Tü nüshajalakat Lucas
1 Wattainna naalii na wayuu akottirakana jee ashajakana tü pütchi watüjaakalü aaʼu sünain shiimain shia, 2 maʼaka naküjatüjülüin shia wamüin na wayuu eʼrajakana sukua tü kasa alatakat otta na ekirajakana sünain tia pütchikat. 3 Müshijeseʼe tekirajaain sünain süpüshuaʼa tia suʼttiajee maʼin jee tashajüin shia pümüin Teófilo* suluʼu lotuin sukuwaʼipa, 4 süpüla pütüjaainjatüin saaʼu shiimain maʼin tü ekirajünakalü anain pia.
5 Soʼu nükalia Herodes, chi aluwataashikai saaʼu Judea, eejachi wanee sacerdote kanüliashi Zacarías, napüshi nia na sacerdote kanüliakana Abías. Elisabet sünülia tü nuʼwayuusekat Zacarías, nülüin Aarón. 6 Wayuu loto akuwaʼipachii naya noʼuluʼu Maleiwa otta naaʼinrüin süpüshuaʼa tü aluwataanakalü anain jee tü kasa nuchuntakat Jehová.* 7 Machonpejeʼe naya süka maralüin* Elisabet otta laülaainnain naya.
8 Chajachi Zacarías aʼyataain nümüin Maleiwa naʼaka na sacerdote kanüliakana Abías. 9 Nikerotoko suluʼu tü aʼwaajüleekat Jehová* süpüla naʼajüin wunuʼu jemeta eejuut nümüin maʼakaapuʼu naaʼinrüin shia na sacerdotekana. 10 Wanaa sümaa saʼajünüin tü wunuʼu jemetakalü eejuu, eejatü watta saalii wayuu anooipaʼa sünain oʼuraajaa. 11 Nüntakalaka chi aapiee nümaʼanajeejachikai Jehová* nünainmüin Zacarías, shaʼwatüshi chi aapieekai saʼatoʼu tü aʼajüleekat wanee kasa nümüin Maleiwa. 12 Sainkuukalaka naaʼin Zacarías niʼraiwaʼaya chi aapieekai jee mmotkalaka maʼin nia. 13 Nümakalaka chi aapieekai nümüin: «Nnojo mmoluin pia Zacarías, naapüin Maleiwa tü puchuntakat maʼin nümüin, kachonjeerü Elisabet tü puʼwayuusekat jee piʼitaajeerü Juain nünülia chi joʼuukai. 14 Talateechi maʼin pia otta watteena naalii na wayuu talatakana wanaa pümaa saaʼu niweetüichipain chi püchonkai. 15 Wayuujeechi kojutushi nia nümüin Jehová,* nnojolinjachipajaʼa nia asüin wiino otta ooʼulaküin seʼejü yootshi. Eejeerü nüpülain Maleiwa naaʼu süpülapünaa joʼuuin nia. 16 Otta nükaalinjeena watta naalii israelita süpüla noonooinjanain nachikuaʼa nümüin Jehová,* chi Namaleiwasekai. 17 Jee oʼuneechi nia nüpüleerua Maleiwa sümaa pülasheechin nia maʼaka naaʼin Elías, süpüla müinjachin wanee wayuu maʼaka naaʼin nüchonnii jee süpüla kekiinjanain na wayuu eʼrüliikana wayumüin maʼaka kekiin na wayuu lotokana akuwaʼipa otta süpüla yapainjatüin wayuu nutuma süpüla aʼyatawaa nümüin Jehová».*
18 Nümakalaka Zacarías nümüin chi aapieekai: «¿Jamüshi süpüla tatüjaainjachin saaʼu shiimainrejeʼeya tia pümakat? Wayuu laülaaichi taya, akaʼaya neʼe tü taʼwayuusekat laülaairü shia». 19 Nusoutakalaka chi aapieekai nümüin: «Tayasa chi kanüliakai Gabriel, aʼyataashi taya waneepia nümülatuʼu Maleiwa. Aluwataaushi taya süpüla aashajawaa pümaa jee süpüla taküjainjatüin pümüin tia pütchi anakat maʼin.* 20 Saaʼujee manoujain pia sünain tanüiki manüijeechi pia waneʼereeya shikeraajapa tü tamakat pümüin, süka shikeraajeerüinya soʼu tü kaʼi eʼitaanakat süpüla». 21 Naʼatapajünaka maʼin Zacarías natuma na wayuukana jee asukaashii maʼin naya nüpüla süka koulain nia suluʼu tü aʼwaajüleekat. 22 Isakalaka nüchiki aashajawaa nujuʼitapa suluʼujee tü aʼwaajüleekat, nayaawataka saaʼu na wayuukana eein tü kasa niʼrakat. Manüisai neʼe nia jee niiʼiyataʼalüin neʼe wanee kasa süka najapü. 23 Nuʼunakalaka Zacarías nipialuʼumüin kettaapa tü sükaliakat niʼyataain.
