Génesis
Alejünüshi Lot Nütüma Abram
14 14:1-2 Wanaa sümaa kepiain Abram suluʼu Hebrón, eesü wane atkawaa natüma na sülaülashiikana wayuu. Wane pienchishii nooʼomüin wane jaʼraishii. Otta na pienchishiikana, niajaʼa Amrafel, sülaüla tü pueulokat Sinar; Arioc, sülaüla tü pueulokat Elasar; Quedorlaomer, sülaüla tü pueulokat Elam; je müshia Tidal, sülaüla tü pueulokat Goim. Otta na jaʼraishiikana, niajaʼa Bera, sülaüla tü pueulokat Sodoma; Birsa, sülaüla tü pueulokat Gomorra; Sinab, sülaüla tü pueulokat Adma; Semeber, sülaüla tü pueulokat Zeboim; je müshia sülaüla tü pueulokat Bela. (Suwalaʼata sünülia Bela, Zoar münüsü.) 2 — 3 14:3-4 Na jaʼraishiikana, aluwataana aaʼuchii paala nütüma Quedorlaomer soʼu poloo piammüin juya. Shiasaʼa soʼu tü polookot apünüinmüin juya, aashajaajiraashii naya shikiira joo tü atkawaakat nümaa Quedorlaomer süpaʼa wane nasapü kanüliasü Sidim süka nayouktüitpain nuluwataainjachin naaʼu. (Otta tü mma natkaainjatkat aluʼu, shia tü Mar Salado münakat maaʼulu yaa.) 4 —
5 Otta müshia Quedorlaomer, nütüjaapa saaʼu nütkaanüinjachin amaa natüma na jaʼraishii sülaülashiikana pueuloirua, nuunejaakalaka na nümejuunakana, na apünüinshiikana sülaüla pueuloirua, je müsia süpüshua tü wayuu namaajatkalüirua. Je sümaʼinruʼu, natkaakalaka palajana namaa wane naʼünüʼüya katata noulia na jaʼraishiikana sülaüla pueuloirua. Ayamünnüshii naya nütüma Quedorlaomer. Anaa na wayuu akanajuukana nütüma: wayuu refaíta suluʼu tü pueulokat Astarot Karnaim; wayuu zuzita suluʼu tü pueulokat Ham; wayuu emita suluʼu tü pueulokat Save-quiriataim; 6 je müsia wayuu horeo kepiakat saaʼu tü uuchikat Seir je süpaʼa tü anooikat Parán uuchipünaakat sotpaʼa mma maaʼinyatuuisü. 7 Shiasaʼa süchikijee nüyamülüin Quedorlaomer tia nüʼünüükalüirua, oʼunüshi namaa na nümejuunakana palaamüin sünain atkawaa namaa na wayuu suluʼukana tü pueulokat Enmispat. (Suwalaʼata sünülia En-mispat, Cades münüsü.) Nüyamülüin süpüshua tü wayuu amalecita ooʼulaka tü wayuu amorreo kepiakat suluʼu Hazezon-tamar.
8 Nakotchijiraataalakalaka joo na jaʼraishiikana sülaüla pueuloirua suluʼu tü mmakat Sidim süpüla atkawaa nümaa Quedorlaomer je namaa na nümejuunakana. Naainnua: naya na sülaülashiikana tü pueulokalüirua Sodoma, Gomorra, Adma, Zeboim, ooʼulaka Bela. 9 Natkaakalaka na jaʼraishiikana sülaülashii pueuloirua namaa na pienchishiikana. Naainnua: nia Quedorlaomer, sülaüla tü pueulokat Elam; Tidal, sülaüla tü pueulokat Goim; Amrafel, sülaüla tü pueulokat Sinar; je müsia Arioc, sülaüla tü pueulokat Elasar.
10 Akanaluushii na jaʼraishiikana natüma na pienchishiikana. Otta süpaʼa tü mmakat Sidim eejanale natkaain, wainma ishi kaluʼusü mena. Shiasaʼa wanaa sümaa neipinnüin na namaajanakana chi sülaülakai Sodoma je chi sülaülakai Gomorra, ojutuushii wainma suluʼu tü ishikalüirua. Naya neʼe na apünüinshiikana neʼipa, ountüin isajüin noulia na naʼünüükana süpüla nonujulaainjanain chaa saʼaka tü uuchikalüirua. 11 “Süchikijee niyamülüin Quedorlaomer tü nüʼünüükalüirua, nikerotkalaka namaa na apünüinshiikana nümejuuna suluʼumüin tü pueulokalüirua Sodoma ooʼulaka Gomorra sünain nasirüin süpüshua tü suwashirüinkat je tü eküütkat. Noʼunakalaka süchikijee tia yalajee yala. 12 Otta suluʼu tü pueulokat Sodoma, kepiashi Lot, chi nüchonkai nimülia Abram. Amaanüshi niaʼaya sümaa süpüshua tü nuwashirüinkat natüma na pienchishii sülaülashiikana.
