Kojutusü nümüin Josías tü Pütchi nüshajirakat Jehová

Aluwataashi Josías saaʼu Judá wanaa sümaa mekiisalüin nuuyase. Soʼu tia, sünainpünaashii maʼin na wayuukana sukuwaʼipa ouutsü otta naʼwaajüin tü maleiwayaasükalüirua. Wanaa sümaa 16 nuuyase Josías, nuʼwaajeein Jehová süka anakalü akuwaʼipa. Wanaa sümaa 20 nuuyase, najaʼttirüin süpüshuaʼa tü maleiwayaasükalüirua otta tü aʼwaajülee eejatkat sainküinpünaa tü mmakat Judá. Wanaa sümaa 26 nuuyase, nukumajirüin sukuwaʼipa süpüla sukumajünüin süchikuaʼa tü aʼwaajüleekat Jehová.

Hilquías, chi laülaashikai napüleerua na sacerdotekana nünta anainrü suluʼu tü aʼwaajüleekat Maleiwa, tü Pütchi nüshajiralakat Maleiwa. Eesüjaʼa süpüla shiain tü pütchi nüshajalakat Moisés. Niʼikajaaka Safán nümüin Josías tü ashajuushikat. Safán, nia wanee nüseküretaariose chi aluwataaikai. Nüleejaka shia Safán nümüin Josías. Naapapa Josías tü pütchikat, niyaawataka saaʼu kakaliainnain moonooin na wayuukana sümaa nünüiki Jehová. «Jashichishi maʼin Jehová wamüin. Puchunta nümüin süpüla nüküjain wamüin tü waaʼinrüinjatkat», nümaka Josías nümüin Hilquías. «Motushi taya saaʼin tü wayuukalüirua yaaka Judá. Kasalajaneerü naainjala tatuma, nnojoleerü taaʼinrüin tia soʼunnaa nuluwataain Josías, süka wayuuin anamia nia», nümaka Jehová sümüin wanee nünüikimaajatü kanüliakat Huldá.

Wanaa sümaa naapüin Josías tia pütchikat, nuutkajeʼerüin tü wayuukalüirua süpüshuaʼa eere tü aʼwaajüleekat. Nüleejaka suʼupala wayuu tü Pütchi nüshajiralakat Maleiwa. Soʼu kaʼikat tia, nüküjain Josías otta na wayuukana naaʼinrüinjatüin süka süpüshuaʼa naaʼin tü Pütchi nüshajirakat Jehová.

Kakaliainna na israelitakana nnojoluin naaʼinrüin tü miʼiraa kanüliakat Pascua. Saashin tü pütchi nüleejakat Josías, aainjünajatü tia miʼiraakat juyawai. «Eeinjatü watuma tü miʼiraa Pascuakat nüpüla Jehová», nümaka namüin na wayuukana. Nukumajirüin Josías sukuwaʼipa süpüla eeinjatüin watta saalii mürüt aʼajünajatka nümüin Maleiwa otta eeinjanain eeʼirajülii suluʼu tü aʼwaajüleekat. Naainjaka tü Pascuakat otta tü miʼiraa nekaakalü oʼu pan moolojiasat soʼu akaratshi kaʼi. Nnojotpuʼusü naaʼinrüin wanee miʼiraa makalü aka saaʼin tia akatüjüt soʼu nükalia Samuel. Kojutusü nümüin Josías tü Pütchi nüshajiralakat Maleiwa. ¿Kamalainsüche pümüin ekirajawaa nüchiki Jehová?