Génesis
Wane pütchi nüpütaaya Jacob napüla na nüchonniikana
49 Süchikijee naashajaain Jacob nümaa José nooʼopünaa Efraín ooʼulaka Manasés, neenajitkalaka na nüchonniikana napüshua nünainmüin süpüla nüpütaain napüla sünain maa namüin:
2 —Jükotchijaa tanainmüin jia tachonniikana, jaapajaiwa tanüiki:
3 “Rubénkalee, pia tachon epayaakai,
jemeikai tatchinruʼuiwaʼaya taya,
Pia talataka atüma taaʼin jintüliiwaʼaya pia süka teʼirumain pia,
Pia kojutka tatüma paala süka alanaʼaleein
sünain katchin pia noulialeʼeya na pimüliayuukana.
4 Otta pia aaʼinrakalinka tü süchekalakat piʼiruku.
Je nnojolüichipa alanaʼaleein pia noulia na pimüliayuukana,
süka painkaainkain sümaa tü taʼwayuusekat.
5 “Simeónkalee, Levíkalee, pawalaawajiraashii jia
süpüla ashutaa saaʼu wayuu süka jaʼapüla.
6 Nnojoleechi taya wanaawajiraain aaʼin jümaa
sünain jaashajaajiraain süchiirua tü keeʼireekat jaaʼin.
Juʼutüin saaʼin wayuu süka süʼürüla jaaʼin,
maa aka jeewain tü mürütkalüirua sünainjee shaittaa neʼe.
7 Oʼulejünüinapa jia nütüma Maleiwa,
sükajee üttüin jaaʼin waneepia.
Nuʼwalakajeena jia saʼakapünaa tü wayuukolüirua Israelkat anülia.
8 “Judákalee, piyamülüinjat tü püʼünüükalüirua.
Aʼwaajüneechi pia natüma na puwalayuukana.
Aʼwachiraajeena naya pümülatuʼumüin.
9 Müshia aka pia wane kannajapüt.
Nuʼutüin saaʼin tü nüsitkat. Aleʼejüshi süchikijee suluʼumüin nutunküle.
Mmotsü kasa süpüshua neema.
10 Judákalee, pieechi aneekünaka süpüla aluwatawaa.
Je aluwataajeechi pia waneepia.
Jüüjüweerü eʼirukuukat süpüshua pümüin.
Saapeerü süpüshi tü nawashirüinkat pümüin.
11 Jouleerü pünajüt uuwa.
Puuʼulaajeerü püpüliikse ekajaain saʼaka tü uuwa anasükat.
Püshijaajeerü püsheʼin shiroku shira tü uuwakat.
12 Puluwateechi pia sütüma tü shirakat.
Kaüseechi pia sütüma püsüin süchira püsachirat.
13 “Zabulónkalee, kepieechi pia sotpaʼa palaa.
Wainmeerü maʼi tü anuakat antajatkat pünainmüin.
Miyoʼujeerü maʼi puumain,
sünainmüinreʼeya tü pueulokat Sidón.
14 “Isacarkalee, meechi aka pia wane püliikü.
Mayaainje kachisein nia,
apalasiraashi yaa mmoluʼu.
15 Otta piʼrüin sünain anain maʼi tü puumainkat.
Talatüsü maʼi paaʼin suluʼu tü pipiakat.
Asütüneerü shia puulia süka shukulain pia.
Süchepchieechi pia wayuu sükajee.
16 “Dankalee, laülaajeechi pia saaʼu püpüshi.
Jaʼitaina palirüin na püpüshikana,
aluwataajeena naya maa aka tü eʼirukuukat Israel süpüshua.
17 Meechi aka pia wane maaʼala sotpaʼa wopu,
yapain süpüla ochotaa suuʼui seʼejena wayuu
je nujutuuin chi amaajuchikai sütüma.
18 “Jehovákalee, taʼatapajüin pia süpüla puʼtteʼerüinjanain waya.