13 Niasaʼa wane wayuu saʼakajachikai tü asaajaaushikat suluʼujee Sodoma, aʼluwataashi nujuuna Quedorlaomer. Nuʼunakalaka nünainmüin Abram süpüla nüküjainjatüin nümüin nüchiki Lot sünain nümaanüin natüma na pienchishii sülaülakana pueulo. Je müshia Abram, sünain wayuuin hebreo nia, kepiashi saʼaka wayuu nnojotkat hebreoin, eere kepiain chi wayuu amorreo kanüliakai Mamre. Kejepüseshi Abram peje sünain wane wunuʼulia eepüʼüle nüchuntüin Mamre sümüin tü nümaleiwaseyaasükalüirua. Eeshii wane nuwalayuu Mamre kanüliashii Escol je Aner. Naya nümejuunaka Abram. Ee aaʼinchii waneepia süpüla akaaliijaa Abram sünain atkawaa noulia na nüʼünüükana.
14 Mayaasü nütüjaapa saaʼu Abram sünain nütaʼünnüin Lot, nuunejaakalaka napüshua na wayuu nümaajanakana. Eeshii maa aka 318 tooloyuu nipialuʼujeejanakana Abram. Oushikajaashii naya nachiirua na pienchishiikana sülaüla pueuloirua chaa watta palaamüinkana, eemüin tü mma kanüliakat Dan. 15 Otta chamüin chaʼaya, nükatajüin Abram na wayuu nümaajanakana süpüla nashutüinjanain saaʼuirua. Nashutakalaka saaʼuirua saʼwai. Ayamütsü natüma. Neipirakalaka joo shia wattamüin sotpaʼamüin tü pueulo kanüliakat Hoba yala palaapünaa sünain tü pueulo Damascokat. 16 Nülejakalaka Abram noulia süpüshua tü kasa je wayuu nasaajaakat suluʼujee tü pueulokalüirua Sodoma je Gomorra. Alejüna müshijaʼa Lot, chi nüchonkai nimülia Abram, sümaa tü nuwashirüinkat, je müshia na wayuu asiruukana wanaa nümaa, wayuu eekai tooloin je jierüin.
Melquisedec, achuntüshi nümüin Maleiwa naaʼu Abram
17 Aleʼejüshi Abram nüchikua süchikijee nükanajüin atkawaa nuulia Quedorlaomer je suulia sülaülakalüirua pueulo nümaajatkat. Otta chi sülaülakai tü pueulo Sodoma münakat, oʼunüshi eemüin wane nasapü kanüliasü Save nüpanapa Abram. (Suwalaʼata sünülia tü nasapükat, Nuumain Chi Laülaashikai, münüsü.) 18 Nüntakalakaʼaya wane alaülaa kanüliashi Melquisedec, sülaülakai tü pueulokat Salem. Nia wane sacerdote eʼitaaushi nütüma chi Maleiwa Miyoʼushikai maʼi. Nüsülajakalaka Melquisedec pan ooʼulaka “wiino” nümüin Abram je namüin na nümaajanakana. 19 Nüchuntakalaka Melquisedec nümüin chi Maleiwakai naaʼu Abram sünain maa: “Maleiwakalee, pia Miyoʼushikai maʼi, pia kakumalakai kasa süpüshua chaa iipünaa je yaa mmoluʼu, anakaja piiʼiyatüle paʼanasia nümüin Abram. 20 Waʼwaajüin pia Maleiwa Miyoʼushikai maʼi, süka pükaaliijain Abram süpüla niyamülüinjatüin nüʼünüü”, müshi. Otta müshia Abram, naapakalaka nümüin Melquisedec poloʼowai sünainjee poloʼowai shikii tü nüsitkat sünainjee atkawaa.
21 Otta müshia chi sülaülakai Sodoma, nümakalaka nümüin Abram:
—Tachuntüin pümüin naleʼejüin nepialuʼumüin na wayuu asaajaaushikana suluʼujee Sodoma. Otta tü wawashirüinkat, wooʼulaajeerü püpüla saaʼu tü paaʼinrakat wamüin —müshi.
22 Nüsouktakalaka Abram:
—Nnojo, nnojoleerü makatüin tamaʼana tü juwashirüinkat. Süka jamüin, pansaasü tanüiki nuʼupala Jehová, chi Maleiwakai Miyoʼushikai maʼi, chi Kakumajalakai kasa süpüshua chaa iipünaa je yaa mmoluʼu, 23 sünain nnojoleerüin makatüin tamaʼana tü juwashirüinkat, jaʼitakaje wane shiʼipa jiitpai, jaʼitakaje süülia süsapaatse wayuu je kasa eekai eein neʼe, suulia pümajüin tamüin mapeena: “Washitshi tatüma Abram”. 24 Nnojoleerü kasain apütaain tapüla. Shiaʼalajaʼa neʼe tü kasa nekakat na wayuu tamaakana. Naya tachuntaka neʼe apüleerua na temejuunakana Aner, Escol, ooʼulaka Mamre, makatüinjatüin süpüshi tü juwashirüinkat napüla süka nasalain shia sünainjee atkawaa —nümakalaka Abram nümüin chi sülaülakai Sodoma.