Génesis

Nüntirüin José tü nüpüshikat nünainmüin Faraón

47 Oʼunüshi José sünain aapiraa chi Faraónkai nüchikü chi nüshikai ooʼulaka na nuwalayuukana sümaa nantüin chajee Canaánjee yalamüin suluʼumüin tü mmakat Gosén sümaa naʼanneetse je nasachiralüirua ooʼulaka kasa süpüshua eekat namaʼana. 2 Nüneekajaakalaka José jaʼraishii na nuwalayuukana. Nüntitkalaka naya nünainmüin chi Faraónkai süpüla niʼraajüinjanain naya. 3 Nasakinnataalakalaka nütüma chi Faraónkai:

—¿Kasa jütüjaka apüleerua?

Asouktüshii joo naya nümüin:

—Laülaashikalee, arüleejüliireʼe waya anneerü maa akaapüʼü na watuushinuuirua namaiwa. 4 Antüshii waya sünain oʼonowaa yaamüin suluʼumüin tü mmakat süka alin maʼi tü jamükat chaʼaya Canaán. Nnojotsüleʼe tü alama shiküinjatkat tü wamüʼünüinkalüirua chaʼaya. Laülaashikalee, puuʼulaakejeʼe waya yaaiwa waya kejepüsein suluʼu tü mmakat Gosén.

5 Nümataalakalaka joo chi Faraónkai nümüin José:

—Aniikajaʼa joo chi püshikai je na puwalayuukana antüin yaamüin süpüla kepiaa pümaa. 6 Tü mmakat Egipto, eesü napüla. Paapa tü saʼanainkat tü mmakat Gosén namüin, kepiaiwa naya yala suluʼu. Müleka eere noʼuluku eekana tütüin sümaa yalayalajüin, paaʼinmajira naya tü tasachiratkalüirua.

7 Nuʼunittaalakalaka joo José chi nüshikai nünainmüin chi Faraónkai süpüla niʼraajüinjachin nia. Nüsakünakalaka chi Faraónkai nütüma Jacob sümaa kojutüin maʼi nia nütüma. 8 Nüsakinnataalakalaka nütüma chi Faraónkai:

—¿Jeraichi juya pia?

9 Nüsouktakalaka nümüin:

—Tayakai 130 juya touyase. Kamaʼaichi taya sünain oʼonookuu maa suluʼupünaa wane mma, suluʼupünaa wane mma. Wattairüjaʼa saalin tü kasa mojusü alatakat tamüin sünain waraitkuu maa. Otta nnojolüyülia tasaʼwajüin wane ouyasee maa aka nouyasepüʼü na tatuushinuu paalainka.

10 Nüpütaakalaka joo Jacob nüpüla chi Faraónkai. Nuʼunakalaka nümaʼanajee.

11 Shiasa süchikijee naashajaain José nümaa chi Faraónkai, naapüinjeseʼe tü saʼanainkat tü mmakat Egipto nümüin chi nüshikai ooʼulaka namüin na nuwalayuukana süpüla kepiainjanain naya yala suluʼu, maa aka tü nümakat chi Faraónkai nümüin. Je joo chi nüshikai ooʼulaka na nuwalayuukana, noʼttakalaka sünain kepiain yala suluʼu tü mmakat Gosén, peje sünain tü anooi kanüliainjatkat mapeena Ramesésüin. 12 Ooʼulaka José, asülajüshi eküülü nümüin chi nüshikai, otta namüin na nuwalayuukana je namüin napüshua na napüshikana. Yaawasü joo shia süka tü nachooinkalüirua nütüma.

Ayatüsia alin jamü sainküin mmakat

13 Ayatüsia alin maʼi jamü suluʼu tü mmakat Canaán ooʼulaka Egipto. Nnojotsü tü eküülü shiküinjatkat wayuu, nnojotsü tü alama shiküinjatkat mürüt. Je tü wayuukolüirua süpüshua, ajaʼlajüsü saaʼin sütüma tü jamükat. 14 Antapaatüsü tü wayuukolüirua nümaʼanamüin José suluʼujee tü mmakat süpüshua sünain ayalajaa eküülü. Je tü neerü süliakat tü soʼu pünajüt oikkünakat namüin, anaajaanüsü nütüma José suluʼu nipia chi Faraónkai. 15 Shiasaʼa süchikijee sajaʼttüin süpüshua sünneetse wayuu suluʼujee Egipto ooʼulaka Canaán, nantakalaka nünainmüin José sünain owoorolowaa nümüin:

—¿Jamüinjanakaʼa waya jooluʼu süka sajaʼttüin wanneetse? Ouktüinjanakaʼa waya sütüma jamü. Paapa wamüin eküülü, Laülaashikalee —müshii.

16 Nüsouktakalaka José namüin:

—Saaʼu sajaʼlajaain tü jünneetsekalüirua, jüikka jümüsüjeʼe tü jümüʼünüinkalüirua yaamüin. Taapeerü eküülü jümüin saaʼu —müshi.

17 Müsüjeseʼe nantirüin tü namüʼünüinkalüirua nünainmüin José. Je naapüin eküülü saaʼu namüʼünüin: saaʼu ama, anneerü, kaaʼula, paaʼa ooʼulaka saaʼu püliikü. Ayatüsia nütüma soʼu juyakat tia sünain naapüin eküülü saaʼu tü namüʼünüinkalüirua. Ajaʼtta müsia tü namüʼünüinkalüirua süpüshua sükajee tia.