19 “Gadkalee, pieechi ashutünaka ooʼomüin sütüma wayuu kaʼruwarat.
Piyamüleena naya.
Piipireena nachiirua.
20 “Aserkalee, anashaateerü maʼi puumain.
Jouleerü aʼttiee suluʼu.
Puikkeerü süpüshi nümüin chi aluwataashikai.
21 “Neftalíkalee, meechi aka pia saaʼin wane irama.
Taasheechi pia waneepia.
Anachonjeerü maʼi püsouktia sümüin wayuu.
22 “Josékalee, meechi aka pia wane püliikü sareerü,
awataain sooʼopünaa utai.
23 Jaʼitaichi ashutüneechin aaʼu pia natüma na püʼünüükana,
jaʼitaina antüin pünainmüin sümaa jatü je uraichi,
24 nnojoleechi mmolüin pia neema.
Katsüinjeechi pia waneepia
nütüma chi Maleiwakai Pülashikai maʼi,
chi Nümaleiwasekai Jacob chi püshikai.
Katsüinjeechi pia nütüma Jehová,
chi aaʼinmajüikai tü wayuukolüirua Israel.
25 Chi Nümaleiwasekai chi püshikai,
nükaaliijeechi pia.
Chi Maleiwa Pülashikai maʼi,
niiʼiyateerü naʼanasia pümüin.
Nüjüteerü juya iipünaajee paaʼu.
Palateerü wüin suluʼujee mma püpüla.
Wainmeerü tü puuʼuliwoʼukalüirua.
Wainmeerü tü pümüʼünüinkalüirua.
26 Tü pütchi anasü aapünakat pümüin nütüma chi püshikai, anashaatüsü maʼi,
maa aka tü kasa anachensü atpajuushikat unaʼapü.
Pia akataluushika nütüma Maleiwa noulia na puwalayuukana.
Kasataalejese naapüin tü kasa anasükat süpüshua pümüin.
27 “Benjamínkalee, meechi aka pia wane unaalü.
Nuʼutüin saaʼin mürüt saʼwai je soʼukaʼi.
Ajaʼttinnüsü sümüʼünüin wayuu nütüma”.
Müshi Jacob sünain nüküjain namüin na nüchonniikana süchiki tü alateetkat namüin mapeena.
28 Kettaaitpa tü pütchi nüpütaayakat Jacob namüin na nüchonniikana waneʼewai nakua süpülapünaa ouktaa. Nayeena na shikiijeenaka tü poloosükat piammüin eʼirukuu naʼaka na nuuʼuliwoʼukana Jacob. Israeleerü sünülia tü neʼirukukat süpüshua, süka shiain suwalaʼatain nünülia Jacob tia. 29 49:29-30 Nümataalakalaka joo Jacob namüin na nüchooinkana:
—Ouktataainjaʼa jooluʼu taya. Jiʼikeechi taya chaʼaya Canaán eere mmaapüin na tashikana suluʼu tü ipa koʼukat chakat chaʼaya suluʼu tü apain niyalajalakalüinka chi tatuushikai Abraham süpüla waamakainjatüin shia. Shia tü apain suluʼukot tü mmakat Macpela chaa wiinnaa sünain tü mmakat Mamre. Shia tü naʼapainsekat paala Efrón, waneeshia naʼakajee na nuuʼuliwoʼukana Het. 30 — 31 Iraa mmaapüin Abraham atümawaa yala suluʼu sümaʼalee Sara tü nuʼwayuusekat, tü toushikat, ooʼulaka chi tashikai Isaac je tü teikat Rebeca, je eere teʼiküin tü taʼwayuusekat Lea. 32 Tü ipa koʼukat je tü apain ayalajuushikat noulia na nuuʼuliwoʼukana Het, tacheküin süpüleerua jiʼiküinjachin taya chaʼaya suluʼu —müshi Jacob.
33 Mayaakalü joo keraain naashajaala Jacob namaa na nüchooinkana, nujuleraakalaka. Ouktakalaka nia.