Palajatka karaloʼuta namüinjatka na chajanakana Tesalónica
2 Tawalayuwaa, jütüjaa aaʼulu nnojoluin amülain neʼe wakua wanaa sümaa chejeein waya jümaʼanajee. 2 Jütüjaa aaʼulu wainmain tü kasa mojusü alatakat wamüin jee müliain maʼin waya atumawaa wanaa sümaa chajanain waya Filipos, nükatchinrapejeʼe waaʼin chi Maleiwakai süpüla waküjainjanain jümüin tü pütchi anakat maʼin nüchiki mayaapejeʼe wainmain tü kasa alatakat wamüin. 3 Nnojotsü mojuluʼuluin tü kasa waküjakat jümüin jee nnojotsü waküjain shia jümüin süpüla wamaʼülapalain jia jee wemeejüin jia. 4 Nüneeküin waya Maleiwa jee niʼitaain wajapuluʼu waküjainjanain tü pütchi anakat maʼin, nnojotsü waainjain tia süpüla talatüinjatüin neʼe saaʼin wayuu watuma, waainjain shia süpüla talatüinjatüin naaʼin Maleiwa, jama niʼrüin tü kasa suluʼukat waaʼin.
5 Jütüjaa aaʼulu nnojoliin wemeejüin jia sümaa anayaain wanüiki jümüin jee nnojotsü anayaain wakuwaʼipa shiiʼiree saapünajatüin wamüin wanee kasa. ¡Nütüjaa aaʼulu Maleiwa tia! 6 Nnojotsü wachajaain süchiki kojutuinjanain waya sutuma wayuu, kojutuinjanain waya jutuma jee sutuma wayuu eeka eein, eepejeʼe süpüla wachuntuin jümüin tü kasa choʼujaakat wamüin, jama waluwataaushin nutuma Cristo. 7 Nnojotpejeʼe waaʼinrüin tia, kamaneeshii waya jümüin maʼaka wanee wayuu atujeʼerakai süchon sümaa saaʼinmajachoin nia. 8 Sutuma alin maʼin jia wapüla wacheka achikit waküjain jümüin tü pütchi anakat maʼin nüchiki Maleiwa, jaʼitakajeʼe neʼe choʼujaale waapajiraainjanain wekii jaaʼu, waainjeeriaʼaya shia süpüla wakaalinjain jia.
9 Tawalayuwaa, eesüjaʼa sotule jaaʼin waʼyataain maʼin jüpüleerua jee wainmain tü kasa waainjakat. Soʼu waküjain jümüin tü pütchi anakat maʼin nüchiki Maleiwa, aʼyataashii maʼin waya saʼwai jee soʼukai suulia wachuunajüin jümüin wanee kasa choʼujaaka wamüin. 10 Soʼu chajanainkain waya jümaa, waaʼinmaasü tü kasa waaʼinrakat, lotusü wakuwaʼipa jee wulesü wakuwaʼipa. Jütüjaa aaʼulu tia jee nütüjaa aaʼulu shia Maleiwa. 11 Jütüjaa aaʼulu müin wakuwaʼipa jümüin maʼaka nukuwaʼipa wanee wayuu namüin nüchonnii, wachiaapuʼuin jia, wamülialapuʼuin jaaʼin jee waküjapuʼuin pütchi jümüin waneʼewai jukua 12 süpüla ayatüinjatüin anain jukuwaʼipa noʼuluʼu Maleiwa, jama nüneeküin jia süpüla jiʼrüinjanain tü kasa anasü eejeetkat nuluwataapeena otta süpüla kojutuinjanain jia nutuma.
13 Müsüjeseʼe waapüin analuʼut waneepia nümüin Maleiwa, jama jaapaain sümaa tü nünüikikat, tü waküjakat jümüin. Nnojotsü jaapaain amaa shia süka sünüikin shia wayuu, jaapaa amaalü shia süka nünüikin shia Maleiwa, tü anuu jooluʼu akaalinjain jia anoujashiikana. 14 Tawalayuwaa, jüshatüin nakuwaʼipa na anoujashii chakana Judea, na paaʼinwakana nümaa Cristo Jesús. Eʼrüshii jia müliaa natuma na wayuu juumainpaʼajeʼewaliikana maʼaka neʼrüin müliaa na anoujashii judíokana natuma na wayuu noumainpaʼajeʼewaliikana. 15 Noʼuta aaʼinchi chi Señotkai Jesús otta müshiʼiya na nünüikimaajanakana Maleiwa. Jee müshiʼiya wayakana eʼrüshii waya müliaa natuma, nnojotsü anain nakuwaʼipa noʼuluʼu Maleiwa otta nnojotsü anain sukuwaʼipa wayuu sutuma tü kasa naaʼinrakat 16 süka nooʼuleʼereein waya suulia waküjain pütchi namüin na wayuu nnojoliikana judíoin süpüla nnojoliinjanain noʼtteʼennüin. Wainma tü kasa mojusü naainjakat, jashichipejeʼe Maleiwa namüin maaʼulu yaa.
17 Tawalayuwaa, soʼu nnojoliipünaain weʼrüin jia, wachajaain maʼin sukuwaʼipa süpüla weʼrüinjanain jia, jama shiain suchuntaain maʼin waaʼin tia. Mayaapejeʼe nnojoliin chajanain waya jümaa sotushii jia waaʼin waneepia. 18 Müshiijeseʼe woʼuneein sünain anaʼlawaa jümüin. Jamüshijaʼa tayakai Pablo, nnojotsü uwatuain tooʼulaküin oʼunaa jümaʼanamüin, piantua maʼin shia. Nütaʼülapejeʼe wakuwaʼipa Satanás suulia waaʼinrüinjatüin tia. 19 ¿Jaralii na waʼwaataakana aluʼu? ¿Aashin jiain jiakana? Talateerü waaʼin jutuma nuʼupala chi Señotkai Jesús yaapa nia, jama müin jia maʼaka saaʼin wanee kotse wamüin. 20 Jiaʼaya waʼwaataaka aluʼu jee talataka atuma waaʼin.