18 Süchikijee juyakat tia, süntakalaka tü wayuukolüirua nünainmüin José sünain maa nümüin:

—Laülaashikalee, pütüjaa aaʼulu sünain sajaʼttüin paala tü wanneetsekat. Je maaʼulu yaa, eesü süpüshua tü wamüʼünüinkat pümaʼana piakai. Acheküshii jooluʼu müleka wantüle wayakana pünainmüin süpüla waapajiraain waaʼin süpüla aʼyatawaa pümüin saaʼu tü eküülü weküinjatkat. Je müsia tü waʼapainsekalüirua, anasü piyalajüle shia woulia saaʼu eküülü. 19 Jalia waya, ouktüshii taa waya sütüma tü jamükat. Piʼyateʼera pümaala waya. Otta chaʼijaasü wamüin waüyee wapünajüinjatkat suluʼu tü waʼapainsekalüirua. Piyalaja pümaala shia woulia suulia maluʼujain. Aishaʼajaa, nüchepchieena joo waya chi Faraónkai je nieechi kamaʼanaka tü waʼapainsekalüirua süpüshua —müsü tü wayuukolüirua nümüin José.

20 Müsüjeseʼe niyalajüin José saaʼu eküülü süpüshua tü mmakat suluʼu Egipto nümüinjatü chi Faraónkai. Noikküin tü naʼapainsekalüirua nümüin süka alin maʼi tü jamükat namüin suluʼu süpüshua tü mmakat Egipto. Nümaʼanasüjeseʼe chi Faraónkai süpüshua tü mma anasü suluʼupünaakat Egipto. 21 Nüchepchiaitpa chi Faraónkai nütüma José süpüshua tü wayuukolüirua suluʼukot tia mmakat Egipto. 22 Otta na sacerdote Egiptojeʼewaliikana, nnojotsü alin jamü namüin süka süsülajünüin eküülü waneepia namüin nütüma chi Faraónkai. Je sükajee tia, nnojotsü noikküin tü naʼapainsekalüirua nümüin.

23 Soʼu wane kaʼi süchikijee sajaʼlajaain tü akaratshikat juya jouktaleʼolukat, nümakalaka José sümüin tü wayuukolüirua süpüshua:

—Tayalajaitpa tü jaʼapainsekalüirua nümüin chi Faraónkai. Je jooluʼu, nüchepchiainapa jiakana jüpüshua. Jaapaa jümaala waüyeekat tüü jüpünajaiwa suluʼu tü apain tayalajüitpakalüirua juulia. 24 Je soʼu tü kaʼi jükotchijeetkat oʼu tü aʼttieekat, sünainjee jaʼraisü toleeka soʼu, aapüneerü waneesia nümüin chi Faraónkai. Makateerü pienchi toleeka jümaʼana süpüla tü eküülü jiküinjatkat ooʼulaka süpüla tü jüpünajüinjatkat —müshii José namüinrua.

25 Süsouktakalaka tü wayuukolüirua nümüin José:

—Laülaashikalee, anamia maʼi pia wamüin. Anainapa waya jooluʼu pütüma saaʼu puʼtteʼerüin waya suulia ouktaa. Nüchepchieena waya joo chi Faraónkai —müshii.

26 Shia sükuaippainjatka joo tüü nütüma José: sünainjee jaʼraisü toleeka soʼu pünajüt akotchijünakat sütüma wayuu, aapüneerü waneesia nümüin chi Faraónkai. Ayatakalaka suluwataanüin tü wayuukolüirua sünain aaʼinraa tia maaʼunnaa. Aluʼujasa na sacerdote Egiptojeʼewaliikana, maapüinsalii naya süpüshi naʼttia nümüin chi Faraónkai, süka nnojolüin süikkünüin paala tü naʼapainsekalüirua nümüin.

Tü nüchuntakat Jacob nümüin José

27 47:27-28 Kepiakalaka Jacob poloo juya akaratshimüin Egipto süpülapünaa sükeraajüin tü 147 juya ouktajachikai oʼu nia Sükojuyalaakalaka maʼi tü nuuʼuliwoʼukalüirua suluʼu tü mmakat Gosén yaa suluʼu Egipto. Je kettüitpa joo tü mmakat naka. 28 —

29 47:29-31 Niyaawatakalaka naaʼin Jacob sümaa sülüʼülüin tü kaʼi ouktajachikai oʼu nia. Neenajitkalaka joo José süpüla naashajaainjachin nümaa. Nüntapa nünainmüin, nümakalaka Jacob nümüin:

—Piirakaa, tachuntüin paala pümüin nuʼupala Maleiwakai wane kasa. Püpansaaja tamüin pünüiki süpüla paaʼinrüinjatüin tü tamüinjatkat jooluʼu pümüin. Tachonchee, ouktapa taya, nnojo piʼiküin taya yaa suluʼu tü mmakat Egipto. Pülüʼüjeechi taya yaajee yaa Canaánmüin. Piʼika taya naamakaluʼumüin na tashikanairua.

—Meeriaʼaya tatüman —nümakalaka José nümüin sünain pansaain nünüiki nümüin chi nüshikai.

Otta Jacob, nujuleraakalaka sünain eemerawaa süka talatüitpain naaʼin. 30 — 31 —