Tü nüshajalakat Mateo
28 Shiasaʼa jaʼyuupa kaʼikat, sülatapa sükalia eemerawaa, shiinaluʼujee semaanakat, suʼunakalaka María Magdalena sümaa María sünain anaʼlawaa nümüin müliashii chaa eere niʼitaanüin.
2 Sukutkujaakalaka tü mmakat süka nüshakatüin iipünaajee chi aapiee nümaʼanajeejachikai Jehová.* Nürütkaaka sünainmüin tü woowirakat jee nüsünneʼeraka tü ipa soʼulujunasükat paala sümaa nüikalaain saaʼu. 3 Chuwataʼatshi neʼe chi aapieekai maʼaka chuwatüin tü shiyaakat juya jee kasuusü maʼin tü nüsheʼinkat. 4 Patatüsü naaʼin na waariakana süka nainkuuin aaʼin. Kutkuttaʼatshii neʼe jee süchikijee tia, maaʼatshii aka saaʼin wayuu outusü.
5 Nümakalaka chi aapieekai namüin na jieyuukana: «Nnojo mmoluin jia, tatüjaa aaʼuchi niain jüchajaain achiki Jesús, chi akachennakai sünain wunuʼu süpüla outajachin nia. 6 Nnojolitchipasaʼa nia yaain, asoʼireʼennüitpa naaʼin maʼaka nüküjain paala. Jalainna jiʼraiwa eejachire niʼitaanüin. 7 Anakajaʼa juʼunamaatüle namaʼanamüin na nikirajüinkana jümaiwa namüin: ‹Asoʼireʼennüitpa naaʼin süchikijee outaa. Oʼunushi nia müinmaʼa yaa jüpüleerua Galileamüin, jiʼreechi nia chamüin›, shia taküjainjatka tia jümüin».
8 Patatüsü naaʼin na jieyuukana, talatapejeʼe naaʼin. Noʼunamaataka eejee tü woowirakat süpüla naküjainjatüin shia namüin na nikirajüinkana Jesús. 9 Nüntiraakalaka Jesús namaa wopuluʼu jee nümaka namüin: «¿Jamayaa jia?». Narütkaakalaka na jieyuukana nünainmüin jee nasapainkaka naya sümaa nakoʼojooin sünain nüsaʼa. 10 Nümakalaka Jesús namüin: «Nnojo mmoluin jia, juʼuna jümaala jaapirai na tawalayuukana süpüla noʼunajanain chaa Galileamüin eere neʼreechin taya».
11 Jee wopuluʼuiwaʼaya na jieyuukana eeshii waneinnua waaria oʼunakana suluʼumüin tü pueulokot jee naküjakalaka namüin nekiipüʼü na sacerdotekana süchiki tü kasa alatakat. 12 Noutkajaaka nekiipüʼü na sacerdotekana namaa na laülaashiikana süpüla natüjaainjatüin saaʼu tü naaʼinrajatkat jee süchikijee tia, naapaka kojuyasü nneerü pülaata namüin na surulaatkana. 13 Namakalaka namüin: «Anuu tü jünüikinjatkat: ‹Antüshii na nikirajüinkana Jesús saʼwai sünain asaajawaa müliashii. Nalüʼüjakalaka nia wooʼopünaa, jama watunkajüin›. 14 Jee naapülejeʼe chi aluwataashikai süchiki tia, wayeena aashajaaka nümaa. Nnojo shapaain jaaʼin saaʼu tia». 15 Naapaakalaka na surulaatkana tü nneerü pülaata aapünakat namüin jee naaʼinrakalaka tü münakat namüin. Suʼwalakajaaka süchiki tia naʼaka na judíokana. Ayatayülüjaʼa aküjünüin tia maaʼulu yaa.
16 Nayasaʼa na polookana waneemüin nikirajüin Jesús, oʼunushii Galileamüin sünain antirawaa nümaa Jesús saaʼumüin tü uuchi nüküjakalü achiki paala namüin. 17 Nasapainkaka naya nümülatuʼu neʼraiwaʼaya nia, eepejeʼe na wainmajakana aaʼin. 18 Nürütkaakalaka Jesús sümaa nümüin namüin: «Laülaashi taya atumawaa chaa sirumatuʼu jee yaa saaʼu tü mmakat. 19 Anashii juʼunule sünain ekirajaa wayuu maʼleekalia sainküin tü mmakat. Woutiiseena naya jutuma saaʼu nünülia chi Tashikai, saaʼu tanülia tayakai chi Nüchonkai otta saaʼu nüpülain Maleiwa. 20 Jikirajeena naya süpüla noonooinjanain sümaa süpüshuaʼa tü taluwataakalü anain. Soto jaaʼin eejeechin taya waneepia jümaa sülüʼülaleepaʼa sükalia süpüla sajaʼttajatüin tü kasa alatakat sainküin mma».*