Génesis
Akatalaashi Lot nuulia Abram
13 13:1-2 Wainma joo washirüü nümaʼana Abram. Eesü nümaʼana anneerü, kaaʼula, paaʼa, pülaata je ooro. Shiasaʼa süchikijee nujuittinnüin suluʼujee Egipto, nüleʼejakalaka nüchikua sümaa süpüshua tü nümüʼünüinkalüirua suluʼumüin tü mmakat Neguev eejachikai kepiain aluʼu paala nia. Nümaajatü Sarai tü nuʼwayuusekat ooʼulaka Lot chi nüchonkai Harán nimüliakai Abram. 2 — 3 Noʼunakalaka yalajee suluʼujee tü mmakat Neguev sünain noʼonooin palaapünaa sünain tü pueulokat Bet-el. Nantakalaka eejanainkamaʼa natunkapünaain paala yala pasanain sünain tü pueulokalüirua Bet-el je Hai. 4 Je chaʼaya, eʼitaashinkamaʼa paala Abram wane aʼajüleepala. Nüchuntakalaka joo nüchikua yala nümüin Jehová sünain niiʼiyatüin nujut nümüin.
5 Otta müshia Lot, kamaajanashi nuʼwayuuse je na nüchonniikana je müsia tü nüchepchiakalüirua. Je eesü wainma kasa nümaʼana, maa aka nümaʼana Abram, anneerü, kaaʼula, ooʼulaka paaʼa. 6 Je saaʼujee tia, mouisü tü mmakat napüleerua nayakana piamaleʼe süka wainmain namaʼana anneerü, kaaʼula ooʼulaka paaʼa. Ajaʼttüsü joo shiküle mma je süpana wunuʼu süpüleerua tü namüʼünüinkalüirua. Je achoʼujaasü wüin süsüinjatüin tü mürütkalüirua süpüshua. 7 Je nnojoliishii nayain namüiwain suluʼu tü mmakat. Eejatü wanaa namaa kepiain tü wayuu cananeokalüirua ooʼulaka ferezeokalüirua chaʼaya suluʼu tia mmakat. Atkaashiijeseʼe na aaʼinmajüliikana tü nümüʼünüinkat Abram namaa na aaʼinmajüliikana tü nümüʼünüinkat Lot. 8 Shiasaʼa soʼu wane kaʼi, nümakalaka joo Abram nümüin Lot: “Kaatei, pia nüchonkai temülia. Nnojotsü anain, saaʼin tamüin, naʼülüjaajiraain na arüleejüliikana wamüin. Süka jamüin, tachonya neʼe pia, süka nüchoin temülia pia. 9 Anakaja müleka jooluʼu wapaajiraale. Müloʼusüʼüsaʼa maʼi tü mmakat wapüleerua. Püneeka tü püchekakat püpüleerua jalakualinjachin pia. Jaʼitakaje paapaain wüinpumüinmüin, oʼuneechi taya wopumüinmüin. Jaʼitakaje paapaain wopumüinmüin, oʼuneechi taya wüinpumüinmüin”, müshi Abram nümüin Lot.
10 Eirakaashi joo Lot sümüin shiʼipapaʼa tü mmakat süpüshua. Nünanaja amüinrü tü mmakat eere sülatüin tü süchi kanüliakat Jordán je eere tü pueulochon kanüliakat Zoar. Wüituuisü maʼi niʼrüin tü mmakat, mataasü aka saaʼin tü apainkat Edén niʼitaalakat paala Jehová, mataasü aka saaʼin tü mma kekülesükat suluʼu Egipto. Nnojoliwajatüjaʼa sajaʼttinnüin nütüma Jehová tü pueulokat chaʼaya kanüliakat Sodoma je müsia Gomorra. 11 12:11-13 Shiakalaka nüneeküin joo Lot tü mma eere sülatüin tü süchi Jordánkat süpüla yalainjachin nia suluʼu. Oʼunüshijeseʼe nia okolojooin chaʼaya wüinpumüin. Niʼitaakalaka nejepüse chaa saʼaka tü pueulokalüirua sotpaʼakat tü süchi Jordánkat je pejeshi nia sünain tü pueulokat Sodoma, eere kepiain wayuu mojulaashaatasü maʼi, wayuu kaainjarat waneepia nuʼupala Jehová. Niakalaka Abram makatüin suluʼu tü mmakat Canaán. 12 — 13 —
14 Shiasaʼa mapa nüchikiruʼu Lot, eeʼiyataashi Jehová nümüin Abram sünain maa nümüin: “Piirakaa jooluʼu sümüin tü mmakat süpüshua, chaa palaamüin je uuchimüin, chaa wüinpumüin je wopumüin. 15 Süpüshua tü mma piʼrakat, taapeerü shia pümüin je sümüin tü puuʼuliwoʼukalüirua. Shieerü noumainka waneepia süpüla kaʼikat süpüshua. 16 Watteerü saalii puuʼuliwoʼu tatüma. Iseerü süchiki ayaawajünaa, maa aka isain achikii shiyaawajünüin tü jasai sotpaʼakat palaa. 17 Anakaja jooluʼu puwaraijaale piirakaaiwa sümüin tü mmakat süpüshua, süka shiimüin sünain taapeerüin süpüshua shia pümüin”, nümakalaka chi Maleiwakai nümüin.
18 Oʼuna müshia Abram okolojooin eemüin wane pueulo kanüliasü Hebrón. Makatüshi nia chaʼaya sümaa kepiain peje sünain wane wunuʼulia eere nüchuntüle wane wayuu kanüliashi Mamre sümüin tü nümaleiwaseyaasükalüirua. Je chaʼaya, nükumajakalaka Abram wane aʼajüleepala süpüla naʼajüinjatüin kasa nümüin Maleiwa sünain niiʼiyatüin nujut nümüin.