Tü nüshajalakat Juan

11 Ayuuikalaka wanee wayuu kanüliashi Lázaro, chejeʼewai nia Betania, chaa eere kepiain na nuwalayuukana, María sümaa Marta. 2 Shia tü María oʼyotokot seita jemeta eejuut naaʼu chi Señotkai jee soosojuin tü nuuʼuikat süka tü suʼwalakat. Ayuuishi Lázaro chi suwalakai. 3 Najütitkalaka nanüiki nümüin Jesús na nuwalayuukana Lázaro sünain maa: «Señotkalee, ayuuishi maʼin chi paʼaleewainkai, chi aikai maʼin püpüla». 4 Anuujeseʼe nünüiki Jesús naapaiwaʼaya tia: «Nnojoishiaaje outajachin nia sutuma tia ayuuliikat, shiajaʼa neʼe nuʼwaajünajachin Maleiwa suluʼujee tia otta süpüla nuʼwaajünajachin chi Nüchonkai Maleiwa».

5 Aisü maʼin nüpüla Jesús Marta, María otta müshia Lázaro. 6 Naapapa Jesús süchiki ayuulin Lázaro, makataka nia piama kaʼi chaa eejachire nia. 7 Shiasaʼa mapa nümakalaka Jesús namüin na nikirajüinkana: «Anashii woʼunule wachikuaʼa Judeamüin». 8 Anuujeseʼe nanüiki na nikirajüinkana nümüin: «Ekirajüikalee, mataashi püʼinaʼanneekai jekenainka natuma na wayuu chajanakana Judea, ¿puʼuneekalaka joo püchikuaʼaya?». 9 Nusoutakalaka Jesús namüin: «¿Aashin chuwatüin chi kaʼikai soʼu poloo piamamüin oora? Chi wayuu warai makai jaʼipa kaʼi, nnojoishi wototuin saaʼujee wanee kasa, jama niʼrüin tü mmapaʼakat. 10 Akaajasaʼa chi wayuu warai makai saʼwai, wototushi saaʼujee wanee kasa, jama piʼyuushin nüpüleerua».

11 Anuukalaka sooʼomüin nünüiki Jesús: «Atunkushi chi waʼaleewainkai Lázaro, chainjachikalaka taya süpüla tachijirüin nia». 12 Nasoutakalaka na nikirajüinkana nümüin: «Señotkalee, aawalaataajeechi paashin. Ichaʼasa nünülia atunkuin». 13 Shia nüküjeeka achiki Jesús outuin Lázaro. Eekajasaʼa naaʼinruʼu na nikirajüinkana, atunkayaashi neʼe, eemeraayaashi naaʼinruʼu. 14 Pansaʼaleeka nünüiki Jesús sünain maa namüin: «Outushi Lázaro 15 jee anasü taaʼin süka nnojolin chajachin taya chayaa süka katsüinjeerüin junoula sünainjee tü kasa taainjainjatkat. Anashii woʼunule chaa eere nia». 16 Niasaʼa Tomás chi «Senkeyuu» münakai, nümakalaka namüin na nikirajüinkana Jesús: «Anashiijaʼamata woʼunule, outaiwa waya wanaa nümaa».