24 Shiasaʼa maʼaka jeʼra kaʼi süchikijee tia, ipuotkalaka Elisabet, tü nuʼwayuusekat Zacarías. Jaʼrai kashi mojuʼitüin shia shipialuʼujee. Anuu sünüiki: 25 «Müsüleʼeya takuwaʼipa müinmaʼa yaa süka nümüliajüin taya Jehová.* Sotusü taya naaʼin süpüla talatüin süchikumüin tü japülii teʼrakat».
26 Aipiruapa kashi süleʼe Elisabet, nuluwataaka Maleiwa chi aapiee kanüliakai Gabriel suluʼumüin wanee pueulo chasü Galilea, kanüliasü Nazaret, 27 sümaʼanamüin wanee majayüt kanüliasü María. Achuntuushirü tia majayütkat süpüla nuʼwayuuseinjatüin shia wanee nülüin David kanüliashi José. 28 Nüntapa chi aapieekai, nümakalaka sümüin María: «Talatüshi maʼin Jehová* pümaa, eeshi nia pümaa». 29 Sainkuukalaka aaʼin María saapaiwaʼaya tü nümakat jee sütüjawee aaʼu jamaluʼuluin nünüiki sümüin nüsakaiwaʼaya shia. 30 Anuukalaka nünüiki chi aapieekai sümüin: «Nnojo mmoluin pia María, talatüshi chi Maleiwakai pümaa. 31 Ipuoleerü pia otta jemeyuleerü pia nümaa wanee joʼuu piʼitaajeechikai anüliain Jesús. 32 Kojuteechi nia atumawaa jee eʼraajüneechi nia saaʼu niain Nüchon chi Miyoʼushikai. Aluwataajeechi nia nutuma Jehová* maʼaka nuluwataapuʼuin David, chi nutuushikai.* 33 Aluwataajeechi nia waneepia naaʼu na nüikeyuukana Jacob. Müichia nnojolin ooʼulaain suulia aluwatawaa».
34 Anuujeseʼe sünüiki María nümüin chi aapieekai: «¿Jamakuwaʼipat süpüla kachoinjatüin taya nnojorüle nünainpünaain taya wanee toolo?». 35 Nümakalaka chi aapieekai sümüin: «Anteerü nüpülain Maleiwa paaʼu jee saaʼinmajeerü pia nüpülain chi Miyoʼushikai, makalaka niʼraajüneechin chi joʼuukai sünain maainjalain jee Nüchooin nia Maleiwa. 36 Eekajasaʼa Elisabet, tü wayuu kasaitkat pünain, ipuotsü eerejeʼe laülaairüin shia, aipiruairü kashi süleʼe, ‹marat› münapuʼusü. 37 Nnojotsü kasain isain nüchiki Maleiwa». 38 Anuujeseʼe sünüiki María: «Anuujaʼa joo taya, nüchepchia taya Jehová.* Anasüjaʼamata sülatüle tamüin tü püküjakalü achiki». Nuʼunakalaka chi aapieekai sümaʼanajee.
39 Süchikijee tia, suʼunamaataka María uuchoʼumüin, suluʼumüin wanee pueulo chasü Judá. 40 Süntaka nipialuʼumüin Zacarías jee süsakaka Elisabet. 41 Mayaasü saapüin Elisabet sünüiki María nukutulaaka chi süchonkai süleʼeruʼu. Süntaka tü nüpülainkat Maleiwa saaʼu Elisabet 42 jee sümakalaka sümaa emetuluin sünüiki: «Anasü maʼin pukuwaʼipa nutuma Maleiwa suulia jieyuu maʼleekalia jee anasü nutuma nukuwaʼipa chi joʼuu yalakai püleʼeruʼu. 43 Anakuwaʼipattaʼaleejaʼa maʼin taya makaʼa sünaʼlaain tamüin nii chi Taseñotsekai. 44 Taapaiwaʼaya pünüiki, akutulaashi chi tachonkai taleʼeruʼu süka talatüin naaʼin. 45 Anakuwaʼipattaʼaleejaʼa maʼin pia süka punoujain. Ekeraajeeria süpüshuaʼa tü nüküjirakat Jehová* pümüin».
46 Anuujeseʼe sünüiki María: «Taʼwaajüin Jehová* süka Miyoʼuin maʼin nia 47 otta talatashaatasü maʼin taaʼin nutuma Maleiwa, chi Oʼtteʼerakai taya. 48 Niʼrüin sümüliala tü nüchepchiakat. ‹¡Anakuwaʼipattaʼaleejaʼa!›, meerü wayuu maʼleekalia tamüin waneepia. 49 Anashaatasü maʼin tü kasa naaʼinrakat tapüleerua chi Maleiwa Pülashikai maʼin otta kojutushi nia. 50 Amülialaashi nia waneepia naalin na wayuu kojutukana amüin* nia. 51 Wainma kasa pülasü naaʼinraka süka nüpülain jee nuʼwalakajeʼerüin na wayuu yaletakana aaʼin. 52 Nüsünneʼerüin na wayuu kojutukana atumawaa saaʼujee tü neinase naluwataakalü aaʼu, nayapejeʼe kojutuin nutuma na wayuu nnojoliikana yaletüin aaʼin. 53 Aapüshi nia kasa anasü namüin na wayuu outakana jamü, nüjünajaapejeʼe na washinnuukana sümaa majapüitpain naya nutuma. 54 Antüshi nia sünain akaalinjaa Israel, chi nüchepchiakai. Sotusü naaʼin sümülialaain naaʼin 55 naalin Abrahán otta naalin na nüikeyuukana süpüla kaʼi süpüshuaʼa, maʼaka nüküjain shia paala namüin na watuushinuukana». 56 Chajatka María apünüin kashi sümaʼana Elisabet jee süchikijee tia süleʼejaka shipialuʼumüin.
