Génesis
Apütaashi Jacob süka wane pütchi analuʼut namüin na nüchooinkana José
48 Kojuya kaʼi süchikijee, aküjünataalasü nümüin José nüchikü chi nüshikai sümaa ayuulin. Nuʼunakalaka sünain analawaa nümüin. Je nümaashii na nüchooin piamashiikana Manasés je Efraín. 2 Wanaa sümaa nüküjünüin achikü José nümüin Jacob sümaa nüntüin sünain analawaa nümüin, atütülaasü naaʼin. Nütamaajiraakalaka suluʼu tü nuʼulakat sünain nüikkalaain. 3 Je wanaa sümaa nüntüin José nünainmüin, nümakalaka nümüin:
—Eeʼiyataashinkaleʼe tamüin chi Maleiwakai Pülashikai chaʼaya eere tü pueulo kanüliakat Luz, chaʼaya suluʼu tü mmakat Canaán. 4 Nümataalakalaka tamüin: “Aneerü pükuaippa tatüma. Watteerü saalin püchooin tatüma. Meena aka na puuʼuliwoʼukana sünain wattashaateerüin maʼi naalii tatüma. Waneejeena mma namüiwa. Je taapeerü mmakat Canaán namüin süpüla noumainjatüin shia süpüla kaʼikat süpüshua”. Shiaʼaya nümakainka Maleiwakai tamüin paala tüü —müshi.
5 Ayatüshi Jacob sünain aashajawaa nümaa José sünain maa:
—Tachee, tamüsü paala wane kasa pümüin: Na piamashiikana püchonnii, Efraín je Manasés, na jemeishiikana pümüin yaa suluʼu tü mmakat Egipto süpülapünaa tantüin yaamüin yaa, müshii aka naya tachonnii, maa aka naaʼin Rubén ooʼulaka Simeón, süpüla kapaalainjachin taya namüin. 6 Je müleka eere wane püchonnii mapeena, tü mma aapünüinjatkat namüin, suluʼujeeinjatia neʼe tü noumainjatkat Efraín je Manasés. 7 Tamüitpa tüü nooʼopünaa Efraín je Manasés süpüla sotüinjatüin taaʼin Raquel tü püikat sünainjee. Je mojusü maʼi taaʼin saaliijee nnojolüin süntüin tamaa yaamüin yaa. Pütüjaa aaʼulu sünain ouktüin shia suluʼu tü mmakat Canaán peje sünain tü pueulokat Efrata süchikijee taleʼejüin suluʼujee tü mmakat Padan-aram. Tojoitüin shia sotpaʼa wane wopu süpünakat Efrata —müshi. (Je sünülia Efrata maaʼulu yaa, Belén.)
8 Je niʼrapa Jacob na piamashii nüchonniikana José, nusakirakalaka nia:
—¿Nayaʼaya püchonnii na tepichi pümaakana? —müshi.
9 Nüsouktakalaka José:
—Aa, nayaʼaya na tachonnii aapuushikana tamüin nütüma chi Maleiwakai yaa suluʼu tü mmakat Egipto.
Nümakalaka Jacob:
—Pürütkeʼera nala taikeyuukana tanainmüin süpüla tapütaain napüla süka wane pütchi analuʼut —müshi.
10 Moʼupaʼasai Jacob süka laülaaichin maʼi. Narütkeʼennakalaka nütüma José na piamashiikana nüchonnii nünainmüin chi nüshikai. Nukoʼojookalaka nanain na tepichikana sümaa nuchuʼlüin nawalapaʼa.
11 Nümakalaka Jacob nümüin José:
—Atak, müichiyaasaʼa taaʼinruʼu nnojolin teʼrüin pia tachikua. Anamiashaatashi chi Maleiwakai tamüin. Nnojoishi piain neʼe pümüiwa teʼrüin jooluʼu, aluʼujasa teʼrüinapa joo yaaya na püchonniikana pümaʼaya —müshi.
