Palajatka karaloʼuta Samuel
1 Eejachikalaka wanee nülüin Efraín kepiakai suluʼu tü mmakat Ramataim-Zofim, kepiashi nia saaʼu tü uuchi eejanale kepiain na nüikeyuukana Efraín, Elcaná nünülia chia wayuukai. Jeroham nünülia chi nüshikai, Elihú nünülia chi nutuushikai, Tohu nünülia nüshi chi nutuushikai, nüchon nia Zuf. 2 Piamasü nuʼwayuuse Elcaná. Ana sünülia tü palajatkat jee Peniná sünülia tü suwalaʼatakat. Kachonsü Peniná, machonpejeʼe Ana. 3 Oʼunawaishi chia wayuukai juyawai suluʼumüin tü mmakat Siló süpüla nuʼwaajüinjachin Jehová, chi laülaashikai naaʼu na aapiee chakana iipünaa jee süpüla nuʼutajatüin saaʼin mürüt jee naʼajüinjatüin shia nümüin. Nia sacerdoteka soʼu tia Hofní nümaa Finehás, nüchonnii naya Elí. Aʼyataashii naya nümüin Jehová.
4 Shiasaʼa soʼu wanee kaʼi, nuʼutakalaka Elcaná saaʼin mürüt jee naʼajüin shia nümüin Maleiwa. Nikirakalaka Peniná namaʼaleeya na süchooinkana süpüshi tia asalaakat. 5 Shiapejeʼe nikirüin Ana tü saʼanainkat asalaa süka shiain alin maʼin nüpüla mayaainjeʼe nnojolin nükaalinjain shia Jehová süpüla kachoinjatüin shia. 6 Meeʼerapalasü Ana waneepia sutuma tü shipiamüinkat, shimeeʼerainpalasü shiiʼiree mojuinjatüin saaʼin Ana saalinjee nnojoluin nükaalinjain shia Jehová süpüla kachoinjatüin shia. 7 Saaʼinrawalin tia Peniná sümüin Ana juyawai. Suʼunawaipa Ana suluʼumüin tü miichi eere nuʼwaajünüin Jehová, airuʼutsü maʼin sünüiki Peniná sümüin. Aʼyalajawaisü maʼin Ana jee meküinsat shia saalinjee tia. 8 Anuujeseʼe nünüiki Elcaná sümüin: «¿Jamüsü mojukaʼa maʼin paaʼin Ana? ¿Jamüsü piʼyalajakaʼa? ¿Jamüsü nnojotkaʼa pikeein? Anii taya pümaa, ¿aashin sülanaʼaleeinña maʼin tia suulialeʼeya eein pümaa polooshii püchonnii?».
9 Kettaapa neküin jee nasüin wanee kasa, sütamaakalaka Ana jee suʼunaka. Yalajachikalaka chi sacerdote kanüliakai Elí joyotuin saaʼu tü niinasekat soʼuluʼu tü miichi aʼwaajüleekat Jehová. 10 Mojusü maʼin saaʼin Ana, shiʼyalajaka maʼin sünain oʼuraajaa nümüin Jehová. 11 Süpansaajakalaka sünüiki Ana sünain maa: «Jehovákalee, pia chi laülaashikai naaʼu na aapiee chakana iipünaa, müliasü maʼin taya, anasü sotule taya paaʼin. Soto paaʼin tü püchepchiakat otta pükaalinja taya süpüla kachoinjatüin taya wanee joʼuu toolo, taapeechikalaka nia pümüin Jehová süpüla niʼyataainjachin pümüin süpüla kaʼikat süpüshuaʼa, müiria machotoojuuin nuʼwala».