17 Nüntapa Jesús chamüin, pienchitchi kaʼi Lázaro süchikijee eʼitaanaa. 18 Pejesü tü mmakat Betania sünain Jerusalén, eesü maʼaka apünüin kilómetro.* 19 Watta naalii na judío antakana sünain alapajawaa saaʼu Marta otta María, jama outuin chi nawalakai. 20 Saapaiwaʼaya Marta süchiki nülüʼülaain Jesús, süpanapajüin nia, shiapejeʼe makatüin María miichipaʼa. 21 Anuujeseʼe sünüiki Marta nümüin Jesús: «Señotkalee, yaajachireje pia, nnojoishije outuin chi tawalakai. 22 Tatüjaapejeʼe saaʼu naaʼinreerüin Maleiwa süpüshuaʼa tü kasa puchuntakat nümüin». 23 Nusoutakalaka Jesús sümüin Marta: «Asoʼiraweechi aaʼin chi puwalakai». 24 «Tatüjaa aaʼuchi nüsoʼiraweechin aaʼin soʼuweena wanee kaʼi», sümakalaka Marta nümüin Jesús. 25 Anuukalaka nünüiki Jesús sümüin Marta: «Taya chi asoʼireʼerakai saaʼin wayuu outusü otta taya chi katakai atuma soʼu wayuu. Chi eekai kanoulain tanain, jaʼitashi outuin nia, tasoʼireʼereechi aaʼin. 26 Katülejeʼe noʼu wanee wayuu sümaa kanoulain nia tanain, nnojoireejaʼa outajachin nia, ¿punoujainjaʼa tanüiki?». 27 «Aa Señotkalee, tanouja anainchi piain chi Cristokai, chi Nüchonkai Maleiwa, chi antajachikai saʼakamüin wayuu», sümakalaka Marta nümüin Jesús. 28 Süchikijee süküjain tia nümüin, suʼunakalaka Marta sünain asaajaa María, tü shimiiruakat jee sümakalaka sümüin sümüiwaʼa: «Isaa antüin Ekirajüikai, oʼunajatü pia naashin». 29 Saapaiwaʼaya María tü münakat sümüin, sütamaaka jee suʼunaka eemüin Jesús.

30 Jee müshia Jesús wanaa sümaa tia, nnojoishi antüin pueulopaʼamüin, chajachi eejachire süpanapajüin paala nia Marta. 31 Nayasaʼa na judío alapajüshiikana saaʼu María chaa shipialuʼu, neʼrapa suʼunuin, noʼunakalaka süchiirua süka chainjatiaain shia aʼyalajüin amuuyuupaʼa naaʼinruʼu. 32 Mayaasü süntüin María chaa eejachire Jesús, süsapainkaka shia, sümakalaka nümüin: «Señotkalee, yaajachirejeʼe pia nnojoishijeʼe outuin chi tawalakai». 33 Niʼrapa Jesús shiʼyalajüin María namaa na judío antapaashiikana sümaa, aikalaka maʼin nümüin namüliala jee mojusü maʼin naaʼin. 34 «¿Jalashi nia eʼitaanüin?», nümakalaka Jesús. «Jooʼuya piʼraiwa Señotkalee», nümünakalaka amüin. 35 Niʼyalajakalaka Jesús. 36 Nayasaʼa na judíokana neʼrapa niʼyalajüin Jesús, namakalaka: «Aikaiche maʼin nia nüpüla». 37 Eepejeʼe na wayu makana anüiki mayaa: «Analejeʼe nutuma chi wayuu moʼukai paala, ¿jamakaʼa nnojoika naawaleʼeratüjülin Lázaro suulia outaa?».

38 Aikalaka süchikuaʼa nümüin Jesús namüliala na wayuukana jee süchikijee tia, nuʼunakalaka eemüin tü woowirakat. Koʼushii tia makat, koʼulujanasü ipa atumawaa. 39 Anuujeseʼe nünüiki Jesús: «Jüsünneʼera türa ipakat». «Señotkalee, keejuuichin. Pienchitchi kaʼi süchikijee niʼitaanüin», sümakalaka Marta, tü nushunuukat Lázaro. 40 Nusoutaka Jesús sümüin: «Mataashi tamakai pümüin piʼreerüin jorottuin maʼin tü nüpülainkat Maleiwa müleka punoujale». 41 Süsünneʼennaka tü ipakat, niirakaaka Jesús iipünaamüin sümaa müin nünüiki: «Tashikalee, taapüin analuʼutkat pümüin saaʼu paapajüin tanüiki. 42 Tatüjaa aaʼuchi pia sünain paapajüin tanüiki waneepia. Tamüsü neʼe tia, nayaaluʼu na wayuu yaakana jutkatüin, süpüla nanoujainjanain sünain püjünalain taya». 43 Nüküjapa tia Jesús, emetutkalaka nünüiki sünain maa: «Lázaro, pujuʼitaa yalejee». 44 Nujuʼitaakalaka chi wayuu outushikai paala sümaa koʼoyooin nuuʼui, najapü sümaʼaleeya nuʼupünaa süka wanee kuluulu. Anuujeseʼe nünüiki Jesús: «Jüsiʼwata nuulia türa koʼoyookalü aka nia, juuʼulaa nüwarairaaiwa».

