Tü nüshajalakat Mateo

21 Nülüʼülaapa Jesús namaa na nikirajüinkana Jerusalénmüin, antüshii naya suluʼumüin tü pueulo kanüliakat Betfagué, eekai tü wutai kanüliakat Olivos. Nüjütakalaka Jesús piamashii nikirajüin 2 sümaa nümüin namüin: «Juʼuna eemüin tüsa pueulokot, jüntapa samüin, eejeerü jüpüla wanee püliikü kapüsü nümaʼaleeya süchon. Jüsiwateetka napü sümaa jajattüin naya yaamüin. 3 Jamüle sünüiki wayuu jümüin, ‹choʼujaasü nümüin Señotkai›, meena jia sümüin, süjütamaateenaka jia yaamüin».

4 Alatüsü tia süpüla shikeraajüinjatüin tü nümakat Maleiwa nükajee chi nünüikimaajachikai, wanaa sümaa nümüin: 5 «Müinjatü jünüiki namüin na wayuu chakana Sion: ‹Iseeichi chi aluwataakai jaaʼu, wayuu anamia nia jee püliikoʼushi nia. Püliiküchon chi neʼejenakai›».

6 Noʼunakalaka na nikirajüinkana Jesús, naaʼinrüinjaʼaya tü nuluwataakalü anain naya. 7 Neʼitaakalaka na nikirajüinkana Jesús tü saajunakat nasheʼin saaʼu tü püliikükat nümaa chi süchonkai, najattaka shia eemüin Jesús, noʼotookalaka Jesús naaʼu chi püliiküchonkai. 8 Nayasaʼa na wayuukana, nawayalaka tü saajunakat nasheʼin süpaʼa tü wopukot jee eeshii na ashoʼttakana sütüna wunuʼu süpüla neʼitaainjatüin shia suluʼu tü wopukot. 9 Nayasaʼa na wayuu wattakana naalii oʼunakana nüchiiruajee Jesús jee na oʼunakana nüpüleeruajee, emetutsü nanüiki sünain maa: «¡Puʼtteʼera wamüin chi Nüchonkai David!* ¡Anataʼaleeshijaʼa maʼin chi nüjünalakai Jehová!* ¡Wachuntuin nümüin chi Chakai iipünaa süpüla nuʼtteʼerajachin nia!».

10 Nüntapa Jesús Jerusalénmüin, maaʼatshii jamakaijaʼa naaʼin na wayuukana sümaa müin nanüiki: «¿Jaraikai chira antakai?». 11 Nasoutakalaka na wayuu wattakana naalii: «¡Nia Jesús, chi nünüikimaajachikai Maleiwa, chi chejeʼewaikai Nazaret tü chakat Galilea!».

12 Nikerotkalaka Jesús suluʼu tü aʼwaajüleekat Maleiwa jee nüjünajaaka yalejee na oikaaliikana jee na ayaʼlajüliikana wanee kasa. Nujunuin nemeesain na aʼwanajüliikana nneerü jee neinase na oikaaliikana toomasü. 13 Nümakalaka Jesús namüin: «Müsü tü Karaloʼuta Nüchikimaajatkat Maleiwa: ‹Oʼuraajüleeinjatü tepia›, shipiapejeʼe neʼe shia kaʼruwarannuu jutuma». 14 Jee yalaiwaʼaya Jesús suluʼu tü aʼwaajüleekat, sürütkaakalaka nünainmüin wayuu eekai moʼupaʼain jee eekai masaʼain jee anakalaka naya nutuma.

15 Naashichijaakalaka nekiipüʼü na sacerdotekana jee na karaloʼutamaajanakana sutuma neʼrüin tü kasa pülasü naaʼinrakat Jesús jee sutuma naapüin nanüiki na tepichikana suluʼu tü aʼwaajüleekat sünain maa: «¡Puʼtteʼera wamüin chi Nüchonkai David!». 16 Namakalaka nümüin Jesús nekiipüʼü na sacerdotekana namaa na karaloʼutamaajanakana: «¿Paapüin nanüiki nala tepichikana?». Anuujeseʼe nünüiki Jesús namüin: «Aa taapüin, ¿nnojottaale jaashajeʼerüin tü pütchi makat mayaa: ‹Aʼwaajünüshi pia natuma na tepichikana jee natuma na atujaayüliikana›?». 17 Jee nuʼunakalaka Jesús chejee Jerusalénjee chai nukua suluʼumüin tü mmakat Betania, eejachire nutunkaain.

