EKIRAJAAYA 30
Eesü süpüla süsoʼiraain naaʼin püpüshi jee paʼaleewainyuu
Weʼrüin maʼin wamüliala sutuma tü outaakat. Waʼünüü shia saashin tü Bibliakat (1 Corinto 15:26, TNM). Sünain ekirajaaya 27, pikirajaa anainrü najaʼttireerüin Jehová tü outaakat. ¿Kaseetka alatüin namüin na wayuu outuinnapakana? Sünain ekirajaayakat tüü, pikirajaweerü anain nüsoʼireʼerüinjatüin Jehová saaʼin watta saalii wayuu süpüla katüin soʼu waneepia. ¿Shiimainchejeʼe tia? ¿Asoʼiraajeetche naaʼin chaa sirumatuʼu? ¿Shiataapa yaa saaʼu tü Mmakat?
1. ¿Kasa keeʼireeka naaʼin Jehová napüleerua na püpüshi jee paʼaleewainyuu outuinnapakana?
Keeʼireesü naaʼin Jehová nüsoʼireʼerüin naaʼin na wayuu outuinnapakana. Kanoulashi maʼin Job nünain Maleiwa, nütüjaa aaʼu nnojoleechin motuin nia naaʼin mmapü outapa nia. «Puunejeechi taya otta asouteechi taya» müshi nia nümüin Maleiwa (paashajeʼera Job 14:13-15).
2. ¿Jamüsü watüjaaka saaʼu süsoʼiraajeerüin naaʼin na wayuu outuinnapakana?
Wanaa sümaa yaajachin Jesús Mmapaʼa, nüsoʼireʼerüin naaʼin na wayuukana sükajee tü nüpülainkat Maleiwa. Nüsoʼireʼerüin saaʼin wanee jintulu 12 suuyase jee müsia süchon wanee wayuu outa aʼwayuuset (Marcos 5:41, 42; Lucas 7:12-15). Outushi mapa wanee naʼaleewain Jesús, Lázaro nünülia. Mayaainjeʼe sülatüin pienchi kaʼi süchikijee niʼikünüin amuuyuupaʼa, asoʼireʼennüsü naaʼin nutuma Jesús. Süchikijee nuʼuraajüin nümüin Maleiwa, «Lázaro, pujuittaa yalajee yaa anooipaʼamüin» müshi nia sümaa emetuluin nünüiki. «Nujuittaakalaka chi ouktüshikai paala» (Juan 11:43, 44). Talatakajasaʼa maʼin naaʼin na nüpüshikana jee naʼaleewainyuu Lázaro süka katüin noʼu nüchikuaʼa.
3. ¿Asoʼiraajeetche naaʼin na püpüshi jee paʼaleewainyuu outuinnapakana?
Süküjain tü Bibliakat «susoʼiraajeerüin aaʼin tü wayuu ouktüsükalüirua» (Aluwataaushikana [Hechos] 24:15). Na wayuu nüsoʼireʼerakana aaʼin Jesús, nnojoishii chajanain naya chaa iipünaa nümaa Maleiwa (Juan 3:13). Talatüsü maʼin naaʼin na wayuu asoʼireʼennakana aaʼin nutuma Jesús süka katüin noʼu nachikuaʼa yaa saaʼu tü Mmakat. Maʼaka süsoʼireʼennüin naaʼin wayuukana naainnua, alüʼütsü sükalia süpüla süsoʼireʼennüin naaʼin watta naalii wayuu otta kateerü noʼu waneepia suluʼu wanee Mma anasü. Nüküjain Jesús süsoʼiraajeerüin naaʼin na wayuu sotokana naaʼin Maleiwa jaʼitakajeʼe na nnojoliikana sotuin saaʼin wayuu (Juan 5:28, 29).
WEKIRAJAA SOOʼOMÜIN
Wekirajaa sünain jamüin wanoujainjanaka sünain süsoʼiraajeerüin naaʼin na wayuu outakana otta jamüin sükatchinraaka waaʼin süka watüjaain saaʼu tia.
4. Asoʼireʼennüsü naaʼin waneinnua wayuu nutuma Jesús
Pikirajaa sooʼomüin süchiki tü naaʼinrakat Jesús nüpüleerua Lázaro. Jaashajeʼera Juan 11:14 otta 38-44 otta yooto jia süchiki tüü:
¿Jamüsü watüjaaka saaʼu outuin Lázaro? (Jaashajeʼera süchikuaʼa wetsiikulokot 39).
