Palajatka karaloʼuta namüinjatka na chajanakana Tesalónica

5 Tawalayuwaa, nnojotsü choʼujaain washajüinjanain jümüin süchiki tü kaʼi sülatüinjatkalü oʼu wanee kasa, 2 süka jütüjaain saaʼu sünteerüin tü nükaliakat Jehová* maʼaka naaʼin wanee kaʼruwarai antakai saʼwai sünain aʼluwajaa. 3 «Jimatüitpa waaʼin jee anainnapa waya» namapa na wayuukana, antalaa meerü nooʼomüin tü kaʼi najaʼttinnüinjanakana oʼu, meerü nakuwaʼipa maʼaka sukuwaʼipa wanee wayuu ipuolu antalaa makat saalin joʼuu sümüin, nnojoleena naya isajüin. 4 Eekajasaʼa jiakana tawalayuu, nnojotsü kojoin piʼyuushi jaaʼu süpüla süntalaa sümüinjatüin tia kaʼikat jaaʼu maʼaka jaʼyuʼuleein naaʼu wanee kaʼruwarai. 5 Müshii jia maʼaka saaʼin süchon tü luusakat jee süchon kaʼi. Nnojotsü shiain laülaain waaʼu tü aikat jee tü piʼyuushikat.

6 Anakajaʼa nnojoliire watunkuin maʼaka naaʼinrüin shia na waneinnua, ayataʼaya katüin woʼu jee laülaa waaʼin. 7 Na eekai natunkuin atunkushii saʼwai jee na eekai epeʼrüin, epeʼtshii saʼwai. 8 Saaʼu shiain laülaain waaʼu tü kaʼikat, anakajaʼa laülaale waaʼin maʼaka naaʼin wanee surulaat aʼatakai naaʼintoʼupünaa tü kachueera aaʼinmajakat nia, müinjatiaʼaya neʼe sukuwaʼipa watuma, kanoulainjana waya, müinjatü waʼatakai saaʼin tia jee alinjatü wayuu wapüla jee maʼaka wanee surulaat aʼatakai nünain wanee casco süpüla saaʼinmajüin nikii, müinjatia neʼe sukuwaʼipa watuma, jülüjainjatü waaʼin woʼtteʼennajanain. 9 Nnojoishii nüneeküin waya Maleiwa süpüla weʼrüinjanain wamüliala nutuma, nüneeküin waya süpüla woʼtteʼennajanain nükajee chi Waseñotsekai Jesucristo. 10 Outushi nia saaʼu waainjala, kateetkalaka woʼu wanaa nümaa suluʼujee tia, jaʼitashii outuin waya jee katülejeʼeya woʼu. 11 Anakajaʼa ayatüleʼeya jia sünain jümüliajiraain jee jükatchinjiraain jaaʼin maʼaka jaaʼinrüinña shia müinmaʼa yaa.

12 Tawalayuwaa, wachuntuin jümüin kojutuinjanain jümüin na aʼyataakana maʼin jüpüleerua, na oʼunirakana jukuwaʼipa sünain tü jiʼyataainkat nümüin chi Señotkai jee na achiaakana jia. 13 Jaʼyainjatü saaʼu jukuwaʼipa kojutuin maʼin jümüin na aʼyataakana jüpüleerua jee alinjana naya jüpüla. Anakajaʼa anajiraale jia namaa na waneinnua. 14 Tawalayuu, anuu wanee kasa wachunteeka jümüin, jüchiaa na maʼlaüleʼerüinkana naaʼin, jümüliala naaʼin na mojukana aaʼin, jükaalinja na matchinkana aaʼin jee nnojo jaashichijaain sümüin wayuu. 15 Eeja jaaʼin suulia eein wanee wayuu eekai pasalaaweein jaʼaka. Shia jaaʼinmaa maʼin jaaʼinrüin kasa anasü namüin na wayuu anoujiraakana jümaa jee sümüin wayuu süpüshuaʼa.

16 Talata jaaʼin waneepia. 17 Juʼuraaja maʼin waneepia. 18 Jaapa analuʼut saaʼu kasa süpüshuaʼa, shia nüchekaka tia Maleiwa jüpüleerua nükajee Cristo Jesús. 19 Nnojo jütaʼülüin sukuwaʼipa tü nüpülainkat Maleiwa süpüla eeinjatüin shia jaaʼu. 20 Nnojo mojutuin jümüin tü kasa alatajatkat naashin Maleiwa. 21 Jikirajaa sünain kasa süpüshuaʼa süpüla jütüjaain saaʼu shiimainrejeʼeya shia jee jüchecheraa süchiirua wanee kasa eekai anain. 22 Jiyouta süchiki süpüshuaʼa kasa eekai mojuin.

23 Kasataalejeseʼe jükatannüin süpüla aʼyatawaa nümüin chi Maleiwa aapakai jimataa aaʼin. Wuleinjatü tü jukuwaʼipakat,* wuleinjatü jaaʼin jee wuleinjatü jiʼiruku. Anainjatü jukuwaʼipa sünain kasa süpüshuaʼa yaapa chi Waseñotsekai Jesucristo. 24 Waneepiashi jümaa chi aneekakai jia jee meeriaʼaya sukuwaʼipa tia nutuma.

25 Tawalayuwaa, ayataʼaya juʼuraajüin wapüleerua.

26 Kamaneejiraa jia jüsakapa napüshuaʼa na juwalayuukana.

27 Saaʼu nuluwanaajalain taya chi Señotkai, tachuntuin jümüin saashajeʼennajatüin karaloʼutakat tüü namüin napüshuaʼa na wawalayuukana.

28 Kasataalejeseʼe kamaneein maʼin jümüin chi Waseñotsekai Jesucristo.