18 Waneemüin kaʼi nüleʼejapa Jerusalénmüin, outaka nia jamü wopuluʼu, 19 niʼraka sotpaʼa tü wopukot wanee wunuʼu kanüliasü higuera. Nürütkaakalaka sünainmüin, machonkalaka shia nüpüla, süpanaʼala neʼe. Nümakalaka sümüin tia wunuʼukot: «Müirümaʼaleeya machoin pia». Sujulujaakalaka tia wunuʼukot. 20 Patatüsü naaʼin na nikirajüinkana neʼraiwaʼaya tü alatakat, namakalaka: «¿Jamüsüche sujulujaamaataka tü higuerakat?». 21 Nusoutaka Jesús namüin na nikirajüinkana: «Müleka kanoulale jia jee nnojorüle wainmajüin jaaʼin, nnojoleerü shiain neʼe juuntuin jaaʼinrüin tü taaʼinrakat sümüin tü higuerakat. Juunteerü jümüin sümüin uuchikat tüü ‹Anakajaʼa pujuttule shirokumüin tü palaakat›, sujutteetkalaka. 22 Kanoulale jia, aapüneerü jümüin tü juchuntakat juʼuraajapa».

23 Nikerotaka Jesús suluʼu tü aʼwaajüleekat Maleiwa. Yalapa nia sünain ekirajaa, narütkaakalaka nekiipüʼü na sacerdotekana nünainmüin namaa na laülaashiikana napüleerua na wayuukana sümaa namüin nümüin: «¿Jarai aluwataaka pia süpüla müinjatüin tü kasa paaʼinrakat? ¿Jarai aapaka laülawaa pümüin?». 24 Nusoutakalaka Jesús namüin: «Tasakirüinjaʼa paala jia sünain wanee kasa, jusoutule tamüin taküjeerüjaʼa jümüin jaralin aapüin laülawaa tamüin süpüla taaʼinrüin wanee kasa. 25 ¿Jarai kaluwanaajalaka Juan süpüla woutiisain wayuu nutuma? ¿Nuluwanaajalache nia chi Maleiwa chakai iipünaa? ¿Suluwanaajalataapa wayuu?». Anuujeseʼe nanüikijiraa: «Nuluwanaajala Maleiwa chakai iipünaa wamüle nümüin, eeshijaʼa süpüla nümüin wamüin: ‹¿Jamakaʼa manoujainka jia nünain?›. 26 Suluwanaajala wayuu wamülejeʼeya nümüin, eeshiijaʼa süpüla jamajüin waya natuma na wayuukana, jama nünüikimaajachin Maleiwa Juan saashin wayuu». 27 Anuukalaka nanüiki nümüin Jesús: «Nnojotsü watüjaain aaʼu». Nusoutakalaka Jesús namüin: «Nnojoleerüjaʼa taküjain jümüin jaralin aapüin laülawaa tamüin süpüla taaʼinrüin wanee kasa.

28 »Jülüjataa jaaʼin nukuwaʼipa wanee wayuu piamashii nüchonnii. Nümakalaka nümüin chi epayaakai: ‹Tachee, anashi puʼunule soʼukai sünain aʼyatawaa suluʼu tü yüüja kaluʼukat uuwoʼulia›. 29 ‹Nnojoleechi taya oʼunuin›, nümaka chi nüchonkai nümüin. Ayaawanajaapejeʼe naaʼin mapa jee nuʼunakalaka. 30 Niakalaka aluwataanüin chi emülieekai nutuma chi nüshikai. Nümakalaka chi nüchonkai nümüin: ‹Oʼuneechia taya taata›, nnojoipejeʼe nia oʼunuin. 31 ¿Jamüsüjaʼa saaʼin jümüin? ¿Jaraiche chi aapaakai sümaa nünüiki chi nüshikai?». «Nia chi epayaakai», namakalaka nümüin Jesús nekiipüʼü na sacerdotekana namaa na laülaashiikana napüleerua na wayuukana. Anuujeseʼe nünüiki Jesús namüin: «Eekajasaʼa na achekajüliikana nneerü neʼipajee na sülaülakana mma namaa na jieyuu maaʼinsaliikana, naya alüʼülaleeka maʼin juulia jiakana süpüla neʼrüin tü kasa anasü eejeetkat nuluwataapeena Maleiwa. 32 Jamüshijaʼa Juan, nüküjain jümüin süchiki tü wopu anasükat, nnojoliipejeʼe jia anoujain nünain. Eekajasaʼa na achekajüliikana nneerü neʼipajee na sülaülakana mma otta na jieyuu maaʼinsaliikana naya anoujakana nünain Juan. Jee müshiʼiya jiakana jütüjaa aaʼu tia, nnojoliipejeʼe jia ayaawajaain suulia jaainjala, manoujainsalii jia nünain.

