Jonás
3 Naashajaaka Jehová nüchikuaʼa nümaa Jonás, nümakalaka nümüin: 2 «Puʼuna chaa Nínivemüin suluʼumüin tü pueulo miyoʼukat, piʼikajaa maa tanüiki namüin na wayuu kepiakana chayaa».
3 Noonooka Jonás sümaa nünüiki Jehová, nuʼunakalaka chaa Nínivemüin. Miyoʼu maʼin tü pueulokot Nínive, apünüin kaʼi oʼunushi. 4 Nüntaka Jonás suluʼumüin tü pueulokot, wanee kaʼi nia sünain waraittaa. Anuu tü nüküjawaikat: «Choʼujaʼalaa neʼe pienchi shikii kaʼi süpüla sajaʼttinnüin Nínive».
5 Nanoujakalaka sünain nünüiki Maleiwa na chajanakana Nínive. Aamajüshii naya jee naʼatüin nanain tü kuluulu shiyaawasekat mojuu aaʼin. Naaʼinrüin shia na miyoʼuyuukana jee müshiʼiya na tepichikana. 6 Naapapa chi aluwataashikai saaʼu Nínive nünüiki Maleiwa, atamaashi nia saaʼujee niinase eejachire nuluwataain, naakatakalaka tü nüsheʼinkat sünain aluwatawaa jee naʼatakalaka nünain tü kuluulu shiyaawasekat mojuu aaʼin sümaa nüikalaain saʼaka paliʼi. 7 Nuluwataaka süküjünüinjatüin pütchikat tüü namüin na kepiakana Nínive:
«Naashin chi aluwataashikai saaʼu Nínive namaa na niʼipajanakana, aamajüinjatü wayuu sümaa sümüʼlüin, nnojotsü kasainjatüin shiküin. Nnojoishii asüinjanain naya wüin. 8 Jaʼatüinjatü jünain tü kuluulu shiyaawasekat mojuu aaʼin jee jaʼatüinjatü sünain jümüʼlüin. Juchunta maʼin nümüin Maleiwa, juuʼulaa suulia kaainjalaa jee juuʼulaa suulia atkawaa. 9 Eeshijaʼa nümülialaajeechire waalin chi shiimainshikai suluʼu Maleiwain jee sülateerüle nuulia tü jashieekat, nnojoleenaka outuin waya».
10 Sümülialaaka naaʼin chi shiimainshikai suluʼu Maleiwain naalin na wayuu chajanakana Nínive, niʼrapa nooʼulaain suulia naainjala. Nnojotkalaka naaʼinrüin tü nümakat paala.