Génesis

Na nuuʼuliwoʼukana Adán

5 5:1-2 Akumajünüsü wayuu nütüma chi Maleiwakai sünain müin aka naaʼin je nükuaippapala. Naainjüin wayuu toolo ooʼulaka wayuu jierü. Nümakalaka wane pütchi analuʼut namüin. Je nanülia nütüma, “wayuu”.

Anuu nanülia na nuuʼuliwoʼukana Adán: 2 —

3 Shiasaʼa süntapa nuuyase Adán sünainmüin 130 juya, kachonshi nia wane toolochon müshi aka naaʼin niakai. Set nünülia nütüma. 4 Shiasaʼa süchikijee tia, kooʼomüinsü nümüin Adán 800 nuuyase. Eekalaka wane nüchonniʼiya.5 Ouktüshi Adán 930 nuuyase.

6 Shiasaʼa süntapa nuuyase Set sünainmüin 105 juya, kachonshi nia wane toolochon. Enós nünülia nütüma. 7 Shiasaʼa süchikijee tia, kooʼomüinsü nümüin Set 807 nuuyase. Eekalaka wane nüchonniʼiya. 8 Ouktüshi Set 912 nuuyase.

9 Shiasaʼa süntapa nuuyase Enós sünainmüin mekietsat shikii juya, kachonshi nia wane toolochon. Cainán nünülia nütüma. 10 Shiasaʼa süchikijee tia, kooʼomüinsü nümüin Enós 815 nuuyase. Eekalaka wane nüchonniʼiya. 11 Ouktüshi Enós 905 nuuyase.

12 Shiasaʼa süntapa nuuyase Cainán sünainmüin akaratshi shikii juya, kachonshi nia wane toolochon. Mahalaleel nünülia nütüma. 13 Shiasaʼa süchikijee tia, kooʼomüinsü nümüin Cainán 840 nuuyase. Eekalaka wane nüchonniʼiya. 14 Ouktüshi Cainán 910 nuuyase.

15 Shiasaʼa süntapa nuuyase Mahalaleel sünainmüin aippirua shikii jaʼralimüin juya, kachonshi nia wane toolochon. Jared nünülia nütüma. 16 Shiasaʼa süchikijee tia, kooʼomüinsü nümüin Mahalaleel 830 nuuyase. Eekalaka wane nüchonniʼiya. 17 Ouktüshi Mahalaleel 895 nuuyase.

18 Shiasaʼa süntapa nuuyase Jared sünainmüin 162 juya, kachonshi nia wane toolochon. Enoc nünülia nütüma. 19 Shiasaʼa süchikijee tia, kooʼomüinsü nümüin Jared 800 nuuyase. Eekalaka wane nüchonniʼiya. 20 Ouktüshi Jared 962 nuuyase.

21 Shiasaʼa süntapa nuuyase Enoc sünainmüin aippirua shikii jaʼralimüin juya, kachonshi nia wane toolochon. Matusalén nünülia nütüma. 22 Shiasaʼa süchikijee tia, kooʼomüinsü nümüin Enoc 300 nuuyase. Eekalaka wane nüchonniʼiya. Wanaawajiraain naaʼin waneepia nümaa Maleiwa. 23 5:23-24 Aleewapüʼüshi nia waneepia nümaa chi Maleiwakai sümaʼinruʼu katüin noʼu. Je 365 nuuyase, soʼu wane kaʼi, nnojolichipa nia. Nnojoʼiraa müshi, süka nülüʼüjüin nia Maleiwa iipünaamüin. 24 —

25 Shiasaʼa süntapa nuuyase Matusalén sünainmüin 187 juya, kachonshi nia wane toolochon. Lamec nünülia nütüma. 26 Shiasaʼa süchikijee tia, kooʼomüinsü nümüin Matusalén 782 nuuyase. Eekalaka wane nüchonniʼiya. 27 Ouktüshi Matusalén 969 nuuyase.

28 Shiasaʼa süntapa nuuyase Lamec sünainmüin 182 juya, kachonshi nia wane toolochon. 29 Niʼitaain Noéin nünülia sünain maa: “Mayaasüje oʼulejuushin tü mmakat nütüma Maleiwa, nuʼtteʼereena waya chi tachonkai suulia müliajüin waya sünain waaʼinmajüin tü mmakat”, müshi. 30 Shiasaʼa süchikijee tia, kooʼomüinsü nümüin Lamec 595 nuuyase. Eekalaka wane nüchonniʼiya. 31 Ouktüshi Lamec 777 nuuyase.

32 Shiasaʼa süntapa nuuyase Noé sünainmüin 500 juya, kachonshi nia apünüinshii tooloyuu. Je nanülia nütüma: Sem, Cam je müshia Jafet.