12 Nüshakatirakalaka José na nüchonniikana neemeyoʼujee chi nüshikai sümaa nuʼwachiraain nümülatuʼumüin. 13 Niʼitaakalaka José Efraín nüpeʼeruʼujee chi nüshikai ooʼulaka Manasés, nikialuʼujee. 14 Otta müshia Jacob, niyalerüin tü najapü nikialuʼujatkat sümaa niʼitaain saaʼu nikii Efraín, jaʼitashi emülieein nia. Ooʼulaka tü najapü nüpeʼeruʼujeejatkat, niyalerüin shia sümaa niʼitaain saaʼu nikii Manasés chi epayaakai. 15 Nüpütaakalaka joo Jacob nüpüla José süka wane pütchi analuʼut sünain maa nümüin:
—Tachuntüin jooluʼu nümüin Maleiwa, chi Namaleiwasekai Abraham ooʼulaka Isaac, süpüla niiʼiyatüinjatüin naʼanasia namüin nairua püchonniikana. Nia akaaliijapüʼüka taya waneepia. Je maaʼulu yaa, ayatüshia nükaaliijain taya. “Piiʼiyatapa paʼanasia namüin na tepichikana”, tamüshi paa nia. 16 Otta akaaliijünapüʼüshi taya nütüma chi Naʼaapiasekai. Oʼtteʼennapüʼüshi taya waneepia nütüma suulia kasa mojusü. “Piiʼiyatapa naʼanasia Maleiwa namüin naa tepichikana”, tamüshi paa chi aapieekai. Tayakai ooʼulaka Abraham, chi tatuushikai, ooʼulaka Isaac, chi tashikai, anashiije weʼnnaajünüle mapeena nanainjee tepichikana naa. Kasataalejese wainmain nachonnii süpüla watteerüin saalin tü nooʼuliwoʼukalüirua —müshi Jacob sünain nüpütaain nüpüla José süka wane pütchi analuʼut.
17 Otta mojusü nümüin José süka niʼitaaitpain chi nüshikai tü najapü nikialuʼujatkat saaʼu nikii Efraín chi emülieekai. Naapaainjeseʼe najapü chi nüshikai shiiʼiree naakateein shia saaʼujee nikii Efraín süpüla niʼitaainjatüin shia saaʼumüin nikii Manasés chi epayaakai, 18 sünain nümüin nümüin chi nüshikai:
—Taataa, nnojotsü anain tia. Anii chi epayaakai süpüla piʼitaainjatüin pajapü pikialuʼujatkat sünain nikii —müshi.
19 Otta niyouktüin Jacob tü naaʼinreekat chi nüchonkai, sünain maa nümüin:
—Tatüjaa aaʼulu, tachee. Saaʼujee tü tamüitpakat namüin, shiimüin sünain kojuteechin Efraín chi emülieekai sütüma wayuu nuulialeʼeya Manasés chi epayaakai. Mayaasüje wainmeerüin tü nuuʼuliwoʼukalüirua Manasés, alanaʼaleejeeria maʼi tü nuuʼuliwoʼukalüirua Efraín suulialeʼeya. Je shikiijeechi nia wayuu wainma, eʼirukuu wainma —müshi.
20 Ayatüshia aashajaain Jacob wane pütchi anachonsü maʼi namüin na nüchonniikana José sünain maa:
—Je na tooʼuliwoʼukana napüshua mapeena, na kanüliakana Israel, wanaa sümaa naapüin wane pütchi analuʼut namüin na nachonniikana, meena naya: “Kasataalejese müin aka jia Efraín ooʼulaka Manasés nütüma chi Maleiwakai”, meena naya —müshi Jacob sünain niʼitaain nünülia Efraín palajanaleʼeya suulia nünülia Manasés.
21 Nümakalaka joo Jacob nümüin José:
—Tachonchee, ouktataainjaʼa taya jooluʼu. Otta tatüjaa aaʼulu sünain waneepieechin Maleiwakai jümaa süpüla nüleʼejireenain jia noumainpaʼamüin na jutuushinuukana. 22 Eesü wane mma chaʼaya taapüinjatü pümüin, tü nnojotkat taapüin paala namüin na puwalayuukana. Shia wane mma takanain paala noulia na wayuu amorreokana süka chajaruuta ooʼulaka jatü je uraichi —müshi.