Chajachire Lázaro sirumatuʼu, ¿choʼujaasüche nümüin nüleʼejinnüin nüchikuaʼa yaa saaʼumüin tü Mmakat?
5. Wainma na wayuu asoʼiraajeenakana aaʼin
Jaashajeʼera Salmo 37:29 otta yooto jia süchiki tüü:
Süka wainmeenain maʼin na wayuu asoʼiraajeenakana aaʼin, ¿jaleenache kepiain naya?
Nnojoishii nayain neʼe nüsoʼireʼerüinjanain aaʼin Jesús na wayuu aʼwaajapuʼukana Jehová, asoʼiraajeerü naaʼin waneinnua wayuʼuya. Jaashajeʼera Aluwataaushikana 24:15 otta yooto jia süchiki tüü:
Süsoʼiraapa naaʼin na outuinnapakana, ¿jarai chi wayuu piʼreekai asoʼireʼennüin aaʼin?
Jülüjataa paaʼin tüü: mapüleesat nümüin Jesús nüsoʼireʼerüin naaʼin na wayuu outakana maʼaka mapüleein nümüin wanee wayuu nüchijirüin nüchon.
6. Akatchinraasü waaʼin sünainjee watüjaain saaʼu süsoʼiraajeerüin naaʼin na outushiikana
Tü süküjakat tü Bibliakat süchiki nüchon Jairo, sümülialüin otta sükatsüinrüin naaʼin na wayuu anaajaakana apüshi. Jaashajeʼera süchiki tia suluʼu Lucas 8:40-42 jee 49-56.
Müsü nünüiki Jesús nümüin Jairo süpülapünaa nüsoʼireʼerüin saaʼin tü nüchonkat: «Nnojo piyoʼujaain aaʼin. Pünouja neʼe tanain» (jaashajeʼera süchikuaʼa wetsiikulokot 50). Süka pütüjaain saaʼu süsoʼiraajeerüin naaʼin na outushiikana, ¿jameerü paaʼin...
... nünaajaale wanee püpüshi jee niale wanee paʼaleewain?
... piʼrüle pooʼomüin tü outaakat?
Jünaja tü VIDEOKOT otta yooto jia süchiki tüü:
¿Jamüsü naaʼin na wayuu kachooinkana Phelicity süka natüjaain saaʼu süsoʼiraainjatüin naaʼin na outushiikana?
EESHII WAYUU EEKAI NAMÜIN: «Müsü alawaayaakai saaʼin, süsoʼiraainjatüin naaʼin na outushiikana».
¿Jamüsüjaʼa pünüiki süchiki tia?
¿Jeʼtsü tü wetsiikulo paashajeʼereetkat namüin süpüla nayaawatüin saaʼu süsoʼiraajeerüin naaʼin na outushiikana?
WATÜJAAITPAKA AAʼU
Saashin tü Bibliakat, asoʼiraajeerü saaʼin watta saalii wayuu. Keeʼireesü naaʼin Jehová tia jee naapüin nümüin Jesús nüpülain süpüla nüsoʼireʼerüin saaʼin wayuu.
Pusouta shiʼipajee
¿Jamüsü watüjaaka saaʼu keeʼireein naaʼin Jehová nümaa Jesús nasoʼireʼerüin naaʼin na outushiikana?
¿Jaleetche asoʼiraain naaʼin na outushiikana? ¿Chaa sirumatuʼu?, ¿shiataapa yaa saaʼu tü Mmakat? ¿Jamüshii yaainjanaka naya?
¿Jamüsü punoujaka sünain süsoʼiraajeerüin naaʼin püpüshi jee paʼaleewainyuu?
PÜNAʼLA SOOʼOMÜIN
Paashajeʼera süchiki tü waaʼinrajatkat süpüla wachecherüin waaʼin nünaajaale wanee wapüshi.
«Amülialeetka paaʼin nünaajaale wanee püpüshi» (¡Eeja Waaʼin!, nuum. 3, 2018)
Nünaajaale nüpüshi wanee wayuu, ¿eesüche süpüla sükatsüinrüin naaʼin tü sümakat tü Bibliakat?
Pünaja süchiki tü eekat süpüla naaʼinrüin na tepichikana nünaajaale wanee napüshi
¿Eejeenache na wayuu asoʼiraajeenakana aaʼin süpüla kepiain naya chaa iipünaa? ¿Eejeenache na wayuu nnojoliijeenakana asoʼireʼennüin aaʼin?
«¿Kasa wayu tü asoʼirawaakalü aaʼin?» (Pütchi suluʼuka jw.org)