33 »Jülüjataa jaaʼin shiyaawase tü tekirajeekalü anain. Eetaalashi wanee wayuu koumainshi apünajakai uuwoʼulia suluʼu, kakulaatseka shia nutuma. Nupotoko wanee mma eere süchüüjünüinjatüin tü uuwakat otta nukumajaka wanee torre. Naʼanapiraka tü nuumainkat saaʼu nneerü namüin wanee apünajülii. Nuʼunakalaka wattamüin suluʼumüin wanee mma naata. 34 Kettaapa sükalia tü aʼttieekat süpüla atpajünaa, nüjütaka na nüchepchiakana namaʼanamüin na apünajüliikana süpüla naluwataainjatüin nümüin süpüshi süchon tü aʼttieekat. 35 Nayasaʼa na apünajüliikana, nataʼülaka na achepchieekana. Naʼyaajakalaka wanee, noʼuta aaʼinchi waneʼeya jee müshia chi wane neʼinnaʼalüin süka ipa. 36 Niasaʼa chi koumainshikai, nüjütüin waneinnua nüchepchia kojuyaleʼeya noulia na ajütünakana paala. Mataajaʼa neʼe naya atumawaa. 37 Niakalaka nüjütüin mapa chi nüchonkai namaʼanamüin na apünajüliikana. ‹Nieechikajasaʼa kojutuin namüin chi tachonkai›, maa müsü naaʼin. 38 Namajiraaka na apünajüliikana neʼraiwaʼaya nüchon chi wayuukai: ‹Niasaʼa eʼipünaanajachikai apüla mmakat chi makai antüin, anashi woʼutule naaʼin, woumainjeetka tü mmakat›, namajiraaka. 39 Nataʼülakalaka nia sümaa noʼutuin naaʼin chaa anooipaʼa sünain tü uuwoʼuliakat. 40 ¿Jamüsüche saaʼin jümüin? ¿Kaseetche naaʼinraka chi koumainshikai naka na apünajüliikana niapa antüin namaʼanamüin?». 41 Nasoutakalaka na aapajüshiikana nünüiki Jesús: «Ajaʼttinnaleejeena naya apünajüliikana, jama mojulaain maʼin naya, saapüneetka tia mmakat saaʼu nneerü nutuma chi koumainshikai namüin waneinnua apünajülii. Nayeenaka aapüin nümüin süchon tü nüʼttiakat keraapa shia süpüla atpajünaa».

42 Nümakalaka Jesús namüin: «¿Nnojotsükai jaashajeʼerüin tü Karaloʼuta Nüchikimaajatkat Maleiwa, tü makat mayaa: ‹Tü ipa nayoutakat na akumajüliikana miichi, shia tü ipa* choʼujaakat maʼin. Nia keʼinaajalaka shia Jehová* otta anashaatasü maʼin tia saaʼin wamüin›. 43 Tamüshii paala jia, nnojoleerü jiʼrüin tü kasa anasü eejeetkat nuluwataapeena Maleiwa. Nayeena eʼraka tia na wayuu aaʼinrakana tü nüchekakat Maleiwa. 44 Chi eekai nujutuuin saaʼu ipakat tüü, eewaweechi jee shiataale ojutuuin ipakat naaʼu, yülaʼawaleejeechia».

45 Naapapa nekiipüʼü na sacerdotekana otta na fariseokana tü shiyaawasekat nikirajia Jesús, nayaawataka saaʼu nayain kaliajanain tü nümakat. 46 Napüreesajireein nia, mmotpejeʼe naya seema jamajaa natuma na wayuukana, jama nünüikimaajachin Maleiwa Jesús saashin wayuu.