12 Kamaʼaka Ana sünain oʼuraajaa nümüin Jehová. Niʼrajawaain nümakalaka shia Elí süka niʼrüin kutkuttüin shiimata. 13 Yootusü Ana suluʼu saaʼin, kutkuttüsü neʼe shiimata, nnojotpejeʼe aapünüin sünüiki. Shipeʼrayaaka nüküjainruʼu Elí sünainjee tia. 14 «¿Jamüsü pipeʼrakuʼu pümaka? Anasü puuʼulaale suulia asawaa wiino», müshijeseʼe nümüin Elí sümüin. 15 Anuukalaka sünüiki Ana nümüin: «Señotkalee, nnojotsü taya epeʼrüin, nnojotsü taya asüin wiino jee nnojotsü taya asüin yootshi. Mojusü maʼin taaʼin, müsüjeseʼe taküjain nümüin Jehová tü suluʼukat taaʼin. 16 Nnojo müin taya pümüin maʼaka naaʼin na jieyuu nnojoliikana kasain anain apüla. Mojusü maʼin taaʼin otta aisü maʼin tamüin tü alatakat tamüin, müsüjeseʼe eiwaʼalüin taküjaa achiki tia nümüin Maleiwa». 17 Anuujeseʼe nünüiki Elí sümüin Ana: «Kasataalejeseʼe anain pukuwaʼipa. Kasataalejeseʼe naapüin pümüin chi Namaleiwasekai na israelitakana tü kasa puchuntakat nümüin». 18 Anuujeseʼe sünüiki Ana nümüin: «Kasataalejeseʼe ayatüinña talatüin paaʼin tamaa». Suʼunakalaka, shikaka jee nnojoluitpa jaʼyain saaʼu mojuin saaʼin.
19 Natamaaka wattaʼa maalü, noʼunakalaka nepialuʼumüin chaa suluʼumüin tü mmakat Ramá süchikijee naʼwaajüin Jehová. Nüinkaakalaka Elcaná sümaa Ana, sotokalaka naaʼin Jehová tü suchuntakat Ana nümüin. 20 Shiasaʼa waneemüin juya, ipuotkalaka Ana, toolochon süchon. «Samuel», sümakalaka nümüin chi joʼuukai. Anuujeseʼe sünüiki: «Tachuntala nia nümüin Jehová».
21 Shiasaʼa mapa, nuʼunakalaka Elcaná namaʼaleeya na kepiakana nümaa, oʼunushi nia süpüla nuʼutajatüin saaʼin mürüt jee naapajatüin shia nümüin Jehová maʼaka naaʼinrawalin shia juyawai otta oʼunushi nia süpüla naapajatüin nümüin Maleiwa tü nüküjatüjütkalia achiki paala nümüin. 22 Moʼunuinpejeʼe Ana. Anuujeseʼe sünüiki nümüin Elcaná: «Tapütirapeena chi joʼuukai, teʼikajaajeechi nia nümaʼanamüin Jehová, chaichimaʼaleeka nia nümaʼana». 23 Anuujeseʼe nünüiki Elcaná sümüin: «Anasü paaʼinrüle tü anakat saaʼin pümüin. Yaasia pia püpütiraleepaʼaya chi joʼuukai. Kasataalejeseʼe nikeraajüin Jehová tü pümakat nümüin». Makatakalaka Ana shipialuʼu, ayatüshia sutujeʼerüin chi süchonchonkai nüpütaleepaʼaya.
24 Suʼunakalaka nümaa chi süchonchonkai suluʼumüin tü mmakat Siló süpütirapa nia, sülüʼüjakalaka wanee paaʼa toolo apünüinchi juya, alüʼüjasü shiayaa maʼaka poloo waneemüin kilo* ariina otta wanee jaarü miyoʼu kaluʼusü wiino. Süntakalaka nümaa chi süchonchonkai suluʼumüin tü miichi eere nuʼwaajünüin Jehová chaa Siló. 25 Nuʼutunaka aaʼin chi paaʼakai jee niʼikajaanakalaka chi joʼuukai nümaʼanamüin Elí. 26 Anuukalaka sünüiki Ana nümüin Elí: «Señotkalee, shiimainshaana tü tamakat pümüin, taya tü wayuu yaajatkalüinkat piʼrüin sünain oʼuraajaa nümüin Jehová. 27 Tachuntala chi joʼuukai nümüin Jehová, naapüinjeseʼe nia tamüin. 28 Taapüinjachikalaka nia nümüin Jehová, waneepieechikalaka nia sünain aʼyatawaa nümüin Jehová».
Ejepülaashijeseʼe nia* nümülatuʼu Jehová.