Tü nüshajalakat Mateo
17 Aipirua kaʼi süchikijee tia, oʼunushi Jesús saaʼumüin wanee uuchi miyoʼu eere yüütüülin mmapaʼakat otta nia nümaaka Pedro, Santiago otta müshia Juan, chi nuwalakai Santiago. 2 Shiiʼiranajaaka nukuwaʼipa Jesús noʼupala. Warattüsü maʼin nuʼupünaa maʼaka warattüin chi kaʼikai otta jorottusü maʼin tü nüsheʼinkat maʼaka jorottuin tü luusakat. 3 Niiʼiyalaaka Moisés nümaa Elías noʼupala jee naashajaakalaka nümaa Jesús. 4 Nümakalaka Pedro nümüin Jesús: «Señotkalee, anataʼaleeshiijaʼa maʼin waya süka yaain waya. Anashiirejeʼe saaʼin pümüin, eesüjaʼa süpüla takumajüin apünüinsü miichi jipiayaainjatü. Wanee püpüla, wanee nüpüla Moisés otta wanee nüpüla Elías». 5 Yalaiwaʼaya naashajaain Pedro sukumajaaka wanee siruma jorottoshaatasü maʼin. Saapünakalaka wanee pütchi saʼakajee tü sirumakat sünain maa: «Anii chi Tachon aishikai tapüla, talatüshi taya nümaa. Jaapaa sümaa tü nümakat jümüin». 6 Naapaiwaʼaya tia na nikirajüinkana Jesús, naʼwachiraayaa namaka mmoluʼumüin süka mmoluin maʼin naya. 7 Nürütkaakalaka Jesús nanainmüin sümaa niʼitaain najapü nanain, nümakalaka namüin: «Jütamaa, nnojo mmoluin jia». 8 Shiasaʼa nayalerapa nekii, nnojotsü wayuu neʼrüin, niaʼala neʼe Jesús eejachika nümüiwaʼa. 9 Nashakatapa saaʼujee tü uuchikat, nümakalaka Jesús namüin: «Jüküjaʼalayaai sümüin wayuu süchiki tü kasa jiʼrakat, jüküjaleejeeria shia nüsoʼireʼennapa aaʼin süchikijee outaa chi Süchonkai Wayuu».
10 Namakalaka na nikirajüinkana nümüin: «¿Jamakaʼa niainjachika antüin Elías palajana naashin na karaloʼutamaajanakana?». 11 Nusoutakalaka Jesús namüin: «Antajachiaʼaya palajana Elías otta pansaainjatü nutuma sukuwaʼipa wanee kasa. 12 Tamüshii paala jia, antüshiaʼaya Elías nnojoipejeʼe nia nayaawatüin, naaʼinrüin neʼe tü naaʼinreekat nüka. Akaweeria neʼe nukuwaʼipa chi Süchonkai Wayuu, mülieechi maʼin nia natuma». 13 Nayaawatüinjeseʼe na nikirajüinkana Jesús niain naashajaain achiki Juan chi Awoutisaajüikai.
14 Shiasaʼa nantapa saʼakamüin tü wattakat saalii wayuu, nürütkaakalaka wanee wayuu nünainmüin Jesús. Nüsapainkakalaka nia nümülatuʼu jee nümaka nümüin: 15 «Señotkalee, pümüliajaʼaya maʼin tachon, ayuuishi maʼin nia süka nuʼuchichajaʼawalin, eeshi nujuttule soʼu siki jee shiroku wüin. 16 Tantirüin nia namüin na pikirajüinkana shiiʼiree naawaleʼerüin nia, isapejeʼe nia nachiki». 17 Nümakalaka Jesús: «Mojulaajakatche maʼin wayuu maaʼulu jee manoulajasat, ¿yaakuʼu müinjaiche taya namaa naaʼinruʼu? Kakaliairü müin nakuwaʼipa, jürütkeʼera tamüin chi jintüikai». 18 Nuuʼuleʼerakalaka Jesús tü yolujaakat suulia müliain chi jintüikai sutuma, sujuʼitaka nüleʼeruʼujee, anatüjüitka nia soʼujeʼereeya tia. 19 Narütkaakalaka ojuunaa nünainmüin Jesús na nikirajüinkana jee namaka nümüin: «¿Jamüsü nnojotka wountuin wayuʼluin tü yolujaakat nüleʼeruʼujee chi jintüikai?». 20 Nusoutakalaka Jesús namüin: «Shia süka nnojoliin junoujain maʼin. Müle tü junoulakat maʼaka saaʼin wanee süʼü ‹mostaza›, eeshiijaʼa süpüla jümüin sümüin uuchikat tüü, ‹puʼuna yalamüin yala›, suʼuneetkalaka tü uuchikat, nnojoleerü kasain isain jüchiki». 21 *
22 Wanaa sümaa chajachin Jesús chaa Galilea namaa na nikirajüinkana, müshi nia namüin: «Eekajasaʼa chi Süchonkai Wayuu aapüneechi ekii sümüin wayuu 23 jee nuʼutuneechika aaʼin, asoʼiraajeetpejeʼe naaʼin apünüin kaʼi süchikijee tia». Mojukalaka naaʼin na nikirajüinkana naapapa tia.
24 Jee nantapa Capernaúmmüin, narütkaaka nünainmüin Pedro waneinnua wayuu achekajülii tü nneerü* süpülajatkat tü aʼwaajüleekat Maleiwa. «¿Eesia naapüin chi ekirajüshikai pia tü nneerü süpülajatkat tü aʼwaajüleekat Maleiwa?», namakalaka nümüin. 25 «Aa, nuwalaajüinña», nümakalaka Pedro namüin. Shiasaʼa nikerotoiwaʼaya Pedro suluʼumüin tü miichikat, nümaka Jesús nümüin: «¿Jamüsüche saaʼin pümüin Simón? ¿Jaraliiche na wayuu awalaajakana nneerü namüin na sülaülakana mma? ¿Nayache awalaajaka na nachonniikana, nayataapa awalaajüin na wayuu nnojoliikana napüshin?». 26 «Nayajaʼa awalaajüinjanaka na wayuu nnojoliikana napüshin», nümaka Pedro nümüin. Anuujeseʼe nünüiki Jesús: «Nnojoishiijaʼamata nayainjanain awalaajüin nneerü nachonnii na aluwataashiikana. 27 Eekajasaʼa jooluʼu suulia naashichijaain nala wayuukana, puʼuna shirokumüin palaakat, pujuteetka tü kulirakat. Shiasaʼa peerulapa saanükü tü palajatkat jime püsirü, piyuʼleerü wanee nneerü aainjuushi süka pülaata. Paapeetka shia waaʼu namüin na wayuu achekajüshiikana».