45 Naʼakajee na judío antakana sünain anaʼlawaa sümüin María, watta naalii na anoujakana nünain Jesús süka neʼrüin tü kasa pülasü naaʼinrakat. 46 Eepejeʼe na wayuu oʼunakana namaʼanamüin na fariseokana süpüla naküjainjatüin süchiki tü naaʼinrakat Jesús. 47 Nayasaʼa nekiipüʼü na sacerdotekana namaʼaleeya na fariseokana, noutkajeʼeraka napüshuaʼa na sulujunakana tü kanüliakat Sanedrín jee namakalaka: «¿Kasachejeʼe waaʼinrajatka nüka wayuukai chii? Wattaʼaya maʼin saalii tü kasa pülasü naaʼinrakat. 48 Wooʼulaale nia, anoujayaa meerü wayuu süpüshuaʼa nünain. Anta meenia na romanokana sünain alaülaajawaa saaʼu tü aʼwaajüleekat jee müsia saaʼu woumain». 49 Nusoutakalaka wanee neʼipajee, niajaʼa Caifás, chi laülaashikai napüleerua na sacerdotekana soʼu juyakat tia jee nümakalaka namüin: «Nnojotsü kasain jiyaawatüin aaʼu. 50 Nnojotsü jütüjaain aaʼu shiain anain outule waneeshia wayuu naaʼu na judíokana, suulialeʼeya wajaʼttinnüin wapüshuaʼa». 51 Nnojotpejeʼe nikiiruʼujeejatüin tia pütchikat, nüküjain tia süka laülaashin nia napüleerua na sacerdotekana soʼu juyakat tia. Müsüjeseʼe nüküjain naapajiraainjachin nikii Jesús naaʼu na judíokana. 52 Nnojoishi outajachin neʼe Jesús naaʼu na judíokana, outajachi nia naaʼu na nüchonniikana Maleiwa sainküinkana tü mmakat, kotteenakalaka naya nutuma. 53 Soʼujeʼereeya kaʼikat tia, naashajaajiraaka na wayuu jutkatüshiikana shiiʼiree noʼuteein naaʼin Jesús.

54 Suluʼujee tia, nnojoishi waraittüin Jesús saʼakapünaa wayuu judío. Oʼunushi suluʼumüin tü mma chakat süʼütpaʼa isashii, suluʼumüin wanee mma kanüliasü Efraín. Chaichikalaka nia chaʼaya namaa na nikirajüinkana. 55 Sülüʼütkalaka sükalia süpüla shikaanajatüin tü Pascuakat natuma na judíokana. Wattaka naalii wayuu oʼunakana suluʼujee pueulo eekai joʼuuchein chai nakua Jerusalénmüin süpülapünaa tü Pascuakat, jama wuleinjatüin nakuwaʼipa maʼakaapuʼu naaʼinrüin shia na judíokana. 56 Nüchajaanaka achiki Jesús natuma jee majiraashii naya suluʼu tü aʼwaajüleekat: «¿Jamüsüchejeʼe saaʼin jümüin? ¿Anteeichejeʼe nia sünain tü miʼiraakat?». 57 Nayasaʼa nekiipüʼü na sacerdotekana jee müshiʼiya na fariseokana, naluwataain wayuu süpüla süküjainjatüin namüin nüchiki Jesús natüjaale saaʼu jalain nia. Aküjünajatü tia namüin süpüla nataʼülajachin nia.