57 Keraakalaka sükalia Elisabet süpüla jemeyulaa, toolochon süchon. 58 Talatakalaka naaʼin na wayuu kepiakana süʼütpünaa namaʼaleeya na süpüshikana naapapa süchiki nümülialaain Jehová* saalin. 59 Mekiisatpa kaʼi chi joʼuukai, nümaanaka süpüla suchotoonuin süta nükorolo* jee niisholiainjachiaa nia chi nüshikai, Zacaríainjatiaa nünülia atumawaa. 60 «¡Nnojottaa! Juainjatsaʼa nünülia», sümakalaka tü niikat. 61 Anuujeseʼe nanüiki na wayuukana sümüin: «Nnojotsü püpüshi eekai müin anülia mayaa». 62 Nayasaʼa na wayuukana nasakitka Zacarías süka najapü kasaichinjatüin nünülia chi joʼuukai. 63 Nüsaajitkalaka wanee taapüla jee nüshajakalaka sünain wanee pütchi müsü mayaa: «Juainjatü nünülia». Ponokoloko naaʼin napüshuaʼa na wayuukana tia. 64 Kanüimaatakalaka nia jee nuuntakalaka aashajawaa, nuʼwaajakalaka Maleiwa. 65 Ponokoloko naaʼin tia na wayuu chajanakana kepiain nüʼütpünaa Zacarías sümaa Elisabet jee na wayuu kepiakana saaʼupünaa tü uuchi chakat Judea, yootoyoo müshii naya süchiki tia. 66 Nayasaʼa na wayuu aapakana süchiki tia, jülüjasü naaʼin jee majiraashii naya: «¿Kaseechikajasaʼa wayu jintüikai chii?». Nayaawata aaʼu na wayuukana naaʼinmajünüin chi jintüikai nutuma Jehová.*
67 Süshakatakalaka nüpülain Maleiwa naaʼu Zacarías jee nüküjakalaka wanee pütchi nümaʼanajeejatü Maleiwa, müsü mayaa: 68 «Aʼwaajünüinjachi Jehová,* chi Sümaleiwasekai Israel süka nümülialaain naalin na nüpüshikana otta nuʼtteʼerüin naya. 69 Nuluwataain wamüin wanee wayuu katchinshi oʼtteʼereenaka waya, napüshi nia na nüikeyuukana David, chi aʼyataapuʼukai nümüin Maleiwa. 70 Shiaʼaya aküjünaka achiki tia natuma na nünüikimaajanakana Maleiwa namaiwajanakana. 71 Nuluwataain nia süpüla nuʼtteʼerüin waya suulia waʼünüü jee noulia na wayuu aʼürülaakana wanain, 72 süpüla nümülialaain waalin naaʼujee na watuushinuukana jee süpüla sotuin naaʼin Maleiwa tü pütchi nüpansaajakat,* 73 tü nüküjatüjütkalia nümüin chi watuushikai Abrahán 74 süchiki eeinnapain süpüla waʼyataain nümüin Maleiwa sümaa nnojoluin mmoluwaain waaʼin, jama nuʼtteʼerüinnapain waya noulia na waʼünüükana. 75 Aʼyataainjana waya waneepia nümüin otta wuleinjatü wakuwaʼipa süpüla kaʼikat süpüshuaʼa. 76 Otta müshia piakai tachee, eʼnnaajüneechi pia suluʼu piain nünüikimaajachin chi Maleiwa Miyoʼushikai süka puʼuneechin nüpüleerua Jehová* süpüla yapain putuma tü nüpünakat 77 jee süpüla pikirajüinjanain na nüpüshikana süchiki noʼttaweenain saaʼujee motuin naaʼin Maleiwa naainjala, 78 jama nümüliajülin chi Wamaleiwasekai otta saaʼujee nümüliajülin, meerü süntakai waaʼu wanee luusa jorottusü chejee sirumatuʼujee. 79 Chuwatuuijeerü tia luusakat naaʼu na wayuu kojokana aaʼu piʼyuushi otta na sajapuluʼujakana tü outaakat. Sükajee tia luusakat, watüjaajeerü aaʼu tü waaʼinrajatkat süpüla jimatüin waaʼin».
80 Miyoʼukalaka chi jintüikai jee laülaa aaʼinchi nia. Chajachi nia kepiain isashiipaʼa waneʼereeya niiʼiyalaapa namüin na wayuu chajanakana Israel.