Génesis

Nüchiki Caín nümaa Abel

4 Naapaain Adán tü nuʼwayuusekat. Kachonkalaka shia wane joʼuu toolo, Caín nünülia sütüma. “Nükaaliijüinyala maʼi taya Jehová kachonitkaʼa taya wane joʼuu toolo”, müsü shia sümaa talatüin maʼi saaʼin. 2 Kachonkalaka joo shia süchikuaʼaya. Abel nünülia joo chi emülieekai.

Shiasaʼa miyoʼuyuupa naya, anneetpüʼüshi Abel, ooʼulaka Caín, wayuu apünajüi. 3 Shiasaʼa soʼu wane kaʼi, nülüʼüjakalaka Caín süpüshi tü nüʼttiakat süpüla nüsülajüinjatüin nümüin Jehová sünain niiʼiyatüin nujut nümüin. 4 Akaajaʼa Abel, nülüʼüjüin saʼanasiakat shiʼiruku, tü palajatkat süchon naʼanneetse. Nuʼuta aaʼinrü sümaa nüsülajüin tü shiʼirukukat nümüin Jehová. Talatakalaka naaʼin Jehová nümaa Abel je sümaa tü nüsülajalakat nümüin. 5 Niakaʼa niyouktüin Caín sümaa tü nüsülajalakat. Aashichijaashijeseʼe Caín sümaa üttüin maʼi naaʼin. 6 Nümakalaka joo Jehová nümüin:

—¿Jamüshi jashichikaʼa pia sümaa üttüin paaʼin? 7 Müleka paaʼinrüle tü anasükat, nnojoleechi tayouktüin pia, ¿aashi müin? Akaajasaʼa paaʼinrüle tü mojusükat, nnojotsü wattain puulia tü kaainjalaakat. Alaülaajaweesü paaʼu. Jalia pia suulia süchepchiajayaa pia —müshi chi Maleiwakai.

8 Je soʼu wane kaʼi, nümakalaka joo Caín nümüin Abel chi nimüliakai:

—Anakaja wawaraijaale saʼakapünaa mojuui —müshi nümüin.

Je saʼakamüin tü mojuuikat, nünaataakalaka Caín nooʼomüin chi nimüliakai sünain nuʼutaleein naaʼin.

9 Shiasaʼa süchikijee tia, nüsakirakalaka Jehová Caín:

—¿Jalashisaʼa Abel chi pimüliakai?

Nüsouktakalaka Caín:

—¿Jamüin? Nnojoishi tatüjaain aaʼu. ¿Tayajasaʼa eʼitaanaka süpüla taaʼinmajüinjachin chi tawalakai? —mataalashi.

10 Nümakalaka Jehová nümüin:

—¿Jamüsü paaʼinrakaʼa tüü? Kaatei, aʼwaatüsü tü nüshakat chi pimüliakai mmaapüjee sünain achuntaa pasalawaa. 11 “Asüitpa tü mmakat nüsha chi puwalakai amülakat saaʼu. Je saalii puʼutüichipain naaʼin, mojuitpa joo tü mmakat püpüleerua. 12 Nnojoleerü kachooin tü püʼttiakat. Otta pia, waletaʼain meechi pia waneepia sainküin mmakat süpüshua sünain onujulaakuu müin suulia wayuu —müshi joo chi Maleiwakai nümüin.

13 Nüsouktakalaka Caín nümüin Jehová:

—Aishaʼajaa, aluʼuleeka maʼi taya. Iseerü tachiki tachecherüinjatüin taaʼin suʼutpünaa tü müliaa teʼreetkat süsala taainjala pütüma. 14 Piyüülajüin joo taya sümaa tojuittinneechin suulia tü mma taʼyataapüʼükat aluʼu. Müshijeseʼe unateechin taya waneepia sainküinpünaa mma eere tonujulaakuu tameechin suulia wayuu. Je müleka süntüle tanain, suʼuteechin aaʼin taya —mataalashi Caín.

15 Nüsouktakalaka Jehová nümüin Caín:

—Nnojo piyoʼujaain aaʼin saaʼu tü alateetkat mapeena. Müleka puʼutünüle aaʼin, akaratshituweerü shiʼrüin sümüliala wayuu aaʼinrakat tia —müshi.

Niʼitaakalaka Jehová wane niyaawase nünain Caín shiyaawatüinjachikai aka wayuu wanaajiraakat amaa suulia suʼutajüin naaʼin. 16 Nuʼunakalaka Caín nümaʼanajee Jehová süpüla kepiainjachin chaa wüinpumüin saaʼujee tü apainkat Edén suluʼu wane mma kanüliasü Nod.

Na nuuʼuliwoʼukana Caín

17 Kachonshi joo Caín sümüin tü nuʼwayuusekat wane joʼuu toolo. Enoc nünülia natüma. Akumajüshi Caín wane pueulo kakulaatsesü wanaa sümaa jemelin chi nüchonkai. Niʼitaakalaka sünülia tü pueulokat Enoc. 18 Toolo joo wane nüchon Enoc kanüliashi Irad. Otta Irad, nüshi Mehujael. Otta Mehujael, nüshi Metusael. Otta Metusael, nüshi Lamec. 19 Otta Lamec, nüneeküin piamasü jieyuu süpüla nuʼwayuusein. Ada sünülia wane, otta sünülia tü wane, Zila. 20 Kachonsü Ada wane toolo kanüliashi Jabal. Nia sütuushika süpüshua tü wayuu oʼonootkalüirua kamülüinkat paaʼa, anneerü ooʼulaka kaaʼula. 21 Je wane süchon Ada, kanüliashi Jubal, chi nimüliakai Jabal. Nia sütuushika süpüshua tü wayuu atüjakat süpüleerua atalejaa “arpa” ooʼulaka amaasijawaa. 22 Otta Zila tü suwalaʼatakat nuʼwayuuse Lamec, kachonsü shiaʼaya, wane toolo kanüliashi Tubal-caín je müsia wane jierü Naama sünülia. Je Tubal-caín, akumajüi kasa aainjuushikat süka kachueera ooʼulaka “bronce”, tü kasa shiʼyataayakat wayuu.

23 Soʼu wane kaʼi, eeʼirajüshi Lamec sümüin tü piamasükalüirua nuʼwayuuse sünain müin jayeechikat:

Chi apünüintuaichikai nachon Adán je Eva

25 Kachonshi Adán nüchikuaʼaya sümüin tü nuʼwayuusekat. Shiʼitaain nünüliain Set sünain maa: “Aapünüichipa tamüin nütüma Maleiwa wane tachonya niiʼiraka Abel nuʼutakai aaʼin Caín”. 26 Otta müshia Set je tü nuʼwayuusekat, kachonshii wane joʼuu toolo. Enós nünülia natüma. Je wanaa nümaa Enós, oʼttüsü wayuu sünain achuntaa nünülia Maleiwakai sümaa shiiʼiyatüin nujut nümüin sünain maa nümüin: “Jehová, waʼwaajüin maʼi pia”.