanchi pirai vaddot voita toxi, tim umkech toreche khell khellop bond kortat. Karonn tankam mar lagonk xokta mhunn tim zannant. Gaddi cholounchea vixim hench totv lagu zata. Apunn surokxit toren gaddi cholounk xokchona oxem konnankui dista tednam, to gaddi cholovop bond korta. (Mho. 22:3) Toxench, to gaddi choloita dekhun dusreank usko zata mhunn tim taka sangtat tednam, to dhean diun aikota. Hea toren to mannsugen vagta.—2 Samuel 21:15-17 sor korat.

Amkam lagon dusreancho jiv gelʼlo amkam naka. (D.S. 22:8) Ek munis surokxit toren gaddi choloina zalear tem khub dhokeachem. Karonn hea vorvim tacho vo dusreancho jiv vochonk xokta ani to tanchea rogtacho zobabdar zaunk xokta.

Tumi gaddi cholovop bond kelear, dusrim tumkam man diunchimnant oxem chintinakat. Tumchea sobit gunnank lagon, tem mhunnttlear tumi mannsugen vagtat, khaltim asat ani tumkam dusreanchi porva asa dekhun, Jehova tumcho mog korta mhunn ugddas dovrat. To tumkam samballttolo ani bhuzvonn ditolo mhunn bhas dita. (Iz. 46:4) To tumkam kednanch sanddchona. Tor gaddi cholounchi kai na ho nirnnoi ghetana, zannvaie pasot Jehova lagim magnnem korat ani Bible-antlim totvam uzar korat.

Dusreamnim Koxi Modot Korunk Zata?

Zanntteamnim gaddi cholounchi vo na tem tanchea ghorcheamnim sangop borem zatolem. Vo tumi eka zannttea bhav vo bhoinnichim ixttam asot ani tachi gaddi cholounchea vixim apleak usko zata mhunn tachim ghorchim tumkam sangot. Tor tim kitem sangtat tacher dhean diat. To bhav vo bhoinn gaddi koxi choloita tem pollounk tumi tachea sangata vochonk zata. Ani goroz poddlear, tea vixim tumi tachea lagim ukteponnim ulounk zata. Punn oxem kortana, tumchea utrancho tancher koso probhav poddonk xokta tem somzonk proitn korat. Tor uloitana doiallaien, punn sot tem uloiat. To gaddi cholounk purto na zalear, zanntto asa dekhun tea vixim taka sangonk fattim soronakat. “Tum anik surokxit ritin gaddi cholounk pavchona,” oxem mhunnchea bodlek, tumi tankam oxem mhunnonk zata: “Tum gaddi choloitana mhaka tuzo usko zata.” Toxench, mannsugen vagchea vixim ani dusreanchea rogtacho zobabdar zauncho nhoi hea vixim Bible kitem sangta tem tachea ugddasak haddunk zata. Ani Bible-ant sanglam tem to pallunk sodhta mhunn tumkam khobor asa mhunn taka khatri diunk zata.

Eka zannttea munxak gaddi cholovop bond korunk poddtta tednam, taka koxem distolem tem chintunk ami sogleamnim proitn korunk zai. Apleak zai thoim vochonk mellona ani dusreancho adar magcho poddtta oxem taka disot. Tor ami tachea sangata doiall toren vagonk zata ani amchean zata tea toren modot korunk zata. (Mho. 17:17) To tumchea lagim modot magonk fattim sorot, karonn tumkam gorje bhair tras poddttole oxem taka disot. Tor mhotvachim kamam korunk, zoxem taka mittingek, porgottnnek, shopping-ak, ani dotorager vhoronk tumi fuddem soronk zata. Toxench tumkam tachea sangata vell sarunk avoddtta ani taka modot korunk zai mhunn taka khatri diat.—Rom. 1:11, 12.

a Anik zannam zaunk, Agost 22, 2002-achea Zagrut Ravat! masikent, “Automobile Accidents—Are You Safe?” ho lekh polloiat.